XNAQʼTZBʼIL 13
In cheʼx Testigos kywitz jwes tuʼntzun t-xi qʼoʼn ambʼil kye tuʼn kypakbʼan
1, 2. a) ¿Tiʼ bʼant kyuʼn nejenel kye okslabʼil tuʼn tweʼ pakbʼabʼil, pero tiʼ bʼant kyuʼn apóstol? b) ¿Tiquʼn mintiʼ xi kyqʼoʼn apóstol ambʼil tuʼn ya miʼn kypakbʼan?
TZMA in bʼaj ikʼset Pentecostés te abʼqʼi 33 ex oʼkx at kabʼe seman tuʼn tten kʼloj okslal te Jerusalén toj mujbʼabʼil. In kubʼ t-ximen moqa in kubʼ tbʼisin Satanás qa atzun ambʼil lu tuʼn tkubʼ tnajsaʼn kʼloj okslal. Tuʼntzunju, in che ajbʼen nejenel kye okslabʼil tuʼn tuʼntzun tel kyiʼn ambʼil kye apóstol tuʼn kypakbʼan. Pero kukx ok tilil kyuʼn apóstol tuʼn kypakbʼan ex tuʼn jlu ateʼ nim xinaq ex xuʼj «e okslan tiʼj Qajaw» (Hech. 4:18, 33; 5:14).
In che tzalaj apóstol «tuʼnju bʼaʼn ela tuj twitz Dios tuʼn tkubʼ kychʼixwi kywitz xjal, noq tuʼn tlaj okslal qe tiʼj Jesús».
2 Tzaj kyqʼoj qe aj qʼoj ex e okx kyqʼoʼn qe apóstol toj cárcel. Pero toj qonikʼen aju, onin jun anjel tuʼn tjaqet tlamel cárcel ex toj juntl qʼij in che pakbʼantoq apóstol. In che tzyet juntl maj apóstol kyuʼn polisiy ex in chex qʼiʼn kywitz aj kawil tuʼnju kukx in che pakbʼan. Pero in xi kyqʼamaʼn apóstol jlu: «Tnejel ilxix tiʼj tuʼn t-xi qnimane Dios, ex mya qe xjal». In tzaj nim kyqʼoj xjal kyiʼj ex kyaj tuʼn tkubʼ kybʼyoʼn qe apóstol. Toj ambʼil aju, jaw yolin jun aj xnaqʼtzal tiʼj ley aju Gamaliel tbʼi ex xi tqʼamaʼn jlu kye aj kawil: «Miʼn tzʼok kyqʼon kyibʼe kyiʼj xjal lu, ex miʼn che labʼte kyiʼj». Maske jaku qo jaw labʼin tiʼj jlu, xi kybʼiʼn tyol Gamaliel ex i etz kytzaqpiʼn qe apóstol. ¿Pero tiʼ bʼant kyuʼn apóstol tej kyetz tzaqpiʼn? Kukx xi «kyqʼoʼn xnaqʼtzbʼil tuj tja Dios ex tujile kyja xjal ex tuʼn t-xi kypakbʼaʼn tqanil bʼaʼn tiʼj Jesús» (Hech. 5:17-21, 27-42; Prov. 21:1, 30).
3, 4. a) ¿Tiʼ o bʼant tuʼn Satanás tuʼn tok tbʼinchaʼn nya bʼaʼn kyiʼj tmajen Dios? b) ¿Tiʼ qo yolil tiʼj toj xnaqʼtzbʼil lu ex kyoj qeju kabʼe xnaqʼtzbʼil che ul?
3 I ex qʼiʼn qe okslal tnejel maj kywitz aj kawil toj abʼqʼi 33 tuʼnju in che pakbʼan (Hech. 4:5-8; 16:20; 17:6, 7). Ax ikx toj ambʼil jaʼlo in che ajbʼen aj qʼoj tuʼn Satanás tuʼn tel kyiʼn ambʼil qe tuʼn qpakbʼan. Tuʼn tbʼant jlu kyuʼn, in tzaj kyqʼamaʼn junjun nya ax tok yol tiʼj ttnam Jehová, ik tzeʼn qa in naj mujbʼabʼil kyxol xjal quʼn, qa in qo jaw meltzʼaj kyiʼj aj kawil ex qa in qo kʼayin kyiʼj uʼj. Tuʼn tkubʼ yekʼit qa nya ax tok qe yol lu, at maj o kubʼ qximen tuʼn qxiʼ kywitz jusgad. ¿Tiʼ o tzaj tuʼn jlu? ¿Tzeʼn in nonin qʼij aju bʼaj kyximen jusgad kyoj abʼqʼi o che kyaʼj? Qo xnaqʼtzan kyiʼj junjun techel tiʼj tzeʼn o tzʼonin jlu tuʼn ttzaj kyqʼoʼn aj kawil ambʼil qe tuʼn qpakbʼan (Filip. 1:7).
4 Toj xnaqʼtzbʼil lu kʼelel qnikʼ tiʼj tzeʼn o qo kolin kywitz jwes tuʼn ttzaj qʼoʼn ambʼil qe tuʼn qpakbʼan. Atzun kyoj juntl kabʼe xnaqʼtzbʼil, kʼelel qnikʼ kyiʼj junjuntl tiʼ o txi bʼinchet tiʼj twitz ley tuʼntzun miʼn tokx qqʼon qibʼ kyxol xjal ex tuʼn qanqʼin ik tzeʼn taj Jehová.
¿In nelpe kyiʼn mujbʼabʼil moqa in che kolin tiʼj Tkawbʼil Dios?
5. Tej chʼixtoq kykubʼaj abʼqʼi 1930, ¿tiquʼn i ex qʼiʼn erman kyuʼn polisiy ex tiʼ kubʼ kyximen erman qʼil twitz aqʼuntl toj ttnam Jehová?
