1, 2. Bible hun laiin Pathianin eng nge a tih a, tûn laiah mi ṭhenkhatin an dam loh hian eng nge an ngaihtuah mai theih?

NASA taka i dam lo ngai tawh a nih chuan, heti hian i inzâwt mai thei a: ‘Ka ṭha chhuak ang em?’ tiin. A nih loh leh i chhûngkaw zînga mi emaw, i ṭhian emaw a dam loh hian, a ṭha chhuak ang em tih i ngaihtuah mai thei a. Kan hmangaih takte nêna hrisêlna ṭha neih vek kan duh chu thil pângngai tak a ni. Bible-ah chuan, an ṭha chhuak ang em tih hre duhtu dam lo ṭhenkhat chanchin kan chhiar a. Entîr nân, Ahaba leh Jezebeli te fapa, Lal Ahazia chuan a inhliamna ata a ṭha chhuak leh thei ang em tih a ngaihtuah a ni. A hnuah, Suria Lal Benhadada chu a dam lo va, a ṭha chhuak leh thei ang em tih a zâwt a ni.—2 Lalte 1:2; 8:7, 8.

² Bible chuan hmân lai hian Jehova chuan a thil mak tihtheihna hmangin mite a tidam a, a zâwlneite hmangin mitthite pawh a kai tho tih min hrilh bawk. (1 Lalte 17: 17-24; 2 Lalte 4:17-20, 32-35) Tûn laiah pawh, dam lo ṭhenkhat chuan an ṭhat chhuah leh theih nân Pathianin thil engemaw a ti ang em tih an ngaihtuah mai thei a ni.

3-5. Jehova leh Isua’n eng nge an tih theih a, eng zawhnate nge kan sawiho vang?

 ³ Jehova chuan mite hrisêlna khawih danglam tûrin thiltihtheihna a nei a ni. Mi ṭhenkhat chu natnain a hrem a, chûng zîngah chuan Abrahama hun laia Pharaoa leh a hnuah Mosia farnu, Miriami te an tel a. (Genesis 12:17; Number 12:9, 10; 2 Samuela 24:15) Israel mite chu a chunga an rinawm loh khân, ‘natna leh hri tinrêngin’ a hrem bawk a. (Deuteronomy 28:58-61) Ṭum dangah chuan Jehova’n a mite chu natna lakah a vênghim thung a ni. (Exodus 23:25; Deuteronomy 7:15) An zînga ṭhenkhat phei chu a tidam hial a. Entîr nân, Joba chu thih duh hial khawpa a dam loh khân, a tidam a ni.—Joba 2:7; 3:11-13; 42:10, 16.

⁴ Jehova chuan dam lote tidam tûrin thiltihtheihna a nei tih kan hre chiang a ni. Isua pawhin natna a tidam thei a. Leia a awm lai khân, phâr natna leh phûngzâwl natna ang chite chu a tidam a. Mitdelte leh zengte pawh a tidam bawk. (Matthaia 4:23, 24 chhiar rawh; Johana 9:1-7) Chûng thilmak tihte chuan khawvêl thara Isua thil tih tûr ropui takte nghâkhlel tûrin min ṭanpui a. Chu mi hunah chuan, “chu mi khuaa awm chuan ‘ka dam lo ve,’ a ti lo vang.”—Isaia 33:24.

⁵ Mahse, nasa taka kan dam loh hunah Jehova, a nih loh leh Isua’n thilmak tihna hmanga tûna min tihdam chu kan beisei thei ang em? Inenkawlna kan thlan hunah eng nge kan ngaihtuah ang?

6. Kum zabi khatnaa Kristiante thilmak tih chungchângah Bible-in eng nge a sawi?

⁶ Kum zabi khatnaah khân, Jehova chuan Kristiante chu thlarau thianghlima hriak thihin, an zînga ṭhenkhat hnênah thilmak tihtheihna a pe a ni. (Tirhkohte 3:2-7; 9:36-42) Entîr nân, dam lote an tidam theiin ṭawng chi hrang hrangin thu an sawi thei a. (1 Korinth 12:4-11) Mahse, Bible sawi ang ngeiin, chûng thilmak tihnate chu tihtâwp a ni. (1 Korinth 13:8) Chuvângin, tûn laiah keini emaw, kan hmangaihte emaw tidam tûrin Pathianin thilmak a tih chu kan beisei thei lo.

