1, 2. Engin nge mihringte chu ramsate laka tidanglam?

MIHRING thluak hi danglam tak a ni a. Entîr nân, mihringte chuan ṭawng an zir thei a. Chuvâng chuan thil kan chhiarin, kan ziakin, kan sawi thei a, benga kan hriatte kan hre thiam thei a ni. Jehova hnênah kan ṭawngṭai theiin, amah fakna hla kan sak theih phah bawk. Chûng thil zawng zawng chuan ramsate lakah min tidanglam a. Scientist-te chuan kan thluak hna thawh dân mak tak mai hi an la hre thiam thei tak tak lo a ni.

² Ṭawng chhuak theia kan awm hi Jehova thil pêk a ni a. (Sâm 139:14; Thu Puan 4:10, 11) Ramsate laka min tidanglamtu thil pêk dang pawh kan nei bawk. Mihringte chu ‘Pathian anpuia’ siam kan ni a. Zalên taka duhthlan theihna kan nei a ni. Kan ṭawng theihna chu Jehova rawngbâwl nân leh chawimawi nân kan hmang thei a ni.—Genesis 1:27.

3. Jehova’n min tifing theitu eng thil nge min pêk?

³ Jehova chuan Bible-ah a rawng kan bâwl dân tûr leh kan chawimawi dân tûr min hrilh a. Bible a bu pum leh a ṭhen lai chu ṭawng 2,800 aia tama hmuh theih a ni. Bible thute kan  chhût ngun hian, Pathian thil ngaihtuah angin kan ngaihtuah ṭan thei a. (Sâm 40:5; 92:5; 139:17) Jehova ngaihtuahna anga thil ngaihtuahna chuan min tifingin, chatuan nunnaah min hruai a ni.—2 Timothea 3:14-17 chhiar rawh.

4. Chhût ngun tih awmzia chu eng nge ni a, eng zawhnate nge kan sawiho ang?

⁴ Chhût ngun tih awmzia chu thil engemawa ding taka rilru pe a, ngun tak leh fîmkhur taka ngaihtuah tihna a ni. (Sâm 77:12; Thufingte 24:1, 2) Jehova leh Isua chanchin kan zirte chhût ngunna chu kan hlâwkpui ber a. (Johana 17:3) He thuziakah hian hêng zawhnate hi chhân a ni ang: Chhût ngun tiawlsam tûr zâwngin engtin nge kan chhiar theih ang? Eng thil nge kan chhût ngun theih ang? Chhût ngun ziah chu nuam ti tûrin engin nge min ṭanpui thei ang?

5, 6. I thil chhiarte chhinchhiah a, hre thiam lehzual tûrin engin nge ṭanpui thei che?

⁵ Thâwk lâk te, kea kal te, a nih loh leh cycle khalh ang chite hi ngaihtuah vak ngai lova kan tih theih a ni a. Thil kan chhiar pawh hian ngaihtuah lova chhiar liam mai châng kan nei ṭhîn a ni. Thil pakhat i chhiar laiin thil dang i ngaihtuah pawh a ni thei a. Chutiang a nih loh nân eng nge i tih theih? I thil chhiar i ngaihsak a, a awmzia i ngaihtuah a pawimawh a ni. Tichuan, thu leh hla chhuah i chhiar lai paragraph tâwp emaw, a thupui tê emaw i thlen hunah châwl lawkin chhût ngun la. I thil zir chu ngaihtuahin, hriatthiam ngei tum ang che.

⁶ Scientist-te chuan a ria thil kan chhiar hian hriat reng a awlsam lehzual tih an hmu chhuak a. Min Siamtu chuan chu chu a hriat avângin, Josua hnênah Pathian dân bu “ngaihtuah [“chhiar ri neuh neuh,” NW],” tûrin a hrilh a ni. (Josua 1:8 chhiar rawh.) A ria Bible chhiarna chuan ngaihsak lehzual tûr leh chhinchhiah tam lehzual tûrin min ṭanpui ang.