5 Tej chʼixtoq kykubʼaj abʼqʼi 1930, toj tkyaqil tnam Estados Unidos kyqʼama aj kawil qa iltoq tiʼj tuʼn t-xi kyqanin testigos de Jehová permís twitz ley tuʼntzun kypakbʼan. Atzun kye erman kubʼ kyximen tuʼn miʼn txi kyqanin jun permís tuʼnju jaku vencerin. Ax ikx, el kynikʼ tiʼj qa ni jun aj kawil jaku tzʼel qʼinte ambʼil kye tuʼn t-xi kybʼiʼn kawbʼil kyaj tqʼoʼn Jesús, aju tuʼn kypakbʼan tiʼj Tkawbʼil Dios (Mar. 13:10). Tuʼn jlu, nim pakbʼal tiʼj Tkawbʼil Dios i ex qʼiʼn kyuʼn polisiy. Tuʼntzunju kubʼ kyximen erman qʼil twitz aqʼuntl toj tnam Jehová tuʼn kyxiʼ yolil kyoj jusgad. ¿Tiquʼn? Tuʼnju kyajtoq tuʼn tkubʼ kyyekʼin qa otoq tzʼel kyiʼn aj kawil ambʼil kye tuʼn kykʼulin te Jehová. Toj abʼqʼi 1938 ok jun juicio aju tzaj tiʼn nim tbʼanel. ¿Tiʼtzun bʼaj toj ambʼil aju?
6, 7. ¿Tiʼ bʼaj tiʼj ja xjal Cantwell?
6 In najbʼentoq Newton Cantwell te 60 abʼqʼi ex t-xuʼjil Esther te precursor especial. Toj prim te qʼij martes 26 te abril te 1938, kubʼ kyximen junx kyukʼil kykʼwal Henry, Russell ex Jesse tuʼn kyex pakbʼal tkyaqil qʼij toj tnam New Haven (Connecticut). Pero bʼantni kyten tuʼn kyten mas te jun qʼij, ¿tiquʼn? Tuʼnju toj junjuntl maj otoq che ex qʼiʼn kyuʼn polisiy ex jakulo bʼaj juntl maj kyiʼj. Pero kukx ok tilil kyuʼn tuʼn kypakbʼan. E pon toj tnam New Haven kyoj kabʼe car. Toj jun car, tokxtoq Newton, qe toj tja, qe uʼj ex qe gramófono. Atzun toj juntl, tokxtoq Henry te 22 abʼqʼi ex jun equipo de sonido. Tej tikʼ junjun or xi qʼamaʼn kye tuʼn polisiy tuʼn ya miʼn kypakbʼan.
7 Tnejel tzyet Russell te 18 abʼqʼi ex yajxitl tzyet Newton ex Esther. Atzunte Jesse te 16 abʼqʼi, tzaj tkeʼyin najchaq tzeʼn xi qʼiʼn qe ttat ex terman. Tjunalx Jesse kyaj tuʼnju in pakbʼantoq Henry toj juntl plaj te tnam. Maske ikju, xi tiʼn tgramófono ex kukx pakbʼan. Xi kyqʼoʼn kabʼe xinaq católico ambʼil te Jesse tuʼn tok tqʼoʼn tdiscurso ermano Rutherford, aju tok tbʼi «Qe aj qʼoj». Pero tej tok kybʼiʼn, tzaj nim kyqʼoj tiʼj Jesse ex kyajtoq tuʼn tok kybʼyoʼn. Mintiʼ tzaj xobʼ Jesse ex ikʼ bʼet, ex tej tikʼ chʼintl ambʼil, xi qʼiʼn kyuʼn polisiy. Kyqʼama polisiy qa mintiʼ til ermana Cantwell, pero kyqʼama qa attoq til tchmil ex qe tal. Noqtzun tuʼnj, tojx qʼij aju, xi kychjoʼn multa ex i etz tzaqpiʼn.
8. ¿Tiquʼn tqʼama tribunal qa tzaj nya bʼaʼn kyxol xjal tuʼn Jesse Cantwell?
8 Tej tikʼ junjun xjaw, toj septiembre te 1938 e xiʼ ja xjal Cantwell yolil twitz tribunal te primera instancia te tnam New Haven. Tzaj kyqʼamaʼn jwes qa xi tqanin Newton, Russell ex Jesse pwaq kye xjal ex mintiʼ otoq tzaj qʼoʼn permís kye. Ok tilil tuʼn t-xi qʼamet qa mintiʼ kypaltil ja xjal Cantwell toj Tribunal Supremo te tnam Connecticut, noqtzun tuʼnj, kyqʼama jwes qa tzaj nya bʼaʼn kyiʼj xjal tuʼn Jesse. ¿Tiquʼn tzaj qʼamaʼn jlu? Tuʼnju kyqʼama qeju kabʼe xjal católico qa aju chikʼbʼabʼil ok tqʼoʼn Jesse kye, in yolintoq nya bʼaʼn tiʼj kyokslabʼil. Tuʼntzunju, kubʼ kyximen erman qʼil twitz aqʼuntl tuʼn kyxiʼ yolil twitz Tribunal Supremo te Estados Unidos, aju jusgad mas nim toklen toj tnam.
9, 10. a) ¿Tiʼ tqʼama Tribunal Supremo de Estados Unidos tiʼj juicio ok tiʼj ja xjal Cantwell? b) ¿Tzeʼn in nonin qiʼj aju kubʼ t-ximen tribunal?
