Kyoj qeju uʼj e kubʼ tzʼibʼen toj yol hebreo ex arameo (ax ikx in nok qʼoʼn kybʼi te Ojtxe Tuʼjil), tkuʼx chʼixmi 7,000 maj tbʼi Dios kyoj, kyukʼil qeju techel lu יהוה. Aqeju techel lu kyaje letra qe toj yol hebreo, ex Tetragrámaton kybʼi ojtzqiʼn. Aqeju kyaje letra lu in kubʼ qʼet te «Jehová» toj Traducción del Nuevo Mundo. Aju bʼibʼaj lu in kanet nim maj, twitz alkyexku juntl, toj Tyol Dios. Ax tok aqeju kubʼ kytzʼibʼen Xjan Uʼj ajbʼen nim yol kyuʼn tuʼn kyyolin tiʼj Dios ik tzeʼn Maʼxix Toklen, at tipumal tuʼn bʼant tkyaqil tuʼn ex Qman. Noqtzun tuʼnj, oʼkxku jun bʼibʼaj ajbʼen kyuʼn tiʼj Dios aju Tetragrámaton.

Ax Jehová xi qʼamante kye qeju kubʼ kytzʼibʼen Tyol Dios tuʼn tajbʼen tbʼi kyuʼn. Jun techel, xi tqʼamaʼn te t-sanjel, aju Joel tbʼi, tuʼn tkubʼ ttzʼibʼen jlu: «Kykyaqil qeju in che kubʼsan twitz Qman [‹Jehová›, TNM] che kletel», ex xi tqʼamaʼn te juntl t-sanjel, aju Isaías tbʼi, tuʼn tkubʼ ttzʼibʼen jlu: «Aqine Jehová [...] porque atzun nbʼiye» (Joel 2:32; Isaías 42:8). Nya oʼkxju, ax ikx tkuʼx junlo 700 maj tbʼi kyoj Salmos, atz jatumel ateʼkux bʼitz ex poemas kyoj, aju in xi kybʼitzintoq ex in xi kyqʼamaʼntoq tmajen Dios. Qa ikju, ¿tiquʼn mintiʼ tkuʼx bʼibʼaj lu toj nimku Tuʼjil Tyol Dios o che kubʼ kyoj txqantl yol? Ex ¿tiquʼn in najbʼen bʼibʼaj Jehová toj Traducción del Nuevo Mundo? ¿Tiʼ t-xilen, moqa tiʼ tzʼelpuna, bʼibʼaj lu?

¿Tiquʼn mintiʼ tkuʼx bʼibʼaj lu toj nimku Tuʼjil Tyol Dios o che kubʼ kyoj txqantl yol? At nim tiquʼn. 1) At junjun xjal in kubʼ kyximin qa aju Dios at Nimxix Tipumal mintiʼ tuʼn tten jun tbʼi tekuxix. 2) At txqantl xjal ik tzeʼn in nel qnikʼ tiʼj o txi kyqʼoʼn ambʼil teju kyximbʼetz aj judiy aju tuʼn miʼn tajbʼen tbʼi Dios kyuʼn, atlo maj tuʼnju in che xobʼ tuʼn ttzʼilex tbʼi Dios. 3) Ex junjuntl in kubʼ kyximin qa tuʼnju mintiʼ jun tten tuʼn tel qnikʼ tzeʼnxix in xi qʼamet tbʼi Dios ojtxe, mas bʼaʼn tuʼn tajbʼen oʼkx qeju yol Qman moqa Qajaw. Noqtzun tuʼnj, mi jun kyxol qe jlu ax tok. Qo xnaqʼtzan tiʼj tiquʼn.

• Tnejel, aqeju in kyqʼamaʼn qa nya il tiʼj tuʼn tten jun tbʼi Dios tekuxix mintiʼ in che ximin tiʼj qa o che kanet junjun ojtxe uʼj tiʼj Xjan  Uʼj —at junjun naʼmxtoq tul Jesús— atz jatumel tkuʼx tbʼi Dios kyoj. Ik tzeʼn ma qo yolin tiʼj tnejelku, ax Dios qʼamante tuʼn tkux tzʼibʼet junlo 7,000 maj tbʼi toj Tuʼjil Tyol. Tukʼe jlu in nel qnikʼ tiʼj qa taj Dios tuʼn tok qojtzqiʼn tbʼi ex tuʼn tajbʼen quʼn.

