1-3. (a) Engvângin nge Pathian ngaihtuahna leh ṭawng hman chu mihringte ngaihtuahna leh ṭawng hman aia a chungnung? (b) He thuziakah hian eng nge kan zir ang?

JEHOVA chuan nunna leh hlimna mahni chauhva neih a duh loh avângin, vântirhkohte a siam a, a hnuah mihringte a siam a ni. (Sâm 36:9; 1 Timothea 1:11) Ani chuan tirhkoh Johana’n “Thu” tia a koh chu a siam hmasa ber a. (Johana 1:1; Thu Puan 3:14) Chu a siam hmasak ber Isua chu a be pawh a, a ngaihtuahna leh a rilru veizâwngte pawh a hrilh bawk. (Johana 1:14, 17; Kolossa 1:15) Tirhkoh Paula chuan vântirhkohte pawh an inbe pawh a, an ṭawng hman chu mihringte ṭawng hman lakah a danglam hle tih a sawi.—1 Korinth 13:1.

² Pathian Jehova chuan a thil siam vântirhkoh tlûklehdingâwn tam tak leh mihringte chanchin engkim a hria a. Ani chuan mi maktaduai tam takte ṭawngṭaina chu a rualin a ngaithla thei a, eng ṭawng pawh hmang se, an ṭawngṭaina chu a hre thiam a ni. Chûng ṭawngṭaina zawng zawng a ngaihthlâk lai chuan, vântirhkohte nên inbiak pawhna neiin kaihhruaina a pe bawk. Chûng zawng zawng ti thei tûr chuan Pathian Jehova ngaihtuahnate leh ṭawng hman chu mihringte ngaihtuahna leh ṭawng hman ai chuan a chungnung zâwk ngei ang. (Isaia 55:8, 9 chhiar rawh.) Chuvângin mihringte  a biak pawh hian kan hriatthiam theih nân a sawi tum chu a siam rem a ni.

³ He thuziakah hian, Pathian Jehova’n mihringte fiah taka a biak pawh dân kan zir ang a. A biak pawh dân chu dinhmun azira a thlâk danglam dân kan hmu bawk ang.

4. (a) Pathian Jehova’n Mosia te, Samuela te, leh Davida te chu eng ṭawngin nge a biak? (b) Bible-ah eng thu nge chuang?

⁴ Eden huana mihring hmasa ber Adama a biak khân, Jehova chuan hmân lai Hebrai ṭawng a hman a rinawm hle a. A hnuah, Jehova chuan Mosia te, Samuela te, leh Davida te chu a be pawh a ni. Anni chuan an Hebrai thu malte leh ziak dânte angin ziak mah se, an thil ziah chu Pathian ngaihtuahna a ni. Pathian Jehova thusawite chu an ziak a, Pathian leh a mite inlaichînna chanchin pawh an ziak bawk a ni. Entîr nân, Bible-ah chuan an rinna leh Pathian an hmangaihna mai bâkah, an thil sual tihte leh an rinawm lohnate pawh ziak a ni bawk. Hêng zawng zawng hi kan hlawkpui atâna ziak a ni.—Rom 15:4.

5. Pathianin mihringte biak pawh nân Hebrai ṭawng chauh a hmang em? Hrilhfiah rawh.

⁵ Pathian Jehova chuan mite biak pawh nân Hebrai ṭawng chu a hmang reng lo. Israel mite chu Babulon lak ata chhuah zalên an nih khân, an zinga ṭhenkhat chuan an nî tin nunah Aramaic ṭawng an hmang a. Chuvângin, Daniela te, Jeremia te, leh Ezra te chuan Bible bu ṭhenkhat chu Aramaic ṭawngin an ziak a ni. * (Footnote en rawh.)

