¿Tiʼ jaku bʼant wuʼne tuʼn woke te tamiw Dios?
XNAQʼTZBʼIL 35
¿Tiʼ jaku bʼant wuʼne tuʼn woke te tamiw Dios?
El tnikʼ Gabriel tiʼj qa nim toklen tuʼn tten jun tbʼanel tamiwbʼil tukʼil Dios tej tok weʼ twitz nya bʼaʼn. Tqʼama jlu: «O kyaj koline tuʼn nmane tej qʼiʼntoq 12 abʼqʼi wuʼne. Naʼnx wuʼne toj jun qonikʼen xi nqanine te Jehová tuʼn tmeltzʼaj nmane».
Ok ten Gabriel uʼjil tiʼj Tyol Dios tej otoq tzaj bʼaj tkʼuʼj. Kanet jun versículo tuʼn jatumel xi tqʼamaʼn jun aj tzʼibʼil jlu te Jehová: «Aju xjal mintiʼ tipun tuʼn tklonte tibʼ in xi toqxenan tibʼ teya; aya in onin kyiʼj qe kʼwaʼl mintiʼ kyman ex kytxuʼ» (Salmo 10:14). Tzaj tqʼamaʼn Gabriel qa e pon qe yol lu toj tanmi. Tqʼama jlu: «Tuʼn taqikʼ Tyol Dios lu, el nnikʼe tiʼj qa tajtoq Jehová tuʼn tonin wiʼje ex tzaj tnaʼn weye qa taj tuʼn tok te Nmane. Mintiʼ juntl mambʼaj jaku pon ik tzeʼn».
¿AXPE qe tiʼchaq in nikʼ tiʼja ik tzeʼn te Gabriel? Bʼalo axju moqa miʼn. Pero at jun tiʼ in nel qnikʼ tiʼj: taj Jehová tuʼn toka te tamiw. Keʼyinka tiʼ in tzaj tqʼamaʼn Tyol Dios, chi: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8). ¿Ma tzʼel tnikʼa tiʼj? Maske mlay tzʼok qkeʼyin Qman Dios ex maske nya mas nim qoklen twitz, in tzaj tqʼoʼn txokbʼil qiʼj tuʼn qok te tamiw.
Noqtzun tuʼnj, nya kukx in qo ok te tamiw Qman Dios, sino il tiʼj tuʼn qaqʼunan tiʼj. Qo ximen tiʼj jun techel. ¿Ope kux tawaʼna jun tal bʼech? Qa taja tuʼn tchʼiy ex tuʼn miʼn tkyim, ¿tiʼ kbʼantel tuʼna? Il tiʼj tuʼn tkubʼ tqʼoʼna toj jun tbʼanel lugar ex tuʼn tkux tqʼoʼna aʼ t-xeʼ tkyaqil qʼij. Mlayx kyaj tkolina. Ax jlu in bʼaj tukʼil qamiwbʼil tukʼil Dios. ¿Tiʼ kbʼantel tuʼna tuʼn kukx tchʼiy?
Nim toklen tuʼn qxnaqʼtzan tiʼj Tyol Dios
Ik tzeʼn ojtzqiʼn tuʼna, tuʼn tten jun tbʼanel qamiwbʼil tukʼil jun xjal, il tiʼj tuʼn qyolin tukʼil ex tuʼn tok qqʼoʼn qwiʼ tiʼj. Ax jlu in bʼaj qa qaj tuʼn tten jun tbʼanel qamiwbʼil tukʼil Dios. Pero ¿alkye tten jaku tzʼok qqʼoʼn qwiʼ tiʼj Jehová? Aj tjaw quʼjin Tyol ex aj qxnaqʼtzan tiʼj (Salmo 1:2, 3).
