Tej tten Jesús tzalu twitz Txʼotxʼ, tzaj tnaʼn kawbʼil lu: «Kynimanxe kymane ex kytxuʼye» (Éx 20:12; Mt 15:4). Kubʼ tnaʼn Jesús bʼaʼn tej tqʼama qe yol lu tuʼnju nimen kye tman tej tzmatoq kuʼxun (Lu 2:51). Ex tej tchʼiy, ok tilil tuʼn Jesús tuʼn tten aju at tajbʼen te ttxuʼ tej otoqxi kyim (Jn 19:26, 27).

Toj ambʼil jaʼlo, ax ikx in kubʼ kyyekʼin okslal kuʼxun qa bʼaʼn che nimen kye kyman aj t-xi kybʼiʼn kyyol ex aj kyyolin toj tumelxix kyukʼil. Aju tuʼn qnimen kye qman mintiʼ bʼajsbʼil te. Maske ya ma che tijen qe qman, il tiʼj tuʼn tok qqʼoʼn kyoklen aj t-xi qbʼiʼn qe tbʼanel nabʼil in tzaj kyqʼoʼn qe (Pr 23:22). Juntl tten tuʼn tok qqʼoʼn kyoklen aju tuʼn qonin kyiʼj tiʼj jun tiʼ in bʼaj kykʼuʼj tiʼj ex qa tukʼil pwaq qa at tajbʼen kye (1Ti 5:8). Qa kuʼxun qoʼ ex qa ya ma qo chʼiy, qa kukx ma qo yolin kyukʼil atzun jun tbʼanel tten tuʼn kukx tok qqʼoʼn kyoklen qman.

OTOQXI TZʼOK TKEʼYINA VIDEO PIZARRÓN AT TILBʼILAL TWITZ TZEʼN TUʼN TYOLINA KYUKʼIL TMANA, TZAQʼWENTZA QE XJEL LU:

• ¿Tiquʼn atlo junjun maj kwest tuʼn tyolina kyukʼil tmana?

• ¿Tzeʼn jaku tzʼok tqʼoʼna kyoklen tmana aj tyolina kyukʼil?

• ¿Tiquʼn tbʼanel qa ma tzʼok tilil tuʼna tuʼn tyolina kyukʼil tmana? (Pr 15:22).