Aju uʼj ¿Alkyeqe in kubʼ kybʼinchaʼn tajbʼil Jehová toj ambʼil jaʼlo? ma bʼaj bʼinchaʼn tuʼn tkubʼ qxnaqʼtzaʼn kyukʼil xjal in che xnaqʼtzan tiʼj Tyol Dios qukʼil, aj t-xi tzyet moqa aj qbʼaj xnaqʼtzan junjun maj tukʼil xjal. * Aʼyeju xnaqʼtzbʼil 1 a 4 in tzaj kyyekʼun alkyeqe testigos de Jehová; toj xnaqʼtzbʼil 5 a 14 in yolin tiʼj aqʼuntl in bʼant quʼn, ex toj xnaqʼtzbʼil 15 a 28 in tzaj tyekʼun alkye tten in naqʼunan ttnam Jehová. Chʼixme tkyaqil maj, mas bʼaʼn tuʼn kykubʼ xnaqʼtzet xnaqʼtzbʼil toj ttxolil, qatzun at jun xnaqʼtzbʼil ma jaw tjyoʼn xjal jaku kubʼ qxnaqʼtzaʼn tukʼil. Aʼyeju xnaqʼtzbʼil tkuʼx toj uʼj oʼkx te jun t-xaq ex jaku kubʼ qxnaqʼtzaʼn toj 5 moqa 10 minut kyukʼil chʼixme kykyaqil xjal.

• Yolina tiʼj xjel aju tkubʼ te tbʼi xnaqʼtzbʼil.

• Jaku jaw tuʼjina xnaqʼtzbʼil junx tukʼil xjal bʼiʼx tkyaqil moqa junjun taqikʼ.

• Jaku che yoline tiʼjju ma jaw kyuʼjine. Jaku che ajbʼen xjel tuʼna aʼyeju ateʼkux t-xe junjun xnaqʼtzbʼil ex qeju tilbʼilal. Jaku jaw kyuʼjine ex kubʼ kyxnaqʼtzaʼne taqikʼ Tyol Dios tkuʼx toj xnaqʼtzbʼil ik tzeʼn at tajbʼen. Yekʼunxa qa aʼyeju txol yol qʼeqsaʼn kyiʼj in tzaj kyqʼoʼn tzaqʼwebʼil tiʼj xjel tiʼj tbʼi xnaqʼtzbʼil.

• Qa at recuadro «Ojtzqiʼnka chʼintl» toj jun xnaqʼtzbʼil, uʼjinktza ex qʼamanxa te xjal tuʼn tkubʼ tqʼoʼn toj xnaqʼtzbʼil aju in tzaj tqʼamaʼn.