• Tkabʼ, aqeju in kubʼ kyqʼoʼn Xjan Uʼj kyoj txqantl yol ex in jatz kyiʼn tbʼi Dios tuʼnju kyximbʼetz aj judiy mintiʼ in che ximin tiʼj jun tqanil nim toklen. At junjun judiy in neltoq kycopiarin Tyol Dios nya kyajtoq tuʼn t-xi kyqʼamaʼn tbʼi Dios, noqtzun tuʼnj, in kuxtoq kytzʼibʼen aj tel kycopiarin tuʼn tkuʼx toj Tyol Dios. Niqayin tiʼj mar Muerto, toj Qumrán, o che kanet junjun ojtxe uʼj jatumel tkuʼx tbʼi Dios toj nimku taqikʼ Tyol Dios. At junjun kyxol qeju o kubʼ kyqʼoʼn Tyol Dios kyoj txqantl yol o jatz kyiʼn tbʼi Dios ex o kux kyqʼoʼn yol QMAN tukʼe mayúscula tuʼn ttzaj kyyekʼun jatumel tkuʼxtoq tbʼi Dios kyoj qeju uʼj e kubʼ tzʼibʼen tnejelku. Noqtzun tuʼnj, qa ojtzqiʼn kyuʼn qa tkuʼx tbʼi Dios nimku maj toj Xjan Uʼj, ¿tiquʼn in kubʼ kychʼexpuʼn moqa in jatz kyiʼn? ¿Alkye o txi qʼonte kyoklen tuʼn tjatz kyiʼn tbʼi Dios toj kywitz?

• Ex toxin, aqeju in kyqʼamaʼn qa mintiʼ tuʼn tajbʼen tbʼi Dios tuʼnju mintiʼ ojtzqiʼn tzeʼnxix in xi qʼamet, in najbʼenxix tbʼi Jesús kyuʼn. Noqtzun tuʼnj, jaʼlo mintiʼx jun xjal in xi tqʼamaʼn tbʼi Jesús ik tzeʼn toj tnejel syent abʼqʼi. Aqeju okslal, moqa nimil, in che yolin toj yol hebreo chʼixmilo in xitoq kyqʼamaʼn ik tzeʼn jlu «Yeshúa». Ex aju yol Cristo (moqa Mesías) atoq in najbʼen «Maschíaj». Aqeju okslal in che yolin toj yol griego in najbʼentoq jlu kyuʼn «Iēsóus Kjristós», ex qeju in che yolin latín in kyqʼamaʼntoq, «Iesus Christus». Tuʼnju onbʼil tzaj tqʼoʼn Dios kye qeju ajtzʼibʼil tiʼj Xjan Uʼj ajbʼen tbʼi Dios kyuʼn aju otoq kubʼ chʼixpet toj yol griego. Mintiʼ ok tilil kyuʼn tuʼn tajbʼen ikxix tzeʼntoq in xi qʼamet toj hebreo, quʼn aju bʼant kyuʼn ajbʼen aju mas in najbʼentoq kyuʼn xjal toj kyyol. Chʼixmi axju in bʼaj tiʼj tbʼi Dios: aju Kʼloj Xjal Bʼinchal Traducción del Nuevo Mundo ma tzʼel tnikʼ qa mas bʼaʼn tuʼn tajbʼen aju yol Jehová maske nyaxix aju in najbʼentoq tiʼj alkye tten in xi qʼamet toj ojtxe yol hebreo.

¿Tiquʼn in najbʼen bʼibʼaj Jehová toj Traducción del Nuevo Mundo? Toj kastiy, moqa español, aʼyeju kyaje letra te Tetragrámaton (יהוה) a kyxilen YHWH (ax ikx jaku che ajbʼen YHVH moqa JHVH). ¿Ex tiquʼn mintiʼ qe vocal? Tuʼnju toj ojtxe yol hebreo oʼkxtoq qeju consonante in che kubʼ tzʼibʼet. ¿Tzeʼntzun tten in nel kynikʼ xjal alkyeqe vocal tuʼn kyajbʼen aj tjaw uʼjit jun yol? Ojtzqiʼntoq kyuʼn alkye tten tuʼn tjaw uʼjit tuʼnju in najbʼentoq kyuʼn toj kyanqʼibʼil.

