XNAQʼTZBʼIL 8

¿Tzeʼn kymod qe tbʼanel amiw at?

«Qa otoq tzaj nqʼoje, waje tuʼn t-xi nqʼamaʼne te juntl. Qa in tzaj nbʼise, waje tuʼn tok nbʼiʼne qa bʼaʼn kʼelel tkyaqil. Ex qa in chin tzalaje, waje tuʼn t-xi nqʼamaʼne te juntl. Nimxix kyoklen wamiwe toj nwitze» (chi Brittany).

ATEʼ junjun in tzaj kyqʼamaʼn qa kyajbʼil kʼwal jun kyukʼil tuʼn kychaqin moqa tuʼn kysaqchan, atzun kye kuʼxun kyajbʼil tuʼn tten jun kyamiw. Pero ¿junxpe taʼ jun qamiw ik tzeʼn jun qukʼil? Miʼn.

Jun qukʼil, atz in yolin tiʼj jun xjal in ten jun rat qukʼil.

Atzunte jun qamiw, atz in yolin tiʼj jun xjal in nok tqʼoʼn toklen aju in bʼant quʼn.

In tzaj tqʼamaʼn Biblia jlu tiʼj jun amiw axix tok: «Aju tamiw jun xjal kukx in ten tkʼujlalil tiʼj, ex ok ttzaj jun mya bʼaʼn tiʼj, nnoʼk tamiw ik tzaʼn jun terman» (Proverbios 17:17). A jlu in tzaj tyekʼin qa mas nim toklen jun qamiw twitzju tej qsaqchan tukʼil jun qukʼil tej kʼwalx qoʼ.

Aj qchʼiy, qajbʼil tuʼn kyten qamiw...

1) at tbʼanel kymod.

2) in kubʼ kybʼinchaʼn aju bʼaʼn.

3) jaku che onin tiʼja.

Tuʼntzunju, bʼaʼn tuʼn t-ximana tiʼj qa ateʼqe tamiwa ik tzeʼn jlu. Qo xnaqʼtzan tiʼj jlu.

Tnejel: At tbʼanel kymod

Aju tuʼn tok tojtzqiʼna. Nya kykyaqil qeju in kyqʼamaʼn qa amiw qe, jaku che ok te tbʼanel tamiwa. In tzaj tqʼamaʼn Biblia jlu: «At junjun tamiw xjal in tzaj kyiʼn xitbʼil tiʼj» (Proverbios 18:​24). Jakulo kubʼ t-ximana qa nya toj tumel qe yol lu, pero ximana tiʼj jlu: ¿Ope ten jun tamiwa o tzʼok tbʼinchaʼn nya bʼaʼn tiʼja ex o txi tqʼamaʼn nya ax tok yol tiʼja kye txqantl? Jaku naj qamiwbʼil tukʼil jun xjal ik tzeʼn jlu. * Tuʼntzunju, mas tbʼanel tuʼn tten tbʼanel kymod qamiw twitzju tuʼn tten nim qamiw.

Aju jaku bʼant tuʼna. Jyonktza qe tamiwa ateʼ tbʼanel kymod.

«Kykyaqilx in che yolin bʼaʼn tiʼj wamiwe Fiona. Waje tuʼn woke ik tzeʼn te ex tuʼn kyyolin txqantl bʼaʼn wiʼje. Tbʼanel jlu toj nwitze» (chi Yvette, te 17 abʼqʼi).

Bʼinchankuya jlu:

1. Uʼjinktza Gálatas 5:​22, 23.

2. Xjelinkuya jlu: «¿Atpe kymod wamiwe ik tzeʼn in tzaj qʼamaʼn toj texto lu?».

3. Tzʼibʼinkuya kybʼi tbʼanel tamiwa ex ttxlaj tzʼibʼinkuya jun tbʼanel kymod.

Tbʼi

․․․․․

Tmod

․․․․․

Nabʼil. Qa mintiʼ in nul jun tbʼanel kymod tamiwa toj twiʼya, maslo bʼaʼn tuʼn kykubʼ tchʼexpuʼna tamiwa.

Tkabʼin: In kubʼ kybʼinchaʼn aju bʼaʼn

Aju tuʼn tok tojtzqiʼna. Qa taja tuʼn kykanet naj tamiwa, mlay tzʼonin jlu tuʼn kykanet tbʼanel tamiwa. Ex bʼaʼn tuʼn ttzaj tnaʼna texto lu: «Qatzun ma tzʼok tjunin tibʼa kyukʼil qe xjal mintiʼ kynabʼl, knajela» (Proverbios 13:20). Aju txol yol «mintiʼ kynabʼl», nya atz in yolin jlu kyiʼj qeju nya nim kykalificación in jatz toj examen, sino atz in yolin kyiʼj qeju in kubʼ kybʼinchaʼn nya bʼaʼn ex mibʼan che bʼin. Ex nyalo taj teya tuʼn kyten tamiwa ik tzeʼn jlu.

