XNAQʼTZBʼIL 37

¿Mape bʼant ntene tuʼn nbautisarine?

Qʼonkuya techel qa ax tok moqa nya ax tok:

Kykyaqil okslal moqa nimel il tiʼj tuʼn kybautisarin.

□ Ax tok

□ Nya ax tok

In nonin bautismo qiʼj tuʼn miʼn qkubʼ tzʼaq toj il.

□ Ax tok

□ Nya ax tok

Aj in qo bautisarin in xi tzyet tuʼn qbʼet toj bʼe te kolbʼil.

□ Ax tok

□ Nya ax tok

Mlay txi nqʼoʼne tajlal te Dios qa mintiʼ ma chʼin bautisarine.

□ Ax tok

□ Nya ax tok

Il tiʼj tuʼn nbautisarine tuʼnju in che bautisarin wamiwe.

□ Ax tok

□ Nya ax tok

¿IN KUBʼPE tbʼinchaʼna aju in nel tnikʼa tiʼj toj Tyol Dios? ¿In nokpe tilil tuʼna tuʼn toka te tamiw Dios? ¿In yolinpe teya tiʼj Tyol Dios kyukʼil txqantl? Qa in che bʼant jlu tuʼna, in ximenlo teya tuʼn tbautisarina. Pero tzʼayona nej. Tnejel, bʼaʼn tuʼn tel tnikʼa tiʼj qa ma bʼant ttena tuʼn tbautisarina. Ex aju kʼonil tiʼja tuʼn tel tnikʼa tiʼj qa ma bʼant ttena, aju qa ma kubʼ tqʼoʼna tzaqʼwebʼil toj tumel kyiʼj xjel ateʼ jawni.

● Kykyaqil okslal moqa nimel il tiʼj tuʼn kybautisarin.

Ax tok. Atzun jlu kyaj tqʼamaʼn Jesús tuʼn tbʼant kyuʼn t-xnaqʼtzbʼen (Mateo 28:​19, 20). Axpe ikx te Jesús bautisarin. Tuʼntzunju, tuʼn toka te t-xnaqʼtzbʼen, bʼaʼn tuʼn tbautisarina aj tkubʼ tnaʼna qa ma bʼant ttena ex qa qʼuqli tkʼuʼja tiʼj qa taja tuʼn tbʼant jlu tuʼna.

● In nonin bautismo qiʼj tuʼn miʼn qkubʼ tzʼaq toj il.

Nya ax tok. Aj tbautisarina in kubʼ tyekʼina kywitz txqantl qa o txi tqʼamaʼna te Jehová tuʼn tajbʼena te. Ex in xi qqʼamaʼn te Jehová tuʼn qajbʼen te tuʼnju qaj tuʼn qanqʼin ik tzeʼn te tajbʼil ex nya oʼkx tuʼn miʼn qkubʼ tzʼaq toj jun il.

● Aj in qo bautisarin in xi tzyet tuʼn qbʼet toj bʼe te kolbʼil.

Ax tok. In tzaj tqʼamaʼn Tyol Dios qa nim toklen tuʼn qbautisarin tuʼntzun qklet (1 Pedro 3:21). Noqtzun tuʼnj, nya ik tten jlu ik tzeʼn jun seguro aju kxqʼuqil qiʼj aj ttzaj alkyexku nya bʼaʼn. Sino in qo bautisarin tuʼnju kʼujlaʼn Jehová quʼn ex tuʼnju qaj tuʼn qajbʼen te tuʼn tkyaqil qanmi te jumajx (Marcos 12:​29, 30).

● Mlay txi nqʼoʼne tajlal te Dios qa mintiʼ ma chʼin bautisarine.

Nya ax tok. In tzaj tqʼamaʼn Santiago 4:17 qa aju «xjal bʼaʼn tuʼn alkye ju bʼaʼn ex mintiʼ in tbʼinchaʼn, at til», qa o bautisarin moqa naʼmx. Tuʼntzunju, ximana kyiʼj xjel lu: ¿In nelpe tnikʼa tiʼjju taj Dios tuʼn tbʼant tuʼna? ¿In nelpe tnikʼa tiʼjju taja tuʼn tbʼant tuʼna toj tanqʼibʼila? Qa ikju, bʼaʼn tuʼn tyolina kyukʼil ttata moqa tukʼil jun erman o chʼiy toj tokslabʼil. Tuʼnju jaku che onin tiʼja tuʼn tel tnikʼa tiʼj tiʼ jaku bʼant tuʼna tuʼn tbautisarina.

● Il tiʼj tuʼn nbautisarine tuʼnju in che bautisarin wamiwe.

Nya ax tok. Aj tkubʼ t-ximana tuʼn tbautisarina, nim toklen tuʼn tjatz anqʼin toj tanmiya (Salmo 110:3) Ex oʼkx jaku bʼant jlu tuʼna aj tel tnikʼa tiʼj tiʼ t-xilen tuʼn toka te testigo de Jehová ex qa qʼuqli tkʼuʼja tiʼj qa ma bʼant ttena tuʼn tbʼant jlu tuʼna (Eclesiastés 5:​4, 5).