7. Bible chhût ngun nân eng hun nge ṭha ber? (A thupui chunga milem en rawh.)

⁷ Kan thil zirte chhût ngun a, ngaihsak lehzual tûr chuan nasa taka ṭan kan lâk a ngai a. Chuvâng chuan, hah loh lai leh rilru lapêngtu a tam lohna, hmun reh tak chu chhût ngunna atân a ṭha ber a ni. Fakna hla phuahtu Davida chuan a khumlaizâwlah ngun takin a chhût ṭhîn a. (Sâm 63:6) Mi ṭha famkim Isua chuan, chhût ngun leh ṭawngṭai nân hmun reh tak a thlang a ni.—Luka 6:12.

8. (a) Eng nge kan chhût ngun theih? (b) A chanchin mite hnêna kan hrilh hian Jehova’n engtin nge a ngaih?

⁸ Bible-a i thil chhiarte bâkah, i chhût ngun theih thil dang a awm a. Entîr nân, Jehova thilsiam ropui tak zînga pakhat i hmuh hunah, châwl lawkin heti hian inzâwt rawh, ‘Hei hian Jehova chungchâng eng nge min zirtîr?’ tiin. Chutianga ngaihtuahna chuan ṭawngṭaia Jehova hnêna lâwmthu sawi tûrin a chêttîr ngei ang che. I bulah mi dang an awm a nih chuan, chu i lâwmna chu hrilh ve i duh ngei ang. (Sâm 104:24; Tirhkohte 14:17) I chhût ngun a, i ṭawngṭai a, mi dang hnêna i hrilh hunah Jehova chuan a ngaithlain, a lâwm a ni. Bible chuan: “LALPA ṭihtute leh a hming ngaihsaktute [“chhût nguntute” NW] tân hriat rengna lehkhabu chu a hmâah ziak a ni ta a,” tiin a sawi.—Malakia 3:16.

9. (a) Paula’n Timothea hnênah eng nge chhût ngun tûra a hrilh? (b) Rawngbâwlna atân kan inbuatsaih hunah, eng nge kan chhût ngun theih?

⁹ Tirhkoh Paula’n Timothea hnênah a thusawi  te, a nungchang te, leh a zirtîrnain mi dangte a ngawng dânte chu chhût ngun tûrin a hrilh a. (1 Timothea 4:12-16 chhiar rawh.) Nang pawhin chûng thilte chu i chhût ngun ve thei a ni. Entîr nân, Bible zirpui tûra i inpuahchah hunah chhût ngun tûrin hun i mamawh a. Hma a sâwnna tûra ṭanpui thei tûr zawhna emaw, entîrna emaw chu ngaihtuah rawh. Chutianga i inpuahchah chuan, i rinna ngei pawh tihchakin a awm a, Bible zirtîrtu phûr tak leh ṭha lehzual i lo ni ang. Rawngbâwl tûra i kal chhuah hmaa i chhût ngunna chu i ṭangkaipui bawk ang. (Ezra 7:10 chhiar rawh.) Rawngbâwlnaa ṭhahnemngai lehzual tûra ṭanpui tûr chein Tirhkohte lehkhabu chu i chhiar thei a ni. Chumi nîa i hman tum Bible chângte leh i sem chhuah tum thu leh hla chhuahte pawh i chhût ngun thei bawk. (2 Timothea 1:6) Thu hrilhna biala mite leh an ngaihsak tûr zâwng i sawi theih tûrte chu ngaihtuah ang che. Chutianga i inbuatsaih chuan, Bible chu mi dangte hnêna thu hrilh nân thiam takin i hmang thei ang.—1 Korinth 2:4, 5.

