TIQUʼN NIM TOKLEN. Qa in bʼaj tbʼinchaʼn xjal tten, mas nya kwest kʼelel tnikʼ tiʼj xnaqʼtzbʼil ex tuʼn ttzaj tnaʼn aju in xi qxnaqʼtzaʼn te. A jlu kʼonil tiʼj tuʼn tchʼiy naj toj tokslabʼil. Ex qa otoqxi jaw aʼ twi, ax ikx il tiʼj tuʼn tbʼaj tbʼinchaʼn tten kyiʼj chmabʼil ex tiʼj pakbʼabʼil tuʼntzun tok t-xqʼuqin tibʼ (Mt 25:13). Tuʼntzunju, qa ma bʼant tuʼn t-xnaqʼtzan ex tuʼn kukx tbʼant tuʼn, a jlu kʼonil tiʼj toj tkyaqil tanqʼibʼil. Aj t-xi tzyet t-xnaqʼtzan jun xjal bʼiʼx kxel qyekʼin te tuʼn tnaqʼet tuʼn tbʼaj tbʼinchan tten tiʼj xnaqʼtzbʼil kbʼel xnaqʼtzet.

TZEʼN JAKU BʼANT QUʼN

• Qʼonkuya jun tbʼanel techel twitz (Ro 2:21). Ximana tiʼj xjal kxel tqʼoʼna xnaqʼtzbʼil te aj tbʼaj tbʼinchaʼn ttena (km-S 11/15 t-xaq 3). Yekʼinxa tuʼja te aju otoq bʼaj t-xnaqʼtzaʼna.

• Qʼamanxa te tuʼn tbʼaj tbʼinchaʼn tten. Aj t-xi tzyet jun xnaqʼtzbʼil tuʼna tukʼil, qʼamanxa te tuʼn tbʼaj tbʼinchaʼn tten quʼn at toklen jlu tukʼil xnaqʼtzbʼil ex chikʼbʼanxa te aju tbʼanel jaku tzaj tuʼn jlu. Qʼamanxa junjun tumel te tiʼj tzeʼn tuʼn tel tpaʼn ambʼil tuʼn tbʼaj tbʼinchaʼn tten. Ateʼ junjun erman in xi kyqʼoʼn kyuʼj tmajen xjal aju otoq bʼaj kyqʼoʼn techel aj t-xi kyqʼoʼn xnaqʼtzbʼil te, tuʼntzun tok tkeʼyin xjal tzeʼn jaku tzʼonin tiʼj. Qʼamanxa tbʼanel yol te aj tbʼaj tbʼinchaʼn tten.

• Xnaqʼtzanxa tzeʼn tuʼn tkubʼ tbʼinchaʼn tten. Ateʼ junjun pakbʼal in najbʼen tnejel xnaqʼtzbʼil kyuʼn tuʼntzun t-xi kyyekʼin alkye tten tuʼn tbʼaj tbʼinchan tibʼ xjal tiʼj jun xnaqʼtzbʼil.