PLAJ 5
Aju axix tok tiʼj kyaqʼun chman moqa aj yoʼẍ
1. ¿Jteʼ xjal in nok qeʼ kykʼuʼj tiʼj magia, tiʼj hechicería ex tiʼj kyaqʼun chman?
IN TZAJ tqʼamaʼn libro African Traditional Religion (Aju kyokslabʼil xjal te África) jlu: «Toj África, mintiʼ ttxolil qa ma txi qqanin qa ateʼ bruja moqa mintiʼ». Ex in tzaj tqʼamaʼn qa «nim toklen kyaqʼun chman toj kywitz kykyaqil xjal te África». Kyxol qeju in nok qeʼ kykʼuʼj tiʼj magia, tiʼj hechicería ex tiʼj kyaqʼun chman, ateʼ xjal mintiʼ in bʼant kyuʼjin ex qe xjal o tzʼetz kyxnaqʼtzbʼil, axpe ikx qeju nejenel te okslabʼil islam tbʼi ex junjuntl okslabʼil nya ax tok.
2. Ik tzeʼn in tzaj kyqʼamaʼn xjal, ¿jatumel in tzaj kypoder chman?
2 In kubʼ kyximen xjal te África qa at jun ipumalj mintiʼ qʼanchaʼl ex qa a Dios in controlarin tiʼj. Ex qa in najbʼen ipumalj moqa poder lu kyuʼn espíritu moqa kyuʼn xjal o che kyim. Ax ikx, ateʼ junjun xjal in najbʼen jlu kyuʼn tuʼn tok kybʼinchaʼn bʼaʼn (magia blanca) moqa nya bʼaʼn kyiʼj txqantl (magia negra).
3. ¿Tiʼ aju magia negra ex tiʼ jaku tzaj tuʼn ik tzeʼn in kubʼ kyximen xjal?
3 In najbʼen magia negra moqa kyaqʼun aj kyʼaʼ kyuʼn xjal tuʼn tok kybʼinchaʼn nya bʼaʼn kyiʼj txqantl. In kubʼ kyximen xjal qa jaku tzʼajbʼen sotzʼ, qe pájaro, qe us ex junjuntl txkup kyuʼn chman tuʼn tok kybʼinchaʼn nya bʼaʼn kyiʼj txqantl. Ex ateʼ nim xjal in kubʼ kyximen qa tuʼn magia negra, jaku tzaj qʼoj, jaku tzaj yabʼil tiʼj jun xjal moqa jaku kyim ex mlay tzul tal jun xuʼj.
4. ¿Tiʼ in xi kynimen xjal kyiʼj bruja ex tiʼ in tzaj kyqʼamaʼn junjun xjal o kyaj kytzaqpiʼn brujería?
4 At toklen kyaqʼun chman tukʼil magia negra. In tzaj kyqʼamaʼn xjal qa in kyaj kyqʼoʼn bruja kyxmilal toj qonikʼen ex in cheʼx jyol junjuntl bruja, moqa in nok kybʼinchaʼn nya bʼaʼn kyiʼj aj qʼoj kyiʼj. Ateʼ xjal in nok qeʼ kykʼuʼj tiʼj qa ax tok jlu, tuʼnju atzun in tzaj kyqʼamaʼn junjun xjal o kyaj kytzaqpiʼn brujería. In tzaj tqʼamaʼn jun uʼj te África kyyol junjun xuʼj kyaj kytzaqpiʼn brujería, ex chʼixme kykyaqil txin qe: «O che kubʼ nbʼyoʼne 150 xjal kyoj aksident kyuʼn kar», «jatz ntzʼuʼne kychkʼel jweʼ tal kʼwal ex o che kyim wuʼne», «o che kyim oxe qʼa wuʼne tuʼnju in kyaj kytzaqpiʼne».
5. ¿Tiʼ aju magia blanca ex tiʼ in bʼant kyuʼn xjal nimen jlu kyuʼn?
