Thilsiamna hmunpuia khâwl aṭangin meikhu a chhuak luih luih a, vânah chhûm anga a chang chu hmeichhe naupang pakhatin a hmu a. Chu khâwl hnathawh ber chu chhûm siam chhuah niin a ring ta a ni. Naupangin chutianga thil a hre sual palh chu a nuihzatthlâk mai thei. Mahse, hriatsualna lian tham chuan kan nun a khawih pawi thei a. Entîr nân, damdawi bûra kaihhruaina lehkha chu chhiar sual palh a nih chuan nghawng pawi tak a nei thei a ni.

Thlarau lam thilte hriatsual palh a nih chuan a pawi lehzual. Entîr nân, mi ṭhenkhat chuan Isua zirtîrna chu an hre sual a. (Johana 6:48-68) Isua hnêna zir zawm aiin, a zirtîrna zawng zawng an hnâwl ta zâwk a ni. Chânna nasa tak a va ni êm!

Kaihruaitu atân Bible i chhiar em? I chhiar a nih chuan i fakawm hle a ni. Mahse, i thil chhiar i hre sual a nih chuan, chu chu thil hlauhawm a ni em? Mi tam tak pawhin an thil chhiar chu an hre sual fo va. Mite hriat sual ṭhin pathum hi han ngaihtuah teh.

• “Pathian ṭih” tûra Bible thupêk hi mi ṭhenkhatin an hre sual a. Pathian chu sakei hlauha hlauh tûrah an ngai a ni. (Thuhriltu 12:13) Mahse, Pathian chuan amah betute chu chutianga hlau tûrin a duh lo. Ani chuan: “Hlau suh u, kei in hnênah ka awm si a; mangang suh u, kei in Pathian ka ni si a: ka tichak ang che u a; a ni, ka ṭanpui ang che u,” tiin a sawi. (Isaia 41:10) Pathian ṭih tih chu amah zahna thûk tak neih hi a ni.

• Mi ṭhenkhatin thlarauva thâwk khum: “Engkim tân hian hun ruat a awm a, . . . Pian hun a awm a, thih hun a awm,” tih thu hi an chhiarin an hre sual ṭhîn a. Pathianin mi tin thih hun tûr chu a ruat lâwkah an ngai a ni. (Thuhriltu 3:1, 2) Mahse, he Bible châng hian mihring nun inher dân chungchâng leh thihna hi mi tin tawn tûr a nih thu a sawi mai a ni. Kan thu tlûkna siamin kan nunah nghawng a nei thei tih Pathian Thuin min hrilh bawk. Entîr nân, heti hian kan chhiar a ni: “LALPA ṭihna chuan dam chhûng nî a tisei a,” tiin. (Thufingte 10:27; Sâm 90:10; Isaia 55:3) Engtin nge a nih theih? Entîr nân, Pathian Thu zahnain zu ruihna leh nungchang ṭhat lohna ang chi chîn dân ṭha lote pumpelh tûrin min ṭanpui ang.—1 Korinth 6:9, 10.

• Mi ṭhenkhat chuan Bible-in vânte leh lei awmte hi “hâl tûra khêk,” a ni tih thu chu a ngial a ngana an lâk avângin Pathianin leilung a tichhe vêk tûrah an ngai a ni. (2 Petera 3:7) Mahse, Pathianin he leilung tak tak hi tihchhiat a phal dâwn loh tih min tiam a. Ani chuan: “Leilung nghahchhante chu a phûm a, kumkhuaa a nghîn loh nân.” (Sâm 104:5; Isaia 45:18) Meia hâl bo anga chatuana tihtâwp tûr chu he leilung tak tak ni lovin, khawvêl kalhmang suaksual zâwk hi a ni a. Vân tih thumalin a ngial a nganna a kawh chu chunglam boruak zau tak arsi tam tak awmna, a nih loh leh Pathian chênna hmun a ni a. Chûng chu tihchhiat a ni lo vang.

Kan sawi tâk entîrna aṭang khân, mite’n Bible-a an thu chhiarte an hre sual ṭhîn tih i hre ngei ang. Mahse, engvângin nge chutiang thil a thlen chu Pathianin a phal? Ṭhenkhat chuan: ‘Pathian chu fing tak leh engkim hretu a nih si chuan, mi tinin awlsam taka an hriat thiam nghâl mai tûr lehkhabu engah nge min pêk mai loh?’ tiin an ngaihtuah mai thei. Bible hriat sual a nih chhan pathum hi han ngaihtuah teh.

