England ram, mi tam tak chênna London Khawpui, Paddington-ah ka piang a. Ka nu leh ka u hmeichhe pathumte nên kan awm tlâng a. Ka pa chu zûa buaina nei a nih avângin kan hnênah a awm reng ṭhîn lo.

Ka naupan laiin, ka nuin zan tin ṭawngṭai dân mi zirtîr ṭhîn a. Sâm bu chauh awm Bible tê pakhat ka nei a, a thlûknate ka siam a, ka sa ṭhîn. Ka lehkhabu pakhata ka rilru khawih êm êmtu he thu châng: “Engtik nîah engemaw chuan nak tûk a awm tawh lo vang,” tih hi ka hre reng a. Chûng thute avângin ka zân mu hîl laite pawh ṭhangharhin nakin hun chungchâng ka ngaihtuah ṭhîn. ‘Nun nachhan tûr engemaw chu a awm ngei ang le,’ tiin ka ngaihtuah a. ‘Engvânga heta lo awm nge ka nih?’ Thih ka duh lo!

Thlarau khawvêl lam thil chu kan ngaihven ṭan ta hle a. Mitthite biak tumin school-a ka ṭhiante nên thlânahte kan kal a, chu bâkah, ramhuai filmte kan en ṭhîn. Chu chu a phûrawm rualin a hlauhawm hle bawk.

Kum sâwm mi ka nihin ka nungchang a ṭha lo ṭan a. Mei zialte zu ṭanin, a ngawl ka vei ta thuai a ni. A hnuah, ganzate pawh ka zu chho zêl ta a. Kum 11 mi ka nihin, zûte ka in chho leh ta zêl a. Tui ka ti vak lo na a, a ruih hi nuam ka ti tlat a ni. Rimawi leh lâmte ka ngaina a. Ka hman apiangin party-ahte, zân lama lâmna hmunahte ka kal ziah ṭhîn bawk. Zânah a rûkin ka chhuak a, zîng khawvâr hmain a rûkin ka haw leh ṭhîn. A tûkah chuan ka nguai thei hlein, school ka kal loh phah ṭhîn a ni. School ka kal pawhin a châng chuan zirna hun inthlâk chhûngin zû ka lo in hman ṭhîn.

Ka school kal kum tâwp berah chuan ka mark a ṭha lo hle a. Ka nungchang ṭhat lohzia hre hauh lotu ka nu chu a bei dawngin a thinrim ta êm êm a ni. Kan inhauh hrep hnu chuan in aṭangin ka chhuak ta a. Rei vak lo chhûng chu ka bialpa Tony-a hnênah ka awm. Ani chu thil tênauva dân bawhchhiatnaah telin, ruih theih thilte zuartu leh mi nunrâwng tak nia hriat hlawh a ni. Rei vak lovah chuan nau ka pai ta a, kum 16 mi lek niin fapa ka nei ta a ni.

Jehova Thuhretute ka tawn hmasak ber ṭum chu, pasal  nei lo va fanei nuho leh an fate awmna hostel-a ka awm laiin a ni a. Chutah chuan, tualchhûng thuneitute’n room pakhat min pe ve a ni. Thuhretu hmeichhe pahnihte chuan chuta awm ve naupangtê nia fa neite chu an rawn tlawh ṭhîn a. Ni khat chu, an thu sawihonaah ka tel ve a. Thuhretute an dik lohzia tihlan ka tum a ni. Mahse, ka zawhna apiang mai chu Bible aṭangin dam tak leh fiah takin min chhâng a. Ngilnei tak leh zahawm tak an ni a, chu chuan ka rilru a khawih hle. Chuvângin, anni nêna Bible zir chu ka duh ve ta a ni.

Rei vak lovah chuan, ka nun thlâk danglam theitu Bible aṭangin ka hre ta a. Ka naupan lai aṭang tawhin, thih ka hlau va. Tûnah chuan, thawhlehna chungchâng Isua zirtîrna chu ka hre ta! (Johana 5:28, 29) Chu bâkah, Pathianin mi mal takin mi ngaihsak tih ka hria a. (1 Petera 5:7) Jeremia 29:11-a thu: “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin thil ṭha lo ni lovin ṭhatna ka ngaihtuah asin,” tih thu hian ka rilru a khawih hle a ni. Lei Paradis-a chatuana nunna chu ka nei thei tih ka ring ta a.—Sâm 37:29.

