1. (a) Pathianin Adama hnênah eng hna nge a pêk? (b) Chuta ṭang chuan engtin nge Pathian mite’n ṭawng theihna thilpêk chu an hman?

PATHIAN JEHOVA chuan mihringte chu ṭawng theihna thilpêk a pe a. Eden huanah khân, Pathianin Adama chu ramsa chi tin rengte hming a pêktîr a ni. Ani chuan ramsa tinrêngte chu hming awmze nei tak a pe ṭheuh va. (Genesis 2:19, 20) Chuta ṭang chuan, Pathian mite chuan Jehova fak nân leh mi dangte hnêna a chanchin hrilh nân ṭawng theihna thilpêk chu an hmang ṭan a. Tûn hnaiah hian, Pathian mite chuan mi tam takin Jehova chungchâng an zir theihna tûrin he thilpêk hi Bible lehlin nân an hmang a ni.

2. (a) Eng thu bulte nge New World Bible Translation Committee member-te chuan an ṭawng lehlinnaah an zawm? (b) He thuziakah hian eng nge kan zir ang?

² Bible lehlin a sâng têlin a awm a; mahse, ṭhenkhat chu a dang aiin a dik zâwk a. Dik taka Bible letling tûrin, New World Bible Translation Committee chuan thu bul pathum an zâwm a: (1) Pathian hming chawimawi leh atîra ziaka a hming a lanna apianga lantîr. (Matthaia 6:9 chhiar rawh.) (2) A theih phawt chuan atîra thute a ngial a ngana lehlin. A theih loh hunah a awmze dik tak lehlin. (3) Chhiar nuam leh  hriatthiam awlsam tûr ṭawngkamte hman a ni. * (Footnote en rawh.) (Nehemia 8:8, 12 chhiar rawh.) Hêng thu bul pathumte hi ṭawng chi hrang 130 aia tama New World Translation letlingtute chuan an hmang tawh a. He thuziakah hian, kum 2013-a New World Translation siam ṭhatnaa hêng thu bulte hman a nih dân leh ṭawng danga letlingtute’n an hman dân chu kan zir ang.

3, 4. (a) Kawiah nge Tetragrammaton chu kan hmuh theih? (b) Bible lehlin tam tak chuan eng angin nge Pathian hming a tih?

³ Tetragrammaton tia koh Hebrai hawrawp pali chu Pathian hming aia hman a ni a. Chu chu Dead Sea Lehkhazial ang chi, Hebrai kutziak lehkha tam takah kan hmu thei a ni. Grik Septuagint copy ṭhenkhatah pawh kan hmu thei bawk. Chûng copy-te chu Krista pian hma kum 200 vêl aṭanga Krista thih hnu kum 100 vêl inkâra siam a ni a. Mi tam tak chuan kutziak lehkhabua Pathian hming a lan tam dân an hmuh hian mak an ti hle.

⁴ Bible-ah Pathian hming a chuang tûr a ni tih a chiang hle. Chuti chung pawhin, ṭawng lehlin tam tak chuan Pathian hming a hmang chuang lo. Entîr nân, New World Translation of the Christian Greek Scriptures chhuah hnu kum hnih vêl lekah the American Standard Version siam ṭhat chu tlângzarh a ni a. Kum 1901-a chhuak chu Bible-ah chuan Pathian hming a chuang a: mahse, kum 1952-a siam ṭhatah chuan a chuang tawh lo a ni. Engvângin nge? Chu mi letlingtute’n Pathian hming hman chu “thil tihâwm lo tak” nia an ngaih vâng a ni. Sâp ṭawng leh ṭawng danga lehlin tam tak pawhin chutiang chuan Pathian an paih chhuak a ni.

5. Engvângin nge Bible-ah Pathian hming hman chu a pawimawh?

⁵ Ṭawng letlingtute’n Pathian hming an telh leh telh loh chu a pawimawh tak zet em? Pawimawh e! Bible ziaktu Jehova chuan mite’n a hming an hriat chu a duh si a. Ṭawng lettu ṭha chuan a ziaktu duh dân a hre tûr a ni a, chu chu a hnathawhah a lang tûr a ni a. Bible châng tam tak chuan Pathian hming a pawimawhzia leh chawimawi ngei tûr a nihzia a târ lang. (Exodus 3:15; Sâm 83:18; 148:13; Isaia 42:8; 43:10; Johana 17:6, 26; Tirhkohte 15:14) Tin, Pathian Jehova chuan Bible ziaktute chu hmân lai kutziak lehkhabuah vawi sâng tam tak a hming ziak lang tûrin a thâwk khum a ni.  (Ezekiela 38:23 chhiar rawh.) Chuvângin, ṭawng lettute’n Pathian hming an telh loh hian Pathian Jehova an zah lo a ni.