Ax tok, bʼalo nya tgana tuʼn t-xnaqʼtzana. Maslo tgan teya junjuntl tiʼchaq, ik tzeʼn tuʼn tkeʼyina tiʼj televisión, tuʼn tsaqchana kyiʼj videojuego ex tuʼn texa kyukʼil tamiwa. Pero qa taja tuʼn toka te tamiw Dios, il tiʼj tuʼn t-xi tbʼiʼna aju in tzaj tqʼamaʼn Biblia.
Miʼn kubʼ t-ximana qa kbʼajel tgana aj t-xnaqʼtzana tiʼj Tyol Dios. Axpe ikx jaku tzalaja tiʼj maske in kubʼ t-ximana qa nya tgana tuʼn tuʼjina. Pero tnejel, il tiʼj tuʼn tel tpaʼna ambʼil. ¿Tzeʼn jaku bʼant jlu tuʼna? Jaku txi tbʼinchaʼna ik tzeʼn in bʼant tuʼn jun txin Lais tbʼi. Tqʼama jlu: «O kubʼ nqʼoʼne jun horario, aj in chin jaw weʼye, in jaw wuʼjine jun capítulo tiʼj Tyol Dios». Atzunte María, aju qʼiʼn 15 abʼqʼi tuʼn, junxitl tten in xi tbʼinchaʼn. Tqʼama jlu: «Naʼmxtoq in xiʼye jtal, in chin uʼjine jun rat tiʼj Tyol Dios».
¿Tiʼ teya kbʼantel tuʼn tuʼn t-xnaqʼtzana? Tnejel, bʼaʼn tuʼn tok tkeʼyina recuadro toj t-xaq 292. Yajxitl, tzʼibʼinkuya toj alkye ambʼil jaku tzʼel tpaʼna media hora tuʼn t-xnaqʼtzana tiʼj Tyol Dios akux in nex qʼij.
․․․․․
Aj tkubʼ tqʼoʼna jun horario, kʼonil tiʼja tuʼn t-xi tzyet tuʼn tuʼjina tiʼj Tyol Dios. Kʼelel tnikʼa tiʼj qa at maj kwest tuʼn quʼjin. Bʼalo axju jaku bʼaj tiʼja ik tzeʼn te Jezreel, jun qʼa te 11 abʼqʼi. Tqʼama jlu: «At junjun plaj Tyol Dios kwest tuʼn tel nnikʼe tiʼj». Pero miʼn sikta. Bʼaʼn tuʼn ttzaj tnaʼna qa aj t-xnaqʼtzana tiʼj Tyol Dios, in bʼiʼna tiʼj Jehová, aju tbʼanel tamiwa. Aj tbʼet ambʼil, ktzalajela aj tuʼjina tiʼj Tyol Dios. Qa mas ma tzʼok tilil tuʼna, mas ktzalajela ex mas kʼonil tiʼja.
Kukx naʼna Dios
O tzaj tqʼoʼn Jehová ambʼil tuʼn qnaʼn Dios te tuʼntzun qyolin tukʼil. Tbʼanelxix oyaj lu. Ximana tiʼj jlu: jaku yolina tukʼil toj alkyexku ambʼil, qa qʼij moqa te qonikʼen. Jaku tzaj bʼiʼna tuʼn Jehová toj alkyexku ambʼil ex taj tuʼn tbʼin tiʼja. Tuʼntzunju, in tzaj tqʼamaʼn Xjan Uʼj tuʼn t-xi tqʼamaʼna te Dios tkyaqilju in bʼaj tkʼuʼja tiʼj ex bʼaʼn tuʼn t-xi tqʼoʼna chjonte te tiʼj tkyaqil (Filipenses 4:6).
¿Tiʼ t-xilen texto lu? Atz in yolin tiʼj qa jaku txi tqʼamaʼna te Jehová tkyaqilju in bʼaj tiʼja, ik tzeʼn qe nya bʼaʼn in nok weʼya twitz ex aju in tzaj bʼaj tkʼuʼja tiʼj. Pero ax ikx, bʼaʼn tuʼn t-xi tqʼoʼna chjonte te, ik tzeʼn in bʼant quʼn tukʼil jun qamiw. Mas nim tiʼchaq o bʼant tuʼn Jehová tiʼja twitzju o bʼant tuʼn jun tamiwa (Salmo 106:1).
