Julio: Jeʼk Ernesto, in chin tzalaje tuʼnju ma chin ule yolil juntl maj tiʼj Tyol Dios tukʼila. * ¿Tzeʼn taya?

Ernesto: Bʼaʼn atine chjonte.

Julio: ¡Tbʼanel! Tej qyolin juntl maj, xi nqʼamaʼne teya tiquʼn in nok qeʼ kykʼuʼj testigos de Jehová tiʼj qa xi tzyet tuʼn tkawin Tkawbʼil Dios toj abʼqʼi 1914. * Toj capítulo 4 toj uʼj te Daniel, o xnaqʼtzan tiʼj jun tqanil aju onin qiʼj tuʼn tel qnikʼ tiʼj jlu. ¿Naʼnx tuʼna alkye?

Ernesto: Naʼnx wuʼne, aju twitzikʼ Nabucodonosor.

Julio: Ikju, ok twitzkʼaʼn Nabucodonosor jun matij tzeʼ japun tweʼ toj kyaʼj. Ax ikx, ok tbʼiʼn tej ttzaj tqʼamaʼn jun anjel tuʼn tjaw txʼemin tzeʼ ex oʼkx kyaj ten tlokʼ ex ttronkil. Yajxitl, ikʼ wuq abʼqʼi ex chʼiy juntl maj tzeʼ. * Ex el qnikʼ tiʼj qa o japun twi profecía lu kabʼe maj. ¿Naʼnx tuʼna tzeʼn japun twiʼ tnejel maj?

Ernesto: Naʼnx wuʼne, japun twiʼ tej tok Nabucodonosor te loc ex ten ikju toj wuq abʼqʼi.

Julio: Ikju. El loc ex el qʼiʼn toklen te aj kawil. Japun juntl maj twi profecía lu tej ya mintiʼ kawin juntl aj Judiy te t-xel Dios toj wuq abʼqʼi. Tzaj tzyet ambʼil lu tej tkubʼ xiten tnam Jerusalén toj abʼqʼi 607 tjaqʼ ambʼil qʼiʼn quʼn jaʼlo. Toj ambʼil aju, ya mintiʼ kawin jun xjal te t-xel Jehová. Noqtzun tuʼnj, tej tkubʼaj wuq abʼqʼi, jaw tskʼoʼn Jehová jun akʼaj aj kawil tuʼn tkawin toj kyaʼj. Iktzun tten xi tzyet tuʼn tkawin Tkawbʼil Dios juntl maj. Ya ma tzʼel qnikʼ tiʼj toj alkye ambʼil xi tzyet tuʼn tajlet qeju wuq abʼqʼi. Atzun jaʼlo, qo xnaqʼtzan tiʼj jteʼ ambʼil in yolin wuq abʼqʼi tiʼj tuʼntzun tok qojtzqiʼn jtoje xi tzyet tuʼn tkawin Tkawbʼil Dios. ¿In nelpe tnikʼa tiʼj?

Ernesto: Ikju, ya ma tzaj nnaʼne aju o yolin tiʼj juntl maj.

Julio: Tbʼanelxix. Entonces qo xnaqʼtzan tiʼj jteʼ ambʼil in yolin wuq abʼqʼi tiʼj. Tej naʼmxtoq wule tukʼila, ma chin xnaqʼtzane tiʼj xnaqʼtzbʼil ex kʼokel tilil wuʼne tuʼn t-xi nchikʼbʼaʼne teya toj tumel.

Ernesto: Bʼaʼn.

Julio: Tej tjapun twi profecía lu tiʼj Nabucodonosor, oʼkx xi tiʼn wuq abʼqʼi. Noqtzun tuʼnj, tej tjapun tiʼj Tkawbʼil Dios, xi tiʼn mas ambʼil.

Ernesto: ¿Tiquʼntzun in tzaj tqʼamaʼna jlu?

Julio: Tnejel, bʼaʼn tuʼn ttzaj qnaʼn qa tzaj tzyet tuʼn ttzaj ajlet qeju wuq abʼqʼi tej tkubʼ xiten tnam Jerusalén toj abʼqʼi 607 tjaqʼ ambʼil qʼiʼn quʼn jaʼlo. Noqwit oʼkx wuq abʼqʼi in xi tiʼn ambʼil lu, in qo pon tiʼn toj abʼqʼi 600. Noqtzun tuʼnj, toj abʼqʼi lu, mintiʼ bʼaj jun tiʼ at toklen tukʼil Tkawbʼil Dios. Ex ik tzeʼn el qnikʼ tiʼj, tej tten Jesús tzalu twitz Txʼotxʼ, tqʼama qa naʼmxtoq kykubʼaj qeju wuq abʼqʼi.

Ernesto: Ah, ma tzaj nnaʼne.

Julio: Tbʼanel. Ik tzeʼn ma tzʼel qnikʼ tiʼj, xi tiʼn mas ambʼil tej tjapun twi profecía lu tiʼj Tkawbʼil Dios.

Ernesto: ¿Jniʼtzun ambʼil xi tiʼn?

Julio: Tuʼn tel qnikʼ tiʼj, qo xnaqʼtzan tiʼj juntl profecía in yolin uʼj te Apocalipsis tiʼj ex at toklen tukʼil profecía tkuʼx toj uʼj te Daniel. In tzaj tqʼamaʼn profecía tkuʼx toj uʼj te Apocalipsis qa in nok oxe abʼqʼi tukʼil mij te 1,260 qʼij. * Tuʼntzunju, qa ma txi qajlaʼn kabʼe maj jlu, in japun tajlal te 2,520 qʼij. ¿In nelpe tnikʼa tiʼj?