6. Engvângin nge Hebrai Pathian Lehkha Thu chu Grik ṭawnga lehlin a nih?

⁶ A hnuah, Alexander Ropuia’n khawvêl ram tam tak a hneh chuan, Grik ṭawng tuallêng, a nih loh leh Koine Grik ṭawng chu ram tam takah hman a lo ni a. Juda mi tam takin Grik ṭawng an hmang ṭan a, a tâwpah phei chuan Hebrai Pathian Lehkha Thu chu Grik ṭawnga lehlin a ni. Chu Bible lehlin chu Septuagint tia koh a ni a. Chu chu Bible lehlin hmasa ber niin, a pawimawh ber zînga mi a ni. Mi thiamte chuan Septuagint chu ṭawng lettu mi 72 thawh chhuah a nih an ring a. * (Footnote en rawh.) Ṭhenkhatin Hebrai Pathian Lehkha Thu aṭanga a ngial a ngana an lehchhuah laiin, mi dangte erawh chuan chutiangin an let lo va. Chutichung pawhin, Grik ṭawng hmang Judate leh Kristiante chuan Septuagint chu Pathian Lehkha Thu a ni tih an ring tlat tho a ni.

7. Isua’n a zirtîrte zirtîr nân eng ṭawng nge a hman?

⁷ Isua leia a awm lai khân, Hebrai ṭawng a hman ngei a rinawm a. (Johana 19:20; 20:16; Tirhkohte 26:14) Chutih hun laia lâr Aramaic ṭawngkam ṭhenkhat pawh hman châng a nei ve ngei bawk ang. Mahse, Mosia leh zâwlnei dangte hman hmân lai Hebrai ṭawng pawh a hria a ni; an thuziakte chu inkhâwmna inah chawlhkâr tina chhiar a ni ṭhîn si a. (Luka 4:17-19; 24:44, 45; Tirhkohte 15:21) Chutih lai chuan Grik ṭawng leh Latin ṭawngte pawh hman ni mah se, Bible-in Isua’n chu ṭawngte a hman thu a sawi lang lo.

8, 9. Engvângin nge Kristian tam takin Grik ṭawng an hman a, chu chuan Pathian Jehova chungchâng eng nge min zirtîr?

⁸ Isua hnungzuitu hmasate chuan Hebrai ṭawng an hmang a; mahse, Isua thih hnu chuan ṭawng dangte pawh an hmang a ni. (Tirhkohte 6:1 chhiar rawh.) Chanchin ṭha a darh zêl chuan, Kristian tam takte chuan Hebrai ṭawng  aiin Greek ṭawng an hmang zâwk a. Grik chu ṭawng tuallêng a nih avângin Matthaia, Marka, Luka, leh Johana lehkhabute chu Grik ṭawnga theh darh a ni. * (Footnote en rawh.) Tirhkoh Paula lehkha thawnte leh Bible bu dangte chu Grik ṭawnga ziak a ni bawk.

⁹ Kristian Grik Pathian Lehkha Thu ziaktute’n Hebrai Pathian Lehkha Thu an lâk chhâwn hian Septuagint Bible an hmang ṭhîn a, chu chu a ngaihvenawm hle. A châng chuan, chûng an lâk chhâwnte chu atîra Hebrai thu mal an rem dân nên chhe têin a inang lo va. Chuvângin, ṭha famkimlo ṭawnglettute hna thawh chu tûn laia kan Bible neihah a tel ta a. Hei hian, Pathian Jehova chuan ṭawng chi khat emaw, hnam pakhat emaw chu a dangte aia ṭha zâwk angin a thlîr lo tih min zirtîr a ni.—Trihkohte 10:34 chhiar rawh.

10. Pathian Jehova’n mihringte a biak pawh dân aṭangin eng nge kan hriat?

¹⁰ Pathian Jehova’n mihringte chu dinhmun azirin a be pawh tih kan hre tawh a. Ani chuan amah leh a thil tumte kan hriat theih nân ṭawng chi khat hman bîk nei tûrin min beisei lo. (Zakaria 8:23; Thupuan 7:9, 10 chhiar rawh.) Bible ziaktute chu Jehova’n a thlarauvin a thâwk khum tih kan hre bawk a; mahse, mahni irâwm chhuaka an ziah a phal a ni.