Aju jaku bʼant tuʼna. Miʼn tzʼok tamiwen tibʼa tukʼil alkyexku xjal, mas bʼaʼn tuʼn tjaw tjyoʼna qe tamiwa (Salmo 26:4). Nya a t-xilen jlu qa oʼkx junjun tamiwa jaku che jaw tjyoʼna. Sino atz in yolin jlu tiʼj tuʼn tel tnikʼa tiʼj «qa mya junx taʼ ju xjal bʼaʼn tukʼil ju xjal mya bʼaʼn, ex mya junx taʼ ju xjal in kʼulun te Dios tukʼil ju xjal mintiʼ in kʼulun te» (Malaquías 3:18).

«In kubʼ nnaʼne nim tzalajbʼil tuʼnju e onin ntate wiʼje tuʼn kykanet tbʼanel wamiwe, qe kuʼxun ax kyabʼqʼi ik tzeʼn weye ex at jun tbʼanel kyamiwbʼil tukʼil Jehová» (chi Christopher, te 13 abʼqʼi).

Tzaqʼwentza qe xjel lu:

¿In tzajpe xobʼa tuʼn tok obligarina kyuʼn tamiwa tuʼn tkubʼ tbʼinchaʼna jun tiʼ nya toj tumel?

□ Ikju

□ Miʼn

¿In tzajpe xobʼa tuʼn kyok tojtzqiʼn ttata qe tamiwa tuʼnju in kubʼ t-ximana qa nya bʼaʼn che elel toj kywitz?

□ Ikju

□ Miʼn

Nabʼil. Qa ma txi ttzaqʼweʼna qa ikju, tbʼanel qa ma txi tjyoʼna qe tamiwa at tbʼanel kymod, ik tzeʼn qeju erman in kubʼ kyqʼoʼn jun tbʼanel techel kywitz txqantl.

Toxin: Jaku che onin tiʼja.

Aju tuʼn tok tojtzqiʼna. In tzaj tqʼamaʼn Biblia jlu: «Qa ma txi kyukʼin kyibʼe kyukʼil xjal mya bʼaʼn, ok ktzakjel kynabʼle» (1 Corintios 15:​33). Atzun jlu bʼaj tiʼj Lauren, tqʼama jlu: «Wajtoqe tuʼn tok wamiwen wibʼe kyukʼil wukʼile toj escuela. Pero tuʼn tbʼant jlu, iltoq tiʼj tuʼn t-xi nbʼinchaʼne tkyaqilju in tzaj kyqʼamaʼn weye. Kubʼ nnaʼne qa njunalxe atine, tuʼntzunju kubʼ nbʼinchaʼne aju in bʼanttoq kyuʼn noq tuʼn woke te kyamiw». Qa ma txi tbʼinchaʼna qe tiʼchaq noq tuʼnju taja tuʼn kytzalaj txqantl tiʼja ik tzeʼn bʼant tuʼn Lauren, kʼokela ik tzeʼn jun pieza in najbʼen kyuʼn txqantl aj in che saqchan tiʼj ajedrez ex kxel kybʼinchaʼn noq tiʼxku kyaj tukʼila. ¿Ape jlu taja tuʼn tbʼaj tiʼja?

Aju jaku bʼant tuʼna. Pamil tibʼa kyiʼj qeju in che ok obligarin teya tuʼn tkubʼ tchʼexpuʼn tmoda noq toka ik tzeʼn kye. Bʼalo nya nim tamiwa che tel, pero kbʼel tnaʼna bʼaʼn. Ax ikx, jaku che kanet tbʼanel tamiwa aqeju che onil tiʼja tuʼn tten tbʼanel tmoda (Romanos 12:2).

«At Clint kyxol qe tbʼanel wamiwe. In kubʼ tbʼinchaʼn tkyaqil toj tumel ex in nel tnikʼ tiʼjju in bʼaj wiʼje. Nim o tzʼonin wiʼje» (chi Jason, te 21 abʼqʼi).

Tzaqʼwentza qe xjel lu:

¿In kubʼpe tchʼexpuʼna alkye tten in bʼaj xbʼalumin tibʼa, tzeʼn yolina moqa tmoda noq tuʼn kytzalaj tamiwa?

□ Ikju

□ Miʼn

¿Ilpe tiʼj tuʼn t-xiʼya kyoj junjun lugar nya bʼaʼn noq tuʼnju in cheʼx tamiwa atz?

□ Ikju

□ Miʼn

Nabʼil. Qa ma txi tqʼamaʼna ikju kyiʼj qe xjel lu, qaninxa kye ttata moqa te jun xjal ma chʼiy tuʼn tonin tiʼja tuʼn tjaw tjyoʼna qe tbʼanel tamiwa. Qatzun jun testigo de Jehová teya, jaku yolina tukʼil jun ansyan tuʼn tonin tiʼja.