Jun chʼixpubʼil nim toklen

Kchʼexpetel tanqʼibʼila aj tbautisarina ex tzul tkʼamoʼna nim kʼiwlabʼil. Pero ax ikx nim toklen tuʼn tjapun tuʼna tkyaqilju kxel ttziyena te Jehová.

¿Mape pon ambʼil tuʼn tbautisarina? Qa ikju, nimxixlo in tzalaja. Mintiʼ juntl oklenj mas tbʼanel twitzju tuʼn qajbʼen te Jehová tuʼn tkyaqil qanmi ex tuʼn t-xi qyekʼin te tkyaqil qʼij qa in qo anqʼin ik tzeʼn taj (Mateo 22:​36, 37).

TOJ JUNTL XNAQʼTZBʼIL

Ojtzqinka tiʼ jaku bʼant tuʼna tuʼntzun ttzalaja toj tanqʼibʼila.

TAQIKʼ TYOL DIOS NIM TOKLEN

«Tuʼn t-xi kyqʼoʼne kyximlale te Dios ik tzaʼn jun oyaj itzʼ, tekuxix Dios ex bʼaʼn nneʼla tuj twitz, atzun kykʼulbʼile axix tok twitz Dios» (Romanos 12:1).

JUN NABʼIL

Qaninxa kye ttata alkye jun ermano moqa jun ermana jaku tzʼonin tiʼja tuʼn tchʼiya toj tokslabʼila (Hechos 16:​1-3).

¿OJTZQIʼN JLU TUʼNA?

Aju bautismo in nok te «jun techal» tuʼntzun tkleta (Ezequiel 9:4-6).

TZʼAQʼUNANA TIʼJ JLU

¿Alkyeqe xnaqʼtzbʼil toj Tyol Dios taja tuʼn telxix tnikʼa kyiʼj tuʼn tbautisarina? ․․․․․

¿Tiʼ taja tuʼn t-xi tqanina te tmana moqa te ttxuʼya tiʼj xnaqʼtzbʼil lu? ․․․․․

¿TI’ T-XIMBʼETZA TIʼJ JLU?

● ¿Tiquʼn nimxix toklen ambʼil aj qbautisarin?

● ¿Tiquʼn in che bautisarin junjun qʼa ex txin ex naʼmxtoq tbʼant kyten?

● ¿Tiquʼn ateʼ junjun kuʼxun mintiʼ in xi kyqʼamaʼn naj te Jehová tuʼn kyajbʼen te ex tuʼn kybautisarin naj?

[Yol]

Aj ttzaj nnaʼne qa o chin bautisarine, in nonin wiʼje tuʼn tkubʼ nbʼinchaʼne bʼaʼn ex tuʼn tel wikʼune nya bʼaʼn» (Noemí).

[A’yeju recuadro ex qe tilb’ilal]

Qe xjel kukx in che tzaj qanin tiʼj bautismo

¿Tiʼ in kubʼ techlaʼn bautismo? Aj tkux bʼaj t-ximlala toj aʼ, ik tten ik tzeʼn in kyima, toj juntl yol, in kyaj ttzaqpiʼna aju ojtxe tbʼinchbʼena. Aj tjatza toj aʼ, ik tten ik tzeʼn in nul itzʼja juntl maj tuʼnju in xi tzyet jun akʼaj tanqʼibʼila tuʼn tajbʼena te Jehová ex tuʼn tkubʼ tbʼinchaʼna aju tajbʼil.

¿Tiʼ t-xilen tuʼn t-xi qqʼamaʼn te Jehová tuʼn qajbʼen te? A t-xilen tuʼn tkubʼ t-xkʼayin tibʼa teju texa tajbʼila ex tuʼn t-xi tqʼoʼna tanqʼibʼila te Jehová (Mateo 16:24). Tuʼntzunju, naʼmxtoq tbautisarina, il tiʼj tuʼn tok jun naʼj Dios tuʼna jatumel kxel ttziyena te Jehová tuʼn tkubʼ tqʼoʼna tajbʼil tnejel toj tanqʼibʼila te jumajx.

¿Tiʼ il tiʼj tuʼn tbʼant wuʼne naʼmxtoq nbautisarine? Il tiʼj tuʼn tanqʼina ik tzeʼn in tzaj tqʼamaʼn Tyol Dios ex tuʼn tyolina tiʼjju in nel tnikʼa tiʼj kyukʼil xjal. Ax ikx, il tiʼj tuʼn tten jun tamiwbʼila tukʼil Dios aj t-xnaqʼtzana tiʼj Biblia ex aj tnaʼna Dios te. Nimxix toklen tuʼn tajbʼena te Jehová tuʼnju taja tuʼn tbʼant tuʼna ex nya tuʼnju in tzaj qʼamaʼn teya kyuʼn txqantl.

¿Jteʼ wabʼqʼiye il tiʼj tuʼn tten tuʼntzun nbautisarine? Nya nim toklen jteʼ tabʼqʼiya at aj tbautisarina. Noqtzun tuʼnj, il tiʼj tuʼn tjapuna toj jun abʼqʼi jatumel in nel tnikʼa tiʼj tiʼ t-xilen aju tuʼn tajbʼena te Dios.