9 Toj 29 te marzo te 1940, ok tbʼiʼn Charles Evans Hughes, nejenel toj jusgad, junx kyukʼil 8 jwes aju xi tqʼamaʼn ermano Hayden Covington, abogado kye testigos de Jehová. * Tej tqʼama fiscal te tnam Connecticut qa in tzaj nya bʼaʼn kyxol xjal kyuʼn testigos de Jehová, xi tqanin jun jwes jlu te: «¿Nyapetzun ax ikx el ikʼun Jesús tuʼn tqanil pakbʼan tiʼj?». Xi ttzaqʼweʼn fiscal jlu: «Ikju, in tzaj tqʼamaʼn Tyol Dios tkyaqilju bʼaj tiʼj Jesús tuʼnju pakbʼan tiʼj tbʼanel tqanil». ¡Axix tok qe tyol! Mintiʼ el tnikʼ fiscal tiʼj, pero tqʼama qa in che pakbʼan testigos de Jehová ik tzeʼn te Jesús, ex ok tqʼoʼn Estado ik tzeʼn qe aj qʼoj ten tiʼj Jesús. Toj 20 te mayo te 1940, tqʼama jusgad qa mintiʼtoq kyil testigos de Jehová.
Nejni Hayden Covington (aju at toj tmij) junx tukʼil Glen How (aju at toj izquierda) ex junjuntl erman tej kyetz toj jun tribunal tej kykambʼan toj jun juicio.
10 ¿Tiʼ tbʼanel tzaj tuʼnju kubʼ t-ximen jusgad? Tzaj tqʼoʼn ambʼil kye xjal tuʼn kyyolin tiʼj kyokslabʼil ex tuʼn tok kychmon kyibʼ tuʼn kykʼulin te Dios, ex ni jun aj kawil jakutoq tzʼel qʼinte ambʼil kye. Ax ikx, tqʼama Tribunal qa mintiʼ jun nya bʼaʼn bʼant tuʼn Jesse «tuʼn tnaj mujbʼabʼil kyxol xjal». Tuʼn jlu el nikʼbʼaj tiʼj qa mintiʼ el kyiʼn testigos de Jehová mujbʼabʼil kyxol xjal. Nim onin jlu kyiʼj tmajen Jehová. ¿Kukxpe in nonin qiʼj toj ambʼil jaʼlo? Kukx. Tqʼama jun abogado testigo de Jehová jlu: «Tuʼnju tzaj qʼoʼn ambʼil qe tuʼn ley tuʼn qpakbʼan, jaku t-xi qqʼuqbʼaʼn kykʼuʼj xjal tukʼil Tyol Dios».
¿In che okpe meltzʼaj kyiʼj aj kawil moqa in che pakbʼan tiʼj Tyol Dios?
Aju tratado xi sipin toj tnam Canadá.
11. ¿Tiʼ bʼant kyuʼn erman te Canadá ex tiquʼn?
11 Kyoj abʼqʼi 1940 e ok weʼ testigos de Jehová te tnam Canadá twitz nimxix ikʼbʼil. Tuʼntzunju, tuʼn tel kynikʼ xjal tiʼj qa mintiʼ in tzaj tqʼoʼn ley ambʼil kye tuʼn kykʼulin te Dios, kubʼ kyximen erman te Canadá tuʼn kypakbʼan 16 qʼij tuʼn t-xi kysipen tal uʼj tok tbʼi Quebec’s Burning Hate for God and Christ and Freedom Is the Shame of All Canada (In che qʼojin xjal te Quebec tiʼj Dios, tiʼj Cristo ex chʼixbʼajil jlu kye xjal te Canadá tuʼnju mintiʼ in xi kyqʼoʼn ambʼil kye txqantl tuʼn kyajbʼen te Dios). Attoq kyaje t-xaq tratado lu ex yolin tiʼj tkyaqilju nya bʼaʼn ok bʼinchaʼn kyiʼj testigos de Jehová kyuʼn okslabʼil nya ax tok, kyuʼn polisiy ex kyuʼn xjal te tnam Quebec. Tqʼama tratado jlu: «Kukx in che ex qʼiʼn testigos de Jehová kyuʼn polisiy maske mintiʼ kyil. At junlo 800 juicio naʼmx t-xi bʼinchet kyiʼj testigos de Jehová toj tnam Gran Montreal».
12. a) ¿Tiʼ kyqʼama aj qʼoj kyiʼj erman tej t-xi kysipen tratado? b) ¿Tiʼ nya ax tok yol xi qʼamaʼn kyiʼj erman? (Ax ikx qʼonka twitza tiʼj tqanil).
12 Tej tok tbʼiʼn tnejel ministro te Quebec, Maurice Duplessis tbʼi tqanil tkuʼx tok tratado, ok tmojbʼan tibʼ tukʼil cardenal católico Villeneuve tuʼntzun tok jun qʼoj kyuʼn kyiʼj testigos de Jehová. Tuʼn jlu, jun rat naj japun 1,600 juicio ok kyiʼj testigos de Jehová. In tzaj tqʼamaʼn jun precursora jlu: «Nim maj o xi qʼiʼne kyuʼn polisiy». Tej kyok keʼyin testigos de Jehová akux in che sipen tiʼj tratado, kyqʼama xjal qa in che sipen tqanil kye txqantl tuʼntzun kyok meltzʼaj kyiʼj aj kawil. *
13. ¿Alkyeqe tnejel testigos de Jehová tzaj qʼamaʼn kyiʼj qa e ok meltzʼaj kyiʼj aj kawil ex tiʼ tqʼama tribunal kyiʼj?