7. Engtin nge Sâm 41:3 chuan min tihchak theih?

⁷ Mahse, i dam loh chuan, hmân laia a chhiahhlawhte chunga a tih ang bawkin, Jehova chuan a thlamuanin a ṭanpui ang che. Lal Davida chuan: “Retheite ngaihtuah mi chu a eng a thâwl e, mangan nî chuan LALPAN ani chu a chhanhim ang. LALPAN ani chu humhimin a tinung ang,” tiin a ziak a. (Sâm 41:1, 2) Mahse, Davida chuan chûng hun laia mi retheite ngaihtuahtu mi ṭha chu a thi ngai lo vang a tihna a ni lo. A nih leh, engtin nge chu mi ṭha chu Jehova’n a ṭanpui ang? Davida chuan: “LALPAN a chauhna mut hmunah chuan a tichak ang a: nangin a dam loh laiin a mutna i siamsak vek ṭhîn,” tiin a hrilhfiah a ni. (Sâm 41:3) Jehova chuan a chhiahhlawhte hrehawm tawrh chu a hre chiang hle a, anni chu a theihnghilh lo. Huaisenna leh finna a pe thei a. Jehova chuan mihring taksa chu mahnia intidam thei tûrin a siam bawk.

8. Sâm 41:4-a sawi angin, thih ngama a nat lai khân, Davida’n Jehova hnênah eng nge tihsak tûra a ngen?

⁸ Sâm 41-ah, Davida chuan nasa taka a dam loh laia a chauh thu leh a mangan thu min hrilh bawk a. Chu chu a fapa Absaloma’n a lalna chhuhsak a tum lai niin a lang. Thih ngama a nat avângin Absaloma chu a dang thei lo va. A chhûngkaw buaina chu Bath-sebi nêna a thil sual tih vâng a ni tih a hre bawk. (2 Samuela 12:7-14) Chuvângin, eng nge a tih? “Aw LALPA, mi khawngaih la, ka nunna hi tidam ang che, i chungah thil ka tisual si a,” tiin a ṭawngṭai a ni. (Sâm 41:4) Jehova’n a sualna a ngaidam tawh tih a hria a, a dam loh lai chuan Pathian ṭanpuina a rinchhan a ni. Mahse, Davida chuan Jehova hnên aṭanga mak taka tihdamna a beisei em?

9. (a) Jehova’n Lal Hezekia tân eng nge a tihsak? (b) Davida’n Jehova hnên aṭangin eng nge a beisei?

 ⁹ Pathianin mite tihdam châng a nei tih chu a dik ngei mai. Entîr nân, Lal Hezekia chu thih ngamin a nâ a, Jehova’n a tidam a. A nunna chu kum 15-in a pawh seisak a ni. (2 Lalte 20:1-6) Mahse, Davida chuan mak taka tihdamna a beisei lo. Chu ai chuan, Pathianin “reitheite ngaihtuah mi” tupawh a ṭanpui angin, ani pawh a ṭanpui ang tih a beisei zâwk a ni. Jehova nêna inlaichînna ṭha tak a neih avângin, amah thlamuan tûr leh a dam loh laia ngaihsak tûrin a ngên thei a. A taksa tidam a, ṭha chhuak leh tûrin a dîl bawk. Chutianga min ṭanpui ve tûrin Jehova kan dîl thei a ni.—Sâm 103:3.

10. Trophima leh Epaphrodita chungah eng thil nge thleng a, chu chuan eng nge min zirtîr?

¹⁰ Kum zabi khatnaah khân, tirhkoh Paula leh mi dangte chuan dam lote tihdam theihna an nei chung pawhin, Kristian zawng zawngte chu thilmak tihna hmanga tihdam an ni lo. (Tirhkohte 14:8-10 chhiar rawh.) Tirhkoh Paula chuan khawsik leh santên vei Publia pa chu a tidam a. Ani chuan “a ṭawngṭai a, a chungah a kutte a nghat a, a tidam ta a.” (Tirhkohte 28:8) Mahse, Paula chuan a mi hriat apiangte chu a tidam vek lo. A ṭhian Trophima nên missionary-in an zin a. (Tirhkohte 20:3-5, 22; 21:29) Trophima a dam lo khân ani chuan a tidam lo. Chuvângin, Trophima chu Paula nêna zin zawm thei tawh lovin, Mileti khuaah a dam thlengin a awm ta a ni. (2 Timothea 4:20) Paula ṭhian dang leh Epaphrodita chu thih ngamin a nâ a. Mahse, Bible chuan Paula’n a tihdam thu a sawi lo a ni.—Philippi 2:25-27, 30.