Tzʼibʼinkuya alkyeqe tiʼchaq in xi tqʼoʼna chjonte te Jehová kyiʼj.
․․․․․
Qa in kubʼ t-ximana qa mlayx tzʼexa twitz jun nya bʼaʼn in tzaj bʼaj tkʼuʼja tuʼn ex qa in xobʼa, in tzaj tqʼamaʼn Tyol Dios qa jaku txi tbʼinchaʼna jlu: «Qʼonkja qe tbʼisa tuj tqʼabʼ Qman, ate ktzajel qʼonte tipuna tuʼn tikʼx tuʼna, mlayx taqʼ ambʼil tuʼn tkubʼ tzʼaq aju xjal bʼaʼn niman te» (Salmos 55:22).
Tzʼibʼinkuya jun tiʼ in tzaj bʼaj tkʼuʼja tuʼn ex taja tuʼn t-xi tqʼamaʼna toj tnaʼj Diosa.
․․․․․
Jaku tzʼel tiʼna jun xnaqʼtzbʼil tiʼjju in bʼaj tiʼja
Aj tten jun tbʼanel tamiwbʼila tukʼil Dios, ax ikx bʼaʼn tuʼn t-ximana tiʼj juntl tiʼ. Kubʼ ttzʼibʼin David jun bʼitz jatumel tqʼama jlu: «Che nikʼbʼenchaqe tiʼj, tzʼelx kynikʼe tiʼj, ate Qman puro bʼaʼn» (Salmo 34:8). Otoq tzikʼ David toj jun nya bʼaʼn tej tkubʼ ttzʼibʼin bʼitz lu. Otoq tzʼok weʼ twitz kamik tuʼnju chʼixme kubʼ bʼyoʼn tuʼn Saúl. Tuʼn miʼn tkyim, okx tewin tibʼ kyxol aj qʼoj tiʼj, pero jun rat el kynikʼ tiʼj. Kubʼ t-ximen David qa kbʼeltoq bʼyoʼn kyuʼn soldad. Pero mintiʼ bʼaj jlu. ¿Tzeʼntzun klet David? Bʼant jun tiʼ tuʼn, «ok tqʼon tibʼ ik tzaʼn jun lok» (1 Samuel 21:10-15).
Mintiʼ kubʼ t-ximen David qa otoq klet tuʼnju list. Tej t-xi tzyet tuʼn tkubʼ ttzʼibʼin bʼitz, jaw tnimsaʼn Dios tej tqʼama jlu: «In kubʼsane twitz Qman ex in tzaj tzaqʼweʼne tuʼn; in klete tuʼn te tkyaqilju in chin xobʼtoqe te» (Salmo 34:4). Tuʼn tkyaqilju otoq tzikʼ tiʼj David, tuʼntzunju jakutoq tqʼama jlu: «Tzʼelx kynikʼe tiʼj, ate Qman puro bʼaʼn».
Ximana tiʼj jun ambʼil jatumel ok tqʼoʼn twitza tiʼj qa onin Jehová tiʼja ex bʼaʼn tuʼn tkubʼ ttzʼibʼina. Jaku kubʼ ttzʼibʼina alkyexku tiʼ maske in kubʼ t-ximana qa nya nim toklen.