13 Toj 1947, a ermano Aimé Boucher ex qe tmyal Gisèle te 18 abʼqʼi ex Lucille te 11 abʼqʼi, aʼyetzun tnejel testigo de Jehová e xiʼ toj juicio tuʼnju tzaj qʼamaʼn qa e ok meltzʼaj kyiʼj aj kawil. Otoq txi kysipen tratado kye kyvecin, pero mlayx kubʼ qximen qa in xi kyqʼamaʼn kye xjal tuʼn kyok meltzʼaj kyiʼj aj kawil. Tbʼaneltoq xjal Aimé, in nanqʼintoq kubʼni tiʼj tnam Quebec ex in xqʼuqintoq kyiʼj talun, ex at maj in xiʼtoq toj tnam toj jun tkarruaje. Noqtzun tuʼnj, otoq tzʼok bʼinchaʼn nya bʼaʼn kyiʼj qe toj tja ik tzeʼn tzaj qʼamaʼn toj tratado. Ikʼuntoq qe testigos de Jehová tuʼn jwes ex mintiʼ ok tqʼoʼn twiʼ tiʼj tyol Aimé. Pero xi tbʼiʼn jwes aju tqʼama fiscal qa jakutoq tzaj nya bʼaʼn kyiʼj xjal tuʼn tratado in che sipin tiʼj ex iltoq tiʼj tuʼn tkubʼ kykastiw toj tja Aimé. Aju tqʼama jwes jaku txi qʼamet ik tzeʼn jlu: jun il tuʼn t-xi qʼamet axix tok. Kubʼ tqʼoʼn jwes kykastiw Aimé ex Gisèle tuʼnju tzaj tqʼamaʼn qa otoq che ok meltzʼaj tiʼj aj kawil, axpe ikx te Lucille ten kabʼe qʼij toj cárcel. Xi kyiʼn erman caso lu twitz Tribunal Supremo te Canadá ex ok tbʼiʼn.
14. ¿Tiʼ bʼant kyuʼn erman te Quebec toj ambʼil tej kyel ikʼun kyuʼn xjal?
14 Maske kukx ok bʼinchaʼn nya bʼaʼn kyiʼj erman te tnam Quebec, kukx e pakbʼan tiʼj tbʼanel tqanil tiʼj Tkawbʼil Dios ex tzaj nim tbʼanel tuʼn jlu. Oʼkx attoq 300 kybʼet erman toj tnam Quebec toj 1946 tej t-xi sipet tratado, pero tej tikʼ kyaje abʼqʼi ya attoq 1,000 kybʼet. *
15, 16. a) ¿Tiʼ tqʼama Tribunal Supremo te Canadá tiʼjju juicio ok tiʼj ja xjal Boucher? b) ¿Tiʼ tbʼanel tzaj kye erman tuʼn jlu ex kye xjal?
15 Toj junio te 1950, aqeju 9 jwes ateʼ toj Tribunal Supremo te Canadá ok kyqʼoʼn kywitz tiʼj tcaso Aimé Boucher. Tej tikʼ qaq xjaw, toj 18 te diciembre te1950, tzaj kyqʼamaʼn jwes qa mintiʼ til ermano Aimé. ¿Tiquʼn? Tzaj tqʼamaʼn ermano Glen How, aju abogado kye testigos de Jehová, qa bʼaʼn ela toj twitz Tribunal aju xi kyqʼamaʼn: aj tkubʼ t-ximen jun xjal tuʼn tok meltzʼaj tiʼj jun aj kawil, at toklen jlu tukʼil qʼoj ex tuʼn miʼn tnimen te xjal in kawin. Noqtzun tuʼnj, «mintiʼtoq tqanil lu tkuʼx toj tratado, tuʼntzunju jakutoq txi qʼet kye txqantl». Ax ikx tqʼama jlu: «Ok nqʼoʼne nwitze tiʼj tzeʼn onin Jehová qiʼje tuʼn qkambʼane». *
16 Aju tqʼama Tribunal Supremo, onin moqa mojin tuʼn tkambʼan Tkawbʼil Dios, tuʼnju ya mintiʼ e ok qeju 122 juicio kyiʼj testigos de Jehová te Quebec. Ax ikx onin jlu kyiʼj xjal te Canadá ex kyiʼj xjal te Comunidad Británica de Naciones (Commonwealth) tuʼn t-xi kyqʼamaʼn qa at jun tiʼ nya toj tumel in bʼant tuʼn aj kawil. Ex onin tuʼn ya miʼn tok bʼinchaʼn nya bʼaʼn kyiʼj testigos de Jehová tuʼn Iglesia ex kyuʼn aj kawil. *
¿In che yolinpe tiʼj Tkawbʼil Dios moqa in che kʼayin tiʼj Tyol Dios?
17. ¿Tiʼ in tzaj kyqʼamaʼn junjun aj kawil tiʼj aqʼuntl in bʼant quʼn?
17 Ik tzeʼn bʼant kyuʼn okslal toj ambʼil ojtxe, mintiʼ in che kʼayin testigos de Jehová tiʼj Tyol Dios (kjawil uʼjit 2 Corintios 2:17). Noqtzun tuʼnj, kyaj junjun aj kawil tuʼn tok kyqʼoʼn aqʼuntl in bʼant quʼn ik tzeʼn jun kʼaẍjel. Qo xnaqʼtzan tiʼj kabʼe juicio aju in tzaj tyekʼin qa in che kʼayin testigos de Jehová kyiʼj uʼj moqa in che yolin tiʼj Tyol Dios.
18, 19. ¿Tiʼ bʼant kyuʼn aj kawil te Dinamarca tuʼn tel kyiʼn ambʼil kye erman tuʼn kypakbʼan?
18 Dinamarca. Toj 1 te Octubre te 1932, etz qʼoʼn jun ley jatumel tzaj qʼamaʼn qa mintiʼ qʼoʼn ambʼil kye xjal tuʼn kykʼayin tiʼj uʼj qa mintiʼ jun kypermís. Pero mintiʼ etz kyiʼn erman jun kypermís. Toj juntl qʼij, i eʼx jweʼ erman pakbʼal atz toj tnam Roskilde, junlo 30 kilómetros tiʼj ttxuylal tnam Copenhague. Tej tkubʼaj qʼij, ya mintiʼ meltzʼaj ermano August Lehmann, otoq txi qʼiʼn tuʼn polisiy tuʼnju mintiʼ tpermís tuʼn tkʼayin.