5 In tzaj kyqʼamaʼn xjal qa in xqʼuqin magia blanca kyiʼj. Aqeju xjal in xi kynimen jlu, in nok kyqʼoʼn junjun pulsera tiʼj kyqʼabʼ moqa anillo, in xi kykʼaʼn junjun qʼanbʼil moqa in nok kyqʼoʼn tiʼj kyxmilal. Ax ikx, in nokx kyewin junjun tiʼ toj kyja moqa in kux kymaquʼn tjaqʼ txʼotxʼ tuʼnju in kubʼ kyximen qa at tpoder tuʼn t-xqʼuqin kyiʼj. Axpe ikx qʼiʼn junjun tiʼchaq kyuʼn jatumel tzʼibʼin junjun texto tiʼj, aju in jatz toj Corán moqa toj Tyol Dios.
Nikʼaj yol ex sbʼubʼil
6. ¿Tiʼ o bʼant tuʼn Satanás ex qe taqʼunal toj ambʼil ojtxe ex tiʼ qximbʼetz ktel tiʼj kyipumal?
6 Ax tok, jaku tzaj nya bʼaʼn kyiʼj xjal tuʼn Satanás ex kyuʼn qe taqʼunal. Jaku che okx toj kyxmilal xjal ex jaku chʼexpaj kymod kyuʼn. Toj ambʼil ojtxe e okx kyoj xjal, kyoj txkup ex ok kybʼinchaʼn nya bʼaʼn kyiʼj (Mateo 12:43-45). Ax tok, at tipumal Satanás ex qe taqʼunal, pero mintiʼ tuʼn qtzaj xobʼ tuʼn jlu.
7. ¿Tiʼ taj Satanás tuʼn tkubʼ qximen ex alkye techel jaku tzʼok mojbʼet tukʼilju in bʼant tuʼn?
7 In che kubʼ tsbʼuʼn Satanás xjal tuʼn t-xi kynimen qa at nimxix tipumal moqa tpoder. Jaku tzʼok qmojbʼaʼn jlu ik tzeʼn jun qʼoj ok toj tnam te África, ajbʼen jun equipo de sonido kyuʼn soldad tuʼn kytzaj xobʼ qe aj qʼoj kyiʼj. Tej naʼmxtoq kyok tzoqpaj soldad, ok kyqʼoʼn jun grabación tukʼil nim tvolumen jatumel etz tqʼajqʼajel kywiʼ nim arma tuʼntzun tkubʼ kyximen aj qʼoj qa in che ok atacarin. Ax jlu in bʼant tuʼn Satanás, taj tuʼn tkubʼ kyximen xjal qa at nim tipumal. Taj tuʼn kytzaj xobʼ xjal tuʼntzun tkubʼ kybʼinchaʼn tajbʼil ex nya tvoluntad Jehová. Qo xnaqʼtzan tiʼj oxe tiʼ taj Satanás tuʼn t-xi qnimen.
8. ¿Alkye jun nya ax tok yol in tqʼamaʼn Satanás?
8 Taj Satanás tuʼn tkubʼ qximen qa nya noq minabʼen in che tzaj nya bʼaʼn qiʼj, sino in nok bʼinchaʼn qiʼj kyuʼn ipumalj nya qʼanchaʼl. Qo ximen tiʼj qa in kyim jun tal kʼwal tuʼn yabʼil malaria ex bʼalo ojtzqiʼn tuʼn ttxuʼ qa in tzaj yabʼil lu kyuʼn us. Pero ax ikx jakulo kubʼ t-ximen qa ma tzʼajbʼen brujería tuʼn jun xjal tuʼn tok txʼaʼn tal kʼwal tuʼn us.
Mlay bʼant tuʼn kyex bruja toj kyxmilal.
9. ¿Alkye tten in tzaj tyekʼin Tyol Dios qa nya tuʼn Satanás in tzaj tkyaqil nya bʼaʼn?