․․․․․
Teyele junjun qe kʼokel tilil tuʼn tuʼn tchʼiy tamiwbʼil tukʼil Dios maske in che ajbʼen qman te Jehová ex in che onin qiʼj tuʼn tel qnikʼ tiʼj axix tok. ¿In nokpe tilil teya tuʼn tuʼn tten tbʼanel tamiwbʼila tukʼil Dios moqa naʼmx t-xi tzyet tuʼna? Qa ikju, kʼonil xnaqʼtzbʼil lu tiʼja tuʼn t-ximana tiʼj. Tzul kʼiwlaʼna tuʼn Jehová aj tok tilil tuʼna tuʼnju in tzaj tqʼamaʼn Xjan Uʼj lu: «Kyqaninxe ex ktzajel qʼoʼn kyeye; kyjyome ex knetel kyuʼne» (Mateo 7:7).
KKANETEL MAS TQANIL TUʼNA TOJ CAPÍTULO 38 EX 39 TOJ TNEJEL VOLUMEN TE UʼJ LU
TOJ JUNTL CAPÍTULO, CHE TZAJEL TZAQʼWEʼN XJEL LU:
¿Kwestpe tuʼn tyolina tiʼj Dios kyukʼil xjal? ¿Tiʼ jaku bʼant tuʼna tuʼn tkolina tiʼjju nimen tuʼna?
TAQIKʼ TYOL DIOS NIM TOKLEN
«At tzalajbʼil kye qeju nneʼl kynikʼ tiʼj qa at tajbʼen Dios kye» (Mateo 5:3).
JUN NABʼIL
Qa ma jaw tuʼjina kyaje página Tyol Dios tkyaqil qʼij, kbʼel bʼaj tuʼna toj jun abʼqʼi.
¿OJTZQIʼN JLU TUʼNA?
In nuʼjina tiʼj uʼj lu ex in xi tbʼiʼna qe consej in tzaj tqʼamaʼn Tyol Dios tuʼnju in ximen Jehová tiʼja ex taj tuʼn toka te tamiw (Juan 6:44).
BʼINCHAMA JLU
Aj nxnaqʼtzane tiʼj Tyol Dios, atzun jlu kbʼantel wuʼne tuʼntzun tonin wiʼje: ․․․․․
Kbʼantel jlu wuʼne tuʼntzun tel npaʼne mas ambʼil tuʼn nnaʼne Dios: ․․․․․
¿Tiʼ waje tuʼn t-xi nqanine te nmane ex te ntxuʼye tiʼj xnaqʼtzbʼil lu? ․․․․․
YAJTZUN TEYA, ¿TIʼ IN KUBʼ T-XIMANA?
● ¿Tiʼ jaku bʼant tuʼna tuʼntzun ttzalaja aj tjaw tuʼjina Tyol Dios?
● ¿Tiquʼn taj Jehová tuʼn kynaʼn xjal Dios te maske aj il qe?
● ¿Tiʼ jaku bʼant tuʼna tuʼn tok qe tnaʼj Diosa te mas tbʼanel?
[Yol]
«Tej kʼwalx qine, chʼixmi tkyaqil maj aʼyex yol xi nqʼamaʼne te Jehová toj nnaʼj Diose. Atzun jaʼlo, in nok tilil wuʼne tuʼn t-xi nqʼamaʼne tkyaqilju in bʼaj wiʼje, qa bʼaʼn moqa nya bʼaʼn. Tuʼnju junxitl tiʼ in bʼaj junjun qʼij, ax ikx junxitl tiʼchaq in xi nqʼamaʼne toj nnaʼj Diose» (Eva).
[A’yeju recuadro ex qe tilb’ilal]
Ojtzqinka Tyol Dios
1. Jyonktza jun txʼolbʼabʼil toj Tyol Dios aju mas tgana. Tuʼn telxix tnikʼa tiʼj, qaninxa te Jehová tuʼn ttzaj tqʼoʼn tnabʼila.
2. Chebʼe uʼjina. Miʼn ojqelina aj tuʼjina. Bʼaʼn tuʼn t-ximana tiʼjju in jaw tuʼjina. Jun techel, qʼonka twitza tiʼjju in bʼaj, bʼinxa tqʼajqʼajel kywiʼ xjal in che yolin, sqonxa tkʼokʼjal, nikʼbʼenxa aju wabʼj in yolin tiʼj... Iktzun tten kʼelel tnikʼa tiʼj txʼolbʼabʼil.