19 Xiʼ August Lehmann toj jun tribunal toj 19 te diciembre toj 1932. Tqʼama qa in visitarin kye xjal tuʼn tkyaj tqʼoʼn junjun uʼj tiʼj Tyol Dios kye, pero tqʼama qa mintiʼ in kʼayin kyiʼj uʼj. Tqʼama tribunal qa ax tok aju tzaj tqʼamaʼn August ex tzaj tchikʼbʼaʼn jlu: «Jaku [...] bʼant tuʼn taqʼunan xjal lu, mintiʼ o txi qʼoʼn pwaq te ex mintiʼ o kubʼ t-ximen tuʼn tkambʼan pwaq, sino o tzʼajbʼen tpwaq tiʼjju in bʼant tuʼn». Tqʼama tribunal qa mintiʼ til ermano Lehmann ex qa aju in bʼant tuʼn nya «jun kʼaẍjel». Pero kyajtoq aj qʼoj kyiʼj tmajen Dios tuʼn tel kyiʼn ambʼil kye tuʼn ya miʼn kypakbʼan toj kytnam (Sal. 94:20). Pero xi tzyet jun juicio tuʼn fiscal toj Tribunal Supremo te tnam. ¿Tiʼtzun bʼant kyuʼn erman?
20. ¿Tiʼ tqʼama Tribunal Supremo de Dinamarca ex tiʼ bʼant kyuʼn erman?
20 Toj seman tej tok audiencia tuʼn Tribunal Supremo, mas ok tilil kyuʼn erman te Dinamarca tuʼn kypakbʼan. Toj martes 3 te octubre te 1933, tqʼama Tribunal Supremo qa mintiʼ til ermano August Lehmann ik tzeʼn otoq tqʼama juntl tribunal. Tuʼntzunju, jakutoq bʼant tuʼn kypakbʼan testigos de Jehová. Tuʼn t-xi kyqʼoʼn chjonte te Jehová ok tilil kyuʼn tuʼn kypakbʼan mas. Atxix tej kykambʼan testigos de Jehová tiʼj juicio lu, mi jun o tzʼel qʼinte ambʼil kye erman te Dinamarca tuʼn kukx kypakbʼan.
In che pakbʼan testigos de Jehová te Dinamarca kyoj abʼqʼi 1930.
21, 22. ¿Tiʼ bʼant tuʼn Tribunal Supremo te Estados Unidos tiʼj juicio ok tiʼj ermano Murdock?
21 Estados Unidos. Toj domingo 25 te febrero te 1940, xi qʼiʼn precursor Robert Murdock, kʼwalbʼaj, tuʼn polisiy junx kyukʼil juntl 7 testigos de Jehová tej in che pakbʼan toj tal tnam Jeannette, nqayin tiʼj Pittsburgh, toj tnam te Pensilvania. Kyqʼama polisiy qa attoq kyil tuʼnju in che sipen uʼj ex qa mintiʼ otoq txi kyqanin permís twitz ley. Tuʼntzunju, xi kyiʼn erman caso lu toj Tribunal Supremo te Estados Unidos ex bʼaʼn ela jlu toj twitz.
22 Toj 3 te mayo te 1943, tzaj tqʼamaʼn Tribunal Supremo qa mintiʼtoq kyil testigos de Jehová. Tqʼama qa nya il tiʼj tuʼn t-xi qanin permís twitz ley, tuʼnju nya iltoq tiʼj «tuʼn t-xi chjet jun tiʼ qʼoʼn ambʼil tuʼn Constitución Federal». Ax ikx el tiʼn toklen ley municipal, aju el «tiʼn ambʼil kye xjal tuʼn t-xi kyqʼamaʼn tqanil ex tuʼn kykʼulin te Dios». Tej ttzaj kyqʼamaʼn juez te Tribunal aju kubʼ kyximen, tqʼama magistrado William Orville Douglas qa aju aqʼuntl in bʼant kyuʼn testigos de Jehová «nya oʼkx at toklen tukʼilju tuʼn kypakbʼan, tuʼn t-xi kysipen uʼj, sino in nyolin tiʼj tkyaqilju in bʼant kyuʼn». Ax ikx tqʼama jlu: «Il tiʼj tuʼn tok qʼet toklen aqʼuntl in bʼant kyuʼn [...] ik tzeʼn in nok qʼet kyoklen culto in che ok kyuʼn junjuntl iglesia ex aju kypakbʼabʼil in netz twitz púlpito [moqa altar]».
23. ¿Tiʼ tbʼanel in tzaj qe kyuʼn juicio e kambʼan erman kyiʼj toj abʼqʼi 1943?
23 Aju tqʼama Tribunal Supremo, jun yekʼbʼil jlu tiʼj qa kambʼan ttnam Dios. Tuʼn jlu, el toj qʼanchaʼl qa in qo pakbʼan tiʼj Tyol Dios ex nya in qo kʼayin kyiʼj uʼj. Tbʼanelxix aju bʼaj toj 1943, tuʼnju e kambʼan testigos de Jehová 12 juicio tiʼj 13, axpe ikx aju caso Murdock. Nim o che onin juicio lu qʼij kyoj junjun juicio o che ok kʼitzqeku, aj ttzaj kyqʼamaʼn xjal qa mintiʼ qoklen tuʼn qpakbʼan jatumel ateʼ nim xjal ex kytziyele ja.
«Tnejel ilxix tiʼj tuʼn t-xi qnimane Dios, ex mya qe xjal»
24. ¿Tiʼ qmod in kubʼ qyekʼin aj ttzaj tqʼamaʼn jun aj kawil tuʼn ya miʼn qpakbʼan?