9 Maske jaku tzaj junjun nya bʼaʼn tuʼn Satanás kyiʼj xjal, mlay kubʼ qximen qa tuʼn in tzaj tkyaqil nya bʼaʼn. In tzaj tqʼamaʼn Tyol Dios jlu: «Mi jun xjal bʼaʼn tuʼn jtoj bʼaʼn tpon or tuʼn tkyim; ik tzaʼn qe kyiẍ in che tzyet tuʼn xyubʼ, ex ik tzaʼn qe chyuʼj in che tzyet tuʼn kʼobʼil; ikxtzun tten xjal, maske mintiʼ ximan tuʼn, pero noq minabʼen in tzaj mya bʼaʼn tibʼaj» (Eclesiastés 9:12). Maske jun rat in karrelin jun xjal twitz juntl, nya a t-xilen jlu qa a kkambʼal tiʼj carrera. Mlaylo kambʼan tuʼnju «noq minabʼen» jaku jaw tzʼaq moqa jaku tzaj choʼn t-xmilal. Noq alkyexku xjal jaku bʼaj jlu tiʼj ex mlay txi qqʼamaʼn qa a Satanás sok bʼinchante tiʼj moqa ajbʼen brujería tuʼn jun xjal.
10. ¿Tiʼ in kubʼ kyximen xjal kyiʼj bruja ex tiquʼn jaku txi qqʼamaʼn qa nya ax tok jlu?
10 Juntl nya ax tok yol in najbʼen tuʼn Satanás, aju tuʼn tkubʼ kyximen xjal qa in che ex bruja toj kyxmilal tuʼn kyxiʼ kyukʼil junjuntl bruja moqa tuʼn tok kybʼinchaʼn nya bʼaʼn kyiʼj aj qʼoj kyiʼj. Ximana tiʼj jlu: «Qa ax tok in bʼant jlu kyuʼn bruja, ¿tiʼtzun in nex toj kyxmilal?». Ik tzeʼn o tzʼel qnikʼ tiʼj, aju alma atzun xjal ex nya jun tiʼ in nex toj t-xmilal. Ax ikx, aju espíritu atzun t-xew xjal in nonin tuʼn tanqʼin ex mlay ten jlu qa mintiʼ t-xmilal xjal.
Nimku maj noq minabʼen in tzaj nya bʼaʼn qiʼj.
11. ¿Tiquʼn jaku txi qqʼamaʼn qa mlay che ex bruja toj kyxmilal? ¿In nokpe qeʼ tkʼuʼja tiʼj jlu?
11 Mlayx tzʼex alma nix espíritu toj t-xmilal jun xjal tuʼn tkubʼ tbʼinchaʼn jun tiʼ, qa bʼaʼn moqa nya bʼaʼn. Tuʼntzunju, jaku txi qqʼamaʼn qa mlay che ex bruja toj kyxmilal ex nya ax tok aju in tzaj kyqʼamaʼn.
12. ¿Tiʼ o bʼant tuʼn Satanás tuʼn tkubʼ kyximen xjal qa o bʼant junjun tiʼchaq kyuʼn maske mintiʼ?
12 ¿Tiʼtzun jaku txi qqʼamaʼn tiʼjju in tzaj kyqʼamaʼn xjal e aqʼunan tiʼj brujería? Bʼaʼn tuʼn ttzaj qnaʼn qa jaku tzʼok tilil tuʼn Satanás tuʼn tkubʼ kyximen xjal qa o bʼaj junjun tiʼchaq kyiʼj. Jaku tzʼok kywitzikʼ xjal tuʼn tuʼntzun tkubʼ kyximen qa o tzʼok kyqʼoʼn kywitz tiʼj jun tiʼ moqa o kubʼ kybʼinchaʼn maske mintiʼ o bʼaj. Tuʼn jlu, in che el tpaʼn Satanás xjal tiʼj Jehová ex tuʼn miʼn tok qeʼ kykʼuʼj tiʼj Tyol Dios.
13. a) ¿Tbʼanelpe aju magia blanca? b) ¿Tiʼ in tzaj tqʼamaʼn Tyol Dios tiʼj magia?
13 Juntl nya ax tok yol in najbʼen tuʼn Satanás, aju qa bʼaʼn magia blanca ex qa in kolin kyiʼj xjal tiʼj magia negra. Noqtzun tuʼnj, in tzaj tqʼamaʼn Tyol Dios qa nya bʼaʼn tkyaqilju at toklen tukʼil magia. Qʼonka twitza tiʼj ley tzaj tqʼoʼn Jehová kye aj Israel tiʼj magia ex tiʼ tuʼn tbʼaj kyiʼj xjal in kubʼ kybʼinchaʼn:
-
«Miʼn bʼaj kyxnaqʼtzan kyibʼe tuʼn tbʼant kyqʼijine» (Levítico 19:26).