10. Eng thil ṭha dangte nge kan chhût ngun theih?

¹⁰ Eng thil dang nge i ngaihtuah theih? Vântlâng thusawi leh inkhâwmpui thusawite ziaka i chhinchhiah chuan, ennawn ṭhîn ang che. Chutianga i tih lai chuan, ‘Pathian Thu leh a inawpna pâwl aṭangin eng nge ka zir?’ tiin inzâwt rawh. Thla tin chhuak Vênnainsâng leh Awake! magazine-te leh inkhâwmpuia tihchhuah tharte chu i chhût ngun thei a. Yearbook-a thiltawn pakhat i chhiar zawhah thiltawn dang i chhiar leh hmaa chawlh lawk chu i hlâwkpui mai thei bawk. Kan thu leh hla chhuah i chhiar hunah, a thu pawimawh lai rîn emaw, a sîrah  tawitêa chhinchhiah emaw chu i duh mai thei a. Chu chuan tlawhkîr nei tûr te, berâm tlawh tûr te, leh thusawi tûrtea i inbuatsaih hunah a ṭanpui ang che. I thil chhiar lai chu châwl a, i chhût ngun hunah, i thinlung thleng tûra ngaihtuah nân leh i thil ṭha zirte avânga Jehova hnêna lâwm thu sawi nâna hun hman chu thil pawimawh ber a ni.

11. Eng nge kan chhût ngun ber ang a, chu chuan engtin nge min ṭanpui ang? (Footnote en rawh.)

¹¹ Kan chhût ngun ber tûr chu Bible hi a ni a. Mahse, engtik nîah emaw Bible i kawl phal ni lo ta se, engtin nge ni ang? * (Footnote en rawh.) Bible châng leh Pathian fakna hla i duhzâwng ang chi, i hriat tawh sate chhût ngun lo tûrin tumahin an dang thei lo che. (Tirhkohte 16:25) Pathian thlarau chuan rinawm reng tûra ṭanpui chein, i thil zirte hre chhuak leh tûrin a pui ang che.—Johana 14:26.

12. Nî tina Bible chhiarna hun duan i neih theih dân kawng khat chu eng nge ni?

¹² Nî tina Bible chhiarna hun duan i neih theih dân kawng khat chu eng nge ni? Theocratic Rawngbâwlna School atâna chawlhkâr tina Bible châng chhiar tûrte chhiar leh chhût ngun nân chawlhkâr chhûnga ni ṭhenkhat i hmang thei a. Ni dangah chuan Chanchin Ṭha ziak Matthaia, Marka, Luka, leh Johana lehkhabute chu chhiarin, Isua thusawi leh thiltihte chu i chhût ngun thei a ni. (Rom 10:17; Hebrai 12:1, 2; 1 Petera 2:21) Isua nuna thil thlengte indawt dân târ lanna lehkhabu kan nei bawk a. Chu chuan Chanchin Ṭha ziakte i chhiarna hlâwkpui lehzual tûrin a ṭanpui ang che.—Johana 14:6.

13, 14. Jehova leh Isua chanchin chhût ngunna chu engvângin nge a pawimawh a, chu chuan engti tûrin nge min chêttîr ang?

¹³ Jehova leh Isua chanchin chhût ngunna chuan mi chu Kristian puitling ni tûr leh rinna chak tak nei tûrin a ṭanpui thei a. (Hebrai 5:14; 6:1, 2) Pathian chanchin ngaihtuah nâna hun tlêmtê hmangtu chuan zawi zawiin Jehova nêna an inlaichînna a hlauh thei a, Pathian a hawisan hial thei bawk. (Hebrai 2:1; 3:12) Pathian Thu chu ‘rilru fel leh ṭha’ pu chunga kan hriat, a nih loh leh kan pawm loh chuan kan “vawng reng” dâwn lo tih Isua’n min vaukhân a. “Lungkhamnate, hausaknate, nawmsaknate” chuan awlsam takin min dîp ral thei hial a ni.—Luka 8:14, 15.

¹⁴ Chuvângin Bible chhût ngun zêlin, Jehova i hre chiang lehzual ang u. Chu chuan a miziate entawn lehzual tûrin min chêttîr ang. (2 Korinth 3:18) Kan Pa vânna mi chanchin kan zir belh zêl thei ang a, amah chu chatuanin kan entawn thei ang. Chawimawina ropui ber a va ni êm!—Thuhriltu 3:11.

