A hmasain: Pathian chuan tûn lai khawvêla hrehawm tawrhnate hi a hmu a, thiltih tum a nei, tih thu dikah hian thlamuanna hmu rawh. (Sâm 72:13, 14) A Thu, Bible-ah Pathian chuan ‘hrehawm tuartute chu chawlhnaa’ rulh an ni ang tih a tiam a. Engtikah nge? ‘Pathian hre lo mi leh kan Lalpa Isua chanchin ṭha âwih lo mite chunga phuba lain a vântirhkoh chak takte nên . . . vân aṭanga a inlâr hunah’ a ni ang. (2 Thessalonika 1:6-8) Chu Isua inlârna chu Bible-in Armageddon tia a koh bawk, ‘Pathian Engkimtitheia ni ropuia indona,’ lo thlen huna thleng tûr a ni.—Thu Puan 16:14, 16.

Chu indona lo thleng tûrah chuan Pathianin sualna tibo tûrin mihringte ni lovin, a Fapa, Isua Krista leh thlarau thilsiam dang thiltithei takte chu a hmang ang. Anni chuan inawpbehna zawng zawng an tireh ang.—Isaia 11:4; Thu Puan 19:11-16.

Tûn thleng hian, Pathianin indona a thlîr dân a la inthlâk danglam lo va. Indona chu inawpbehna leh suahsualna tihtâwpna angin a la thlîr reng a ni. Mahse, mihring chanchin tluan chhuaka a thlen dik tawh angin, Pathian chauhvin indona a thlen hun tûr leh a tel tûrte a ruat a ni. Kan hmuh tawh angin, Pathian chuan suahsualna tihtâwp nân leh inawpbehna laka phuba lâk nân indona thlentîr chu a tum daih tawh a, chu indonaah chuan a Fapa, Isua’n a bei ang. Chuvângin, tûn laia leia indonate  hi chhan ṭha tak nei angin lang mah se, Pathianin a pawm lo tihna a ni.

Entîr nân: An pa awm loh hlâna lo insual unau pahnih chu han mitthla teh. An insual lai chu tâwp lawkin, an pa chu phone-in an bia a. Pakhat chuan pakhat zâwk chu insualna ṭantu anga a sawi laiin, ani erawh chuan ṭha lo taka cheibâwl a nih thu a sawi thung. A ṭan zâwk beisei ve ve chungin an pa chu an bia a. Mahse, ani chuan a ngaihthlâk ve ve hnu chuan insual tawh lo tûr leh ina a haw a, a chinfel hun nghâk tûrin a hrilh a ni. Unau pahnihte chuan engemaw chen an han nghâk a. Mahse, reilote hnuah chuan an insual leh ta tho a ni. Ina an pa a lo haw chuan, an pahnih chungah a lungawi lo hle a, thu an awih loh avângin a hrem ve ve a ni.

Tûn laiah, ram indote chuan Pathian ṭanpuina an dîl ṭhîn a. Mahse, Pathian chuan tûn laia indonaah hian ṭan lam a nei lo. Chu aiin, A Thu, Bible chuan: “Tu sual pawh sualin thungrûl suh,” tih leh, “Phuba la suh,” tiin chiang takin a sawi a. (Rom 12:17, 19) Armageddon-a hma a lâk hun thleng mite chuan an “nghâk fan fan” tûr a ni tih a sawi bawk a ni. (Sâm 37:7) Pathian thiltih hun nghâk lo va, indonaa hnamte an tel hian chutiang indona chu amah tilâwm lotu chapona thiltih angin Pathianin a thlîr a ni. Chuvângin, Armageddon-ah Pathian chuan a thinurna a hri thlain, ‘indonate chu kâwlkil thlengin a tireh’ ang a, hnamte intihbuaina chu a chingfel vek tawh ang. (Sâm 46:9; Isaia 34:2) Amageddon chu indona zawng zawng titâwptu indona a ni tak zet a ni.

Indona tâwpna chu Pathian Ram malsâwmna tam tak zînga pakhat a ni a. Isua chuan chu sawrkârna chu: “I ram lo thleng rawh se. I duhzâwng vâna an tih angin leia mi’n ti rawh se,” tih ṭawngṭaina hriat lâr takah a sawi a ni. (Matthaia 6:10) Pathian Ram chuan indona zawng zawng a nuaibo bâkah, indona thlentîrtu, suahsualna pawh a tireh ang. * (Sâm 37:9, 10, 14, 15) Isua hnungzuitute’n Pathian Ram malsâwmnate an nghâkhlel hle pawh chu thil mak a ni lo.—2 Petera 3:13.

Mahse, Pathian Ramin hrehawm tawrhna te, inawpbehna te, leh suahsualna zawng zawng a tihtâwp hun chu eng chen nge kan la nghah ngai ang? Bible hrilh lâwkna thlen famkimnate chuan he khawvêl “ni hnuhnûngahte” kan awm tih a târ lang a. (2 Timothea 3:1-5) * Pathian Lalram chuan Armageddon indona hmangin ni hnuhnûng tâwpna a rawn thlen thuai dâwn a ni.

Atîra kan hriat tawh angin, he indona hnuhnûng berah hian “kan Lalpa Isua chanchin ṭha âwih,” duh lotute chu tihboral an ni ang. (2 Thessalonika 1:6-8) Mahse, mi sualte pawh tiamin, mite thihnaah Pathianin lâwmna a nei lo tih hre chhuak leh ang che. (Ezekiela 33:11) Chuvângin, chu indona hnuhnûng berah chuan ‘tuma boral a duh loh’ avângin, Pathian chuan kan Lalpa Isua chungchânga chanchin ṭha chu tâwpna a lo thlen hmaa “hnam zawng zawng hriattîrna tûrin khawvêl zawng zawngah” a hrilhtîr mêk a ni. (2 Petera 3:8, 9; Matthaia 24:14; 1 Timothea 2:3, 4) Khawvêl puma Jehova Thuhretute thu hrilh rawngbâwlna avângin, tûn lai mite chuan Pathian hriat theihna, Isua chungchânga chanchin ṭha rin theihna, leh indona a awm tawh loh hun hmu tûra nun theihna hun remchâng an nei a ni. (wp15-E 11/01)