3. Ximana kyiʼj junjun xjel. Aj tbʼaj tuʼjina jun txʼolbʼabʼil, bʼaʼn tuʼn tkubʼ t-xjelina jlu:
● ¿Tiquʼn tzaj tqʼoʼn Jehová ambʼil tuʼn tkyaj tzʼibʼin jlu toj Tyol?
● ¿Alkyeqe xjal jaku che ok te jun tbʼanel techel nwitze ex alkyeqe mlay?
● ¿Alkyeqe xnaqʼtzbʼil jaku che onin wiʼje tkyaqil qʼij?
● ¿Tiʼ xnaqʼtzbʼil jaku tzʼel wiʼne tiʼj Jehová ex tiʼjju tmod?
4. Bʼinchama jun naʼj Dios. Qʼamanxa te Jehová tiʼ otoq tzʼel tnikʼa tiʼj ex tzeʼn jaku kubʼ tbʼinchaʼna. Aaa, ex miʼn tzikʼ tnaʼl tuʼna tuʼn t-xi tqʼoʼna chjonte te Jehová tiʼj Tyol.
[Tilb’ilal]
«Ik tten tyola ik tzaʼn jun kandil te ẍaqlul weye, in tqʼoʼn spikʼun tuj nbʼeye» (Salmos 119:105).
[A’yeju recuadro ex qe tilb’ilal]
Ximana tiʼj alkye mas nim toklen
¿Kwestpe tuʼn tkanet ambʼil tuʼna tuʼn tnaʼna Dios ex tuʼn t-xnaqʼtzana tiʼj Biblia? Jaku tzʼonin tiʼja qa ma tzʼel tnikʼa tiʼj alkye mas nim toklen.
Bʼinchama jlu: Jyonxa jun palangana ex qʼonkuxa junjun matij abʼj toj. Yajxitl, chitinxa arena tibʼaj. ¿Tiʼ at jaʼlo? Nya kwest tuʼn tel qnikʼ tiʼj, at jun palangana nojni tuʼn abʼj ex tuʼn arena.
Atzun jaʼlo, jaku jatz tiʼna arena ex qe abʼj toj ex bʼinchama juntl maj, pero tnejel qʼonkuxa arena ex yajxitl qe matij abʼj. ¿Tiʼtzun ma bʼaj? Mintiʼ ma che kux kanin abʼj toj palangana. Ma bʼaj jlu tuʼnju tnejel ma kux tqʼoʼna arena.
¿Tiʼ xnaqʼtzbʼil jaku tzʼel qiʼn tiʼj? Qa tnejel ma kubʼ tbʼinchaʼna junjun tiʼchaq nyaxix nim kyoklen, mlay kanet ambʼil tuʼna tuʼn t-xi tbʼinchaʼna qeju mas nim kyoklen, toj juntl yol, aqeju at toklen tukʼil tamiwbʼila tukʼil Jehová. Tuʼntzunju, in tzaj tqʼamaʼn Tyol Dios jlu kye okslal: «[Bʼant-x] kyskʼone tiʼj alkyeju mas bʼaʼn», moqa alkyeju mas nim toklen (Filipenses 1:10). Qa ma txi tbʼiʼna consej lu, ktel ambʼil tiʼja tuʼn tajbʼena te Dios ex tuʼn t-xi tbʼinchaʼna junjuntl tiʼchaq tuʼn ttzalaja. Bʼaʼn tuʼn ttzaj tnaʼna qa tnejel kxel tbʼinchaʼna qe tiʼchaq mas nim kyoklen.
[Tilb’ilal]
Ik tten qamiwbʼil tukʼil Dios ik tzeʼn jun tal bʼech, il tiʼj tuʼn tok qxqʼuqin tuʼntzun tchʼiy.