24 In xi qqʼoʼn chjonte te Jehová tuʼnju in tzaj kyqʼoʼn aj kawil ambʼil qe tuʼn qpakbʼan tiʼj tbʼanel tqanil tij Tkawbʼil Dios. Noqtzun tuʼnj, aj tel kyiʼn aj kawil ambʼil qe tuʼn ya miʼn qpakbʼan, in xi qjyoʼn junjuntl tumel tzeʼn tuʼn kukx qpakbʼan. Ax qximbʼetz ik tzeʼn kye apóstol tej kyqʼama jlu: «Tnejel ilxix tiʼj tuʼn t-xi qnimane Dios, ex mya qe xjal» (Hech. 5:29; Mat. 28:19, 20). Ax ikx in qoʼx kyoj jusgad tuʼn ttzaj qʼoʼn ambʼil qe tuʼn kukx qpakbʼan. Qo xnaqʼtzan kyiʼj junjun techel.
25, 26. ¿Tiquʼn xi kysamaʼn erman jun uʼj toj Corte Suprema de Justicia te tnam Nicaragua ex tiʼ tzaj tuʼn jlu?
25 Nicaragua. In najbʼentoq Donovan Munsterman te misionero ex te siervo te sucursal, toj 19 te noviembre te 1952 xiʼ toj Departamento te Inmigración atz Managua. Otoq tzaj qʼamaʼn te tuʼn tpon yolil tukʼil capitán Arnoldo García, aju nejenel te Departamento. Xi tqʼamaʼn capitán te Donovan qa mintiʼ qʼoʼn ambʼil kye testigos de Jehová te Nicaragua «tuʼn kypakbʼan tiʼj xnaqʼtzbʼil nimen kyuʼn ex tuʼn tbʼant junjuntl tiʼchaq kyuʼn». Tej txi tqʼanin Donovan te tiquʼn, tqʼama capitán qa mintiʼ qoʼn ambʼil kye testigos de Jehová tuʼn ministro de Gobierno ex Religiones ex qa kyajtoq tuʼn kyok meltzʼaj kyiʼj aj kawil. ¿Alkyetzun tzaj qʼamante jlu? Aʼye xjal te Iglesia Católica.
Qe erman te Nicaragua tej tel qʼiʼn ambʼil kye tuʼn kykʼulin te Dios.
26 Xiʼ ermano Donovan yolil toj Ministerio de Gobierno ex Religiones tuʼn ttzaj qʼoʼn ambʼil kye tuʼn kypakbʼan, axpe ikx tukʼil presidente Anastasio Somoza García, pero mintiʼ tzaj qʼoʼn ambʼil kye. Tuʼntzunju, kubʼ kyximen ermano tuʼn ya miʼn tok kychmon kyibʼ toj Ja te Chmabʼil ex tuʼn ya miʼn kypakbʼan kyoj bʼe. Pero kukx ok kychmon kyibʼ toj tal kʼlojin ex kukx e pakbʼan. Ax ikx, xiʼ kysamaʼn jun uʼj te Corte Suprema de Justicia te Nicaragua tuʼn ttzaj qʼoʼn ambʼil kye tuʼn kyajbʼen te Dios. Etz nim tqanil tiʼj kyoj peródico qa otoq tzʼel qʼiʼn ambʼil kye testigos de Jehová tuʼn kyajbʼen te Dios ex tiʼjju uʼj otoq txi kysamaʼn, ex tzaj tqʼoʼn Corte Suprema ambʼil tuʼn tok tqʼoʼn twitz tiʼj caso lu. ¿Tiʼ tzaj tuʼn jlu? Toj 19 te junio te 1953, tzaj tqʼoʼn Corte Suprema ambʼil kye testigos de Jehová tuʼn kypakbʼan. Tqʼama qa qʼoʼn ambʼil tuʼn ley tuʼn tok qet kyoklen xjal ex tuʼn kyyolin tiʼjju nimen kyuʼn. Ax ikx, tzaj tqʼamaʼn tuʼn tten juntl maj mujbʼabʼil kyxol aj kawil te Nicaragua ex qe testigos de Jehová.
27. ¿Tiquʼn e jaw labʼin erman tiʼjju kubʼ t-ximen Corte Suprema?
27 Noq e jaw labʼin xjal te Nicaragua tej tonin Corte Suprema kyiʼj testigos de Jehová. Toj ambʼil aju attoq nim kyipumal okslabʼil ex nya tajtoq Corte Suprema tuʼn ttzaj nya bʼaʼn kyxol. Ax ikx attoq nim kyipumal xjal ateʼ toj kawbʼil, tuʼntzunju chʼixme tkyaqil maj onin Corte Suprema kyiʼj. Qʼuqli kykʼuʼj erman tiʼj qa e kambʼan toj juicio tuʼnju onin Jesús kyiʼj ex tuʼnju kukx e pakbʼan (Hech. 1:8).
28, 29. Kyoj abʼqʼi 1980, ¿tzeʼn e chʼexpaj qe tiʼchaq toj ttnam Zaire?
28 Zaire. Kyoj abʼqʼi 1980 attoq junlo 35 mil testigos de Jehová toj tnam Zaire, toj ambʼil jaʼlo tok tbʼi te República Democrática del Congo. Tuʼnju kukxtoq in chʼiy kybʼet pakbʼal toj tnam aju, ok tilil tuʼn sucursal tuʼn kyjaw bʼinchet mas edificio. Toj 1985, ok jun asamblea internacional toj jun estadio toj ttxuylal tnam Kinsasa. E pon 32 mil xjal toj estadio, aqeju e tzaj toj junxichaq lugar twitz tkyaqil Txʼotxʼ. Noqtzun tuʼnj, toj ambʼil aju chʼexpaj qe tiʼchaq kye tmajen Jehová. ¿Tiʼtzun bʼaj?
