¿ALKYE TTEN TUʼN KYANQʼIN OKSLAL?
Xqʼuqink tibʼa kyiʼj nya bʼaʼn jaku che tzaj kyuʼn redes sociales
TIQUʼN NIM TOKLEN. Ik tzeʼn in bʼaj kyukʼil nim tiʼchaq, at kyajbʼen redes sociales pero ax ikx jaku tzaj nya bʼaʼn qiʼj kyuʼn. Ateʼ junjun okslal o kubʼ kyximen tuʼn miʼn tajbʼen kyuʼn, ex junjuntl in najbʼen kyuʼn tuʼn kyyolin kyukʼil toj kyja ex kyukʼil kyamiw. Noqtzun tuʼnj, nya taj Satanás tuʼn kyajbʼen redes sociales quʼn toj tumel, ex tuʼn jlu jaku che yolin xjal nya bʼaʼn qiʼj ex tuʼn ttzaj nya bʼaʼn tiʼj qamiwbʼil tukʼil Jehová. Noqtzun tuʼnj, tukʼil onbʼil in tzaj kyqʼoʼn nabʼil toj Tyol Dios, jaku tzʼel qnikʼ kyiʼj nya bʼaʼn jaku che tzaj ex tuʼn t-xi qjyoʼn tumel tuʼn miʼn kytzaj qiʼj, ik tzeʼn bʼant tuʼn Jesús (Lu 4:4, 8, 12).
QE NYA BʼAʼN JAKU CHE TZAJ
-
Tuʼn tok qqʼoʼn nim ambʼil tiʼj. Qa ma tzʼok qqʼoʼn nim or kyiʼj redes sociales ex tiʼj Internet jaku tzʼel tiʼn aju ambʼil nim toklen in xi qqʼoʼn tiʼj qajbʼebʼil te Jehová.
Qe nabʼil toj Tyol Dios: (Ef 5:15, 16; Flp 1:10)
-
Tuʼn tok qkeʼyin qe tiʼ nya bʼaʼn. Qa ma tzʼok qkeʼyin qe tilbʼilal nya bʼaʼn jaku qo naqʼet tuʼn tok qkeʼyin kyilbʼilal xjal mintiʼ kyxbʼalun tok moqa tuʼn tkubʼ qbʼinchaʼn jun tiʼ at toklen tukʼil yaẍbʼil. Qa ma jaw quʼjin tqanil toj kytembʼil apóstata jaku tzaj tiʼn nya bʼaʼn tiʼj qamiwbʼil tukʼil Jehová.
-
Tuʼn tjax qqʼoʼn jun qyol moqa jun qilbʼilal nya bʼaʼn. Tuʼnju bʼaʼn sbʼun qanmi, jaku jax tqʼoʼn jun xjal qe tyol moqa jun tilbʼilal nya bʼaʼn kyoj redes sociales. Qa ma bʼant jlu, jaku tzaj kyyol xjal tiʼja moqa jaku tzʼoka te jun tolsabʼil kye txqantl.
OTOQXI TZʼOK TKEʼYINA VIDEO QA IN CHE AJBʼEN TEMBʼIL TUʼNA TOJ INTERNET, MIʼN BʼAJ TSUKUN TIBʼA KYOJ, XNAQʼTZANKUYA TZEʼN TUʼN MIʼN KYBʼAJ TIʼCHAQ LU TIʼJA:
