Julio: In chin tzalaje Ernesto tuʼn nyoline tukʼila tiʼj Tyol Dios. * ¿Naʼnx tuʼna qa tzaj tqanina weye tuʼn t-xi nchikʼbʼaʼne jun tiʼ teya tiʼj Tkawbʼil Dios? Tzaj tqʼamaʼna weye qa taja tuʼn tel tnikʼa tiʼj tiquʼn in xi kyqʼamaʼn testigos de Jehová qa xi tzyet tuʼn tkawin Tkawbʼil Dios toj 1914.

Ernesto: Ikju, atzunju jaw wuʼjine toj jun kyuʼje, qa xi tzyet tuʼn tkawin Tkawbʼil Dios toj 1914 ex at jun nxjele tiʼj. In tzaj kyqʼamaʼne qa atz in jatz tkyaqil xnaqʼtzbʼil nimen kyuʼne toj Tyol Dios.

Julio: Ikju, ax tok.

Ernesto: O jaw wuʼjine tkyaqil Tyol Dios ex mintiʼ naʼn wuʼne qa o tzʼok nkeʼyine abʼqʼi lu. Tuʼntzunju, ma txi njyone tqanil toj Internet tiʼj abʼqʼi 1914 toj jun Biblia pero mintiʼ jun tqanil ma kanet wuʼne.

Julio: Waje tuʼn t-xi nqʼamaʼne teya qa in chin tzalaje tiʼja. Tnejel, tuʼnju o jaw tuʼjina tkyaqil Tyol Dios. Qʼanchaʼl qa in nok tqʼoʼna toklen.

Ernesto: Ikju, atzun mas tbʼanel uʼj lu te weye.

Julio: Tbʼanel, ex tkabʼin, tuʼnju in najbʼen tuʼna tuʼn tkanet tzaqʼwebʼil kyiʼj t-xjela. In kubʼ tbʼinchana jun tiʼ in tzaj tqʼamaʼn Tyol Dios, in nok tilil tuʼna tuʼn tten tojtzqibʼila. * Tbʼanelxix tuʼnju in nok tilil tuʼna.

Ernesto: Chjonte Julio. Waje tuʼn kukx tel nnikʼe tiʼj Tyol Dios. Ex o tzʼel npaʼne chʼin ambʼil tuʼn xnaqʼtzane ex o kanet jun tqanil wuʼne tiʼj 1914 toj uʼj in qo xnaqʼtzan tiʼj. Aju in yolin tiʼj jun matij tzeʼ in jaw txʼemin ex in jaw chʼiy juntl maj.

Julio: Ah, ya. In kanet profecía lu quʼn toj capítulo 4 toj uʼj te Daniel. Tzalu in tzaj qʼamaʼn twitzikʼ Nabucodonosor ok, aju aj kawil te Babilonia.

Ernesto: Ax jlu o jaw wuʼjine nimku maj, noqtzun tuʼnj, mintiʼ in nel nnikʼe tiʼj tiʼ toklen witzikʼ lu at tukʼil Tkawbʼil Dios moqa tukʼil abʼqʼi 1914.

Julio: Miʼn bʼisuna. Axpe ikx te profeta Daniel mintiʼ el tnikʼ tiʼj jlu tej tkubʼ ttzʼibʼin.

Ernesto: ¿Ax tok tuʼna?

Julio: Ikju, qʼonka twitza tiʼjju kubʼ tzʼibʼin tzalu toj Daniel 12:8: «O nbʼiye aju o tma ex mintiʼ el nnikʼe tiʼj».

Ernesto: Qape oʼkx weye mintiʼ in nel nnikʼe tiʼj nchi weye.

Julio: ¿Ojtzqiʼn tuʼna tiquʼn mintiʼ el tnikʼ Daniel tiʼj? Tuʼnju naʼmxtoq tpon ambʼil tuʼn tel nikʼbʼaj kyiʼj yol lu. Noqtzun tuʼnj, toj ambʼil jaʼlo jaku tzʼel qnikʼ tiʼj profecía lu.

Ernesto: ¿Ax tok?

Julio: Ikju, in tzaj tchikʼbʼaʼn versículo 9 jlu: «Tkyaqil jlu il tiʼj tuʼn tten tuj ewaj okxi tjapun bʼaj mankbʼil tqʼijlalil». Ik tzeʼn ma tzʼok tqʼoʼna twitza tiʼj, oʼkx jakutoq tzʼel nikʼbʼaj tiʼj profecía lu toj mankbʼil moqa bʼajsbʼil tqʼijlalil. Ex tuʼn tkyaqilju in bʼaj twitz Txʼotxʼ, in nel qnikʼ tiʼj qa in qo anqʼin toj mankbʼil tqʼijlalil. Kʼelel mas qnikʼ tiʼj mankbʼil tqʼijlalil toj uʼj in najbʼen quʼn. *

Ernesto: ¿Jakupe tzaj tchikʼbʼaʼna profecía lu weye?

Julio: A ver qa ma bʼant wuʼne.

Julio: Tnejel, qo yolil tiʼj twitzikʼ Nabucodonosor, yajxitl qo yolil tiʼj tiʼ t-xilen. ¿Tzeʼn toj twitza?

Ernesto: Bʼaʼn.

Julio: Ok twitzkʼaʼn Nabucodonosor jun matij tzeʼ in japun tzmax twitz kyaʼj. Ex ok tbʼiʼn tej ttzaj tqʼamaʼn jun t-anjel Dios tuʼn tjaw txʼemit tzeʼ. Oʼkx kyaj tlokʼ ex ttronkil tzeʼ. Yajxitl, ikʼ «wuq abʼqʼi» ex tzaj t-xul juntl maj. * Tnejel, japun twi profecía lu tiʼj Nabucodonosor. Tej tkawin, attoq nim tipumal ex ok ik tzeʼn matij tzeʼ in japun tzmax twitz kyaʼj. Noqtzun tuʼnj, el qʼiʼn toklen te aj kawil ex ikʼ «wuq abʼqʼi». ¿Naʼnx tuʼna tiʼ t-xilen jlu?

Ernesto: Eh, mintiʼ naʼn wuʼne.

Julio: In tzaj tqʼamaʼn Tyol Dios qa ok te loc ex ten ikju toj «wuq abʼqʼi». Tuʼntzunju el qʼiʼn toklen te aj kawil. Noqtzun tuʼnj, tej tbʼaj ambʼil lu, ok tnabʼil ex ok juntl maj te aj kawil. *

Ernesto: Ya in nel nnikʼe tiʼj. ¿Pero tiʼ toklen jlu tukʼil Tkawbʼil Dios ex tukʼil abʼqʼi 1914?

Julio: Tuʼn tel qnikʼ tiʼj jlu, bʼaʼn tuʼn ttzaj qnaʼn qa japun kabʼe maj twi profecía lu. Japun tnejel maj tej tel qʼiʼn toklen Nabucodonosor te aj kawil. Ax ikx, japun juntl maj tej ya mintiʼ kawin juntl aj Judiy te t-xel Dios, ex at toklen jlu tukʼil Tkawbʼil Dios.

Ernesto: ¿Tzeʼn in nel tnikʼa tiʼj qa japun twi profecía lu kabʼe maj?

Julio: Tojx profecía lu in tzaj qʼoʼn junjuntl tqanil nim toklen. In tzaj tqʼamaʼn Daniel 4:17 qa kyaj tzʼibʼin profecía lu tuʼn tel kynikʼ xjal tiʼj qa «ate Dios maʼ toklen ex at nim tipumal tuʼn tkawin kyibʼaj kykyaqil kykawbʼil xjal ex a Dios nnoʼk qʼonte toklen jun xjal tuʼn tkawin, noq alkye tajbʼil tuʼn tok tqʼoʼn». ¿Mape tzʼok tqʼoʼna twitza tiʼj txol yol lu: «At nim tipumal tuʼn tkawin kyibʼaj kykyaqil kykawbʼil xjal»?

Ernesto: Ikju, in tzaj tqʼamaʼn qa «ate Dios maʼ toklen ex at nim tipumal tuʼn tkawin kyibʼaj kykyaqil kykawbʼil xjal».

Julio: Tbʼanel. Tuʼn jlu in nel qnikʼ tiʼj qa nya oʼkx in yolin profecía lu tiʼj Nabucodonosor. Ax ikx in yolin kyiʼj «kykawbʼil xjal», toj juntl yol, aju toklen Dios at tuʼn tkawin kyibʼaj xjal. Qa ma qo xnaqʼtzan tiʼj junjuntl tqanil tiʼj profecía lu, kʼelel tnikʼa tiʼj qa toj ttxolil taʼ tkyaqil.

Ernesto: Weno, jaku tzʼok nbʼiʼne.

Julio: Nimku maj in yolin uʼj te Daniel tiʼj jun xnaqʼtzbʼil nim toklen, aju aj t-xi tzyet tuʼn tkawin Tkawbʼil Dios ex a Jesús aj Kawil toj Kawbʼil lu. ¿Tzeʼn toj twitza qa ma qo xnaqʼtzan chʼintl tiʼj jlu? Jyonkuxa Daniel 2:44 ex jaku tzaj tuʼjina najsama.

Ernesto: Bʼaʼn. Chi tzalu: «Tuj kyqʼijlalil qe rey lu, ate Dios aju at tuj kyaʼj kbʼel tqʼoʼn jun kawbʼil mlay naj ex mlay kubʼ tiʼj tuʼn juntl nasyon, noq oʼkx che bʼel bʼaj kykyaqil txqantl kawbʼil tuʼn, atzunte kukx ktel te jumajx».

Julio: Tbʼanel. ¿Jakupe txi tqʼamaʼna qa in yolin versículo lu tiʼj Tkawbʼil Dios?

Ernesto: Mmm, bʼalo.

Julio: In tzaj tqʼamaʼn versículo qa ktel Tkawbʼil Dios te jumajx. ¿Atpe jun xjal jaku kawin te jumajx ik tzeʼn te Dios?

Ernesto: Ni jun.

Julio: Ikju, qo yolin tiʼj juntl profecía in yolin tiʼj Tkawbʼil Dios. Toj Daniel 7:13 ex 14 in tzaj qʼamaʼn qa kʼokeltoq jun xjal te aj kawil. Qʼonka twitza tiʼjju in tzaj qʼamaʼn tzalu: «Tetzun jlu xi qʼoʼn ipumalj, ajwalil ex kawbʼil, ex kykyaqil xjal kyuj kykyaqil nasyon ex kykyaqil xjal junxitlchaq kyyol in che ajbʼentoq te. Aju tipumal ex tkawbʼil kukx ktel te jumajx, mlay chʼexpaj ex mlay kubʼ xitun». Toj versículo lu in tzaj qʼamaʼn jun tiʼ aju ma qo yolin tiʼj.

Ernesto: Ikju, in yolin juntl maj tiʼj jun kawbʼil.

Julio: Ex nya alkyexku kawbʼil. Qa in nok tqʼoʼna twitza tiʼj, in tzaj qʼamaʼn qa at toklen kyibʼaj «kykyaqil xjal kyuj kykyaqil nasyon ex kykyaqil xjal junxitlchaq kyyol in che ajbʼentoq te». Toj juntl yol, in kawin tibʼaj tkyaqil twitz Txʼotxʼ.

Ernesto: Naʼmxtoq tok nkeʼyine jlu. Pero toj tumel tuʼnju atzunju in tzaj tqʼamaʼn.

Julio: Qʼonka twitza juntl maj tiʼjju in tzaj qʼamaʼn tzalu: «Aju tipumal ex tkawbʼil kukx ktel te jumajx, mlay chʼexpaj ex mlay kubʼ xitun». ¿Nyapetzun chʼixme aʼyex yol in tzaj tqʼamaʼn versículo lu tukʼilju in tzaj tqʼamaʼn Daniel 2:44?

Ernesto: Ikju, chʼixme aʼyex.

Julio: Tbʼanel, qnaʼntz aju ma qo yolin tiʼj. Aju profecía in tzaj qʼamaʼn toj Daniel capítulo 4, in nonin kyiʼj xjal tuʼn tel kynikʼ tiʼj qa «ate Dios maʼ toklen ex at nim tipumal tuʼn tkawin kyibʼaj kykyaqil kykawbʼil xjal». A jlu in tzaj tyekʼin qa japun twi profecía lu tiʼj juntl xjal mas nim toklen twitz Nabucodonosor. Ax ikx, in che kanet profecía quʼn toj uʼj te Daniel aqeju in che yolin tiʼj ambʼil aj t-xi tzyet tuʼn tkawin Tkawbʼil Dios ex a Jesús aj Kawil toj. Tuʼn tkyaqil jlu, in nel qnikʼ tiʼj qa in yolin capítulo 4 te uʼj te Daniel tiʼj Tkawbʼil Dios.

Ernesto: Ma tzʼel nnikʼe tiʼj jlu. Noqtzun tuʼnj, ¿tiʼ toklen jlu tukʼil 1914?

Julio: Weno, qo yolin juntl maj tiʼj aj kawil Nabucodonosor. Ma qqʼama qa tej tjapun tnejel maj twi profecía toj uʼj te Daniel, ok tzeʼ te techel tkawbʼil Nabucodonosor. El qʼiʼn toklen te aj kawil tej tjaw txʼemin tzeʼ ex ikʼ wuq abʼqʼi. Ok Nabucodonosor te loc, pero tej tikʼ wuq abʼqʼi, ten juntl maj tnabʼil ex meltzʼaj toj tkawbʼil. Ex japun juntl maj twi profecía lu tej ya mintiʼ juntl aj Judiy kawin te t-xel Dios. Pero nya a t-xilen jlu qa kubʼ tbʼinchaʼn Dios jun nya bʼaʼn.

Ernesto: Ah, mintiʼxix in nel nnikʼe tiʼj.

Julio: In tzaj tqʼamaʼn Tyol Dios qa aʼyeju aj kawil te Israel in che kubʼtoq qeʼ toj «tqʼuqbʼil Qman» Jehová. * ¿Tiʼ t-xilen jlu? A jlu in tzaj tyekʼin qa e kawin te t-xel Dios. Ok kykawbʼil te techel Tkawbʼil Jehová. Noqtzun tuʼnj, tej tikʼ ambʼil, chʼixme kykyaqil el kypan kyibʼ tiʼj Jehová ex ax jlu bʼant kyuʼn xjal. Tuʼn jlu, xi tqʼoʼn ambʼil kye xjal te Babilonia tuʼn tkubʼ kyiʼj aj Israel kyuʼn toj abʼqʼi 607 tjaqʼxi ambʼil jaʼlo. Toj ambʼil aju, ya mintiʼ kawin juntl aj Judiy toj tnam Jerusalén te t-xel Dios. Toj juntl yol, ya mintiʼ kawin Dios. ¿Klarpe taʼ jlu?

Ernesto: Klar.

Julio: Toj abʼqʼi 607 tjaqʼxi ambʼil jaʼlo, xi tzyet tuʼn kyxi ajlet qeju wuq abʼqʼi. Toj ambʼil aju, ni jun xjal kawin te t-xel Dios. Tej tkubʼaj ambʼil lu, ok tqʼoʼn Dios juntl xjal tuʼn tkawin te t-xel, pero jaʼlo toj kyaʼj. Aqeju profecía ma che jaw quʼjin toj uʼj te Daniel, ax ikx japun kywiʼ tej tkubʼaj wuq abʼqʼi. Noqtzun tuʼnj, ¿jtoje kubʼaj qeju wuq abʼqʼi? Qa ma tzʼel qnikʼ tiʼj tzaqʼwebʼil, kʼonil qiʼj tuʼn tel qnikʼ tiʼj toj alkye ambʼil tzaj tzyet tuʼn tkawin Tkawbʼil Dios.

Ernesto: Tojlo 1914.

Julio: Atzun tzaqʼwebʼil.

Ernesto: Pero, ¿tiquʼn in tzaj tqʼamaʼna qa tzaj tzyet toj abʼqʼi aju?

Julio: Tej tul Jesús tzalu twitz Txʼotxʼ, tqʼama qa naʼmxtoq kykubʼaj qeju wuq abʼqʼi. * Tuʼntzunju, in nel qnikʼ tiʼj qa nimxix ambʼil qeju wuq abʼqʼi. Tzaj tzyet tuʼn ttzaj ajlet ambʼil lu tej atxtoq nim syent abʼqʼi tuʼn tul Jesús tzalu twitz Txʼotxʼ ex naʼmxtoq tkubʼaj tej tmeltzʼaj toj kyaʼj. Ax ikx, bʼaʼn tuʼn ttzaj qnaʼn qa aju profecía tkuʼx toj uʼj te Daniel, oktoq kʼelel qnikʼ tiʼj toj «mankbʼil tqʼijlalil». * Tej chʼixtoq kykubʼaj abʼqʼi 1800, tzaj tzyet tuʼn t-xnaqʼtzan jun kʼloj xjal tiʼj profecía lu ex kyiʼj junjuntl. Chebʼe chebʼe el kynikʼ tiʼj qa oktoq che kbʼel bʼaj wuq abʼqʼi toj 1914. Atxix toj ambʼil aju, tkyaqilju o bʼaj twitz Txʼotxʼ in tzaj tyekʼin qa xi tzyet tuʼn tkawin Tkawbʼil Dios toj kyaʼj ex tzaj tzyet bʼajsbʼil tqʼijlalil. Ax tok, at nim tqanil tiʼj xnaqʼtzbʼil lu tuʼn tel qnikʼ tiʼj.

Ernesto: Ikju, il tiʼj tuʼn tjaw wuʼjine juntl maj tuʼn tel nnikʼe tiʼj.

Julio: In nel nnikʼe tiʼja. Ax ikx weye xi tiʼn ambʼil tuʼn tel nnikʼe tiʼj. Pero ik tzeʼn ma qo yolin tiʼj, tkyaqilju in xi kyqʼamaʼn testigos de Jehová tiʼj Tkawbʼil Dios atz in jatz toj Biblia.

Ernesto: Ax tok. Tbʼanel o tzʼela te weye tuʼnju in nok qeʼxix kykʼuʼje tiʼj Tyol Dios.

Julio: In nel nnikʼe tiʼj qa ax ikx teya taja tuʼn tok qeʼ tkʼuʼja tiʼj Tyol Dios. Ik tzeʼn ma txi nqʼamaʼne teya, mlaylo tzʼel tnikʼa tiʼj tkyaqil tqanil ma qo yolin tiʼj ex atlo junjun t-xjela. Jun techel, ma qo yolin tiʼj qa tzaj tzyet qeju wuq abʼqʼi toj abʼqʼi 607 tjaqʼxi ambʼil jaʼlo ex qa at toklen tukʼil Tkawbʼil Dios. Pero, ¿tiquʼn in xi qqʼamaʼn qa kubʼaj tajlal ambʼil lu toj 1914? *

Ernesto: Atzun xjel waje tuʼn tel nnikʼe tiʼj.

Julio: In tzaj tyekʼin Tyol Dios tzeʼn jaku kubʼ qajlaʼn qeju wuq abʼqʼi. ¿Taja tuʼn qyolin tiʼj jlu toj juntl maj? *

Ernesto: Tbʼanel, chin ayole tiʼja.