Toj 23 te marzo in qo yon tuʼn kypon junlo 12 millón xjal toj Nabʼitz Tkyimlen Jesucristo. Aju erman kʼeletz qʼonte chikʼbʼabʼil, ok tzul tchikʼbʼaʼn qa o tzaj tqʼoʼn Jehová jun tbʼanel oyaj kye xjal, tuʼnju tzaj tqʼoʼn chojbʼil ex qkyaqil jaku tzaj qkʼamoʼn tbʼanel tuʼn jlu (Isa 11:6-9; 35:5, 6; 65:21-23; Jn 3:16). Noqtzun tuʼnj, nya oʼkx aju kʼeletz qʼonte chikʼbʼabʼil kbʼel tqʼoʼn jun tbʼanel techel toj qʼij nim toklen. Ax ikx qe jaku txi qqʼoʼn bʼaʼn kyulena kye xjal otoq che tzaj qtxkoʼn (Ro 15:7). Qqʼoʼnk qwitz tiʼj alkye tten jaku bʼant quʼn.

• Mintiʼ tuʼn qkubʼ qeʼ yolte ajxi t-xi tzyet chmabʼil, aju tuʼn tbʼant quʼn, kxel qqʼoʼn bʼaʼn kyulena kye xjal ex kye qeju mintiʼxix in che bʼet toj chmabʼil. Jaku txi qtzeʼn toj kywitz ex tuʼn qok te tbʼanel xjal kyukʼil.

• Qʼonka twiʼya kyiʼj qeju xjal e tzaj ttxkoʼna, noqtzun tuʼnj, ax ikx bʼaʼn tuʼn tok tqʼoʼn twiʼya qa at jun xjal ma pon tuʼnju kyaj qʼoʼn txokbʼil te tej t-xi sipet txokbʼil. Qʼamanxa te tuʼn tkubʼ qeʼ tukʼila ex qʼamanxa tuʼj tajbʼen Tyol Dios tuʼn aju qʼiʼn tuʼna ex yekʼunxa bʼitz te.

• Aj tkubʼ bʼaj chikʼbʼabʼil, qaninxa te xjal qa at jun t-xjel. Qa il tiʼj tuʼn kyetz naj qeju kʼloj okslal tuʼnju kpol juntl kʼloj okslal, jaku txi tqʼamaʼna te xjal qa tajbʼila tuʼn tyolina juntl maj tukʼil. Jaku txi tqʼamaʼne jlu te: «Wajbʼile tuʼn tok nbʼine tzeʼn ma tzʼela chmabʼil toj twitza. ¿Alkye tten jaku chin yolina juntl maj tukʼila?».