LAZARA farnu Marthi chungchâng i ngaihtuah hian eng ang mi niin nge i mitthla? Bible chuan Marthi chu Isua ṭhian ṭha tak leh a hmangaih tak niin a sawi a. Isua hmangaih leh zah hmeichhe awmchhun erawh a ni lo. Entîr nân, Marthi laizâwn Mari pawh Isua ṭhian ṭha a ni a. Isua chuan a nu, Mari ngei pawh a hmangaih a ni. (Johana 11:5; 19:25-27) A nih chuan, engvângin nge Marthi chu a hmangaih?

² Marthi chu ngilnei tak leh thilphal tak a ni a, a taimâk bawk avângin Isua’n a hmangaih a. Mahse, a hmangaih chhan ber chu a rinna chak vâng a ni. Isua thu zirtîr zawng zawng chu a ring a, thutiam Messia a ni tih rinhlelhna a nei lo. (Johana 11:21-27) Chuti chung pawhin, Marthi chu a ṭha famkim lova. Keimahni ang bawka thil tihsual nei a ni. Entîr nân, ṭum khat chu Isua’n a va tlawh laiin a laizâwnnu Mari chunga a lungnih loh avâng maiin zilh tûrin a hrilh a. Marthi chuan: “Lalpa, ka laizâwnnun  keimah chauh rawngbâwl tûra mi thlahthlam hi pawi i ti lo vem ni? Mi pui tûrin ti rawh khai,” a ti a. (Luka 10:38-42 chhiar rawh.) Engvângin nge Marthi’n chu thu chu a sawi a, Isua chhân dân aṭangin eng nge kan zir theih?

3, 4. Mari’n Isua pawm zâwng eng thil nge a tih a, Marthi’n eng nge a zir? (A thupui chunga milem en rawh.)

³ Isua chu Marthi leh Mari’n an ina an sâwm avângin a lâwm hle a, chu hun chu an hnêna thutak zirtîr nân hman a duh a ni. Mari chu a bulah ṭhu nghâlin, “a thu a ngaithla a.” Zirtîrtu Ropui hnên aṭangin a theih ang apiang zir a duh a. Marthi chuan Isua thusawi chu ngaithla ve thei reng a ni. Ngaithla tûrin a thiltih lai kalsan se chuan Isua fak pawh a hlawh ngei ang.

⁴ Mahse, Marthi chu a buai hle a. Isua tâna a bîk taka ei tûr siam leh a nuam thei ang bera Isua a awm theih nân thil dang tam tak tiin a buai a ni. Mari’n a ṭanpui loh avângin a thinur a, Isua hnênah a hrilh ta a. Ani chuan Marthi thiltih tum chu a tam lutuk tih a hriat avângin: “Marthi, Marthi, thil tam tak i ngaihtuah a, i buai a nih hi,” tiin ngilnei takin a hrilh a ni. Isua chuan chaw pângngai tak, chi khat chauh pawh a tâwk thu a hrilh ang a ni. Tichuan Mari’n ṭha taka a ngaihthlâk avângin a fak a. “Marin chan ṭha chu a thlang a, chu chu lâksak tûr a ni lo ve,” tiin a sawi a ni. Mari chuan chu mi ṭuma an thil ei chu a theihnghilh mai thei a, Isua hnêna a thil zir leh fakna a dawn erawh chu a theihnghilh hauh lo vang. Kum 60 hnuah tirhkoh Johana chuan: “Isuan Marthi te, a laizâwn te . . . a hmangaih,” thu a ziak. (Johana 11:5) Chûng thute chuan Isua’n hmangaih taka a zilhna chu Marthiin a pawm tih leh a nun pum chu Jehova rawngbâwl nân a hmang tih a târ lang a ni.

5. Engvângin nge tûn laiah thil pawimawh zâwkte ngaihsak chu a harsat zual a, eng zawhna nge kan chhân ang?

⁵ Bible hun lai aiin tûn laiah hian Jehova rawngbâwlnaa min tibuai thei thil a tam tawh zâwk tih kan hria a. September 15, 1958 chhuak Vênnaisâng chuan unaute chu Jehova rawngbâwlnaa tûn lai thiamnate intihbuaitîr lo tûrin a vaukhân a ni. Chûng hun lai pawh chuan, nî tin thil thar a chhuak reng tho niin a lang. Magazine mit la tak te, radio te, film te, leh television-te chu a lâr tawh hle a. Vênnainsâng chuan he khawvêl tâwpna a hnaih rual hian, “min tibuaitu a pun a rinawm” thu a sawi. Tûn hma zawng aiin tûn laiah hian min tibuai thei thil a tam tawh zâwk a ni. Mari ang lehzual tûr leh Jehova biakna ngaihsak tlat tûrin eng nge kan tih theih?