Tej otoq tzikʼ junlo mil abʼqʼi tbʼajlen tzʼibʼet qe uʼj e kubʼ tzʼibʼin toj hebreo ex toj arameo, kubʼ kybʼinchaʼn judiy at kynabʼil jun nukʼbʼil tuʼn tonin tuʼn kyjaw uʼjit qe yol toj hebreo. Aju nukʼbʼil lu in tzajtoq tqʼamaʼn tuʼn tok qʼet junjun puntos, moqa techel, tuʼn ttzaj tyekʼun alkyeqe vocal jaku che ajbʼentoq toj junjun yol. Noqtzun tuʼnj, toj ambʼil aju attoq nim  xjal judiy mintiʼtoq in najbʼen tbʼi Dios kyuʼn tuʼnju in kyqʼamaʼntoq qa nya bʼaʼn tuʼn tajbʼen tbʼi Dios, ex tuʼntzun aju, in kubʼtoq kychʼixpuʼn kyukʼil junjuntl yol. Tejlo tel kycopiarin qe xjal lu aju Tetragrámatón, aʼyeju vocal ateʼk kyiʼj qe junjuntl yol e ajbʼen kyuʼn te t-xel tbʼi Dios, ok kymojbʼaʼn kyukʼe qe kyaje consonante in najbʼen tiʼj tbʼi Dios. Tuʼntzunju, aʼyeju ojtxe uʼj ateʼkux qeju punto lu kyoj mintiʼ in qo tzaj kyonin tuʼn tel qnikʼ tzeʼn tqʼamet tbʼi Dios ojtxe toj hebreo. At junjun in kyqʼamaʼn qa iktoq tqʼamet tbʼi Dios ik tzeʼn jlu: «Yahweh» (moqa «Yahvé»), ex atzun junjuntl xjal in tzaj kyqʼamaʼn qa atlo junjuntl tten tuʼn t-xi qʼamet. Kyoj qeju uʼj e kanet toj mar Muerto at jun piẍ tiʼj uʼj te Levítico toj yol griego atz jatumel tkuʼx tbʼi Dios toj, aju tzaj iqʼin ikxix tzeʼnj tkubʼtoq kyoj ojtxe uʼj, aju «Iao». At junjuntl ajtzʼibʼil toj yol griego toj ambʼil ojtxe, ax ikx in tzaj kyqʼamaʼn qa jaku txi qʼamet tbʼi Dios ik tzeʼn jlu: «Iaé», «Iabé» moqa «Iaoué». Noqtzun tuʼnj, mintiʼ ojtzqiʼn quʼn tzeʼn tten in xi qʼamet tbʼi Dios toj yol hebreo toj ambʼil ojtxe, tuʼntzunju, mlay txi qqʼamaʼnxix tzeʼnxix in xi qʼamet (Génesis 13:4, TNM; Éxodo 3:15, jyonkuxa aju tqanil tkuʼx t-xe t-xaq Tuʼjil Tyol Dios tiʼj texto lu). Aju ojtzqiʼn quʼn, aju qa ajbʼen nim maj tuʼn Dios tej tyolin kyukʼe tmajen, ex ajbʼen kyuʼn tmajen tej in che naʼntoq Dios ex tej in che yolintoq kyukʼe txqantl xjal (Éxodo 6:2; 1 Reyes 8:23; Salmo 99:9, TNM).

¿Tiquʼntzun in najbʼenju bʼibʼaj Jehová toj Traducción del Nuevo Mundo? Ik tzeʼn qo xnaqʼtzal tiʼj tuʼnju o tzʼajbʼen toj nimku ambʼil toj kastiy.

Aju tnejel Tyol Dios kubʼ qʼoʼn toj kastiy atz jatumel tkuʼx tbʼi Dios toj, aju uʼj te Salmos te Juan te Valdés, aju kubʼ tzʼibʼen tojlo abʼqʼi 1537. In najbʼen aju Iehova tuʼn. Tej tbʼet ambʼil chʼixpaj yol, ax ikx chʼixpet aju alkye tten in kubʼ tzʼibʼet tbʼi Dios. Jun techel tiʼj jlu, toj uʼj te Salmos kubʼ tqʼoʼn Bernardino de Rebolledo toj juntl yol, te abʼqʼi 1661, in najbʼen Jehova tuʼn. Toj Tyol Dios kubʼ ttzʼibʼen Scío de San Miguel, te abʼqʼi 1791, in najbʼen aju Iehováh tuʼn kyoj tqanil t-xe t-xaq uʼj. Toj Tyol Dios Torres Amat te abʼqʼi 1824 in najbʼen Jehovah tuʼn, ex toj Reina-Valera te abʼqʼi 1862, in najbʼen Jehová tuʼn. Kyoj junjuntl yol ax ikx chʼixmi axju tbʼi Dios o tzʼajbʼen toj nimku syent abʼqʼi. Jun techel tiʼj jlu, aju Pentateuco kubʼ  tqʼoʼn William Tyndale toj inglés, te abʼqʼi 1530, in najbʼen aju Iehouah tuʼn. Atzun tnejel Xjan Uʼj lu toj inglés tkuʼx tbʼi Dios toj.