6. Engvângin nge Pathian hming chu New World Translation siam ṭhatah vawi ruk belhchhah a nih?

⁶ Tûn laiah, Pathian hming kan hmang tûr a ni tih finfiahna tam lehzual a awm a. Kum 2013-a New World Translation siam ṭhatah chuan Pathian hming chu vawi 7,216 lai hman a ni. Chhuak hmasa zâwk aiin vawi rukin a hmang tam. Chûng zînga pangate chu tûn hnaia Dead Sea Lehkhazial tihchhuahah Pathian hming hmuh a nih avânga belhchhah a ni a. * (Footnote en rawh.) Chûng pangate chu 1 Samuela 2:25; 6:3; 10:26; 23:14, 16-ah hmuh a ni. A vawi rukna chu, Rorêltute 19:18-na, hmân lai kutziak Bible rin chhan tlâk tak zir belhna avânga belhchhah a ni bawk.

7, 8. Jehova hming awmzia chu eng nge ni?

⁷ Kristian dikte chuan Pathian hming awmzia dik tak hriatthiam chu thil pawimawh tak niin an ngai a. A hming awmzia chu “A Nihtîr” tihna a ni.” * (Footnote en rawh.) Tûn hmain kan thu leh hla chhuahte chuan Pathian hming awmzia hrilhfiah nân Exodus 3:14 (New World Translation) sawi: “Ka Duh Ang Apiang Chu Ka Ni Ang,” tih hi a hmang ṭhîn a. Kum 1984-a chhuah New World Translation chuan Jehova chu a thutiamte hlen chhuah nân a nih duh ang apiang a innihtîr tiin a hrilhfiah a ni. * (Footnote en rawh.) Mahse, kum 2013-a siam ṭhat chuan: “Jehova hming chu a nih duh apiang innihtîr theihna tel thei mah se, chu mai chu a ni lo. A thilsiam leh a thiltum chungchânga thil a nihtîrte pawh a huam tel bawk a ni,” tiin a hrilhfiah a ni.

⁸ Jehova chuan a thil siamte chu a duh ang apiang a nihtîr a. Entîr nân, Pathian chuan Nova chu lawng tuktu, Bezalela chu kut themthiam tak, Gideona chu râl do thiam tak, leh Paula chu missonary a nihtîr a. Pathian mite tân a hming chu awmze nei tak a nih avângin, New World Bible Translation Committee chuan he Bible lehlinnaah Pathian hming a telh a ni.

9. Engvângin nge ṭawng danga Bible lehlin chu ngaih pawimawh a nih?

⁹ Pathian hming bil paih bona Bible lehlin chu a tam chho tawlh tawlh a. A hming  aiah, nihna sawina “Lalpa” emaw, tualchhûng pathian pakhat hming emaw an hmang zâwk a ni. Hei hi Governing Body chuan ṭawng chi hrang hrang hmangtute’n Pathian hming chawimawitu Bible an neih a ngaih pawimawh êm êm chhante zînga pakhat a ni. (Malakia 3:16 chhiar rawh.) Tûnah chuan, New World Translation chu ṭawng 130 chuanga tichhuakin Jehova hming chu chawimawi a ni tawh a ni.

10, 11. Ṭawng danga New World Translation lehlin a nih hian eng ang harsatna nge awm?

¹⁰ Sâp ṭawng New World Translation ṭawng danga lehlinnaah hian harsatna a awm a. Entîr nân, Hebrai thu mal “Seol” hi Sâp ṭawng Bible-ah chuan Thuhriltu 9:10 leh châng dangahte hman a ni a. He ṭawngkam hi Sâp ṭawng Bible dangah pawh hman a ni tlângpui a. Mahse, Hebrai thu mal “Seol” chu chhiartute’n an hriat loh avângin ṭawng tam takah chuan hman theih a ni lo. An dictionary-ah chu thu mal chu a chuang lo va, mi ṭhenkhat phei chuan chu chu hmun pakhat hming niin an ngai hial a ni. Hêngte avâng hian, ṭawng letlingtute chuan Hebrai thu mal “Seol” leh Grik thu mal “Hades” chu “Thlân” tia an lehlin phalsak a ni a. Chutianga lehlin chu a dikin, a fiah bawk a ni.

¹¹ Hebrai leh Grik thu mala “soul” tih ṭawngkam pawh chu ṭawng ṭhenkhatah lehlin a harsa hle a. Chûng ṭawngahte chuan “soul” tih thu mal chu thlarau, a nih loh leh thih hnua taksa aṭanga chhuak thil engemaw sawina a ni ṭhîn a. He hriat sualna pumpelh tûrin ṭawng letlingtute chu “soul” tih thu mal chu a lanna a chung leh a hnuai thute mila let chhuak tûra phalna pêk an ni. “Soul” tih ṭawngkam awmze chi hrang hrang chu New World Translation of the Holy Scriptures—With References appendix-ah hrilhfiah a ni tawh a. Hebrai leh Grik thu mal chungchânga thu ṭangkaite chu Bible siam ṭhat footnote-a dah a nih avângin, chhiar nuam tak leh hriatthiam awlsam tak a lo ni ta a ni.

