XNAQʼTZBʼIL 25

¿Jakupe kyaj ntzaqpiʼne tuʼn nsaqchane tiʼj ntzʼalbʼile?

«Tzaj tzyet tuʼn nsaqchane tiʼj ntzʼalbʼile tej qʼiʼntoq 8 abʼqʼi wuʼne. Tej tbʼet ambʼil, el nnikʼe tiʼj qa nya bʼaʼn jlu toj twitz Dios ex atxix toj ambʼil aju in kubʼtoq nnaʼne nya bʼaʼn qa ma chin kubʼ tzʼaqe juntl maj toj jlu. In kubʼtoq nximane jlu, ‹mlayx chin ok kʼujlaʼne tuʼn Dios›». (Luis)

AJ KYOK qʼa ex txin te kuʼxun mas in chʼiy kyajbʼil tuʼn kykubʼ ten tukʼil juntl, tuʼntzunju, ateʼ nim kuʼxun in che ok ten saqchal tiʼj kytzʼalbʼil. * Atlo junjun xjal tzul kyqʼamaʼn teya qa nya jun il lu ex qa mlay tzaj jun nya bʼaʼn tuʼn. Noqtzun tuʼn, ateʼ junjun tiquʼn nim toklen tuʼn miʼn tkubʼ tbʼinchaʼna jlu. Qʼonka twitza tiʼjju nabʼil tqʼama apóstol Pablo. Tqʼama jlu: «Kyjaʼtzun, kytzoqpinkje tkyaqilju mya bʼaʼn in kybʼinchaʼn xjal [...] tukʼix ju kyajbʼile mya bʼaʼn» (Colosenses 3:5). Aj tsaqchan jun xjal tiʼj ttzʼalbʼil, mintiʼ in naj tajbʼil tuʼn tkubʼ kuẍeʼ tukʼil juntl, sino mas in ten tajbʼil. Nya oʼkxju, ax ikx in tzaj junjuntl nya bʼaʼn tuʼn.

● Oʼkx in ximen xjal tuʼn t-xi tbʼinchaʼn nya bʼaʼn tajbʼil.

● Mintiʼ in nok tqʼoʼn kyoklen xjal ex in kubʼ t-ximen qa oʼkx at kyajbʼen tuʼn kykubʼ kuẍeʼ tukʼil.

● Ex mas kwest tuʼn ttzalaj jun xjal toj tmejebʼleʼn aj tkubʼ kuẍeʼ tukʼil tchmil moqa t-xuʼjil.

Aj ttzaj tajbʼila tuʼn tkubʼ tena tukʼil jun xjal, mas bʼaʼn tuʼn tjakʼunte tibʼa twitzju tuʼn tok tena saqchal tiʼj ttzʼalbʼila (1 Tesalonicenses 4:4, 5). Tuʼntzunju, ¿tiʼ jaku bʼant tuʼna tuʼn tjakʼunte tibʼa? In tzaj tqʼamaʼn Tyol Dios qa mintiʼ tuʼn t-xi tbʼinchaʼna qe tiʼchaq jaku tzaj tajbʼila tuʼn tuʼn tkubʼ tena tukʼil jun xjal (Proverbios 5:8, 9). ¿Yajtzun qa o naqʼeta tiʼj tuʼn tok tmakoʼna ttzʼalbʼila? Bʼalo o tzʼok tilil tuʼna tuʼn tkyaj ttzaqpiʼna ex kwestlo in nela toj twitza. Tuʼntzunju, jaku kubʼ t-ximana qa mlay tzʼexa twitz nya bʼaʼn lu ex qa mlay tzalaj Dios tiʼja. Atzun jlu tqʼama jun kuʼxun aju Pedro tbʼi: «In kubʼtoq nnaʼne nim nya bʼaʼn aj tbʼant juntl maj wuʼne. Kubʼ nximane qa mlaytoq bʼant jun tiʼ wuʼne tiʼj jlu. Axpe ikx mintiʼtoq in bʼant tuʼn nnaʼne Dios».

Qa a jlu in bʼaj tiʼja, miʼn kubʼ numja. Jaku tzʼexa twitz jlu. O kubʼ tiʼj nya bʼaʼn lu kyuʼn nimku xjal ex kyuʼn nimku kuʼxun. Ex qa o kubʼ tiʼj bʼinchbʼen lu kyuʼn nimku, ax ikx teya jaku kubʼ tiʼj tuʼna.

In kubʼ kynaʼn nya bʼaʼn

Ik tzeʼn ma tzʼel qnikʼ tiʼj, chʼixme kykyaqil qeju in che saqchan tiʼj kytzʼalbʼil in kubʼ kynaʼn nya bʼaʼn. Ex in bʼaj kyiʼj ik tzeʼn in tzaj tqʼamaʼn 2 Corintios 7:11: «Tzaj [kybʼise] ik tzaʼnx tajbʼil Dios». Qa a jlu in bʼaj tiʼja, jaku tzʼonin tiʼja tuʼn tkyaj ttzaqpiʼna nya bʼaʼn bʼinchbʼen lu. Noqtzun tuʼnj, qa ma tzaj nimxix tbʼisa jaku kubʼ numja tuʼn ex ya mlay tzʼok tilil tuʼna tuʼn texa twitz (Proverbios 24:10).

