1. Rinna chu eng anga pawimawh nge a nih? (A thupui chunga milem en rawh.)

‘JEHOVA’N hrehawm nasa tak chhûngin min chhanhim duh ang em?’ tiin i inzâwt tawh ngai em? Tirhkoh Paula chuan kan dam khawchhuah theih nâna mize pawimawh tak pakhat chu rinna a nih thu a sawi a. Ani chuan: “Rinna lovin ama lâwmzâwng mi nih rual a ni lo,” tiin a sawi a ni. (Hebrai 11:6) Chu chu thil pângngai tak angin lang mah se, ‘mi zawng zawngin rinna an nei vek lo,’ a ni. (2 Thessalonika 3:1, 2) Hêng Bible châng pahnih hian kan rinna tihchak a pawimawh dân hre thiam tûrin min ṭanpui ang.

2, 3. (a) Kan rinna chu eng anga pawimawh nge a nih? (b) Eng nge kan sawiho vang?

² Tirhkoh Petera chuan rinna “fiahna” chungchâng a sawi a. (1 Petera 1:7 chhiar rawh.) Hrehawmna nasa tak a hnai tawh hle a, “nunna humhim tûra rinna nei pâwla mi” nih kan duh a ni. (Hebrai 10:39) Chuvângin, kan rinna tichak tûra theih tâwp kan chhuah a ngai a. Kan Lal, Isua Krista a lo lan huna lâwmman dawngtute zînga tel chu kan duh. Chuvângin, a rinna tihpunsak tûra Isua hnêna ngêntu angin, keini pawhin: “Rinna ka tlâkchham avâng hian min pui ang che,” tiin kan sawi thei a. (Marka 9:24) A nih loh leh, tirhkohte angin: “Kan rinna min tihpunsak rawh,” tiin kan sawi thei bawk a ni.—Luka 17:5, C.L. Re-edited.

 ³ He thuziakah hian: kan rinna kan tihchak theih dân te, kan rinna a chak tih kan lantîr theih dân te, leh rinna tihpunsak tûra kan dîl hunah Pathianin min chhâng dâwn tih kan rin theih chhante kan sawiho vang.

4. Tute entîrnain nge kan rinna tichak tûra min chêttîr thei?

⁴ Rinna a pawimawh êm avângin, Jehova chuan rinna kawnga entawn tûr tam tak Bible-ah min pe a. Chûngte chu ‘min zirtîrna tûra ziak a ni.’ (Rom 15:4) Abrahama te, Sari te, Isaaka te, Jakoba te, Mosia te, Rahabi te, Gideona te, Baraka te, leh mi dang tam takte entîrna chuan kan rinna tichak tûrin min chêttîr thei a. (Hebrai 11:32-35) Hmân laia entîrnate bâkah, tûn laia kan unaute zîngah pawh rinna lama entawn tûr ṭha tak tak kan nei a ni. * (Footnote en rawh.)

5. Engtin nge Elija’n Jehova chunga a rinna chak tak a lantîr a, eng nge kan in zawh ang?

⁵ Bible-a entîrna pakhat chu zâwlnei Elija a ni a. A entîrna i chhût ngun lai hian, Jehova a rinchhanzia a lantîrna kawng nga hi lo chhinchhiah ang che. (1) Elija’n Lal Ahaba hnênah Jehova’n khua a khentîr dâwn tih a hrilh khân: “LALPA, a bula ka awm ṭhinna Israelte Pathian nunna chhâlin ka sawi e: kum eng emaw ti chhûng chu . . . dai leh ruah rêng rêng a tla lo vang,” tiin ring ngam takin a sawi chhuak a. (1 Lalte 17:1) (2) Khua a khên chhûngin amah leh mi dangte mamawh chu Jehova’n a pe dawn tih a ring tlat a ni. (1 Lalte 17:4, 5, 13, 14) (3) Jehova’n hmeithai fapa chu a kaitho leh thei tih a ring bawk a. (1 Lalte 17:21) (4) Karmel Tlânga a inthawina chu Jehova hnêna mei chuan a kâng dâwn tih a ringhlel lo. (1 Lalte 18:24, 37) (5) Ruah a sûr hma pawhin, Elija chuan Ahaba hnênah: “Han chho ta langin, eiin han in tawh rawh: ruahpui sûr tûr thâwm a awm a nia,” tiin rinna ngei tak chungin a hrilh a. (1 Lalte 18:41) Chuvângin hêng thilthlengte kan ngaihtuah hian, ‘Elija angin ka rinna a chak em?’ tiin kan inzâwt thei a ni.