15, 16. (a) Engtin nge Jehova leh Isua chanchin chhût ngunna chu i hlâwkpui? (b) Engvângin nge chhût ngun a harsat châng a awm theih a; mahse, engvângin nge kan tih hrâm hrâm ang?

¹⁵ Jehova leh Isua chanchin chhût ngunna chuan thutak atân ṭhahnemngai reng tûrin a ṭanpui thei che a. I ṭhahnemngaihna chuan kohhrana unaute leh rawngbâwlnaa i mi tawnte a tichak ang. Jehova min pêk, Isua tlanna inthawina ngun taka i chhût chuan Pathian nêna inlaichînna ṭha i neih chu i hlut zawm zêl ang. (Rom 3:24; Jakoba 4:8) A rinna avânga kum thum lai lung ina tâng South Africa rama unau Mark-a chuan: “Chhût ngunna chuan rilru a tiphûr thei hle a. Thlarau lam thil kan chhût tam poh leh,  kan Pathian, Jehova chungchânga thil thar kan hmu chhuak tam lehzual a ni. Hma lam hun tûr chungchânga ka lunghnual leh mangan deuh châng chuan Bible keuvin, a thute ngun takin ka chhût a. Chu chuan ka rilru a tiveng huai niin ka hria,” tiin a sawi.

¹⁶ Tûn lai khawvêlah min la pêng theitu a tam êm avângin Bible chhût ngun nâna hun neih a harsa a. Africa rama awm unau Patrick-a chuan heti hian a sawi a ni: “Ka rilru chu thil ṭûl leh ṭûl lote nî tina paihbo ngai, thu tam tak thlen khâwmna (mailbox) ang a ni a. Ka rilrua thil awmte ka bih chian hian, ‘ngaihtuahna tam tak’ ka hmu ṭhîn a, rilru fîm tak nêna thil ka chhût ngun theih nân Jehova hnênah chûng thilte chu thlenin ka ṭawngṭai a ngai ṭhîn a ni. Thlarau lam thil chhût ngun hmaa chutianga tihna chuan hun duh rei deuh zâwk mah se, Jehova hnaih lehzualin ka inhria a. Chu chuan thutak hre thiam lehzual tûrin min ṭanpui a ni,” tiin. (Sâm 94:19) Ni e, nî tina Bible kan chhiar a, kan chhût ngun hian kawng tam takin kan hlâwkpui a ni.—Tirhkohte 17:11.

17. Engtin nge chhût ngun nân hun i neih theih?

¹⁷ Ṭhenkhat chuan, Bible chhiar nân, chhût ngun nân, leh ṭawngṭai nân zîng hma takah thovin hun an hmang a. Mi dangte chuan chutiang atân an chhûn chawlh hun chu an hmang thung. I tâna Bible chhiar hun tûr ṭha ber chu tlai lam emaw, mut hma emaw pawh a ni thei a. Ṭhenkhat chuan Bible chu zînga chhiar a, mut hmaa chhiar nawn leh an duh a ni. (Josua 1:8) Thil pawimawh tak chu ‘remchânna lei’ a ni a, chu chu Pathian Thu nî tina chhût thei tûra thil pawimawh lo zâwkte tih nâna hun hman tlêm hi a ni.—Ephesi 5:15, 16.

18. Pathian Thu chhût ngun a, an thil zir nunpuitute chu Bible-in eng nge a tiam?

¹⁸ Jehova’n a Thu chhût ngun a, an thil zirte nunpui tûra theih tâwp chuahtute chu mal a sâwm vek ang tih Bible chuan a tiam a. (Sâm 1:1-3 chhiar rawh.) Isua chuan: “Pathian thu hriaa zâwmte hi mi hamṭha an ni zâwk,” tiin a sawi a ni. (Luka 11:28) Thil pawimawh ber chu, nî tina Jehova Thu chhût ngunnain amah chawimawi tûr zâwnga thil ti tûra min ṭanpui hi a ni. Chutianga kan tih chuan tûnah hian Jehova’n hlimna min pe ang a, khawvêl tharah chatuana nunna min pe bawk ang.—Jakoba 1:25; Thu Puan 1:3. (ws15-E 10/15)