11. Engvângin nge mihringte’n ṭawng chi hrang hrang an hman chu Jehova tân harsatna a tlin loh?

¹¹ Mihringte’n ṭawng chi hrang hrang hmang mah se, chu chu Jehova tân harsatna a tling lo. Engtin nge kan hriat theih? Bible-ah hian Isua ṭawngkam hman tlêm tê chu a ngai ngaiin a lang a. (Matthaia 27:46; Marka 5:41; 7:34; 14:36) Mahse Jehova chuan Isua thuchah chu Grik ṭawnga ziak leh lehlin a ni tih a tichiang a, a hnuah ṭawng dangin a lehlintîr a ni. Chu bâkah, Pathian Thu chu Juda mite leh Kristiante hmanga vawi tam tak copy chhâwn a nih avângin, Pathian thuchah chu vawn ṭhat a ni bawk. Chûng copy-te chu ṭawng chi tam lehzuala lehlin a ni leh a. Krista thih hnu kum 400 vêlah, John Chrysostom-a chuan Isua thu zirtîrte chu Suria, Aigupta, India, Persia, leh Ethiopia ram ṭawngte bâkah, ṭawng dang tam taka lehlin a ni tawh tih a sawi a ni.

12. Engtin nge Bible chuan beihna a tawh?

¹² Mihring chanchinah hian Bible letlingtute leh sem chhuaktute chuan vawi tam tak beih an tâwk a. Isua pian hnu kum 300 vêlah khân, Rom Lal Diocletian-a chuan Bible copy zawng zawngte tichhe vek tûrin thupêk a chhuah a. A hnu kum 1,200 vêlah William Tyndale-a chuan Bible chu Sâp ṭawngin a letling ṭan a. Ani chuan Pathianin dam reina min pêk chuan, lo nei mi naupang pawh puithiam aia Bible thu hre zâwk tûrin ka siam ang a ti ṭhîn. Tihduhdahna  avângin, Tyndale-a chu Bible letling a, print chhuak thei tûrin England aṭangin Europe-ah a tlânchhia a. Sakhaw hruaitute’n an zawn hmuh zawng zawng hâl chhiat tum mah se, Tyndale-a lehlin chu mi tam tak hnêna sem a ni. A tâwpah chuan, Tyndale-a chu a hrawka an reh hlum hnuah bana hâl a ni. Mahse, a Bible lehlin chu sakhaw hruaitute beihna lakah a dam chhuak a, chu chu King James Version tih Bible buatsaih nâna hman a ni.—2 Timothea 2:9 chhiar rawh.

13. Bible kutziak lehkha hluite zir chiannain eng nge a târ lan?

¹³ Bible copy hlui berte zîngah tihsual leh danglamna chhe tê a awm tih chu a dik ngei mai. Mahse, Bible lama mi thiamte chuan kutziak thu a sang tel te, kutziak lehkha ṭhenkhat te, leh Bible lehlin hlui dangte chu ngun takin an zir a. Khaikhinna an neih hnu chuan, Bible châng tlêm têah chauh danglamna chhe tê a awm a, chu chu a tê tham hle tih an hria a ni. Mahse, Bible thuchah chu a inthlâk lo. Hetianga zirnate hian tih tak zeta Bible zirtute chu tûn laia kan neih hi Pathian Jehova thâwk khum Thu a ni tak zet tih a rinnghehtîr a ni.—Isaia 40:8. * (Footnote en rawh.)

14. Tûn laiah Bible hi eng ang taka hmuh theih nge a nih?

¹⁴ Bible chuan vawi tam tak beihna a tâwk chung pawhin, ṭawng 2,800 chuanga lehlin a ni tawh a. Tûn laia hmuh theih lehkhabu dangte aiin a tam zâwk daih a ni. Mi tam takin Pathian ring lo mah se, a Thu chu lehkhabu azawnga sem chhuah tam ber a ni chho zêl a. Bible lehlin ṭhenkhat chu chhiar a nuam lovin, dik chiah lo mah se, chûng chuan beiseina leh chatuan nunna thuchah tluangtlam tak chu a pe chhuak deuh vek tho a ni.

15. (a) Engtin nge kum 1919 aṭang khân, kan Bible thu leh hla chhuah chu tihdanglam a nih? (b) Engvângin nge kan thu leh hla chhuah chu Sâp ṭawnga ziak hmasak a nih?

¹⁵ Kum 1919 khân, Bible zirlai tlêm tê chu “Bawi rinawm, fing tak” ni tûra ruat an ni a. Chutih lai chuan, bâwih rinawm chuan Pathian mite biak pawh nân Sâp ṭawng hi an hmang ber a ni. (Matthaia 24:45) Mahse, tûn laiah chuan Bible thu leh hla chhuahte chu ṭawng 700 chuanga tihchhuah a ni a. Hmân laia Grik ṭawng an hman ang bawkin tûn laiah pawh Sâp ṭawng hi sumdâwnna leh lehkha zirna lamah an hmang tam ber a. Chuvângin kan thu leh hla chhuah chu Sâp ṭawnga chhuah hmasak ber a ni a, chu mi hnuah ṭawng danga lehlin a ni.