-
«Qa at jun xinaq ex qa jun xuʼj bʼaʼn txokon tiʼj kyanmi kyimni, ex qa bʼaʼn qʼijin, il tiʼj tuʼn tkyim» (Levítico 20:27).
-
«Mi jun kyeye [...] tuʼn tbʼant tkyʼaʼn, mi jun tuʼn tbʼant mañ tuʼn, mi jun tuʼn t-xi tqanin jun t-xjel kye aj qʼij» (Deuteronomio 18:10-14).
14. ¿Tiquʼn tzaj tqʼoʼn Jehová junjun ley tuʼn miʼn tajbʼen magia kyuʼn tmajen?
14 In tzaj kyyekʼin ley lu qa nyatoq taj Jehová tuʼn tajbʼen magia kyuʼn tmajen moqa tuʼn tbʼant kyaqʼun chman kyuʼn. Xi tqʼoʼn Jehová ley lu kye aj Israel tuʼnju kʼujlaʼn qetoq tuʼn, nyatoq taj tuʼn ttzaj nya bʼaʼn kyiʼj nix tuʼn kyxobʼ kywitz juʼẍ moqa demonio.
15. ¿Tzeʼn in tzaj tyekʼin Tyol Dios qa at mas tipumal Jehová twitz Satanás?
15 Mintiʼ in tzaj tqʼamaʼn Tyol Dios tiʼ jaku bʼant ex tiʼ mlay bʼant kyuʼn demonio, noqtzun tuʼnj, in tzaj tqʼamaʼn qa mas nim tipumal Jehová at twitz Satanás ex qe taqʼunal. Ax ikx, o kuʼtz t-xoʼn Jehová Satanás twitz Txʼotxʼ (Apocalipsis 12:9). Bʼaʼn tuʼn tok qqʼoʼn qwitz tiʼj qa tej tkubʼ tqʼoʼn Satanás Job toj prueba, tnejel xi tqanin ambʼil te Jehová. Ax ikx xi tbʼiʼn Satanás tyol Jehová tej t-xi tqʼamaʼn te tuʼn miʼn tkubʼ tbʼyoʼn Job (Job 2:4-6).
16. ¿Alkye jaku xqʼuqin qiʼj?
16 In tzaj tqʼamaʼn Proverbios 18:10 jlu: «Ik tten Qman ik tzaʼn jun ja maʼ twaʼl ex kyuw tten, ex atzun in pon tklon tibʼ ju xjal tzʼaqlxix ex mintiʼ jun jaku bʼaj tiʼj». Tuʼntzunju, qa qaj tuʼn qok t-xqʼuqin Jehová, il tiʼj tuʼn qxi laqʼeʼ ttxlaj. Mintiʼ in che ajbʼen amuleto moqa junjun qʼanbʼil kyuʼn tmajen Jehová tuʼn tok kyxqʼuqin kyibʼ tiʼj tbʼinchbʼen Satanás ex qe taqʼunal, ex mintiʼ in che xobʼ tiʼjju in bʼant kyuʼn brujo. Sino in nok qeʼ kykʼuʼj tiʼjju in tzaj tqʼamaʼn Tyol Dios: «Porke ate Qman in keʼyin tiʼj tkyaqilju in bʼaj twitz txʼotxʼ ex in xi tqʼoʼn kyipun qeju axix tok nnoʼk qeʼ kykʼuʼj tiʼj» (2 Crónicas 16:9).
17. ¿Tiʼ in tzaj tqʼamaʼn Santiago 4:7, pero tiʼ il tiʼj tuʼn tbʼant quʼn?
17 Ax ikx in tzaj tqʼamaʼn Santiago 4:7 jlu: «Kyqʼoʼnxtzun kyibʼe tjaqʼ tkawbʼil Dios. Che weʼxixe twitz tajaw il, ex kʼeleltzun oq kywitze». Jaku tzʼok qeʼ tkʼuʼja tiʼj qa kxqʼuqil Jehová tiʼja qa ma tzʼajbʼena te tuʼn tkyaqil tanmiya.