HENG thu pahnihte i chhiar hian, a eng zâwkin nge i ngaih dân ṭâwmpui? Mi tam tak chuan tirhkoh Paula tia hriat bawk, Tarsa khaw chhuak Saula thute chu thlamuanthlâk tak leh duhawm tak niin an hria a ni. (Tirhkohte 17:26, 27) Bible-ah hian chutiang bawk thlamuanna thute a chuang a. Entîr nân, Isua ṭawngṭainaah chuan a zirtîrte tân Pathian hriat theih leh a malsâwmna dawn theih a nih thu târ langtu thutiam duhawm takte a tel a ni.—Johana 17:3.

Nimahsela, Philo-a ang mi fingte chuan ngaih dân dang an nei a. Anni chuan Pathian chu hriatthiam theih miah loh a nih avângin, kan hre thei ngai dâwn lo niin an sawi a. A eng hi nge dik zâwk ang?

Bible chuan mihringte tân Pathian chanchin hriatthiam harsa lai a awm tih tlang takin a sawi a. Entîr nân, Siamtu awm hun rei zâwng te, a rilru ropuizia te, a finna thûkziate chu kan teh thei lo va, kan chhiar thei lovin, kan hre thiam thei hek lo. Mihringte hriatthiam phâk bâk a ni ringawt. Mahse, hêng hian Pathian kan hriatna tûr a dâl chuang lo. A nihna takah chuan, chûng thilte ngaihtuaha chhûtngunna chuan “Pathian hnaih” tûrin min ṭanpui thei zâwk zawmah a ni. (Jakoba 4:8) Chutiang hriatthiam theih loh thil ṭhenkhat  chu i lo en ang u. A hnuah kan hriatthiam theih thilte chu kan en leh ang.

CHATUANA PATHIAN AWMNA: Bible chuan Pathian chu “chatuan ata chatuan thleng pawhin” a awm reng tih min zirtîr a. (Sâm 90:2) Thu danga sawi chuan, Pathianin awm ṭanna a nei lo va, tâwp ni a nei lo vang. Mihringte thlîrna aṭang chuan, “a kum zâtte chu zawh chhuah rual a ni lo.”—Joba 36:26.

I hlâwkpui dân: Pathian chuan amah i hriat tak zet chuan chatuana nunna a tiam che a. (Johana 17:3) Pathian ngei chu chatuanin nung lo ta se, chu thutiam chu eng anga rin tlâk nge ni ang? “Lalber chatuana awm” chauhvin chutiang thutiam chu a tifamkim thei a ni.—1 Timothea 1:17.

PATHIAN RILRU: Bible chuan Pathian ngaihtuahnate chu kan ngaihtuahna aia a sân zâwk êm avângin, “a hriat thiamzia chu zawn chhuah rual a ni lo” tih min zirtîr a. (Isaia 40:28; 55:9) Inâwm takin, Bible chuan chhân ngai lo zawhna a zâwt a ni: “Tuin nge Lalpa rilru hre tawha amah chu zirtîr thei ang?” tiin.—1 Korinth 2:16.

I hlâwkpui dân: Pathian chuan a ruala mi maktaduai têlte ṭawngṭaina chu a ngaithla thei a. (Sâm 65:2) Chawngzawng laia tla apiang pawh a hre vek a ni. Nangmahni hre thei lo tûr leh in ṭawngṭainate ngaithla thei lo tûrin, Pathian rilru chuan zawh loh châng a nei ang em? Nei lo vang, a rilru chuan chin tâwk a nei si lo va. Chu bâkah, a tân chuan “chawngzawng tam tak aiin in hlu zâwk a ni.”—Matthaia 10:29, 31.

PATHIAN KAWNGTE: Bible chuan mihringte’n ‘Pathianin a tîr ata a tâwp thlenga thil a tih chu an hmu chhuak thei ngai dâwn lo’ tih min zirtîr a. (Thuhriltu 3:11) Chuvângin, Pathian chungchâng hriat vek hun kan nei ngai lo vang. Pathian kawngte finzia chu ‘chhui theih rual a ni lo.’ (Rom 11:33) Mahse, Pathian chuan amah tilâwm duhte hnênah a kawngte hmuhtîr chu a duh a ni.—Amosa 3:7.

I hlâwkpui dân: Bible i chhiara i zir a nih chuan, Pathian leh a kawng chungchânga thu tharte i zirna chu engtikah mah a tâwp lo vang. A awmzia chu, kan Pa vâna mi chu chatuanin kan hnaih lehzual thei tihna a ni.