KKANETEL MAS TQANIL TUʼNA TOJ XNAQʼTZBʼIL 9 TOJ VOLUMEN 2

TOJ JUNTL XNAQʼTZBʼIL

¿Ope tzaj qʼamaʼn jun maj teya tuʼn jun xjal tuʼn tkubʼ tbʼinchaʼna jun nya bʼaʼn moqa o kubʼ tnaʼna tuʼn tkubʼ tbʼinchaʼna jun nya bʼaʼn?

[Tqanil]

TAQIKʼ TYOL DIOS NIM TOKLEN

«At junjun tamiw xjal mas mojl kykʼujlalil tukʼil twitz tkʼujlalil jun terman» (Proverbios 18:24).

JUN NABʼIL

Bʼaʼn tuʼn tok tilil tuʼna tuʼn kyten tbʼanel tmoda. Qa ax jlu in bʼant kyuʼn txqantl, che okel laqʼeʼ ttxlaja. ¡Aqetzun jlu jaku che ok te tbʼanel amiw!

TZʼAQʼUNANA TIʼJ JLU

¿Tiʼ kbʼantel wuʼne tuʼn kykanet tbʼanel wamiwe? ․․․․․

Waje tuʼn kyok wojtzqiʼne xjal lu ma che tijen: ․․․․․

¿Tiʼ waje tuʼn t-xi nqanine te ntate moqa te ntxuʼye tiʼj xnaqʼtzbʼil lu? ․․․․․

¿OJTZQIʼN JLU TUʼNA?

Maske mintiʼ in nel tikʼun Dios qe xjal, in che jaw tjyoʼn alkyeqe jaku che ok te tamiw (Salmo 15:​1-5).

¿TI’ T-XIMBʼETZA TIʼJ JLU?

● ¿Alkyeqe tmod tamiwa mas in nok tqʼoʼna toklen? Qʼamantza tiquʼn.

● ¿Tiʼ kbʼantel tuʼna tuʼn toka te jun tbʼanel amiw?

[Yol]

Tzaj kyqʼamaʼn ntate weye tuʼn tel npan wibʼe kyiʼj junjun wamiwe. Nya wajtoqe tuʼn tbʼant jlu wuʼne tuʼnju kubʼ nximane qa mintiʼtoq jun wamiwe. Pero tzaj kyqʼoʼn jun tbʼanel consej weye, tuʼnju el nnikʼe tiʼj qa attoq nim xjal mas bʼaʼn kymod jaku tzʼok wamiwen wibʼe kyukʼil» (chi Carlos).

[A’yeju recuadro ex qe tilb’ilal]

Junjuntl consej

Yolina kyukʼil ttata. Qaninxa kye tzeʼn qetoq kyamiw ten tej qʼiʼntoq kyabʼqʼi ik tzeʼn teya jaʼlo. ¿Jawpe kyjyoʼn jun nya bʼaʼn kyamiw? ¿Tiquʼn? Ax ikx qaninxa kye tiʼ jaku txi tbʼinchaʼna tuʼn miʼn ttzaj nya bʼaʼn tiʼja.

Qʼamanxa kye ttata tuʼn tok kyojtzqiʼn qe tamiwa. Qa nya taja tuʼn tbʼant jlu tuʼna, ximana tiquʼn. ¿Ojtzqiʼnpe tuʼna qa at jun nya bʼaʼn in bʼant kyuʼn tamiwa ex nya bʼaʼn jaku tzʼela toj kywitz ttata? Qa ikju, maslo bʼaʼn tuʼn tkubʼ tchʼexpuʼna qe tamiwa.

Qʼonka twiʼya tiʼj kyyol tamiwa. Qʼonka toklen tyol ex yekʼinxa te qa in ximana tiʼj (Filipenses 2:4).

Bʼaʼn tuʼn tel tnikʼa kyiʼj tamiwa ex najsankuya kyil. Miʼn tzʼayona tuʼn kyok tamiwa te tzʼaqli. In tzaj tqʼamaʼn Santiago 3:2 jlu: «Qkyaqil nimku maj in qo tzpet».

Miʼn kubʼ t-ximana tuʼn ttena tukʼil tamiwa tkyaqil ambʼil. Qa axix tok amiw qe, che onil tiʼja aj tok weʼya twitz jun nya bʼaʼn (Eclesiastés 4:​9, 10).

[Tilb’ilal]

Qa ma txi tbʼinchaʼna qe tiʼchaq noq tuʼnju taja tuʼn kytzalaj txqantl tiʼja, kʼokela ik tzeʼn jun pieza in najbʼen kyuʼn txqantl aj in che saqchan tiʼj ajedrez ex kxel kybʼinchaʼn noq tiʼxku kyaj tukʼila.