Aqeye erman at qkʼujlabʼile kyiʼje:

Bʼalo ma tzikʼ jun 2,600 abʼqʼi, ok tqʼoʼn twitz aj sanjel Ezequiel tiʼj jun witzikʼ nim toklen: ok tqʼoʼn twitz tiʼj jun kar ex a Jehová, aju aj Kawil tibʼaj tkyaqil, in yukin tiʼj. Aju mas in qo jaw labʼin tiʼj kar lu, aju alkye tten in bʼet. In bʼettoq ik tzeʼn tikʼ jun tqan qʼankyoq, axpe ikx aj tbʼaj tchʼixpuʼn jatumel tuʼn t-xiʼ. Jakutoq bʼant jlu tuʼn ex mintiʼ in chʼexpaj tikʼ nix aj tqʼon welt (Ezeq. 1:4, 9, 12, 14, 16-27).

¿Tiʼ in tzaj tnaʼn witzikʼ lu qe? Qa kukx in che aqʼunan qe tmajen Jehová ateʼ toj kyaʼj. ¿Yajtzun qe tmajen ateʼ tzalu twitz txʼotxʼ? Aju aqʼuntl bʼant toj abʼqʼi ma kyaj, in tzaj tyekʼun qa in nonin Jehová kyiʼj tmajen tzalu twitz txʼotxʼ tuʼntzun kukx tbʼant jun tbʼanel aqʼuntl kyuʼn.

Nim kyxol qeju in che ajbʼen toj Betel atz Estados Unidos, in che aqʼunan wen tuʼn tetz kyiʼn tiʼchaq kye atz Brooklyn tuʼntzun kyxiʼ anqʼil toj akʼaj kytxuylal ninja qʼil twitz aqʼuntl atz Warwick (Nueva York), ex qa kyoj junjuntl ja. Ateʼ junjun o txi qʼoʼn junxitl oklenj kye. Atzun kyoj junjuntl tnam, nim in che aqʼunan qeju ateʼ toj Betel tuʼn kyjaw bʼinchet ja, tuʼn kybʼaj bʼinchet chʼintl ex tuʼn kyel iqʼet junjun ninja qʼil twitz aqʼuntl, moqa o cheʼx anqʼil kyoj juntl lugar. Maske mintiʼ o bʼaj kychʼixpuʼne kyjaye, ojtzqiʼn quʼne qa nim in che aqʼunane toj junxichaq tten.

Nim in jaw tzalaj Kʼloj Xjal Qʼil Twitz Aqʼuntl aj tok tqʼoʼn twitz tiʼj qa mas in che aqʼunan erman twitz tkyaqil Txʼotxʼ tuʼntzun kybʼet junx tukʼil ttnam Jehová. Ojtzqiʼn quʼne qa ateʼ junjun o cheʼx ajbʼel jatumel kyaj erman onbʼil toj pakbʼabʼil. Junjuntl o kubʼ kyximen tuʼn kypakbʼan toj junxitl yol moqa o txi kyjyoʼn juntl akʼaj tumel tuʼn kypakbʼan. Atzun txqantl o kubʼ kyximen tuʼn kyajbʼen mas te Jehová kyoj junxichaq tten. Nya oʼkxju, kykyaqilx erman kukx in che ajbʼen te Jehová, axpe ikx qeju ma che tijen moqa yabʼ ateʼ, kukx in che ojqelan tojju bʼe te chwinqlal. Kukx in che ajbʼen te Jehová ex o kubʼ kyximen tuʼn tkubʼ kyyekʼun qa nya ax tok aju in tqʼamaʼn Satanás (1 Cor. 9:24).

Bʼaʼn tuʼn tok qeʼ kykʼuʼje tiʼj qa in nok tqʼoʼn Jehová twitz tiʼj tkyaqil in bʼant kyuʼne te (Heb. 6:10). In kubʼ kyyekʼune kymode ik tzeʼn te Abrahán ex Sara. Tej qʼiʼntoq mas te 70 abʼqʼi tuʼn, kyaj tkolin ttnam caldea te Ur ex xiʼ anqʼil kyukʼil qe toj tja toj lugar Canaán tbʼi. Atztzu, anqʼin kyoj ja xbʼalun tojlo 100 abʼqʼi tzmaxi tej tkyim. Tuʼn jlu kubʼ kyyekʼun qa e bʼant junjun tiʼchaq kyuʼn tukʼil t-xuʼjil maske kwest tuʼn tbʼant kyuʼn (Gén. 11:31; Hech. 7:2, 3).