6. Kan rinna tichak tûrin Jehova hnên aṭangin eng nge kan mamawh?

⁶ Kan rinna mahnia kan tihchak theih loh avângin, Pathian hnênah a thlarau thianghlim kan dîl a ngai a ni. Engvângin nge? Rinna chu thlarau thianghlim rah pêng pakhat a nih vâng a ni a. (Galatia 5:22) Isua’n thlarau thianghlim tam lehzual dawng tûra min fuihna kan zâwm chuan kan fing tihna a ni a. Jehova chuan ‘a dîltute chu thlarau thianghlim a pe dâwn,’ tih Isua’n a tiam a ni.—Luka 11:13.

7. Kan rinna tihchak theih dân hrilhfiah rawh.

⁷ Pathian rinna chak tak kan neih tawh chuan kan nei chho reng tawh tûr a ni. Rinna chu meialh nên kan khaikhin thei a. Mei kan chhêm tawh chuan a alh chu a na hle thei a. Mahse, thing kan tuah belh reng loh chuan, a tâwpah a rêmin mei vâpah a chang dâwn a ni. Kan tuah belh reng erawh chuan a alh reng thei a. Rinna pawh chutiang bawk chu a ni. Nî tin Pathian Thu kan chhiara kan zir reng chuan Bible kan ngainatna leh Jehova kan hmangaihna chu a ṭhang chho vang a. Chutianga kan tih chuan, kan rinna kan vawngin, kan tichak ang.

8. I rinna tichak tûr leh vawng reng tûrin engin nge ṭanpui thei che?

⁸ Baptisma i chan hmaa i thil zirah i lungawi mai tûr a ni lo. (Hebrai 6:1, 2) Entîr nân, Bible hrilh lâwkna thleng famkim tawhte zirna  chuan i rinna tichak tûr leh vawng reng tûrin a ṭanpui ang che. I rinna a chak tak zet leh zet loh hriat nân Pathian Thu i hmang thei bawk a ni.—Jakoba 1:25; 2:24, 26 chhiar rawh.

9, 10. Engtin nge kan rinna chu (a) thian ṭhate, (b) kohhran inkhâwmte, (c) leh thu hrilhnain a tihchak?

⁹ Tirkoh Paula chuan Kristiante chu ‘rinnain an inthlamuan tawn thei’ tih a sawi a. (Rom 1:12) Chu chu eng tihna nge? Kan unaute nêna hun kan hmanho hian, kan rinna kan intichak tawn thei a. Chu chu an rinna ‘fiaha awm tawhte’ nêna hun kan hmanho hian a ni lehzual a ni. (Jakoba 1:2, 3) Ṭhian sualte chuan kan rinna an tichhia a, ṭhian ṭhate erawh chuan an tichak thung. (1 Korinth 15:33) Chuvâng chuan inkhâwm ziah tûra fuih kan ni a. Inkhâwmnaah chuan kan “infuih tawn” reng thei a ni. (Hebrai 10:24, 25 chhiar rawh.) Chu bâkah, inkhâwma kan dawn ṭhin kaihhruainate chuan kan rinna a tichak a. Bible chuan “rinna chu hriatna avângin a lo awm ṭhîn,” tih a sawi a. (Rom 10:17) Chuvângin, ‘Kristian inkhâwmah kan tel ziah em?’ tiin inzâwt rawh.