Qʼonka tilil tuʼn tten t-ximbʼetza toj tumel tiʼjju in bʼaj tiʼja. Ax tok, nya bʼaʼn ex tzʼil aju tuʼn tsaqchan jun xjal tiʼj ttzʼalbʼil, tuʼnju in che naqʼet xjal tiʼj junjun nya bʼaʼn kyajbʼil (Tito 3:3). Noqtzun tuʼnj, nya jun matij il ik tzeʼn aj tyaẍin jun xjal moqa aj tkyʼaʼjin (Judas 7). Tuʼntzunju, qa ma naqʼeta tuʼn tsaqchana tiʼj ttzʼalbʼila, miʼn kubʼ t-ximana qa mlayx kubʼ najsaʼn tila. Mas nim toklen tuʼn tok tilil tuʼna tkubʼ kyiʼj nya bʼaʼn tajbʼila ex tuʼn miʼn tkubʼ numja.

Qa ma kubʼ tzʼaqa juntl maj toj nya bʼaʼn lu, nim toklen tuʼn ttzaj tnaʼn qe yol tkuʼx toj Proverbios 24:16. In tzaj tqʼamaʼn jlu: «Maske kubʼ tzʼaq wuq maj ju xjal tzʼaqlxix, pero in jaw weʼ juntl maj; atzun qe xjal bʼinchal mya bʼaʼn, noq kyjaʼ in cheʼx tuj ju mya bʼaʼn». Mintiʼ in noka te nya bʼaʼn xjal qa ma tzʼel txalpaja. Mas bʼaʼn tuʼn t-ximana tiʼj tiquʼn xkubʼ tzʼaqa toj joybʼil ex tiʼ jaku bʼant tuʼna tuʼn miʼn tkubʼ tzʼaqa juntl maj.

Bʼaʼn tuʼn t-ximana tiʼj tkʼujlabʼil Dios ex tiʼj qʼaqʼbʼil tkʼuʼj. Ojtzqiʼntoq tuʼn David tiʼ in qnaʼn aj qkubʼ tzʼaq toj jun il. Tuʼntzunju kubʼ ttzʼibʼin jlu: «Ik tzaʼn jun mambʼaj in tzaj tzʼeʼy tkʼuʼj kyiʼj tkʼwaʼl, ax ikx te Qman in tzaj tzʼeʼy tkʼuʼj kyiʼj qeju in che niman te. Porke ojtzqiʼn tuʼn alkye bʼanin qoʼ tiʼj: bʼaʼn tuʼn tquqil txʼotxʼ qoʼ» (Salmo 103:13, 14). Ojtzqiʼn tuʼn Dios qa aj il qoʼ, tuʼntzunju in kubʼ tnajsaʼn «kyil xjal» (Salmo 86:5). Noqtzun tuʼnj, ax ikx taj tuʼn tok tilil quʼn tuʼn tkyaj qtzaqpiʼn nya bʼaʼn. Qo xnaqʼtzan kyiʼj junjun nabʼil aju jaku che onin tiʼja tuʼn tkyaj ttzaqpiʼna nya bʼaʼn lu.

Xqʼuqinka aju in nok tqʼoʼna twitza tiʼj. ¿In nokpe tqʼoʼna twitza tiʼj televisión, kyiʼj película ex kyiʼj tembʼil te Internet aʼyeju jaku chʼiy nya bʼaʼn tajbʼila kyuʼn? Bʼaʼn tuʼn tok tqʼoʼn twitza tiʼjju xi tqanin jun aj bʼitzil te Dios toj tnaʼj Dios: «Miʼn tzaj tqʼoʼna ambʼil tuʼn tok nqʼoʼne nwitze tiʼjju mintiʼ tajbʼen» (Salmo 119:37, Traducción del Nuevo Mundo). *

Ximana tiʼj juntl tiʼ. Bʼinxa aju nabʼil in tzaj tqʼamaʼn jun okslal aju William tbʼi: «Naʼmxtoq t-xiʼya jtal, bʼaʼn tuʼn tkubʼ tuʼjina junjun xnaqʼtzbʼil in che jatz toj Tyol Dios. Ex aj tex bʼaj qʼij, bʼaʼn tuʼn t-ximana kyiʼj tiʼchaq at toklen tukʼil Dios ex tukʼil Tyol» (Filipenses 4:8).