Ernesto: Ikju, pero naʼmx tel nnikʼe tiʼj tiquʼn in kyqʼamaʼne qa xi tzyet tuʼn tkawin Tkawbʼil Dios toj abʼqʼi 1914.

Julio: Bʼaʼn, entonces qo xnaqʼtzan tiʼj. In tzaj kyqʼamaʼn junjun profecía toj Tyol Dios qa in nok jun qʼij ik tzeʼn jun abʼqʼi. * Qa ikju, aqeju 2,520 qʼij in che ok te 2,520 abʼqʼi. Ma tzʼel qnikʼ tiʼj qa tzaj tzyet qeju wuq abʼqʼi toj 607 tjaqʼ ambʼil qʼiʼn quʼn jaʼlo. Ex qa ma tzaj qajlaʼn 2,520 abʼqʼi tiʼj abʼqʼi 607, in qo ul tiʼn toj abʼqʼi 1914. Tuʼn jlu, jaku txi qqʼamaʼn qa e kubʼaj qeju wuq abʼqʼi toj 1914, ex qa toj ambʼil aju xi qʼoʼn toklen Jesús te aj Kawil toj Tkawbʼil Dios. Ex toj abʼqʼi 1914, tzaj tzyet tuʼn tjapun twi junjuntl profecía kyaj qʼamaʼn toj Tyol Dios, aʼyeju at kyoklen tukʼil bʼajsbʼil tqʼijlalil.

Ernesto: ¿Alkyeqe profecía lu?

Julio: Qkeʼyink junjun toj Mateo 24:7 jatumel tqʼama Jesús tiʼ kbʼajel aj t-xi tzyet tuʼn tkawin. Tqʼama jlu: «Porke qe xjal tuj jun nasyon che qʼojlel tiʼj juntl nasyon, ex che qʼojlel qe tnam kyiʼj txqantl tnam; ex noq jachaq tzul txʼuʼj yabʼil ex weʼyaj ex kyaqnajnabʼ». ¿In nokpe qqʼoʼn qwitz kyiʼj tiʼchaq lu atxix toj abʼqʼi 1914?

Ernesto: Ikju, atzun jlu in bʼaj.

Julio: Ik tzeʼn in tzaj tyekʼin texto lu, tqʼama Jesús qa che qʼojeltoq tnam kyxolx. Ex ax jlu in tzaj qʼamaʼn toj uʼj te Apocalipsis tuʼn tbʼaj kyoj bʼajsbʼil tqʼijlalil. * ¿Naʼnx tuʼna alkye abʼqʼi ok Tnejel Nimaq Qʼoj twitz Tkyaqil Txʼotxʼ?

Ernesto: Naʼnx wuʼne, toj abʼqʼi 1914, ex tojx abʼqʼi lu in tzaj kyqʼamaʼne qa tzaj tzyet tuʼn tkawin Jesús. Naʼmxtoq nximane tiʼj jlu.

Julio: Ikju, in nel qnikʼ tiʼj qa at toklen profecía in yolin tiʼj wuq abʼqʼi kyukʼil profecía in che yolin kyiʼj bʼajsbʼil tqʼijlalil. In nok qeʼ kykʼuʼj testigos de Jehová tiʼj qa xi tzyet tuʼn tkawin Jesús toj abʼqʼi 1914 ex qa atxix toj ambʼil aju, in qo anqʼin toj bʼajsbʼil tqʼijlalil. *

Ernesto: Tbʼanelxix xnaqʼtzbʼil lu, pero naʼmx telxix nnikʼe tiʼj.

Julio: In nel nnikʼe tiʼja, ax ikx weye mintiʼxix el nnikʼe tiʼj tej ttzaj chikʼbʼaʼn weye. Pero kuchiwt tzʼonin tiʼja aju ma qo yolin tiʼj tuʼn tok tojtzqiʼna tiquʼn in kubʼ qximane qa xi tzyet tuʼn tkawin Jesús toj abʼqʼi 1914, maske mintiʼ in yolin Tyol Dios tiʼj abʼqʼi lu. Ex aju mas nim toklen, qa atz in jatz qxnaqʼtzbʼile toj Tyol Dios.

Ernesto: Ikju, tkyaqil maj in najbʼen Tyol Dios kyuʼne aj ttzaj kyxnaqʼtzaʼne jun tiʼ. Noq tiʼxku ma txi nqanine teya mintiʼ ma tzaj tqʼamaʼna jlu: «Aju weye nximbʼetz», sino kukx ma tzʼajbʼen Tyol Dios tuʼna. Noqtzun tuʼnj, ¿tiquʼn kwest tuʼn tel qnikʼ tiʼjju in tzaj tqʼamaʼn Biblia? ¿Tiquʼn mintiʼ kyaj tqʼamaʼn Dios qa kxel tzyet tuʼn tkawin Jesús toj 1914?

Julio: Tbʼanel qe t-xjela. Pero at maj mintiʼ in tzaj tqʼamaʼn Tyol Dios tzeʼnxix tuʼn kybʼaj junjun tiʼchaq. Tuʼntzunju jaku kubʼ qxjelin jlu: ¿Tiquʼn kubʼ tbʼinchaʼn Dios Biblia ikju? ¿Tiquʼn il tiʼj tuʼn tok tilil quʼn tuʼn tel qnikʼ tiʼj? ¿Tzeʼn toj twitza qa ma txi qqʼoʼn tzaqʼwebʼil kyiʼj xjel lu toj juntl seman?

Ernesto: Bʼaʼn, chin ayole tiʼja.