¹⁰ Mi dangte hnêna Bible-a chuang chanchin ṭha kan hrilhna leh zirtîrna chuan kan rinna a tichak bawk a. Kristian hmasate angin, eng dinhmunah pawh ding mah ila, Jehova rinchhan leh huai taka thusawi dân kan zir a ni.—Tirhkohte 4:17-20; 13:46.

11. Engvângin nge Kaleba leh Josua’n rinna chak tak an neih a, engtin nge anmahni ang kan nih theih ang?

¹¹ Jehova min ṭanpui dân leh kan ṭawngṭaina a chhân dân kan hmuhna chuan amah kan rinna a tichak a. Chu chu Kaleba leh Josua chungah a thleng a ni. Ram Tiam an enthlâk khân Jehova chungah rinna an lantîr a. Hunte a han liam zêl chuan, Jehova’n a ṭanpui dân an hmuh apiangin, an rinna a chak zual zêl a ni. Josua chuan inring tâwk takin Israel mite hnênah: “LALPA in Pathianin in chungchâng a ṭha lam a lo sawi tawh zawng zawngte kha thlâwn pakhat mah a awm lo,” tiin a sawi thei a. A hnuah: “Chuvângin LALPA chu ṭih ula, tih tak zet leh dik takin a rawng chu bâwl ula,” tiin a sawi a ni. Tichuan: “Kei leh ka chhûngte erawh hi zawngin LALPA rawng a nia kan bâwl dâwn ni,” tiin a sawi belh.  (Josua 23:14; 24:14, 15) Jehova kan rinchhan a, a mi mal taka min ṭanpui dân kan hmuh hian, kan rinna a chak lehzual ang.—Sâm 34:8.

12. Rinna chak tak kan nei tih engtin nge kan lantîr?

¹² Rinna chak tak kan nei tih engtin nge kan lantîr? Zirtîr Jakoba chuan: “Ka thiltihin ka rinna ka entîr ang che,” tiin a sawi. (Jakoba 2:18) Kan thiltih chuan rinna chak tak kan nei tih a târ lang a ni. Chutiang a nih dân chu i lo en ang u.

13. Engtin nge thu hrilhna hmanga kan rinna kan lantîr?

¹³ Thu hrilhna chu rinna kan lantîr theih dân kawng ṭha tak a ni. Engvângin nge? Thu kan hrilh hian tâwpna a hnai tih leh ‘a tlai dâwn lo’ tih kan rinzia kan târ lang a ni.” (Habakuka 2:3) Kan rinna a chak leh chak loh hriat nân: ‘Thu hrilh hna hi ka tân eng anga pawimawh nge a nih? Mi dangte hnêna Pathian chanchin hrilh tûrin theih tâwp ka chhuah em? Tam lehzuala Jehova rawngbâwl dân kawng ka zawng em?’ tiin kan inzâwt thei a. (2 Korinth 13:5) Kan rinna chakzia chu vântlâng hmaa “chhandamna” chanchin ṭha puan chhuahna hmangin i lantîr ang u.—Rom 10:10 chhiar rawh.

14, 15. (a) Engtin nge kan nî tin nunah rinna kan lantîr theih? (b) Thiltiha rinna chak tak lantîrtu thiltawn sawi rawh.

¹⁴ He khawvêl harsatnate chhel taka kan tawrh hian Jehova chungah rinna kan lantîr bawk. Retheihna te, damlohna te, lunghnualna te, beidawnna te, a nih loh leh buaina dangte kan tawh hunah Jehova leh Isua chuan “puih kan ngaih huna ṭanpuina” pêk min tiam a ni. (Hebrai 4:16) Jehova hnêna ṭanpuina kan dîl hian rinna kan lantîr a. Isua chuan “kan ei khawpa chaw” min pe tûrin Jehova hnênah kan dîl thei tih a sawi a ni. (Luka 11:3) Bible-a thuziakte chuan Jehova’n kan mamawh apiang min pe thei tih a târ lang. Entîr nân, Israel rama nasa taka khua a khên khân Jehova’n Elija chu ei tûr leh in tûr a pe a ni. Bible chuan “choâkten zîng lamah chhang leh sa an rawn putsak ṭhîn a, tlai lamah chhang leh sa an rawn putsak leh ṭhîn a; tin,  lui tui chu a tlân a,” tiin a sawi. (1 Lalte 17:3-6) Keini pawhin Jehova’n kan mamawh min pe thei tih kan ring a ni.