16, 17. (a) Pathian mite’n eng nge an mamawh? (b) Engtin nge chu an mamawhte chu pêk an nih? (c) Unau Knorr-a’n eng nge a duh?

¹⁶ Kan thu leh hla chhuah zawng zawngte hian Bible a ṭanchhan a. A hmasa berin, Pathian mite chuan kum 1611-a peih fel  King James Version chu an hmang a ni. Mahse, a ṭawng hman chu a khûnin hriatthiam a harsa a. Kutziak lehkhabu hluite chuan Pathian hming a sâng têl hmang mah se, chu Bible-ah chuan Pathian hming chu hmun tlêm tê-ah chauh a chuang a ni. Chu lehlinah chuan lehlin sualte leh kutziak lehkhabu hlui bera tel lo Bible châng belhchhahte a awm bawk. Sâp ṭawnga lehlin Bible dangahte pawh chutiang buaina chu a awm a ni.

¹⁷ Pathian mite chuan dik tak leh hriatthiam awlsam taka lehlin Bible an mamawh tih a chiang hle. Chuvângin, New World Bible Translation Committee chu din a ni a, he committee-a unaute chuan 1950 aṭanga 1960 chhûngin Bible bu a ṭhen laite chu an tichhuak a. Volumes rukte zînga a hmasa ber chu August 2, 1950 inkhâwmpuiah tihchhuah a ni. Chu inkhâwmpuiah, unau Knorr-a chuan Pathian mite’n tûn laia Bible lehlin, dik tak leh hriatthiam awlsam tak, thutak chiang lehzuala hre tûra ṭanpuitu tûr an mamawh tih a sawi. Krista zirtîrte’n atîra an ziah chhiar awlsam leh hriatthiam awlsam tak ang Bible lehlin chu an mamawh a. Unau Knorr-a’n New World Translation chuan Jehova hre tûra mi maktaduai têlte a ṭanpui chu a duh a ni.

18. Engin nge Bible lehlinna chu ṭanpui?

¹⁸ Kum 1963-ah chuan Unau Knorr-a duh thusâm chu a thleng ta a. New World Translation of the Christian Greek Scriptures chu Dutch ṭawng te, France ṭawng te, German ṭawng te, Italian ṭawng te, Portuguese ṭawng te leh Spanish ṭawngtein hmuh theih a ni ta. Kum 1989-ah Jehova Thuhretute Governing Body chuan Bible letlingtute ṭanpui tûrin world headquarter-ah department thar a din a ni. Kum 2005-ah Vênnainsâng nei tawhte ṭawnga Bible lehlin phalna chu a pe chhuak a. Chuvângin, tûnah chuan New World Translation chu a bu pum emaw, a ṭhen emaw chu ṭawng 130 ai tama hmuh theih a ni tawh a ni.

19. Kum 2013-ah chuan eng thil pawimawh tak nge thleng a, a dawta thuziakah eng nge kan hriat ang?

¹⁹ New World Translation tihchhuah hmasak hun aṭanga Sâp ṭawng hman dân a inthlâk danglam avângin, tûn lai ṭawnga thlâk a ngai ta a. October 5-6, 2013, chawlhkâr tâwpah chuan ram 31-a mi 1,413,676-te chu Watch Tower Bible and Tract Society of Pennsylvania kum tin inkhâwmah a mi malin emaw, Internet hmanga thlunzawmin emaw an tel a. Governing Body member pakhat chuan Sâp ṭawnga New World Translation siam ṭhat chu a tlângzarh a. Ngaithlatute chu an phûr hle a, he lehlin thar copy khat an han dawn chuan mi tam tak chu an mittui a tla hial a ni. Thusawituin chu Bible thar aṭanga a châng ṭhenkhat a han chhiar chuan, chhiar a nuam zâwkin hriatthiam a awlsam zâwk tih a lang chiang hle a ni. A dawta thuziakah chuan he Bible thar chungchâng tam zâwk leh chu chu ṭawng danga lehlin a nih dân kan hria ang. (ws15-E 12/15)