A KAWM THU | BIBLE I HRE THIAM THEI
Engvângin Nge Bible Hriatthiam I Tum Ang?
“Bible hi sakhaw lehkhabu hriat hlawh tak a ni a. Mahse, China mite tân chuan lehkhabu hriat ṭhan loh leh pawimawh lêm lo a ni.”—LIN-I, CHINA.
“Ka Hindu sakhaw lehkabu thianghlim mah ka hre thiam thei lo a ni a. Engtin nge Holy Bible chu ka hriatthiam theih ang?”—AMIT-A, INDIA.
“Bible hi lehkhabu upa tak a nih angin ka zah a, hralh kal ber a ni tih ka hria. Mahse, bu khat pawh ka la hmu ngai lo.”—YUMIKO-I, JAPAN.
Khawvêl puma mi tam takte chuan Bible hi an ngaisâng hle a. Mahse, Bible-a thu awmte an hria a nih pawhin an la hre tlêm hle a ni. Asia khawmuala mi maktaduai tam takte mai ni lovin, Bible bu tam tak sem chhuahna ramahte pawh Bible-a thu awmte hria chu an tlêm hle.
Mahse, ‘Engvângin nge Bible hriatthiam chu ka tum ang?’ tiin i zâwt mai thei. He lehkhabu thianghlim awmzia hriatthiamna chuan hêngte hi ti thei tûrin a ṭanpui ang che:
-
Lungâwina leh hlimna hmu tûrin
-
Chhûngkaw buainate hmachhawn thei tûrin
-
Lungkhamnate hmachhawn thei tûrin
-
Mi dangte nêna inlaichînna ṭha zâwk nei tûrin
-
Fingthiam taka sum hmang tûrin
Entîr nân, Janpan rama Yoshiko-i hi han ngaihtuah teh. Bible chu eng ang nge a nih hriat a duh a, mahniin a chhiar ta a. Eng nge a rah chhuah? “Bible chuan nuna thiltum leh hma lam hun atâna beiseina nei tûrin min ṭanpui a, ruak ngawt nia inhriatna ka nei tawh lo,” tiin a sawi. A hmaa kan târ lan tâk Amit-a chuan mahnia Bible bih chian a tum ta a. “Bible-ah chuan mi tin tâna thu ṭangkai tak a chuang tih ka hriat chuan mak ka ti hle,” tiin a sawi.
Bible hian mi maktaduai tam takte nunah nasa takin nghawng a nei a. I hlâwkpui dân hre tûrin engah nge i bih chian loh vang? (wp15-E 12/01)