29 Ul itzʼj ermano Marcel Filteau toj tnam Quebec te Canadá ex xi samaʼn ajbʼel te misionero toj tnam Zaire. Toj ambʼil aju, el ikʼun tej tten kawbʼil Duplessis ex in tzaj tqʼamaʼn tiʼ bʼaj. Tqʼama jlu: «Toj 12 te marzo te 1986 tzaj samaʼn jun carta kye erman qʼil twitz aqʼuntl toj tnam Zaire, jatumel tzaj qʼamaʼn qa ya mintiʼ permís tuʼn kyten testigos de Jehová toj tnam». Otoq kubʼ firmarin carta tuʼn aj kawil te tnam Zaire, aju Mobutu Sese Seko tbʼi.
30. ¿Tiʼ iltoq tiʼj tuʼn tkubʼ t-ximen Kʼloj ansyan toj Ninja qʼil twitz aqʼuntl ex tiʼ tbʼant kyuʼn?
30 Toj juntl qʼij etz qʼamaʼn jlu toj radio: «Ya miʼn che ten testigos de Jehová toj tnam [Zaire]». Tej tetz qʼamaʼn jlu, tzaj tzyet tuʼn tok bʼinchaʼn nya bʼaʼn kyiʼj erman. E kubʼ xitin Ja te Chmabʼil, xi elqʼaʼn qe tiʼchaq kye erman, e oʼkx qʼoʼn toj cárcel ex e ok kʼixbʼisaʼn. Axpe ikx, e okx qʼoʼn qe kʼwal testigo de Jehová toj cárcel. Nya oʼkxju, ax ikx toj 12 te octubre te 1988 i el tiʼn gobierno qe ja ateʼ toj tkwent ttnam Jehová. Tej tbʼaj jlu, ajbʼen sucursal tuʼn aj kawil tuʼn kyten polisiy toj. Tuʼn jlu, xi kyqanin ermano ambʼil tuʼn kyyolin tukʼil aj kawil Mobutu, pero mintiʼ e tzaj tzaqʼweʼn. Tej tbʼaj jlu, kubʼ t-ximen Kʼloj ansyan toj Ninja qʼil twitz aqʼuntl tiʼ tuʼn tbʼant kyuʼn, qa tuʼn kyxiʼ yolil twitz Tribunal Supremo moqa tuʼn kyyon. Naʼnx tuʼn ermano Timothy Holmes tiʼ bʼaj, aju ajbʼen te misionero ex te ansyan qʼol kyaqʼun Kʼloj ansyan toj Ninja qʼil twitz aqʼuntl. Tqʼama jlu: «Xi qqanine qnabʼile te Jehová tuʼntzun tel qnikʼe tiʼj tiʼ tuʼn tbʼant quʼne». Tej tbʼant jlu kyuʼn, el kynikʼ erman te ninja tiʼj qa nya atoq ambʼil tuʼn kyxiʼ toj juicio. Tuʼntzunju mas ok kyqʼoʼn kywiʼ tiʼj tuʼn kyxqʼuqin kyiʼj erman ex tuʼn kypakbʼan toj junjuntl tumel.
«Tej tok juicio, el qnikʼe tiʼj qa jaku che chʼexpaj qe tiʼchaq tuʼn Jehová».
31, 32. ¿Tiʼ tqʼama Tribunal Supremo te Zaire tiʼj juicio ok kyiʼj erman ex tzeʼn onin jlu kyiʼj erman?
31 Tej tikʼ nim abʼqʼi, ya mintiʼxix i el ikʼun testigos de Jehová ex mas ok qʼoʼn kyoklen xjal toj tnam. Kubʼ t-ximen Kʼloj ansyan toj Ninja qʼil twitz aqʼuntl tuʼn kyxiʼ yolil toj Tribunal Supremo te tnam Zaire tuʼn ttzaj qʼoʼn ambʼil kye tuʼn kyajbʼen te Jehová. Maske jaku qo jaw labʼin tiʼj, tzaj tqʼoʼn Tribunal ambʼil tuʼn tok juicio. Tuʼntzunju, toj 8 te enero te 1993, tej ya otoq tzikʼ wuq abʼqʼi ttzajlen tqʼamaʼn aj kawil tuʼn ya miʼn kyten testigos de Jehová, tqʼama Tribunal qa nya toj tumel jlu ex el qʼiʼn toklen ley lu. Noqpe qo ximen tiʼj jlu, jakutoq che kubʼ bʼyoʼn jwes tuʼnju otoq tzʼel kyiʼn toklen ley otoq kubʼ tfirmarin aj kawil. Tqʼama ermano Holmes jlu: «Tej tok juicio, el qnikʼe tiʼj qa jaku che chʼexpaj qe tiʼchaq tuʼn Jehová» (Dan. 2:21). Chʼiy qʼuqbʼil kykʼuʼj erman tuʼnju el kynikʼ tiʼj qa otoq tzaj tqʼamaʼn aj Kawil Jesús toj alkye ambʼil tuʼn t-xi bʼinchet tiʼj jlu ex tzeʼn tuʼn tbʼant.
WIn che tzalaj testigos de Jehová te República Democrática del Congo tuʼnju qʼoʼn ambʼil kye tuʼn kyajbʼen te Jehová.
32 Tej ttzaj tqʼoʼn ley ambʼil tuʼn kyten testigos de Jehová, ok tilil tuʼn ninja qʼil twitz aqʼuntl tuʼn kypon misionero toj tnam, tuʼn kyjaw bʼinchet ja ex tuʼn kypon uʼj tiʼj Tyol Dios. * Nim in che tzalaj tmajen Jehová twitz tkyaqil Txʼotxʼ aj tok kyqʼoʼn kywitz tiʼj tzeʼn in xqʼuqin Jehová kyiʼj tuʼn tten jun tbʼanel kyamiwbʼil tukʼil (Is. 52:10).