Qʼamanxa te juntl aju in nok weʼya twitz. Maske jaku tzaj nimxix tchʼixwiya, bʼaʼn tuʼn t-xi tqʼama te juntl aju in nok weʼya twitz. Ok kʼonil jlu tiʼja tuʼn tkyaj ttzaqpiʼna nya bʼaʼn. Atzun jlu bʼant tuʼn jun kuʼxun aju David tbʼi: «Kubʼ nximane tuʼn t-xi nqʼamaʼne ten ntate ex mlayx tzʼel naj tiʼj nkʼuʼje aju tzaj tqʼamaʼn weye. Tej tel tnikʼ tiʼj qa kwest ela toj nwitze tuʼn t-xi nqʼamaʼne te, tzaj ttzeʼn toj nwitze ex tzaj tqʼamaʼn: ‹Nimxix in chin tzalaje tiʼja›. Nimxix onin qe tyol wiʼje. Tuʼntzunju, ok tilil wuʼne tuʼn kybʼant chʼixpubʼil».

«Tnejel, jaw tuʼjin ntate junjun versículo weye tuʼntzun miʼn tkubʼ nnaʼne nya bʼaʼn, yajxitl, tzaj tuʼjin junjun texto weye tuʼntzun tel nnikʼe tiʼj qa nya bʼaʼn aju in bʼant wuʼne. Ax ikx, tzaj tqʼamaʼn weye tuʼn tok tilil wuʼne tuʼn miʼn nsaqchane tiʼj ntzʼalbʼile akux in pon qʼij tuʼn qyoline juntl maj tukʼil. Ex qatzun ma chin kubʼ tzʼaqe, ax ikx tzaj tqʼamaʼn weye tuʼn miʼn ttzaj bʼajxix nkʼuʼje ex tuʼn tok tilil wuʼne toj mas ambʼil tuʼn miʼn tkubʼ nbʼinchaʼne jlu». ¿Tiʼ el tnikʼ David tiʼj? Tqʼama jlu: «Mas tbʼanel ok tuʼnju onin juntl wiʼje». *

TOJ JUNTL CAPÍTULO

¿Bʼaʼnpe tuʼn kykubʼ kuẍeʼ xjal noq tuʼn kytzalaj jun rat?

[Qe tqanil]

TAQIKʼ TYOL DIOS NIM TOKLEN

«Tel oqa tiʼj kyachbʼil kuʼxun, tzʼok tililx tuʼna tuʼn tbʼinchanteya aju tzʼaqlxix ex tuʼn tten tokslabʼla ex tuʼn tten tkʼujlalila ex tuʼn tten tmojbʼabʼl tibʼa kyukʼil txqantl, junx kyukʼil qeju in che kubʼsan twitz Qajaw, aqeju saq tuj kyanmi» (2 Timoteo 2:22).

JAKU BʼANT JUN TIʼ TUʼNA

Jaku naʼna Dios te Qman Jehová naʼmxtoq tchʼiy nya bʼaʼn tajbʼila. Tuʼn texa twitz nya bʼaʼn lu, qaninxa tipumala te Dios, tuʼnju «ate Dios in tzaj qʼonte nimxix qipumal» tuʼn tikʼx quʼn (2 Corintios 4:7).

¿OJTZQIʼN JLU TUʼNA?

Mas nya kwest tuʼn tten tajbʼil jun xjal tuʼn tkubʼ kuẍe tukʼil juntl xjal. Noqtzun tuʼnj, aju xjal at tnabʼl ktel tipumal tuʼn tjakʼunte tibʼ kyiʼj nya bʼaʼn tajbʼil, ex mas toj ambʼil jatumel ni jun in nok tqʼoʼn twitz tiʼj.

¡BʼINCHAMA JLU!

¿Tiʼ jaku bʼant wuʼne tuʼn nximane kyiʼj tbʼanel tiʼchaq?

¿Tiʼ jaku bʼant wuʼne tuʼn miʼn nkubʼ tzʼaqe juntl maj toj nya bʼaʼn lu?

¿Tiʼ jaku txi nqanine te ntxuʼye moqa te nmane tiʼj jlu?

YAJTZUN TEYA, ¿TIʼ T-XIMBʼETZA TIʼJ JLU?

● ¿Tiquʼn tbʼanel tuʼn kukx ttzaj tnaʼna qa taj Jehová tuʼn tkubʼ tnajsaʼn tila? (Salmo 86:5).

● Tuʼnju a Dios kubʼ bʼinchante qe tukʼilju qajbʼil tuʼn qkubʼ kuẍeʼ tukʼil juntl xjal, ojtzqiʼn tuʼn qa jaku kubʼ tiʼj qajbʼil lu, maske at nim tipumal.

[Yol]

Atxix tej tkubʼ tiʼj nya bʼaʼn lu wuʼne, nimxix tbʼanel in kubʼ nnaʼne ex mlayx txi nchʼixpuʼne jlu tukʼil juntl tiʼ» (Sara).

[Tilbʼilal]

Aj tjaw tzʼaqa toj jun ojqelbʼil, in jaw weʼya ex kukx in karrelina. Ax ikx, aj tsaqchana juntl maj tiʼj ttzʼalbʼila, nya t-xilen jlu qa mintiʼ in nok tilil tuʼna tuʼn tkyaj ttzaqpiʼna.