¹⁵ Bible thu bulte kan nunpui chuan kan chhûngkua kan enkawl thei dâwn tih kan ring a. Asia rama awm unaunu pasal nei Rebecca-i chuan, Matthaia 6:33 leh Thufingte 10:4-a Bible thu bulte chu an chhûngkuaa an nunpui dân a sawi a. A pasal chuan a hnathawhin Jehova nêna an inlaichînna dinhmun hlauhawmah a dah nia a ngaih thu a sawi bawk. Tichuan a pasal chuan a hna chu a bânsan ta a ni. Mahse, fa pali an châwm avângin ei tûr siamin, an zuar ṭan ta a. An thawhrim avângin, chhûngkaw châwmna khawp chu an nei reng a ni. Rebecca-i chuan: “Jehova’n min kalsan ngai lo tih kan hria a. Vawikhat mah chaw kan nghei ngai lo,” tiin a sawi. I rinna tichaktu chutiang thiltawn chu i nei em?

16. Pathian kan rin chuan eng thil nge thleng ang?

¹⁶ Jehova khaihhruaina kan zawm chuan min ṭanpui ang tih kan ringhlel ngai tûr a ni lo. Paula chuan: “Mi felte chu rinnain an nung ang,” tia a sawi khân Habakuka thusawi a la chhâwng a. (Galatia 3:11; Habakuka 2:4) Chu chu min ṭanpui Theitu chunga rinna chak tak kan neih chhan tûr a ni. Paula chuan Pathian chu “keimahnia thawk ṭhîn thiltihtheihna ang zêlin, kan dîl leh kan ngaihtuah zawng zawng aia nasa zâwk ti theitu,” a nihzia min hriat nawntîr a. (Ephesi 3:20) Jehova chhiahhlawhte chuan a duhzâwng ti tûrin theih tâwp an chhuah a, tlin tâwk an nei tih erawh an hre bawk. Pathian kan zînga a awm vâng leh kan thawhrimna zawng zawngah mal min sâwm avângin kan lâwm tak zet a ni.

17. (a) Engtin nge Isua’n tirhkohte dîlna a chhân? (b) Rinna min tihpunsak tûra kan dîlna chu Jehova’n a chhâng dâwn tih engvângin nge kan beisei theih?

¹⁷ Kan sawiho tawhte aṭangin Isua hnêna: “Kan rinna min tihpunsak rawh,” tia dîltu tirhkohte angin dîl kan duh ve mai thei a. (Luka 17:5) C.E. 33 Pentikost nîa thlarau thianghlim an dawn a, Pathian thiltum hriatthiamna thûk zâwk an neih khân tirhkohte dîlna chu Isua’n kawng danglam takin a chhânsak a ni. Chu chuan an rinna a tichak a. Eng thil nge thleng? Chu tih hun laia thu hrilhna beihpui ropui ber an thlâk ṭan ta a ni. (Kolossa 1:23) Rinna chak lehzual nei tûra kan dîlna chu chhân a nih kan beisei thei em? Jehova chuan “a duhzâwng anga kan dîl” chuan kan beisei thei tih min tiam a ni.—1 Johana 5:14.

18. Engtin nge Jehova’n an rinna tichaktute chu mal a sâwm?

¹⁸ Jehova kan rinchhan tlat hian, kan chungah a lâwm ang a. Rinna tihpunsak tûra kan dîlna chu a chhâng ang a, kan rinna a lo chakzualin ‘Pathian rama mi ni tlâk’ kan ni thei dâwn a ni.—2 Thessalonika 1:3, 5. (ws15-E 10/15)