UʼJ TE AQʼUNTL TOJ CHMABʼIL Septiembre te 2016
Junjun tten tuʼn kykyaj qʼet uʼj
Tzeʼn jaku kyaj qʼet uʼj Aju Xqʼuqil ex jun xnaqʼtzbʼil axix tok tiʼj Tyol Dios aju in tzaj tyekʼun qa at tkʼuʼj Dios qiʼj. Jaku che ajbʼen yekʼbʼil tuʼna tuʼn tkubʼ tbʼinchaʼna tyekʼbʼila.
AʼYEJU QʼINUMABʼIL TOJ TYOL DIOS
Qo bʼet toj tley Jehová
¿Tiʼ t-xilen aju tuʼn qbʼet toj tley Jehová? Jun tbʼanel techel aju aj tzʼibʼil tiʼj Salmo 119 te qe.
¿ALKYE TTEN TUʼN KYANQʼIN OKSLAL?
Qa jun kʼwaʼl xyolin qukʼil
¿Tiʼ jaku bʼant quʼn toj ambʼil aju, ex tzeʼn jaku kubʼ qyekʼun qa in nok qqʼoʼn kyoklen mambʼaj?
AʼYEJU QʼINUMABʼIL TOJ TYOL DIOS
Aju onbʼil weye ktzajel tukʼil Jehová
In che ajbʼen techel toj Salmo 121 tuʼn ttzaj tchikʼbʼaʼn tzeʼn in qo ok t-xqʼuqin Jehová.
AʼYEJU QʼINUMABʼIL TOJ TYOL DIOS
Tbʼanelxix tzeʼn bʼinchabʼinte qxmilal
Toj Salmo 139 in kubʼ tyekʼun David qa in jaw labʼin tiʼj tbʼinchbʼen Dios.
¿ALKYE TTEN TUʼN KYANQʼIN OKSLAL?
Miʼn bʼant jlu tuʼna aj t-xi tqʼoʼna xnaqʼtzbʼil tiʼj Tyol Dios
¿Tiʼ mintiʼ tuʼn tbʼant quʼn tuʼn qpon toj tanmi xjal in xi qqʼoʼn xnaqʼtzbʼil te?
AʼYEJU QʼINUMABʼIL TOJ TYOL DIOS
«Bʼaʼn tuʼn tjaw qnimsaʼn tbʼi Qman porque maʼ toklen»
El tnikʼ David tiʼj qa maʼxix te Jehová toklen ex at toklen tuʼn t-xi qqʼoʼn nimsabʼil te. Toj Salmo 145 in tzaj tyekʼun tiʼtoq in kubʼ tnaʼn David tuʼnju in xqʼuqin Dios kyiʼj tmajen.
¿ALKYE TTEN TUʼN KYANQʼIN OKSLAL?
Qqʼonk tilil tuʼn tbʼant-xix qpakbʼan: bʼaʼn tuʼn kytzaj ttxkoʼna xjal aʼyeju kyaj tuʼn tel kynikʼ tiʼj Tyol Dios
Mas jun rat jaku che chʼiy toj kyokslabʼil qeju xjal in che xnaqʼtzan tiʼj Tyol Dios ex qeju kyaj tuʼn tel kynikʼ qa ma cheʼx kyoj chmabʼil.