Tbʼanel aj qximen tiʼj qa ik qmod  ik tzeʼn kye. Qʼuqli qkʼuʼj tiʼj qa kykyaqilx qeju kukx in che ajbʼen te Jehová kyoj bʼajsbʼil tqʼijlalil, in japun kyiʼj aju tajtoq Jesús tuʼn tbʼant quʼn. Kyaj tqʼamaʼn jlu: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, ex tuʼn kybʼyan kyuʼne tuj tbʼi Dios Mambʼaj, ex tuj nbʼiye aqine Kʼwaʼlbʼaj, ex tuj tbʼi Xewbʼaj Xjan» (Mat. 28:19).

Tej tqʼama Jesús «kyxiʼye», tuʼn jlu tqʼama qa il tiʼj tuʼn qbʼet ex tuʼn qaqʼunan. In kubʼ qnaʼn tbʼanel aj tok qqʼoʼn qwitz tiʼj aqʼuntl ma bʼant kyuʼn qeju lepcheqeʼk tiʼj Jesús toj abʼqʼi ma kyaj. Tuʼn jlu in nel qnikʼ tiʼj qa in tzaj tkʼiwlaʼn Jehová aqʼuntl in bʼant tuʼn t-xi pakbʼet tqanil tiʼj Tkawbʼil twitz tkyaqil Txʼotxʼ ex qa a in nonin tiʼj (Mar. 13:10).

Nim xjal in xi kykʼamoʼn tbʼanel tqanil. Toj abʼqʼi ma kyaj, ma japun 8,340,847 kybʼet pakbʼal ex xi qʼet 10,115,264 xnaqʼtzbʼil tiʼj Tyol Dios junjun xjaw. Qʼanchaʼlxix qa in naqʼunan tkar Jehová ex ¡ax ikx kyeye! Tuʼntzunju, kukx che aqʼunane tiʼj tbʼanel aqʼuntl akux at chʼintl ambʼil tuʼn kyklet xjal tuʼn Jehová.

¡Tbʼanelxix nabʼil in kanet quʼn toj taqikʼ Tyol Dios te abʼqʼi 2017! In tzaj tqʼamaʼn jlu: «Qeʼk tkʼuʼja tiʼj Qman ex bʼinchama ju bʼaʼn» (Sal. 37:3). Aj t-xi qbʼiʼn qeju yol lu ex aj tkubʼ qbʼinchaʼn aju bʼaʼn aj qajbʼen te Jehová, in kubʼ qyekʼun qa qʼuqli qkʼuʼj tiʼj. Bʼaʼn tuʼn ttzaj qnaʼn qa nya qjunalx atoʼ. Kyaj ttziyen Jesús jlu qe: «Lu qine chin tele kyukʼile tkyaqil qʼij akutzun in japun bʼaj mankbʼil tqʼijlalil» (Mat. 28:20). ¿Kxelpe tqʼoʼn Jesús ambʼil tuʼn miʼn tjapun twi tyol?

Bʼaʼn tuʼn ttzaj qnaʼn: kukx tzul tkʼiwlaʼn Jehová qajbʼebʼil kukx in xi qqʼoʼn te. Qa nim moqa nya nim in bʼant quʼn, aju in nok tqʼoʼn twitz tiʼj, aju qa ma kubʼ qbʼinchaʼn aju jaku bʼant quʼn tuʼn tkyaqil qkʼuʼj. Aj tbʼant jlu quʼn, in jaw tzalaj tanmi Jehová tuʼn (2 Cor. 9:6, 7). Ax ikx, kukx qo naʼn Dios te Qtat kʼujlaʼn qoʼ tuʼn, qo xnaqʼtzan tiʼj Tyol ex tzʼok tililxix quʼn tuʼn qpakbʼan. Iktzun tten kchʼiyil mas qamiwbʼil tukʼil Jehová.

Ojtzqiʼn tuʼn Satanás qa «mya nim qʼij tuʼn ttentl», tuʼntzunju in nok tilil tuʼn tuʼn ya miʼn qajbʼen te Jehová (Apoc. 12:12). Akux in bʼant tuʼn, kukx kʼokel tilil tuʼn tuʼn kyajbʼen alkyexku tiʼ tuʼn tuʼntzun qetz tiʼn toj bʼe tuʼn qajbʼen te Jehová. Noqtzun tuʼnj, qa ma qo ten nqayin ttxlaj Jehová, mlayx bʼant tajbʼil Tajaw il (Sal. 16:8). Miʼn tzikʼ tnaʼl kyuʼne qa at nim qkʼujlabʼile kyiʼje ex qa in xi qqʼoʼne chjonte tiʼj tkyaqilju in bʼant kyuʼne tuʼntzun kyonine qiʼje tuʼn tok xqʼuqit aju at toklen tukʼil Tkawbʼil Dios kyoj bʼajsbʼil tqʼijlalil.

Aʼye kyermane,

Kʼloj Xjal Qʼil Twitz Aqʼuntl kye testigos de Jehová