AT MAJ in bʼant junjun tiʼchaq tuʼn Jehová tuʼn t-xqʼuqin kyiʼj kuʼxun mintiʼ in bʼant tuʼn tok kyxqʼuqin kyibʼ kyjunalx. Jun techel, qa ma tzʼexa bʼetil, jaku tzʼok tkeʼyina jun tiʼ in bʼant tuʼn Jehová, maske tnejel mintiʼ in nel tnikʼa tiʼj.

Qo ximen tiʼj qa in bʼeta toj bʼe ex in nok tkeʼyina jun pájaro in kubʼ weʼ nqayin ttxlaja. In kubʼ t-ximana qa otoq kʼixbʼi tuʼnju in xi tjakʼuʼn jun t-xikʼ. Aj tok laqʼeʼya ttxlaj, in nel laqʼeʼ tiʼja, ex aj t-xi laqʼeʼya mas ttxlaj, mas in nel oq tiʼja. Yajxitl in lipen twitz kyaʼj tuʼnju mintiʼ otoq kʼixbʼi t-xikʼ. ¿Ojtzqiʼn tuʼna tiquʼn xbʼant jlu tuʼn?...

Tuʼnju nqayin ateʼtoq qe tal jatumel waʼltoq. Nyatoq taj pájaro tuʼn kykanet tal tuʼna tuʼntzun miʼn tok tbʼinchaʼna jun nya bʼaʼn kyiʼj. Tuʼntzunju ma kubʼ tyekʼin qa otoq kʼixbʼi ex ma tzikʼ bʼet tuʼn tel laqʼeʼya atz. ¿Ojtzqiʼn tuʼna alkye jaku xqʼuqin qiʼj ik tzeʼn te pájaro lu?... In tzaj tqʼamaʼn Biblia qa in nok Jehová ik tzeʼn jun águila in xqʼuqin kyiʼj tal (Deuteronomio 32:11, 12).

Mas kʼujlaʼn Jesús tuʼn Jehová. Tej in nanqʼintoq toj kyaʼj, jun xewbʼaj te ik tzeʼn Ttat ex jakutoq tzʼok t-xqʼuqin tibʼ tjunalx tuʼn attoq tipumal. Pero tej tul tzalu twitz Txʼotxʼ, ok ik tzeʼn jun tal neʼ ex mlaytoq bʼant tuʼn tok t-xqʼuqin tibʼ tjunalx.

Tuʼn tjapun toklen Jesús tzaj tqʼoʼn Jehová, iltoq tiʼj tuʼn tchʼiy ex tuʼn tok te jun xjal tzʼaqli. Pero ok tilil tuʼn Satanás tuʼn tkubʼ tbʼyoʼn tej naʼmxtoq tchʼiy. Tbʼanel aj tjaw quʼjin tzeʼn xqʼuqin Jehová tiʼj Tkʼwal tej tok tilil tuʼn Satanás tuʼn tok tbʼinchaʼn nya bʼaʼn tiʼj. ¿Taja tuʼn tok tbʼiʼna?...

Tej tikʼ chʼin ambʼil tul-len itzʼj Jesús, qoptzʼaj jun cheʼw twitz kyaʼj tuʼn Satanás toj Oriente. E ok lepeʼ junjun xjal in che xnaqʼtzan tiʼj cheʼw tiʼj estrella lu tzmaxi tej kypon Jerusalén. Tej kypon atz, xi kyqanin kye junjun xjal jatumel tuʼn tul itzʼj xjal kykawil kyibʼaj aj Judiy. Yajxitl xi kyqanin kye junjun xjal ojtzqiʼn Tyol Dios kyuʼn ex kyqʼama: «Tuj tnam Belén tuʼn titzʼj» (Mateo 2:1-6).

Tej tok tbʼiʼn nya bʼaʼn aj kawil Herodes aju in kawin toj tnam Jerusalén qa otoq tzul itzʼj juntl aj kawil nqayin tiʼj tnam Belén, tqʼama jlu kye xjal in che xnaqʼtzan kyiʼj cheʼw: «Kyxiʼye tuj Belén, chebʼa kybʼime tiʼj tal neʼ; oktzun tknet kyuʼne, kytzaje qʼmalte weye». ¿Ojtzqiʼn tuʼna tiquʼn tajtoq Herodes tuʼn tkanet Jesús tuʼn?... ¡Tuʼnju tzaj loʼchj tkʼuʼj tiʼj ex tajtoq tuʼn tkubʼ tbʼyoʼn!

