In jaw chʼiye kyoj junjun tnam te Los Ángeles, California atz Estados Unidos. Ojtzqiʼnxix qe lugar jatumel in jaw chʼiye kyuʼn xjal, tuʼnju atz in kʼayinjtz droga ex ateʼ qe mara. Qaq qbʼete ex aʼyine tkabʼ kʼwal.

Tej kʼwalx qoʼye, in qox qʼiʼne tuʼn ntxuʼye toj jun iglesia evangélica. Pero tej wokxe toj nkuxumale, ya mintiʼ xi nbʼiʼne aju etz qʼamaʼn toj iglesia. Kyoj qʼij domingo in chin bʼitzine junx kyukʼil kuʼxun ateʼ toj iglesia, pero aj tex seman in chin tene kyoj ninqʼij, in chin kʼane tiʼj droga ex in chin yaẍine.

Jurattoq in tzaj nqʼoje at tok bʼinchaʼn jun nya bʼaʼn wiʼje. Qa attoq jun tiʼchaq tkubʼ nwitze, ajbʼen wuʼne tuʼn nkambʼane tiʼj qʼoj. Tkyaqilju el nnikʼe tiʼj toj iglesia mintiʼ onin wiʼje. Kukxtoq in nqʼamaʼne jlu: «A Dios in tzaj qʼonte t-xel nya bʼaʼn, atzun weye, noq in chin onine tiʼj». Tej chʼixtoq tkubʼaj abʼqʼi 1960, tej qʼiʼntoq 18 abʼqʼi wuʼne, bʼaʼn ela toj nwitze aju kyximbʼetz aj kawil Panteras Negras kybʼi, tuʼnju in che kolin kyiʼj xjal mebʼa. Ax ikx in nokxe kyxol jun kʼloj kuʼxun ax kyximbʼetz ik tzeʼn kye Panteras Negras. Nim maj ok protesta quʼne ex tuʼntzunju ya mintiʼ o skweline.

Noqtzun tuʼnj, wajtoqe tuʼn tbʼant mas tiʼchaq wuʼne. Tej tikʼ chʼintl ambʼil, kubʼ nbʼinchaʼne nim tiʼchaq nya bʼaʼn. Jun techel, in qoʼxtoqe toj cine kyukʼil wamiwe tuʼn tok qkeʼyine qe película tiʼj nya bʼaʼn in nok bʼinchaʼn kyiʼj xjal te África atz Estados Unidos. Tej tok qkeʼyine jlu, tzaj nim qqʼoje. Tuʼntzunju, bʼaj qbʼyoʼne qe xjal saq che keʼyin ateʼ toj cine ex o xiʼye jyol kye mas kyoj junjuntl lugar.

Toj ambʼil aju, ya otoq bʼant nim qile kywitz aj kawil. Attoq jun witzʼine kyxol mara aʼyeju in bʼanttoq nim nya bʼaʼn kyuʼn, ex ok nmojbʼan wibʼe kyukʼil. Kukx tzaj nim nya bʼaʼn toj wanqʼibʼile.

Testigo de Jehová qe tman jun wamiwe ex tzaj kyqʼoʼn txokbʼil wiʼje tuʼn nxiʼye kyoj chmabʼil. Tej nxiʼye tnejel maj toj chmabʼil, el nnikʼe tiʼj qa junxitl qe Testigo. Kykyaqilx qʼiʼn Tyol Dios kyuʼn ex in najbʼentoq kyuʼn. ¡Axpe ikx qe tal qʼa in nex jun kyoklen! In jaw labʼine tej tok nbʼiʼne qa Jehová tbʼi Dios ex in najbʼentoq kyuʼn (Salmo 83:18). Maske ateʼtoq xjal te junxichaq tnam, mintiʼ ikʼbʼil kyxol.

Tnejel nya wajtoqe tuʼn ttzaj qʼoʼn xnaqʼtzbʼil weye tiʼj Tyol Dios, pero ngane tuʼn nxiʼye kyoj chmabʼil. Toj jun qonikʼen, akux atine toj jun chmabʼil, kubʼ kybʼyoʼn wamiwe jun kuʼxun tuʼn tel kyiʼn tchumpa te cuero. Toj juntl qʼij, in che tzalaj tiʼjju otoq bʼant kyuʼn. Axpe ikx tej kyxi qʼiʼn toj juicio, mintiʼ ok kyqʼoʼn toklen. Chʼixme kykyaqilx, kubʼ qʼoʼn kysentens tejxi kykyim. Nim in tzalaje tuʼnju mintiʼ in xiʼye kyukʼil. Tuʼntzunju, kubʼ nximane tuʼn tchʼexpaj wanqʼibʼile ex xi tzyet tuʼn nxnaqʼtzane tiʼj Tyol Dios.