Jehova Thuhretute chuan ka chungah hmangaihna dik tak an lantîr a. An inkhâwma ka tel hmasak ber ṭum chuan, boruak a zângin a nuam hle a, mi tinte chu an nêlawm tak zet a ni! (Johana 13:34, 35) Tual chhûng church-a ka inkhâwm laia mite’n min cheibâwl dân nên chuan a inang lo hle. Thuhretute chuan ka dinhmun an hre chung pawhin ṭha takin min lo lâwm a. Ka tân hun an pe a, min ngaihsak a, ṭanpuina ṭha tak takte min pe bawk. Hmangaihna nei chhûngkaw lian tak zînga mi angah ka inngai hial a ni.

Pathian nungchang tehna sâng tak mila nung tûrin ka nun dân thlâk danglam a ngai tih Bible ka zirna aṭangin ka hria a. Zial zûk bânsan chu harsa ka ti tak zet a ni. Rimawi ṭhenkhat hian ganza ka zûk châkna a tizual tih ka hriat chuan, ka rimawi ngaihthlâk chu ka thlâk ta a. Mi harh fîm tak nih ka duh avângin, zu in châkna min neihtîr theihna hmun party-ahte leh zân lama lâmnaahte chuan ka kal tawh lo. Nun kawng thar ka zawh ṭan laia ka chunga nghawng ṭha nei thei ṭhian tharte neih ka tum a ni.—Thufingte 13:20.

Chutih lai chuan, Tony-a pawhin Jehova Thuhretute nên Bible an zir a. Thuhretute chuan a zawhnate chu Bible aṭanga an chhân ṭhin avângin a thu zirte chu thutak a ni tih a ring nghet ta a ni. A nunah inthlâk danglamna nasa tak a nei a: tûn hmaa a ṭhian sualte a bânsan bâkah, thil tênauva dân bawhchhiatna thiltihte leh ganza zûkte pawh a bânsan bawk. Jehova tilâwm tak zet tûr chuan, kan nun dân ṭha lo tak kan siam ṭhat a ngai tih leh kan fapa tân dinhmun ṭha kan siamsak a ngai tih kan hria a. Chuvângin, kum 1982-ah kan innei ta a ni.

Ka nun thlâk danglam ka duh avângin, Vênnainsâng leh Awake! * magazine-a hlawhtling taka inthlâk danglamte chanchin ka zawn chu ka la hre reng. An entawn tûr siamte chuan min tichak tak meuh a ni! Theih tâwp chhuah zêl tûrin leh beidawng mai lo tûrin chakna ka hmu a. Ka chunga beidawng mai lo tûrin Jehova chu ṭawngṭaiin ka ngên ṭhîn. Tony-a nên chuan kum 1982 July thlaah Jehova Thuhretute niin baptisma kan chang ta a ni.

Pathian Jehova nêna inṭhian ṭhatna chuan kan nun a chhanhim a. Tony-a nên chuan harsatna kârahte Jehova ṭanpuina kan dawng a ni. Harsatna kârahte chuan Pathian rinchhan kan zir a, min ṭanpui reng tih leh kan chhûngkua min chhawmdâwl reng tih kan hria a ni.—Sâm 55:22.

Pathian Jehova hre tûra ka zir ang bawkin, kan fapa leh kan fanute pawh zir ve tûra ṭanpui chu nuam ka ti hle a. Tûnah, chutiang bawkin, an fate chu Pathian hriatnaah an ṭhang chho zêl ka hmuh chuan ka hlim hle.

Nakin hun leh thihna chungchâng ngaihtuah hahin zânah ka ṭhangharh tawh lo. Tony-a nên chuan chawlhkâr tinin kohhran hrang hranga Jehova Thuhretute fuih tûrin kan zin ṭhîn a. Anni nên chuan mi dangte zirtîrnaah kan thawk ho va, chûng kan zirtîrte’n Isuaa rinna an neih chuan chatuana nunna an chang thei dâwn a ni.