In jaw chʼiye toj jun lugar prow te tnam Montreal. Wajxaq qbʼete ex aʼyine mankbʼil kʼwal. Kyim ntate tej qʼiʼntoq qaq xjaw wuʼne ex a ntxuʼye kwentin qiʼje.

Atxix tej tal kʼwal qiʼne ngantoqe tuʼn n-apostarine, tuʼn nbʼiyene ex tuʼn tajbʼen droga wuʼne. O anqʼine kyxol nya bʼaʼn xjal. Tej qʼiʼntoq 10 abʼqʼi wuʼne, ya in xitoq wiʼne junjun tiʼchaq kye xuʼj in che kubʼ ten kyukʼil xinaq moqa ichan ex kye xjal in che qʼon chʼex toj lugar aju. Ngantoqe tuʼn welqʼane ex tuʼn nsbʼune kyiʼj xjal. Ok jlu ik tzeʼn droga te weye.

Tej njapune twi 14 abʼqʼi, ya otoq ten mas wojtzqibʼile tuʼn nsbʼune ex tuʼn welqʼane kyiʼj xjal. Jun techel, in che tzajtoq nlaqʼoʼne nim reloj, qe pulsera ex qe aniy chapados tukʼil oro. Yajxitl, in kubʼtoq ntzʼibʼine 14 quilates kyibʼaj ex in chex nkʼayine toj kay ex kyoj lugar jatumel in che weʼ kar kye nimaq kʼaẍjel. ¡Nyatoq kwest tuʼn tkanet npwaqe! Jun maj, in kambʼane 10 mil dólar te Canadá toj jun qʼij.

Tej qʼiʼntoq 15 abʼqʼi wuʼne, in etz lajoʼne toj jun reformatorio ex ya mintiʼ ten jun lugar jatumel tuʼn wanqʼine. Tuʼntzunju, in jtane kyoj kay, kyoj parque ex toj kyja nya bʼaʼn wamiwe.

In tzyete junjun maj kyuʼn polisiy tuʼnju in chin sbʼune toj kʼaẍjel. Pero mintiʼ in xiʼye toj pres tuʼnju nyatoq elqʼaʼn nkʼaʼẍe. Maske ikju, xi nchjoʼne nimxix multa tuʼnju in sbʼune ex in elqʼane kyiʼj xjal, ex tuʼnju mintiʼ nlicenciaye tuʼn nkʼayine. Mintiʼtoq in chin xobʼe te nijun, tuʼntzunju, in aqʼunane tuʼn tcobrarit pwaq in xi kyqʼoʼn xjal te chʼex. At maj xi wiʼne arma tuʼnju jakutoq tzaj nya bʼaʼn wiʼje toj aqʼuntl lu. Nya oʼkxju, ax ikx in aqʼunane tukʼil mafía.

Qʼiʼntoq 17 abʼqʼi wuʼne tej tok nbʼiʼne tnejel maj Tyol Dios. In chin anqʼintoqe tukʼil jun nnoviaye aju xi tzyet tuʼn t-xnaqʼtzan kyukʼil testigos de Jehová. Pero nya bʼaʼn ela toj nwitze aju in tzaj tqʼamaʼn Tyol Dios tiʼjju bʼaʼn ex nya bʼaʼn, tuʼntzunju, kyaj nqʼoʼne txin lu ex in xiʼye tukʼil juntl txin aju otoq txi tzyet tuʼn nyoline tukʼil.

Maske jaku qo jaw tzeʼn tuʼn, noqtzun tuʼnj, ax ikx te txin lu xi tzyet tuʼn t-xnaqʼtzan tiʼj Tyol Dios kyukʼil testigos de Jehová. Pero tbʼanel ela toj nwitze tuʼnju ok te mas tbʼanel xjal ex ten mas tpasens. Jun maj, tzaj tqʼamaʼn weye tuʼn nxiʼye toj jun chmabʼil in nok kyuʼn testigos de Jehová ex in xiʼye. Tbʼanel qe xjal e kanet wuʼne atz ex e tzalaj tej npone. Naʼmxtoq tkubʼ nnaʼne jun maj tzalajbʼil ik tzeʼn jlu. Mintiʼ kubʼ kyyekʼin toj njaye kʼujlabʼil wiʼje tej tal kʼwalx qine ex mintiʼ ok kyqʼoʼn kywiʼ wiʼje. Kubʼ kyyekʼin testigos de Jehová nimxix kykʼujlabʼil wiʼje ex atzun jlu wajtoqe. Tej ttzaj kyqʼamaʼn weye tuʼn nxnaqʼtzane kyukʼil tiʼj Tyol Dios, mintiʼ kubʼ nximane kabʼe maj ex jun rat xi tzyet tuʼn nxaqʼtzane.