Pathian chanchin ṭhenkhat kan hre vek thei lo tih chu a dik a; mahse, amah kan hre thei lo tihna erawh a ni lo. Bible-ah chuan Pathian hre chiang lehzual tûra min ṭanpui thei chanchin tam tak a chuang a ni. Entîrna ṭhenkhat ngaihtuah ta ila:

PATHIAN HMING: Bible chuan Pathianin hming a nei tih min zirtîr a. Heti hian a sawi: “Kei JEHOVA ka ni,” tiin. Atîra ziak Bible-ah chuan Pathian hming chu vawi 7,000 ṭha vêl a chuang a, hming dang aiin a chuang tam zâwk a ni.—Exodus 6:2.

I hlâwkpui dân: Isua chuan Lal Ṭawngṭainaah: “Kan Pa vâna mi, i hming zahawm rawh se,” a ti a. (Matthaia 6:9) I ṭawngṭainaah Pathian hming i telh ve thei ang em? Jehova chuan a hming chunga zahna lantîr zawng zawngte chhanchhuah chu a duh a ni.—Rom 10:13.

PATHIAN CHENNA: Bible chuan thlarau taksa nei thil siamte awmna thlarau ram leh lei leh vân awmna tisa ram tiin “ram” pahnih a awm tih min zirtîr a. (Johana 8:23; 1 Korinth 15:44) Bible-ah chuan “vân” tih thu mal hian he thlarau ram hi a kâwk fo va. Min Siamtu chu, chu ‘vânah’ chuan a ‘awm’ a ni.—1 Lalte 8:43.

 I hlâwkpui dân: Pathian nihna i hre chiang lehzual a. Siamtu chu hmun tin leh thil engkima awm hriat loh chakna a ni lo. Jehova chu Mi tak tak leh awmna hmun tak tak nei a ni. Chutichung pawhin, “thil siam ama mithmuha lang lo rêng rêng a awm lo.”—Hebrai 4:13.

PATHIAN MIZIA: Bible chuan Pathian Jehova’n mize duhawm takte a nei tih min zirtîr a. “Pathian chu hmangaihna a ni.” (1 Johana 4:8) Dâwt a sawi ngai lo. (Tita 1:1, 2) Ani chu duhsak bîk nei lo, lainatnaa khat, mi khawngaih thei tak, thin nel tak a ni. (Exodus 34:6; Tirhkohte 10:34) Siamtu chuan amah zahtute nêna ‘inṭhianna’ neih a duh tih hriat chu mi tam tak chuan mak an ti mai thei a ni.—Sâm 25:14, C.L. Re-edited.

I hlâwkpui dân: Jehova ṭhian i ni thei a. (Jakoba 2:23) Tichuan, Jehova mizia i hriat hian, Bible thuziakte chu i hre thiam lehzual thei a ni.

Bible chuan Pathian Jehova chungchâng chiang takin a târ lang a. Ani chu hriattheih loh a ni lo rêng rêng. A nihna takah chuan, Siamtu chuan amah i hriat chu a duh a. A Thu, Bible chuan heti hian min tiam a ni: “Amah i zawn chuan i hmu ang,” tiin. (1 Chronicles 28:9) Bible thuziakte chhiar leh zirna hmangin engvângin nge Pathian chu i hriat belh loh vang? Chutianga i tih chuan, Bible chuan “anin a hnaih ang che u” tih min tiam a ni.—Jakoba 4:8.

Heti hian i ngaihtuah mai thei, ‘Siamtu chungchâng ka hriat kim vek loh avângin, engtin nge a ṭhian ka nih theih tehlul ang?’ tiin. Hei hi ngaihtuah rawh: Doctor thiam tak ṭhian ni tûrin damdawi lama thiamna kan neih a ngai em? Ngai lo ve! Doctor ṭhianpa chuan hnathawh dang daih pawh a nei thei a ni. Chutichung pawhin, inṭhianna ṭha tak an nei thei tho a ni. A pawimawh ber chu a ṭhianpain doctor pa mizia leh a duh leh duh lohzâwngte a hriat hi a ni. Chutiang bawkin, Bible aṭangin Jehova nihna chu i zir thei a—chu tak mai chu a ni, amah nêna inṭhianna neih nâna i hriat ngai chu.

Bible chuan Siamtu nihna chu chiang lo riai ruaiin a târ lang lo, amah kan hriat nâna kan neih ngai chanchinte chu a kim vek a ni. Pathian Jehova chungchâng hriat belh chu i duh ang em? Jehova Thuhretute chuan a thlâwna in lama Bible zirna an neihpui ṭhîn a. In vêng chhûnga Thuhretute be pawh tûr emaw, kan website www.pr418.com tlawh tûr emawin kan sâwm a che u. (wp15-E 10/01)