6. Engtin nge Jehova mite’ntûn lai thiamnate an hman?

⁶ Jehova mite chuan chanchin ṭha hrilh nân tûn lai thiamnate an hmang a. Entîr nân, khawvêl indopui pakhatna thlen hma leh thlen laiin “Photo-Drama of Creation,” film chu an chhuah ṭhîn a. Lem che thei lo leh color, leh ri telna film tawite hmangin ram tam taka mi maktaduai têl hnênah thu an hril a ni. “Photo-Drama” zawhah chuan Isua Krista’n leia ro a rêl hun leh remna a awm hun tûr chu târ lan a ni a. A hnuah, Jehova mite chuan radio chu khawvêl puma mi maktaduai têlte hnêna Lalram thuchah puanzâr nân an hmang bawk. Tûn laiah pawh hmun kilkhâwr ber berte pawh tiamin hmun tina mite biak pawh nân computer leh Internet kan hmang a ni.

7. (a) Engvângin nge a lutuka khawvêl hman chu a hlauhawm? (b) Eng thilah nge kan fîmkhur ang?

 ⁷ Bible chuan khawvêl hmang lutuk lo tûrin min vaukhân a. Chutah chuan khawvêlin a pêk theih thila hun hman tam lutukna a tel a ni. (1 Korinth 7:29-31 chhiar rawh.) Chûng thil ṭhenkhatte chu thil sual ni lo mah se, hun tam tak min khawhraltîr thei a. Entîr nân, kan tuizâwng thil tih te, lehkhabu chhiar te, TV en te, hmun nuam tak tlawh te, bazar te, leh electronic lam thil chhuak thar leh changkang ber berte zawn kual vêlte chu nuam kan ti hle thei a. Mi tam takte chuan Internet hmanga inbiak te, message leh e-mail inthawn te, a nih loh leh chanchin thar leh infiamnaa a chakzâwk hriat tuma zawn chhuah chu nuam an ti thei bawk. Mahse, mi ṭhenkhat chuan chûng thilte chu a lutukin an vei thei a. (Thuhriltu 3:1, 6) Chutiang thila hun tam tak kan hman chuan thil pawimawh ber, Jehova kan biakna chu kan ngaihsak tâwk lo thei a ni.—Ephesi 5:15-17 chhiar rawh.

8. Engvângin nge khawvêl thilte hmangaih loh a pawimawh?

⁸ Setana chuan a khawvêl thilte chu min hîp nân leh Jehova rawngbâwlna ata min lâk pên nân theih tâwp chhuahin a hmang a. Chu chu kum zabi khatnaah khân a hmang tawh a, tûn laiah hian a hmang nasa lehzual a ni. (2 Timothea 4:10) Chuvângin, khawvêl thilte kan ngaih dân chu kan inenfiah reng leh a ṭûl anga kan insiamrem zêl a ngai a. Bible chuan khawvêl thilte hmangaih lo tûrin min hrilh a. Jehova kan hmangaihna chu kan tinghet zâwk tûr a ni. Chutianga tihna chuan, Jehova thuawih leh amah hnaih a tiawlsam ngei ang.—1 Johana 2:15-17.

9. Isua’n a zirtîrte chu eng nge ngaihtuah tûra a zirtîr a, engtin nge entawn tûr a siam?

⁹ Isua’n Marthi hnênah thil tam tak intihbuaitîr lo tûra ngilnei taka a zirtîr angin, a zirtîrte pawh a hrilh a. Jehova rawngbâwlna leh a Lalram ngaihtuah tlat tûrin a fuih a ni. (Matthaia 6:22, 33 chhiar rawh.) Amah ngei pawhin entawn tûr ṭha tak a siam a. Thil tam tak a nei lo va, in leh lo pawh a nei lo a ni.—Luka 9:58; 19:33-35.