11, 12. Luka chungchângah eng nge kan hriat a, engtin nge Paula a ṭanpui mai theih?

¹¹ Luka chu doctor niin, Paula nên an zin a. (Tirhkohte 16:10-12; 20:5,6; Kolossa 4:14) Missionary-a an zinnaa Paula leh mi dangte an dam loh hunah a ṭanpui ngei a rinawm. (Galatia 4:13) Isua sawi ang ngeiin “mi bawrhsâwmte” chuan doctor an mamawh a ni.—Luka 5:31.

¹² Luka chu hrisêlna lama thurâwn pêk nuamtitu satliah mai a ni lo. Doctor zir chhuak a ni. Bible chuan Luka’n doctor a zirna hmun emaw, hun emaw chu a sawi lo va. Mahse, Paula’n Kolossa khuaa mite hnêna a lehkha thawnah Luka’n chibai a bûk thu a ziah tel chu a chuang a ni. Chuvângin, Luka chuan Kolossa khaw bul, Laodikei khuaa damdawi lam zirna school-ah a zir a ni thei ang. Chu bâkah, Luka chuan Chanchin Ṭha leh Tirhkohte bu a ziak lai hian, damdawi lam ṭawngkam dik tak a hmang a. Doctor a nih avângin, Isua’n mite a tihdamna chanchin a ziah hian chipchiar lehzualin a ziak a ni.

13. Hrisêlna chungchânga thurâwn kan pêk hma, a nih loh leh kan pawm hmain eng nge kan hriat reng ang?

¹³ Tûn laiah, kan unaute zînga tumah hian thilmak tihtheihna an nei lo va. Mahse, min ṭanpui an duh avângin ṭhenkhat chuan kan ngên lo chung pawhin, thurâwn min pe mai thei a ni. Thurâwn ṭhenkhat chu a hlauhawm lo. Entîr nân, Paula chuan Timothea hnênah uain tlêm tê in tûrin thurâwn a pe a. Timothea chuan pum lam ṭhat lohna a neih chhan chu tuibawlhhlawh a in vâng a ni thei ang. * (Footnote en rawh.) (1 Timothea 5:23 chhiar rawh.) Mahse, kan fîmkhur a ngai. Unaupa pakhat chuan damdawi chi khat emaw, damdawia hman chi hnim chi khat emaw, a nih loh leh thil ṭhenkhat ei tûr emaw, ei lo tûr emawin min hmin a tum mai thei a. A chhûngte zînga a natna ang nei tuemawin a lo ṭhatpui tawh tih min hrilh pawh a ni mai thei. Mahse, chu chu kan tân a ṭha ve ang tihna a ni lo. Mi tam tak chuan damdawi chi khat, a nih loh leh inenkawl dân chi khat an hmang chung pawhin, ṭhat lohna a nei thei tho tih kan hre tûr a ni.—Thufingte 27:12 chhiar rawh.

14, 15. (a) Eng ang mite lakah nge kan fîmkhur ang? (b) Thufingte 14:15 aṭangin eng nge kan zir theih?

¹⁴ Kan vai hian, nun hlim awm tak nei a, Jehova tâna kan thawh rim theih nân hrisêlna ṭha neih chu kan duh ṭheuh va. Mahse, mi ṭha famkim lo kan nih avângin natna zawng zawng chu kan pumpelh thei lo. Kan nat hian, inenkawlna chi hrang hrang a awm thei ang a, inenkawl dân tûrah thu tlûkna siam tûrin dikna kan nei a. Vânduaithlâk takin, mi ṭhenkhat leh company-te chuan kan natna tidam thei inenkawlna an hmu chhuak tih an sawi a. Chu chu pawisa tam tak an duh vâng a ni. Anni chuan mi tam takin he inenkawlna hi an ṭhatpui tih an sawi mai thei a. Kan dam loh chuan, zia awm a, dam rei tûra min ṭanpui thei tûr thil engpawh tihchhin kan duh mai thei a. Mahse, Bible Thua zilhna thu: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tih hi kan theihnghilh tûr a ni lo.—Thufingte 14:15.