1. Bible chu mi inngaitlâwmte leh zir duhna neite hriat thiam theih tûra ziah a ni. Isua chuan a Pa hnênah: “Aw ka Pa, lei leh vân Lalpa, nangin mi fing leh mi bengvârte hnênah hêng thu  hi i zêp a, nausênte hnêna i puan avâng hian ka fak a che,” tiin a sawi a. (Luka 10:21) Bible-a thute hi rilru dik tak neite chauhvin an hriat thiam theih tûra ziah a ni. Mi chapote—mite’n “mi fing leh mi bengvârte” anga an ngaihte—chuan Bible hi an hre sual fo va. Mahse, “nausênte” ang rilru pu—mi inngaitlâwm leh zir duhna nei mite—chuan Bible an chhiarin a thuchah kente chu an hre thiam thei a ni. Pathianin Bible a ziah dân hi a va thiam tak em!

2. Bible hi hre thiam duha tih tak zeta Pathian ṭanpuina zawngtute tâna ziah a ni. Isua’n a zirtîrnate hre thiam vek tûrin mite’n ṭanpuina an mamawh tih a sawi a. Chu ṭanpuina chu engtin nge an dawn ang? Isua’n: “Ṭanpuitu, thlarau thianghlim, Pain ka hminga a rawn tirh tûr chuan thil engkim a zirtîr ang che u a,” tiin a hrilhfiah a ni. (Johana 14:26, Baptist Mid-missions’ Translation) Chuvângin, Pathianin an Bible chhiar hre thiam tûra mite ṭanpui tûrin a thlarau thianghlim—a chakna chevêl—chu a pe a ni. Mahse, amah rinchhan duh lotute hnênah a thlarau thianghlim a pêk loh avângin an tân Bible chu hriat thiam harsa tak a ni. Thlarau thianghlim chuan hriat belh duhtute ṭanpui tûrin hriat thiamna ngah zâwk Kristiante chu a chêttîr bawk.—Tirhkohte 8:26-35.

3. Mihringte chuan Bible châng ṭhenkhat chu a hun takah chauh an hre thiam thei. Entîr nân, zâwlnei Daniela chu nakin hun chungchâng ziak tûra hrilh a ni a. Vântirhkohvin a hnênah: “Aw Daniela thu chu thup la, lehkhabu chu châr tlat rawh, tâwpna hun thlengin,” tiin a hrilh a ni. Kum zabi tam tak chhûng chu, mi tam takin Bible-a Daniela bu an chhiarin an hre thiam thei lo va. Dik tak chuan, Daniela ngei pawhin a thu ziah ṭhenkhatte chu a hre thiam bîk lo. Inngaitlâwm takin: “Hriat chu ka hria a, a ngaihna erawh chu ka hre lo,” tiin a sawi. A tâwpah chuan, mite’n Daniela ziah Pathian hrilh lâwkna thute chu dik takin an hre thiam thei ta a; mahse, chu chu Pathian hun ruat a thlen chauhvah a ni. Vântirhkohvin: “Daniel, kal mai rawh, thu chu thup leh châr tlat a ni ta e, tâwpna hun thlengin,” tiin a hrilhfiah a. Pathian thuchah chu tuin nge hre thiam thei ang? “Mi suaksual tumahin a ngaihna an hre lo vang a; mi fingte erawh chuan a ngaihna an hria ang.” (Daniela 12:4, 8-10) Chuvângin, Pathianin Bible châng ṭhenkhat awmzia chu a hun a thlen hma chuan a thup tlat a ni.

Hun chungchângah Jehova Thuhretute’n Bible hriat sual palh an lo nei em? Nei e. Mahse, thil hre thiam tûra Pathian hun ruat a rawn thlen chuan an hriat thiam dân chu an siamrem leh mai a ni. Isua’n an ngaih dân a siamrem apianga inngaitlâwm taka pawmtu a tirhkohte chu an entawn tih an ring tlat a ni.—Tirhkohte 1:6, 7.

Chhûm khi khawi aṭanga lo awm nge tih hmeichhe naupang ngaih dân nuihzatthlâk tak kha thil hriat sual palh mai a ni thei. Mahse, Bible zirtîrna erawh chu kan tân thil pawimawh tak a ni. Bible thuchah chu a pawimawh êm avângin, mahnia chhiarna aṭanga hriat thiam mai theih a ni lo. Chuvângin, i chhiar hre thiam tûrin ṭanpuina zawng rawh. Inngaitlâwm taka Bible zirtu te, Bible hre thiam tûra Pathian thlarau thianghlim rinchhantu te, leh tûn hma zawng aiin Pathianin Bible hre thiam tûra min duh hunah kan awm a ni tih ring tlattute chu hmuh chhuah tum rawh. Jehova Thuhretute biak emaw, jw.org website-a ngun taka an zawn chhuah thute chhiar emaw chu hreh suh. Bible-in: “Hriat thiam theihna pawh i auh chuan, . . . Pathian hriatna chu i chhar chhuak ang,” tiin min tiam a ni.—Thufingte 2:3-5.