Pathianin mihringte a be pawh ṭhîn a. A thlarau thianghlim, a nih loh leh a chakna chevêl reng hmangin Bible ziaktute thinlungah a ngaihtuahnate a tuh a ni. (2 Petera 1:20, 21) Bible chhiarna aṭangin Pathian nihna dik kan hre thei a ni.—Johana 17:17; 2 Timothea 3:16 chhiar rawh.

Bible-ah Pathianin a chanchin tam tak a târ lang a. Mihring a siam chhan te, an tâna thil a tih tûr te, leh nung tûra min duh dânte min hriattîr a. (Tirhkohte 17:24-27) Pathian Jehova chuan a nihna dik hre tûrin min duh a ni.—1 Timothea 2:3, 4 chhiar rawh.

Jehova chu thutak Pathian a ni a, a Fapa Isua chu mihringte hnêna thutak zirtîr tûrin a rawn tîr a. Chuvângin, thutak ngainatute chu Isua lama hîpin an awm a. (Johana 18:37) Pathian chuan chutiang mite chu amah betu atân a duh a ni.—Johana 4:23, 24 chhiar rawh.

Diabol-Setana chuan Pathian chungchâng zirtîrna dik lo thehdarhin mi tam takte’n Pathian an hriatna tûr a dâl a. (2 Korinth 4:3, 4) Thil ṭha ngaina lotute chu chutiang zirtîrna dik lote hîpin an awm a ni. (Rom 1: 25) Mahse, rilru ṭha pu maktaduai tam takte chuan Bible zirin Pathian nihna dik an zawng hmu a ni.—Tirhkohte 17:11 chhiar rawh. (wp15-E 12/01)