¹⁵ Mi remhria, a nih loh leh mi fing kan nih chuan, a bîk takin zirna ṭha tak nei si lo va miin thurâwn min pêk hunah kan fîmkhur ang. Heti hian kan inzâwt thei ang: ‘Ani chuan he vitamin, damdawia hman chi hnim chi khat, a nih loh leh ei tûr inchawhte chu mite’n an ṭhatpui tih a sawi a; mahse, chu chu a dik ngei tih ka hre chiang em? Mi dangte’n lo ṭhatpui ta pawh ni se, ka ṭhatpui ve dâwn tih engtin nge ka hriat? Zir bingna neih belhin, ka ṭhat lohna enkawl dân tûr zirtîrna ṭha tak dawng tuemaw chu ka bia ang em?’ tiin.—Deuteronomy 17:6.

16. Kan hrisêlna chungchânga thu tlûkna kan siam hunah eng nge kan ngaihtuah ang?

¹⁶ Natna hriat nâna test lâk tûr emaw, inenkawlna  tûr emaw chungchânga thu tlûkna siam a ngaih hunah “rilru fel tak,” a nih loh leh remhriatna kan neih a ngai a. (Tita 2:12-13) Test dân tûr leh inenkawl dân tûr chu a danglam riau nia a lan chuan remhriatna neih chu a pawimawh zual bîk a ni. Kan doctor pan chuan test leh inenkawlnain hna a thawh dân tûr chu min hrilhfiah thei em? A hrilhfiahna pêk chu a dangdai em? Doctor tam tak chuan he test leh inenkawlnain mi a tidam thei tih an pawm em? (Thufingte 22:29) Tuemaw chuan doctor-te pawhin an la hriat loh, hmun hla tak aṭanga inenkawlna thar hmuh chhuah a nih thu min hrilh mai thei a. Mahse, chutianga tihdam an awm tih finfiahna a awm em? Ṭhenkhat bâwlhlo engemaw tak emaw, a chakna hriat loh emaw hmanga enkawl che chu an tum mai thei bawk. Chu chu a hlauhawm hle thei a ni. Pathian chuan ramhuai thiltihtheihna leh dâwithiamna hmang lo tûrin min vaukhân tih hre reng ang che.—Deuteronomy 18:10-12; Isaia 1:13.

17. Eng duhna pângngai tak nge kan neih?

¹⁷ Kum zabi khatnaa governing body chuan kohhran unaute hnênah an pumpelh ngai thil engemaw chungchâng hrilhin lehkha a thawn a. Lehkha thawn tâwpah chuan governing body chuan: “Hêng hi in bân chuan in tân a ṭha ang. Dam takin awm rawh u,” tiin a ziak a ni. (Tirhkohte 15:29) A tâwpna ṭawngkam tlêm tê chu ṭawngkam ṭhaa inthlahna mai ni mah se, chu chuan hrisêlna ṭha neih kan duh chu thil pângngai tak a ni tih min hriat chhuahtîr a ni.

18, 19. Khawvêl tharah eng nge kan beisei theih?

¹⁸ Mi ṭha famkim lo ka nih avângin, natna zawng zawng kan pumpelh thei lo va. Kan dam loh hian, thilmak tihna hmanga min tidam tûrin Jehova chu kan beisei lo. Mahse, nakina Pathianin min tihdam hlen hun tûr chu kan beisei thei a ni. Thupuan 22:1, 2-ah tirhkoh Johana chuan mi tinte tidamtu tûr “nunna tui” leh “nunna thing” chungchâng a sawi a. Hei hi min tidam tûra tûna kan ei theih, a nih loh leh khawvêl thara kan ei theih tûr damdawia hman chi hnim chungchâng sawina a ni lo. Chu ai chuan, chatuana kan nun theih nâna Jehova leh Isua thil tih tûrte a sawina mai zâwk a ni.—Isaia 35:5, 6.

¹⁹ Chu hun hlimawm tak chu kan nghâkhlel hle a. Mahse, tûnah hrih chuan Jehova’n min hmangaih ṭheuhvin, kan dam loh huna kan awm dânte a hre thiam tih kan ring nghet tlat a ni. Kan dam lo a nih chuan Davida ang bawkin Pathian Jehova’n min kalsan lo vang tih kan ring nghet tlat a. Ani chuan a mi rinawmte chu a ngaihsak reng dâwn a ni.—Sâm 41:12. (ws15-E 12/15)