10. Isua’n kan tân entawn tûr ṭha eng nge min hnutchhiah?

¹⁰ Isua chuan thu hrilh rawngbâwlna chu eng thil mah a intihbuaitîr lo va. Entîr nân, thu hrilh rawngbâwlna a ṭan hnu lawkah, Kapernaum khuaa mipuite chuan an khuaa châm bâng tûra chelh an duh a. Eng nge a tih tâk? A rawngbâwlna chu a ngaihtuah tlat a ni. Ani chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a sawi. (Luka 4:42-44) Isua chuan a tam thei ang ber mite  hnêna chanchin ṭha hril leh zirtîr tûrin hmun hla tak tak a kal a. Mi ṭha famkim mah ni se, a thawhrim êm avângin a chau va, chawlh hahdam a mamawh a ni.—Luka 8:23; Johana 4:6.

11. Mi pakhatin a buaina chungchâng a zawh khân Isua’n eng nge a tih? A zirtîrte hnênah eng nge a zirtîr?

¹¹ A hnuah, Isua’n a zirtîrte hnêna thil pawimawh tak a zirtîr khân, mi pakhat chuan amah tibuaiin: “Zirtîrtu, ka u hnênah, ro mi sem ve tûrin hrilh rawh,” a ti a. Isua chuan chu pa buaina chu tihvensak a tum lo va. A zirtîrte a zirtîr lai chu engmah a intihbuaitîr hek lo. Chu hun remchâng chu, thil neih tam ringawt an ngaihtuah chuan Pathian rawng an bâwlna ata lâk pêna an awm theih thu zirtîr nân a hmang zâwk a ni.—Luka 12:13-15.

12, 13. (a) Isua’n Jerusalema Grik mi ṭhenkhatte rilru hneh tûr eng thil nge a tih? (b) Philipa’n chûng mite hmu tûra a hrilh khân engtin nge Isua’n a chhân?

¹² Isua chu mihring anga a nun a tâwp dâwn lam khân, a rilru a mangang hle a. (Matthaia 26:38; Johana 12:27) Hrehawm nasa tak tuarin, a thi dâwn tih a hria a. A thih hmain hnathawh tûr tam tak a nei tih a hre bawk. Entîr nân, Nisan 9, Chawlhniah chuan sabengtung chunga chuangin Jerusalemah a lût a. Mipuite chuan an Lal angin an lo lâwm a ni. (Luka 19:37, 38) A tûkah, Isua chuan biak ina man to taka thil zuar a, mite rawktu mi duhâmte chu huaisen takin a hnawt chhuak a ni.—Luka 19:45, 46.

¹³ Jerusalema Kalhlên Kût hmang tûra rawn kal Grik mi ṭhenkhatte chuan Isua thiltih an hmu a, chu chuan an rilru a hneh hle a ni. Chuvângin tirhkoh Philipa hnênah Isua an hmuh theih leh theih loh an zâwt a ni. Mahse, Isua chuan a hmêlmate laka amah ṭanpui a, vênghim theitu tûr zawn a tum lo. Thil pawimawh zâwk chu a hria a. A tâna Jehova duhzâwng, inthawina atâna a nun hlan chu a rilruah a dah tlat a ni. Chuvângin, a hnungzuitute hnênah chuan rei lotêah a thi mai dâwn tih leh anni pawhin an nun hlan an inhuam tûr a ni tih a hriat nawntîr a ni. “Tupawh a nun thlahlel chuan a hloh ṭhîn; tupawh he khawvêlah hian a nun ngaitlâwm chuan chatuana nunna tûr a vawng reng ang,” tiin a sawi. Isua chuan a hnungzuitute chu “Pain a chawimawi” tûr thu leh chatuan nunna a pêk tûr thu a tiam bawk a. Philipa’n chu thu thlamuanthlâk tak chu chûng Grik mite hnênah chuan a hrilh thei a ni.—Johana 12:20-26.

14. Isua chuan a nunah chanchin ṭha hrilh chu ngai pawimawh ber mah se, eng thil nge a tih ngei ṭhin?

¹⁴ Isua leia a awm lai khân, a hna pui ber chu chanchin ṭha hrilh a ni a. Chanchin ṭha hrilh chu ngai pawimawh ber mah se, hna ringawt a ngaihtuah reng lo. Entîr nân, vawikhat chu inneihnaah a kal a, chutah chuan tui chu uain ṭha takah a chantîr a ni. (Johana 2:2, 6-10) A ṭhiante leh chanchin ṭha ngaihventu mi dang inah pawh chaw a ei bawk. (Luka 5:29; Johana 12:2) Isua’n ṭawngṭai nân te, chhût ngun nân te, leh chawlhhahdam nân te hun a insiam ṭhîn chu thil pawimawh tak a ni.—Matthaia 14:23; Marka 1:35; 6:31, 32.