¿Tiʼ jaku bʼant wuʼne qa waje tuʼn nbautisarine pero in tzaj kyqʼamaʼn ntate tuʼn tkubʼ nyoʼne chʼintl ambʼil? Qa in kubʼ kyximen ttata qa il tiʼj tuʼn tikʼ chʼintl ambʼil tuʼn kyjapun nabʼil tuʼna toj Tyol Dios, bʼaʼn tuʼn t-xi tbʼiʼna ex jaku tzʼajbʼen ambʼil lu tuʼna tuʼn tchʼiy tamiwbʼila tukʼil Jehová (1 Samuel 2:26).

[A’yeju recuadro ex qe tilb’ilal]

T-xaq jatumel tkuʼx junjun ejercicio

¿In ximenpe teya tiʼj tuʼn tbautisarina?

Aʼye xjel che ul che onil tiʼja tuʼn tel tnikʼa tiʼj qa ma bʼant ttena tuʼn tbautisarina. Miʼn tzʼel naj tiʼj tkʼuʼja tuʼn kyjaw tuʼjina qe texto naʼmxtoq tkubʼ tqʼoʼna qe tzaqʼwebʼil.

¿Alkye tten in kubʼ tyekʼina qa in nok qeʼ tkʼuʼja tiʼj Jehová? (Salmo 71:5). ․․․․․

¿In nelpe tnikʼa tiʼj alkye bʼaʼn ex alkye nya bʼaʼn? ¿Toj alkye ambʼil o kubʼ tyekʼina jlu? (Hebreos 5:14). ․․․․․

¿Jteʼ maj in naʼna Dios toj jun qʼij? ․․․․․

¿Alkyeqe tyola in xi tqʼamaʼna te Jehová toj naʼj Dios? ¿In tzajpe kyyekʼin tyola qa kʼujlaʼn Jehová tuʼna? (Salmo 17:6). ․․․․․

¿Tiʼ taja tuʼn tbʼant tuʼna tuʼntzun kyok tnaʼj Diosa te mas tbʼanel? ․․․․․

¿In nelpe tpaʼna ambʼil tuʼn t-xnaqʼtzana tiʼj Tyol Dios tkyaqil qʼij? (Josué 1:8). ․․․․․

¿Alkyeqe xnaqʼtzbʼil in kubʼ t-xnaqʼtzana tjunalxa? ․․․․․

¿Tiʼ taja tuʼn tbʼant tuʼna aj t-xnaqʼtzana tjunalxa? ․․․․․

¿Jakupe txi tqʼamaʼna qa tbʼanel in nok tpakbʼabʼila? (Junjun techel: ¿Ojtzqiʼn tuʼna tzeʼn jaku txi tchikʼbʼaʼna junjun xnaqʼtzbʼil nim toklen toj Tyol Dios? ¿In meltzʼaja visitaril kye qeju kyaj tuʼn tok kybʼiʼn Tyol Dios? ¿In nokpe tilil tuʼna tuʼn t-xi tqʼoʼna xnaqʼtzbʼil te jun xjal?)

□ Ikju □ Miʼn

¿In nexa pakbʼal maske mintiʼ in che ex ttata? (Hechos 5:42).

□ Ikju □ Miʼn

¿Tiʼ taja tuʼn tbʼant tuʼna tuʼntzun tok tpakbʼabʼila te tbʼanel? (2 Timoteo 2:15). ․․․․․

¿Kykyaqilpe maj in xiʼya kyoj chmabʼil moqa oʼkx junjun maj? (Hebreos 10:25). ․․․․․

¿Atpe jun tyola in xiʼ kyoj chmabʼil moqa atpe jun toklena in nex kyoj? ․․․․․

Qa in tzaj qʼoʼn ambʼil teya kyuʼn ttata, ¿in xiʼya kyoj chmabʼil kyoj ambʼil jatumel mintiʼ in bʼant tuʼn kyxiʼ kye?

□ Ikju □ Miʼn

¿Jakupe tqʼamaya qa in tzalaja tuʼn tbʼant tajbʼil Dios tuʼna? (Salmo 40:8).

□ Ikju □ Miʼn

¿Jakupe tzaj tnaʼna jun ambʼil jatumel mintiʼ kubʼ tiʼja kyuʼn tukʼila tuʼn tkubʼ tbʼinchaʼna jun nya bʼaʼn? (Romanos 12:2). ․․․․․

¿Tiʼ kbʼantel tuʼna tuʼn miʼn tnaj tkʼujlabʼila tiʼj Jehová? (Judas 20, 21). ․․․․․

Qa mintiʼtl ẍe ajbʼen ttata moqa qe tamiwa te Jehová, ¿kukxpe kʼajbʼela te Jehová? (Mateo 10:​36, 37).

□ Ikju □ Miʼn

[Tilb’ilal]

Nim toklen tuʼn tel qpaʼn ambʼil tuʼn qximen tiʼj aj qbautisarin tuʼnju ik tten jlu ik tzeʼn aj tkubʼ mojeʼ jun xjal.