Toj uʼj toj inglés aju Studies in the Psalms (Xnaqʼtzbʼil kyiʼj Salmos), aju etz toj abʼqʼi 1911, ajbʼen Jehovah toj yol inglés tuʼn jun xjal nimxix toklen, aju Joseph Bryant Rotherham tbʼi, ex nya aju tten bʼibʼaj Yahweh tuʼnju in neltoq tnikʼ tiʼj qa a jlu «jun tten aju mas in najbʼen kyuʼn xjal —ax ikx tbʼanel in nel toj kywitz xjal— aʼyeju in che uʼjin tiʼj Tyol Dios». Ax ikx, toj abʼqʼi 1930, aju ajxnaqʼtzal toj yol hebreo Alexander Kirkpatrick tbʼi tzaj tchikʼbʼaʼn chʼixmi axju tiʼjju bʼibʼaj tiquʼn in najbʼen toj yol inglés aju Jehovah: «At nim xjal in che xnaqʼtzan tiʼj alkye ttxolil yol toj ambʼil jaʼlo in kyqʼamaʼn qa il tiʼj tuʼn tjaw uʼjit ik tzeʼn jlu: ‹Yahveh› moqa ‹Yahaveh›; noqtzun tuʼnj, aju bʼibʼaj JEHOVAH mas in najbʼen toj inglés, ex aju mas il tiʼj, nya aju alkyexix tten tuʼn tqʼamet tbʼi Dios, sino aju tuʼn tel qnikʼ qa jun Bʼibʼaj jlu, ex nya noq jun yol, ik tzeʼn Qman». Toj kastiy in tzaj tqʼamaʼn Diccionario Manual Bíblico chʼixmi ax ximbʼetzju aj ttzaj tchikʼbʼaʼn qa aju bʼibʼaj «Jehová atzun jun tten ma kyaj qʼet ex ma kyaj xjanset tuʼnju in najbʼen» toj junjun Tuʼjil Tyol Dios mas in che ajbʼen kyuʼn xjal.

¿Tiʼ t-xilen, moqa tiʼ tzʼelpuna, bʼibʼaj Jehová? Toj yol hebreo, aju tbʼi Dios Jehová tzajni tiʼj jun verbo a t-xilen «in nok te». At junjun ajnabʼil in kyqʼamaʼn qa aju verbo lu kukx in yukchi. Atzun t-xilen jlu qa aju xjal in yolin txol yol tiʼj in najbʼen jun tiʼ moqa juntl xjal tuʼn, tuʼn tbʼant jun tiʼ tuʼn. Tuʼntzunju, aju Kʼloj Xjal Bʼinchal Traducción del Nuevo Mundo in kubʼ t-ximen qa aju tbʼi Dios a t-xilen jlu: «A in Nok te Tkyaqil». Ateʼ junjun xjal at nim kyxnaqʼtzbʼil at junxichaq kyximbʼetz tiʼj jlu, kyjuʼtzun mlay bʼant tuʼn t-xi qqʼamaʼn qa ikxix t-xilen tbʼi Dios. Noqtzun tuʼnj, aju t-xilen tbʼi Dios lu tbʼanel tuʼnju a Jehová bʼinchal tkyaqil ex in japun twiʼ tkyaqilju in kubʼ t-ximin. ¿Tiquʼn? Tuʼnju nya oʼkx kubʼ tbʼinchaʼn Dios kyaʼj, Txʼotxʼ, qe anjel ex qe xjal, sino ax ikx noq tiʼxku in tzaj, kukx in japun aju tajbʼil ex aju in kubʼ t-ximen.

¿Yajtzunju yol tkuʼx toj Éxodo 3:14? Toj taqikʼ Tyol Dios lu in yolin Dios tiʼjx ik tzeʼn jlu: «AQINE AJU AX QINE» (moqa «Jaku Chin Oke te alkyexku qa a wajbʼiljuye»). Toj t-xol yol lu in najbʼen jun verbo toj yol hebreo aju at toklen tukʼe verbo atz jatumel tzajni tbʼi Dios. Noqtzun tuʼnj, aʼyeqe yol lu mintiʼ in tzaj kyqʼamaʼn tkyaqil t-xilen tbʼi Dios. Oʼkx in tzaj kyyekʼun junjun tiʼ tiʼj tmod Dios: qa in nok te aju atx taj tuʼn tbʼant toj junjun ambʼil tuʼn tjapun twiʼ aju ma kubʼ t-ximen. Toj bʼibʼaj Jehová at ximbʼetz jlu, noqtzun tuʼnj, nya oʼkx at toklen tukʼilju in kubʼ t-ximin tuʼn tok. Ax ikx at toklen tukʼilju in bʼant tuʼn, tuʼn tok tbʼinchbʼen te alkyexku tuʼntzun tjapun aju in kubʼ t-ximen.