Ram danga a vawikhatna atâna zin angah han inchan teh. I mi hmuhte, an thiltih dân te, an ei leh inte, leh thil dangte chu i hre bel lo hle a. Hriatthiamawm takin, i beite pawh a dawng hial thei ngei ang.

Bible i chhiar hmasak ber ṭumah chutiang chuan i awm ve pawh a ni thei. I tâna ram dang daih anga sawi theih tûr hmân laia khawvêlah i va zin ang a ni. Chutah chuan Philistia mite i tâwk a, ‘puan pawtthlêr’ ang chi thiltih dânte chu i hriain, manna an tih chaw chi khat pawh i hria a ni. (Exodus 16:31; Josua 13:2; 2 Samuela 3: 31) Chûng chuan a tihrilhhai che pawh a ni thei. Ram danga zin huna ṭawng thiam pakhat ṭanpuina i ngaihhlut ang bawkin, thil hrilhfiah thei che tuemaw hnên aṭanga ṭanpuina dawn chu i ngaihlu dâwn lâwm ni?

B.C.E. kum zabi 16-naa Pathian Lehkha Thu thianghlimte ziah ṭan a nih aṭangin, a thute hre thiam tûra ṭanpuina pêk a ni a. Entîr nân, Israel hnam hruaitu hmasa ber Mosia chuan a thuziahte chu “a sawi fiah a ni.”—Deuteronomy 1:5, C.L. Re-edited.

A hnu kum zabi sâwm thlengin, Bible zirtîrtu thiam takte chu hmuh theihin an la awm a. B.C.E. 455-ah khân, Jerusalem khuaa hmun zau laiah naupang tam tak pawh tiamin Juda mipuiho chu an kal khâwm a ni. Bible zirtîrtute chuan “Pathian dân bua mi chu fiah takin an chhiar a.” Chu mai a ni lo, “a awmzia an hrilhfiah a, . . . an chhiar chu an hriat chiantîr zêl” a ni.—Nehemia 8:1-8.

A hnu kum zangaah, Isua Krista chuan chutiang zirtîrna hna chu a thawk a. Ani chu zirtîrtu anga hriat lâr tak a ni hial a. (Johana 13:13) Mipui tam tak a zirtîr a, a mi mal pawhin a zirtîr bawk. Ṭum khat chu, Tlâng Chunga Thusawi lâr tak chu mipui tam tak hmaah a sawi a, “mipuiten a thu zirtîr chu mak an ti hle a.” (Matthaia 5:1, 2; 7:28) C.E. 33 nipui lai khân, Isua chuan Jerusalem khaw bul thingtlâng khaw kawnga kal a zirtîr pahnihte chu ‘Pathian Lehkha Thute a hrilhfaih a ni.’—Luka 24:13-15, 27, 32.

Isua zirtîrte pawh chu Pathian Thu zirtîrtute an ni bawk a. Ṭum khat chu, Ethiopia mi lian pakhatin Pathian Lehkha Thu a chhiar a. Zirtîr Philipa chuan a va pan hnai a: “I chhiar kha a awmzia i hria em?” tiin a zâwt a ni. “Tuma mi hrilhfiah lovin engtin nge ka hriat theih ang,” tiin a chhâng a. Philipa chuan a thu chhiar awmzia chu a hrilhfiah ta a ni.—Tirhkohte 8:27-35.

Hmân laia Bible zirtîrtute ang bawkin, tûn laia Jehova Thuhretute chuan khawvêl puma ram 239-ah Bible zirtîrna hna chu an thawk a. (Matthaia 28:19, 20) Chawlhkâr tin hian Bible thute hre thiam tûrin mi maktaduai kua aia tamte chu an ṭanpui a ni. Chûng zînga tam takte chu Kristian sakhaw vuantu an ni lo. Hêng zirnate hi inah emaw, hmun remchâng dangah emaw a thlâwna neih theih a ni a. Ṭhenkhat phei chuan phone emaw, Internet video hmang emawin an zir hial a ni.

He ruahmanna i hlâwkpui theih dân kim chang taka hriat nân Jehova Thuhretute zînga tupawh chu khawngaihin be pawh ang che. Bible chu hriat thiam theih loh nih ahnêkin, ‘hna ṭha tinrêng thawk tûra kim taka inthuama i famkim’ theih nân “zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt” a ni tih chu i hmu chhuak ang.—2 Timothea 3:16, 17. (wp15-E 12/01)