«Ate Qman [Jehová] onil weye»
33. ¿Tiʼ in tzaj kyyekʼin junjun juicio e kambʼan erman kyiʼj?
33 Tuʼnju ma tzʼel qnikʼ tiʼjju bʼaj kyoj junjun juicio, in nok qeʼ qkʼuʼj tiʼj qa ax tok qe tyol Jesús tej tqʼama jlu: «Aqine chin qʼolte yol tuj kytziʼye tukʼix kynabʼle, tuʼntzunju mlay kubʼ tiʼj kyyole kyuʼn kykyaqil aj qʼoj kyiʼje, ex mlay maqet kyyole kyuʼn» (kjawil uʼjit Lucas 21:12-15). In nel qnikʼ tiʼj qa at maj o tzʼajbʼen junjun xjal tuʼn Jehová tuʼn kyonin kyiʼj tmajen moqa o che ajbʼen jwes tuʼn ex qe abogado tuʼn t-xi kybʼinchaʼn aju tzʼaqlixix. O qo kambʼan kyiʼj aj qʼoj tuʼn tonbʼil Jehová (kjawil uʼjit Isaías 54:17). Mlayx tzʼel kyiʼn xjal ambʼil qe tuʼn kukx tbʼant tajbʼil Dios quʼn.
34. ¿Tiquʼn jaku tzʼok qeʼ qkʼuʼj tiʼj qa in nonin Jehová kyiʼj tmajen? (Qʼonka twitza tiʼj recuadro tok tbʼi: « In tzaj kyqʼoʼn tribunal ambʼil tuʼn t-xi pakbʼet tbʼanel tqanil tiʼj Tkawbʼil Dios»).
34 ¿Tiquʼn nim kyoklen juicio o qo kambʼan kyiʼj? Qo ximen tiʼj jlu, nyaxix ojtzqiʼn kywitz testigos de Jehová kyuʼn xjal ex nya nim kyoklen. Mintiʼ in qo votarin, mintiʼ in nokx qqʼon qibʼ kyxol aj kawil ex mintiʼ in qo ayon tuʼn kyonin aj kawil qiʼj. Ex aqeju erman in chex qʼiʼn kyoj jusgad, in che ok qʼoʼn ik tzeʼn mintiʼ o tzʼetz kyxnaqʼtzbʼil (Hech. 4:13). Tuʼn tkyaqil jlu, jaku kubʼ qximen qa mlay che onin jwes qiʼj ex qa mlay che ok meltzʼaj kyiʼj okslabʼil nim kyoklen ex kyiʼj aj kawil. Maske ikju, nimku maj o che onin qiʼj. Tuʼnju o qo kambʼan kyiʼj nimku juicio, in tzaj tyekʼin jlu qa in kwentin Jehová qiʼj ex qa in qo ajbʼen te Jesucristo (2 Cor. 2:17). Tuʼntzunju, jaku txi qqʼamaʼn qe yol tqʼama apóstol Pablo: «Ate Qman [Jehová] onil weye; mlay chin xobʼe» (Heb. 13:6).
^ taqik' 9 Onin ermano Hayden Covington tiʼj 43 juicio ok kyiʼj erman toj Tribunal Supremo te Estados Unidos. Aju tnejel juicio onin tiʼj atzun juicio ok tiʼj ja xjal Cantwell toj tnam Connecticut. Kyim ermano Covington toj abʼqʼi 1978. Atzunte t-xuʼjil Dorothy tbʼi, kukx ajbʼen te Jehová ex kyim toj 2015 tej qʼiʼntoq 92 abʼqʼi tuʼn.
^ taqik' 12 Aju xi qʼamaʼn kyiʼj erman atz jatz toj ley te 1606, aju tzaj tqʼamaʼn tuʼn tkubʼ qʼoʼn tkastiw jun xjal qa ma txi tqʼamaʼn jun yol kye txqantl tuʼn tkubʼ kynaʼn qʼoj tuʼn, axpe ikx qa ax tok jlu.
^ taqik' 14 In che ajbʼentoq 164 minisionero toj tnam Quebec toj 1950. Kyxol qe jlu e xi samaʼn 63 erman otoq che ten toj Xnaqʼtzbʼil te Galaad, aqeju xi kykʼamoʼn kyoklen tukʼil tzalajbʼil maske che okeltoq weʼ twitz nya bʼaʼn.
^ taqik' 15 Toj abʼqʼi 1943 a 2003, kolin ermano Glen How kyiʼj testigos de Jehová te tnam Canadá kyoj juicio ex kyiʼj erman te junjuntl tnam.
^ taqik' 16 Kkanetel mas tqanil tuʼna tiʼj juicio lu toj xnaqʼtzbʼil tok tbʼi «La batalla no es de ustedes, sino de Dios», toj uʼj ¡Despertad! te 22 te abril te 2000, toj t-xaq 18 a 24.
^ taqik' 32 Tej tbʼet ambʼil, tzaj qʼoʼn juntl maj sucursal kye erman, pero jaw bʼinchet juntl sucursal toj juntl lugar.
Bʼalo ax ikx tgana jlu
DOCUMENTARIES
Aʼyeju testigos de Jehová: jun txʼolbʼabʼil tiʼj axix tok qʼuqbʼil kʼuʼjbʼaj. Tkabʼ plaj: Kubʼ kyqʼoʼn spikʼun kywitz txqantl xjal
Kyaj tqʼamaʼn Jesús jlu kye t-xnaqʼtzbʼen: «Kymanxe kye xjal tuʼn kyok te nxnaqʼtzbʼene kyuj kykyaqil nasyon». Tej otoq che ex Xnaqʼtzal tiʼj Tyol Dios twitz nim nya bʼaʼn, el kynikʼ tiʼj tiʼ t-xilen tuʼn tkubʼ kyqʼoʼn spikʼun kywitz txqantl xjal.