Tuʼnju otoq bʼant nim tiʼchaq nya bʼaʼn wuʼne, in jaw labʼine kyiʼj junjun tiʼchaq in bʼant kyuʼn testigo de Jehová. Jun techel, tej t-xiʼ jun testigo de Jehová saq xjal toj juntl tnam, kyaj tqʼoʼn qe tkʼwal tukʼil jun familia qʼeq xjal. Ax ikx, oʼkx tkʼamoʼn jun familia saq xjal jun kuʼxun qʼeq xjal toj tja tuʼnju mintiʼtoq tja. Tuʼn jlu, el nnikʼe tiʼj qa in japun kyuʼn testigo de Jehová aju tqʼama Jesús toj Juan 13:35: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye». El nnikʼe tiʼj qa otoq che kanet axix tok wermane.

Tej nxnaqʼtzane tiʼj Tyol Dios, el nnikʼe tiʼj qa iltoq tiʼj tuʼn tchʼexpaj nmode. Ok tilil wuʼne tuʼn miʼn tokx nqʼon wibʼe kyoj qʼoj ex tuʼn tkubʼ nmasin wibʼe (Romanos 12:2). Chebʼe chebʼe chʼexpaj nmode ex toj abʼqʼi 1974 jaw aʼ nwiʼye ex in noke te testigo de Jehová.

Axpe ikx tej tjaw aʼ nwiʼye, kukx ok tilil wuʼne tuʼn miʼn ttzaj nqʼoje. Jun techel, jun qʼij, tej in qo pakbʼane in nok lepeʼye tiʼj jun xjal xi telqʼaʼn radio toj nkare, tej npon laqʼeʼye tiʼj kyaj t-xoʼn radio ex el oq. Tej npone kyukʼil erman, xi nqʼamaʼne kye tiʼ otoq bʼaj, tzaj tqanin jun kyxol erman lu weye: «¿Tiʼwtlo ma bʼant tuʼna noqwit ma tzyet xjal tuʼna?». Tuʼn xjel lu, el nnikʼe tiʼj qa iltoq tiʼj tuʼn tbʼaj junjuntl chʼixpubʼil wuʼne.

Toj octubre te 1974 xi tzyet tuʼn wajbʼene toj tkyaqil ambʼil. In pakbʼane junlo cien or toj xjaw. Tej tikʼ ambʼil, tzaj qʼoʼn txokbʼil weye tuʼn nxiʼye ajbʼel toj kytxuylal ninja qʼil twitz aqʼuntl kye testigo de Jehová atz Brooklyn, Nueva York. Toj 1978 in meltzʼaje Los Ángeles tuʼn nxqʼuqine tiʼj ntxuʼye tuʼnju tzaj yabʼil tiʼj. Tej tikʼ kabʼe abʼqʼi in kubʼ mojeʼye tukʼil Aarhonda. Nim onin wiʼje tej nxqʼuqine tiʼj ntxuʼye tejxi tkyim. Yajxitl, tzaj qʼoʼn txokbʼil qiʼje tuʼn qxiʼye toj Xnaqʼtzbʼil te Galaad te Watchtower. Tej tkubʼaj xnaqʼtzbʼil, o xi samaʼne Panamá, jatumel kukx in qo ajbʼene toj ambʼil jaʼlo.

Atxix tej tjaw aʼ nwiʼye, o tzʼok tilil wuʼne tuʼn tkubʼ tiʼj nmode wuʼne. Aju in bʼant wuʼne, in chin el oqe moqa in xi njyoʼne junjuntl tumel tuʼn miʼn ttzaj nqʼoje. In tzaj kyqʼamaʼn nim xjal ex nxuʼjile tbʼanel yol weye tuʼnju o chʼexpaj nmode. Axpe ikx weye in chin jaw labʼine tiʼj jlu. Nya wuʼnxe o che bʼant chʼixpubʼil lu, sino tuʼn tipumal Tyol Dios, aju in chʼexpaj kyanqʼibʼil xjal tuʼn (Hebreos 4:12).

Noq tuʼn tonbʼil Tyol Dios o kanet ttxolil wanqʼibʼile ex o tzʼonin wiʼje tuʼn miʼn ttzaj nqʼoje. Ya mintiʼ in che ok nbʼyoʼne qe xjal, sino in chin onine kyiʼj tuʼn tel kynikʼ tiʼj Dios. Axpe ikx, o txi nqʼoʼne xnaqʼtzbʼil tiʼj Tyol Dios te jun aj qʼoj wiʼje tej in tene toj tja xnaqʼtzbʼil. Ex tej tjaw aʼ twiʼ, in nanqʼine tukʼil toj ax ja, ex toj ambʼil jaʼlo jun tbʼanel wamiwe. O qo onine tiʼj 80 xjal tukʼil nxuʼjile tuʼn kyok te testigo de Jehová.

In xi nqʼoʼne nim chjonte te Jehová tuʼnju o tzʼonin wiʼje tuʼn ntzalaje, tuʼn tkanet ttxolil wanqʼibʼile ex tuʼn kyten tbʼanel wermane.