12. Kum 2013-a siam ṭhat Bible-a thlâkthlengna dang kan neih ṭhenkhat chu engte nge ni?

¹² Ṭawng lettute zawhna siam chuan Bible thu hriat sualna awmtîr thei thu dangte chu a târ lang a. Chuvângin, September 2007-ah, Governing Body chuan Sâp ṭawng New World Translation siam ṭhat chu a remti ta a ni. A siam ṭhatute chuan Bible letlingtute zawh, zawhna a sâng têlte chu an zir chiang a. Sâp ṭawng un tak takte chu tûn lai ṭawngin an thlâk a, chu chuan a dikna vawng ṭha zêl chungin a thu chhiar leh hriatthiam a tiawlsam a ni. Ṭawng danga lehlinte chuan Sâp ṭawng Bible ṭha lehzual nei tûrin a ṭanpui bawk.—Thufingte 27:17.

13. Kum 2013-a siam ṭhat Bible chu mi tam takin engtin nge an ngaih?

¹³ Engtin nge mi tam takin Sâp ṭawng New World Translation siam ṭhat chu an ngaih? Brooklyn, New York-a Jehova Thuhretute headquarter chuan kan unaute hnên aṭangin an ngaihhlutna lehkha thawn a sâng têl chu a dawng a. Mi tam tak chuan hetianga ziaktu unaunu rilru chu an ṭâwmpui a ni: “Bible hi lunghlua khat ro bâwm ang a ni a. Kum 2013 chhuak Bible hmanga Jehova thute chhiar chu, lunghlute hmêlhmang, a fimzia, a rawng, leh a mawina te ngaihlu taka a mal mala bih chian nên a khaikhin theih a. Pathian Thu ṭawngkam hriat awlsam tak chuan Jehova hre bel tûrin min ṭanpui a ni. Ani chu min tidam thei a thute chhiar paha min kuahtu pa ber ang mai a ni,” tih hi.

14, 15. Engtin nge mite’n ṭawng danga New World Translation chhuah chu an ngaih?

¹⁴ Sâp ṭawng hmang lote pawhin New World Translation avângin lâwmthu an sawi bawk. Bulgaria ram Sofia kawpuia putar pakhat  chuan, Bulgarian ṭawnga Bible chhuah chungchângah heti hian a sawi: “Bible hi kum tam tak ka lo chhiar tawh a; mahse, hetianga hriat awlsam leh thinlung khawih thei ka la chhiar ngai lo,” tiin. Chutiang bawkin, Albania rama unaunu chuan: “Albanian ṭawnga Pathian Thu hriat chu a nuam hle mai! Jehova’n kan ṭawng ngeia min be ta hi chanvo hlu a va ni tak êm!” tiin a ziak a ni.

¹⁵ Ram tam takah chuan, Bible hi a man a to vin, hmuh a harsa hle a. Bible neih chu malsâwmna ropui tak a ni. Rwanda ram aṭanga report chuan: “Hun rei tak chu, unaute Bible zirpui tam tak chuan Bible an neih loh avângin hma an sâwn thei lo va. Kohhran dangte tihchhuah Bible chu an lei thei lo va. Bible châng ṭhenkhat awmziate chiang taka an hriatthiam lohna chuan an hmasawnna tûr a dâl ṭhîn bawk a ni,” tiin a sawi. An tualchhûng ṭawnga New World Translation hmuh theih a nih tâkah chuan, fa tleirâwl pali nei Rwanda chhûngkaw khat chuan: “Jehova leh bâwih rinawm leh fing takte’n he Bible hi min pêk avângin kan lâwm tak zet a ni. Kan retheih avângin Bible kan nei vek thei lo va. Mahse, tûnah chuan kan nei kim ta. Pathian Jehova chunga kan lâwmzia lantîr nân, nî tin chhûngkuain Bible kan chhiar ṭhîn,” tiin a sawi.

16, 17. (a) Jehova’n a mite tân eng nge a duhsak? (b) Eng nge tih kan tum tlat ang?

¹⁶ Nakinah chuan New World Translation siam ṭhat chu ṭawng chi hrang tam lehzuala hmuh theih a ni ang a. Setana chuan he hna hi tihtâwp tum mah se, Pathian Jehova chuan a mite’n fiah tak leh hriatthiam awlsam taka a thusawite an ngaihthlâk chu a duh tih kan hria a ni. (Isaia 30:21 chhiar rawh.) Rei lo têah “tuite hian tuifinriat a khuh reng angin, leilung hi LALPA hriatnain a khat zo vek dâwn a ni.”—Isaia 11:9.

¹⁷ A hming chawimawitu he Bible lehlin pawh tiamin, Jehova thil min pêk zawng zawngte hman ṭangkai chu i tum tlat ang u. A Thu hmangin nî tin inbiaktîr ang che. Ani chuan kan ṭawngṭaina zawng zawng chu ngun takin min ngaihthlâksak thei a ni. He inbiak pawhna hian Jehova chu hre chiang lehzual tûr leh amah kan hmangaihna ṭhang chho zêl tûrin min ṭanpui ang.—Johana 17:3. (ws15-E 12/15)