Aju Nabʼitz Tkyimlen Jesucristo in tzaj tqʼoʼn jun tbʼanelxix ambʼil qe tuʼn qximen kyiʼj qeju nimxix kʼiwlabʼil che ul toj ambʼil tzul noq tuʼnju chojbʼil. Ik tzeʼn aj kyjaw anqʼin qe kyimni. Nyatoq taj Jehová tuʼn qkyim. Tuʼntzunju, jun kyxol qeju in tzaj nimxix qbʼis kyuʼn toj qanqʼibʼil aju aj tkyim jun toj qja kʼujlaʼnxix quʼn (1Co 15:26). Tzaj nimxix tbʼis Jesús tej tok tqʼoʼn twitz kyiʼj qeju lepchiqeʼk tiʼj, in che oqʼtoq tuʼnju otoq kyim Lázaro (Jn 11:33-35). Tuʼnju a Jesús tilbʼilal Tman, in nel qnikʼ tiʼj qa ax ikx te Jehová in tnaʼn bʼis in tzaj qiʼj aj tkyim jun toj qja (Jn 14:7). Tajxix Jehová tuʼn tpon ambʼil tuʼn kyjaw anqʼin qe tmajen, ax ikx qe qajbʼil tuʼn tpon ambʼil lu (Job 14:14, 15).

Tuʼnju tkyaqil nukʼun tten tuʼn Jehová, bʼaʼn tuʼn tkubʼ qyoʼn qa ax ikx aj kyjaw anqʼin qe kyinmi, kxel tbʼinchaʼn Jehová tojxix ttxolil (1Co 14:33, 40). Miʼn qo jaw oqʼtl, noq oʼkx kxel qqʼoʼn bʼaʼn kyulene kye qeju che jawel anqʼin. ¿In nel tpaʼn teya ambʼil tuʼn t-ximana tiʼj qʼuqbʼil qkʼuʼj lu, mas ik tzeʼn aj tkyim jun xjal? (2Co 4:17, 18). ¿In xi tqʼoʼn teya chjonte te Jehová tuʼnju in tzaj tqʼoʼn jun tbʼanel qʼuqbʼil qkʼuʼj tuʼn kyjaw anqʼin qe kyimni, ex tuʼnju in tzaj tyekʼun qe toj Tuʼjil Tyol qa che jawel anqʼin qe kyimni? (Col 3:15).

• ¿Alkye toj tjaya moqa tamiwe taja tuʼn tyolina tukʼe juntl maj?

• ¿Alkyeqe xjal in yolin Tyol Dios kyiʼj taja tuʼn kyok tojtzqiʼna ex tuʼn tyolina kyukʼil?