15. Tirhkoh Paula’n Kristiante thiltih ngai eng nge a sawi a, engtin nge entawn tûr ṭha a siam?

¹⁵ Tirhkoh Paula chuan Kristiante chu intlânsiakna thui taka a tâwp thlenga tlân tumte nên a tehkhin a, anni chuan anmahni timuang thei emaw, chawlhtîr thei emaw apiang chu an dah bo a ngai a ni. (Hebrai 12:1, 2 chhiar rawh.) Amah ngeiin entawn tûr ṭha tak a siam a. Juda sakhaw hruaitu a nih angin hausa tak leh hmingthang tak ni thei mah se, “thil ṭha bîkte” ngaihsak nân chu chu  a kalsan ni. Thu hrilh hnaah a thawkrim hle a, Suria, Asia Minor, Makedonia, leh Judai ram pawh tiamin hmun tam takah a zin a. Vâna chatuana nunna a dawn tûr chu a nghâkhlel hle a ni. Ani chuan: “Hnung lama thil awmte chu theihnghilha, hma lama thil awmte chu banin, . . . lâwmman hmu tûrin, tiam chin lam chu ka pan ṭalh ṭalh a ni,” tiin a sawi. (Philippi 1:10; 3:8, 13, 14) Paula chuan nupui a nei lo va, chu chuan ‘Lalpa rawng buai lova bâwl thei’ tûrin a ṭanpui a ni.—1 Korinth 7:32-35.

16, 17. Nupui pasal kan nei emaw, nei lo emaw pawh ni se, engtin nge Paula kan entawn theih? Engtin nge Mark-a leh Claire-i’n Paula an entawn?

¹⁶ Paula angin tûn laia Jehova chhiahhlawh ṭhenkhatte pawhin tam lehzuala rawng an bâwl theih nân nupui pasal neih loh an thlang a. (Matthaia 19:11, 12) Nupui pasal nei lote chuan a neite aiin chhûngkaw mawhphurhna an nei tlêm zâwk tlângpui a. Mahse, nupui pasal kan nei emaw, nei lo emaw pawh ni se, Jehova rawng kan bâwlna aṭanga min la pêng thei, ‘min tihnawktu apiang kan dah’ bo thei a ni. Hun khawhralna pumpelh nân leh Jehova rawng kan bâwl tam lehzual theih nân kan thil chîn ṭhinte chu kan thlâk a ngai thei a ni.

¹⁷ Entîr nân,Wales rama seilian Mark-a leh Claire-i te chuan school an zawhin pioneer an thawk ṭan a. An inneih hnuah pawh, an thawk zawm zêl a ni. Mahse, thawh tam lehzual an duh a. Mark-a chuan: “International construction hnaa kan luh theih nân mutna pindan pathum awmna in leh kan hnathawh chu kalsanin nun kan tisamkhai lehzual a ni,” tiin a sawi. Kum 20 chhûng zet chu Kingdom Hall sain Africa ram hmun hrang hrangah an zin a. A châng chuan pawisa an nei tlêm hle a; mahse Jehova chuan a enkawl reng a ni. Claire-i chuan: “Nî tin Jehova rawngbâwla hun hmanna chuan lungawina nasa tak min pe a. Ṭhian tam tak kan siam a, tlâkchham engmah kan nei lo. Kan inpêkna tlêmtham tak chu Jehova rawngbâwlna aṭanga kan dawn hlimna nên chuan khaikhin rual a ni lo,” tiin a sawi. Hunbi kima rawngbâwltu tam tak chuan chutiang tho chuan an ngai a ni. *—Footnote en rawh.

18. Eng zawhnate nge kan inzawh theih?

¹⁸ Jehova rawng i bâwlnaah phûr lehzual thei niin i inhria em? Thil pawimawh zâwkte lak ata la pêng thei che a awm em? Chutiang a nih chuan, eng nge i tih theih? Bible i chhiar dân leh i zir dânah hma i sâwn thei a. Chutianga i tih theih dân chu a dawta thuziakah hrilhfiah a ni ang. (ws15-E 10/15)