Onin nxnaqʼtzbʼile tiʼj Biblia tuʼn miʼn nkyime. Otoq bʼaj qximane kyukʼil kabʼe wukʼile tuʼn tetz qelqʼaʼne nim pwaq, tuʼnju iltoq tiʼj tuʼn t-xi nchjoʼne 50 mil dólar nkʼase tuʼn kypaj qe saqchbʼil nya bʼaʼn. Tbʼanel tuʼnju ya mintiʼ in xiʼye. Tuʼnju kubʼ bʼyoʼn jun kyxol qeju i eʼx elqʼal ex atzun juntl okx qʼoʼn pres.

Tej in chin xnaqʼtzane tiʼj Tyol Dios el nnikʼe tiʼj qa iltoq tiʼj tuʼn kybʼant nim chʼixpubʼil wuʼne. Jun techel, in tzaj tqʼamaʼn 1 Corintios 6:​10 jlu: «Qe eleqʼ, qeju in pon kykʼuʼj tiʼj nimku, qe kʼal qʼeʼn, qeju in che yasun ex qeju in che elqʼan tuʼn sbʼubʼl, kykyaqil jlu mintiʼ kyoklen tiʼj tkawbʼil Dios». In jaw oqʼe tej tjaw wuʼjine texto lu. Iltoq tiʼj tuʼn kybʼant chʼixpubʼil wuʼne (Romanos 12:⁠2). Ya mintiʼtoq ttxolil wanqʼibʼile, tuʼnju in chʼin bʼiyene ex in xi nqʼamaʼne nya ax tok yol.

Noqtzun tuʼnj, el nnikʼe tiʼj qa tbʼanel te Jehová ex in kubʼ tnajsaʼn qil (Isaías 1:18). Tuʼntzunju, in naʼne Dios te tuʼn tkyaqil nkʼuʼje ex in kubʼsane twitz tuʼn tonin wiʼje tuʼn tkyaj nqʼoʼne qe vicio ex tuʼn tchʼexpaj wanqʼibʼile. Noq tuʼn tonbʼil, chebʼe chebʼe e kyaj ntzaqpiʼne qe nya bʼaʼn lu. Tuʼntzunju, in kubʼ mojeʼye tukʼil nnoviaye.

Toj ambʼil aju qʼiʼntoq 24 abʼqʼi wuʼne ex ya attoq oxe nkʼwale. Wajtoqe tuʼn tkanet jun waqʼune toj tumel tuʼntzun t-xi nqʼoʼne aju at tajbʼen kye toj njaye. Pero mintiʼ otoq tzʼetz jun xnaqʼtzbʼile ex mintiʼtoq wojtzqibʼile tiʼj jun aqʼuntl. Toj ambʼil aju ax ikx xi nqanine onbʼil te Jehová ex in xiʼye jyol waqʼune. Tej ttzaj qanin junjun xjel tuʼn tkanet waqʼune, in xitoq nqʼamaʼne qa wajtoqe tuʼn tchʼexpaj wanqʼibʼile ex qa ya nya wajtoqe tuʼn nsbʼune. At maj, in xitoq nqʼamaʼne qa in chin xnaqʼtzane tiʼj Tyol Dios tuʼntzun woke te jun tbʼanel xjal, pero mintiʼ tzaj qʼoʼn waqʼune. Jun maj, tej otoq txi nqʼamaʼne aju otoq bʼaj wiʼje te jun tajaw aqʼuntl, tzaj tqʼamaʼn jlu weye: «Mintiʼxix in nel nnikʼe tiʼj tiquʼn, pero in kubʼ nnaʼne qa il tiʼj tuʼn t-xi nqʼoʼne taqʼuna». Qʼuqli nkʼuʼje tiʼj qa atzun tzaqʼwebʼil jlu kyiʼj nnaʼj Diose. Tej tikʼ chʼin ambʼil, o oke te testigo de Jehová tukʼil nxuʼjile.

Kukx itzʼx qine tuʼnju o chex nbʼiʼne qe consej in tzaj tqʼamaʼn Tyol Dios ex tuʼnju o chin ok lepeʼye tiʼj Jesucristo. Bʼaʼn atine tukʼil Dios ex kyukʼil toj njaye, tuʼnju in kubʼ nnaʼne qa o che kubʼ tnajsaʼn Jehová wile.

Ma tzikʼ 14 abʼqʼi in chin ajbʼene te Jehová toj tkyaqil ambʼil ex in chin onine kyiʼj xjal tuʼn tel kynikʼ tiʼj Tyol Dios noq kukx. Ax ikx, kʼitzqeku tzaj tzyet tuʼn tajbʼen nxuʼjile toj tkyaqil ambʼil te Dios. Nya oʼkxju, ax ikx kyoj qeju 30 abʼqʼi o che ikʼ, o chin onine kyiʼj 22 wukʼile toj aqʼuntl tuʼn kyok te testigo de Jehová. Kukx in chin ikʼe kyoj nimaq kaẍjel, pero nya tuʼn welqʼane kyiʼj xjal ik tzeʼn ojtxe. Nim maj in najbʼen ambʼil lu wuʼne tuʼn t-xi nqʼamaʼne kye xjal qa chʼix tpon ambʼil tuʼn qanqʼin jatumel ya miʼn che tentl eleqʼ (Salmo 37:10, 11).