¿Tzeʼn xqʼuqin Jehová tiʼj Tkʼwal?... Tej tkanet Jesús kyuʼn xjal in che xnaqʼtzan tiʼj cheʼw ex tej t-xi kyqʼoʼn oyaj te, xi tqʼamaʼn Dios kye toj jun witzikʼ tuʼn miʼn kymeltzʼaj jatumel taʼ Herodes. Tuʼntzunju, e meltzʼaj toj kytnam ex ya mintiʼ i eʼx juntl maj toj tnam Jerusalén. Tej tel tnikʼ Herodes tiʼj qa otoq che ikʼ bʼet xjal in che xnaqʼtzan tiʼj cheʼw, tzaj nimxix tqʼoj. Tuʼnju tajtoq tuʼn tkubʼ tbʼyoʼn Jesús, xi tqʼoʼn orden tuʼn kykubʼ bʼyoʼn qe tal kʼwal naʼmxtoq kyjapun twi kabʼe abʼqʼi. Pero otoq tzikʼ qʼiʼn Jesús toj tnam aju.

¿Ojtzqiʼn tuʼna tzeʼn klet Jesús?... Tej kyikʼ bʼet xjal in che xnaqʼtzan tiʼj cheʼw, xi tqʼamaʼn Jehová te José aju tchmil María, tuʼn kyxi oq atz Egipto. Iktzun tten klet Jesús toj tqʼabʼ aj kawil Herodes. Tej tikʼ mas abʼqʼi, i etz María, José ex Jesús toj tnam Egipto ex tzaj yolin Dios tukʼil José. Xi tqʼamaʼn te tuʼn kyxiʼ toj tnam Nazaret tuʼntzun miʼn tok bʼinchaʼn nya bʼaʼn tiʼj Jesús (Mateo 2:7-23).

¿In nelpe tnikʼa tiʼj tzeʼn xqʼuqin Jehová tiʼj Tkʼwal?... ¿Alkye in nok ik tzeʼn qe tal pájaro ma qo yolin tiʼj moqa ik tzeʼn te Jesús tej tok te tal neʼ? Ikju, aya. Ax ikx, ateʼ xjal kyaj tuʼn tok kybʼinchaʼn nya bʼaʼn tiʼja. ¿Ojtzqiʼn tuʼna alkyeqe?...

In tzaj tqʼamaʼn Biblia qa in nok Satanás ik tzeʼn jun león ex taj tuʼn qxi tchyoʼn. In jaw kyjyoʼn león qe txkup mas tal chʼin tuʼn tok kybʼinchaʼn nya bʼaʼn kyiʼj, ax ikx te Satanás ex qe demonio in che jaw kyjyoʼn tal kʼwal tuʼn tok kybʼinchaʼn nya bʼaʼn kyiʼj (1 Pedro 5:8). Pero mas nim tipumal Jehová twitz Satanás ex jaku xqʼuqin kyiʼj kʼwal in che ajbʼen te moqa jaku txi tbʼinchaʼn tiʼj nya bʼaʼn o tzʼok bʼinchaʼn kyiʼj tuʼn Satanás.

Ik tzeʼn el qnikʼ tiʼj toj xnaqʼtzbʼil 10 toj uʼj lu, ¿tiʼ taj Satanás ex qe nya bʼaʼn anjel tuʼn tkubʼ qbʼinchaʼn?... Taj tuʼn qyaẍin ex ikʼun jlu tuʼn Jehová. ¿Naʼnx tuʼna alkyeqe jaku che kubʼ kuẍe tukʼil juntl?... Oʼkx jun xinaq ex jun xuʼj o che kubʼ mojeʼ.

Pero ateʼ junjun xjal o che chʼiy kyaj tuʼn kykubʼ kuẍeʼ kyukʼil tal kʼwal. At maj, in nel kykanoʼn nya bʼaʼn in bʼant kyuʼn xjal o che chʼiy ex in najbʼen kytzʼalbʼil kyuʼn tuʼn tkubʼ kybʼinchaʼn nya bʼaʼn. Atzun jlu bʼant kyuʼn xjal toj ojtxe tnam Sodoma. In tzaj tqʼamaʼn Biblia qa kyajtoq «kuʼxun ax ikx qe tij xjal» tuʼn kykubʼ ten kyukʼil qe xinaq e pon visitarilte Lot (Génesis 19:4, 5).

Iltoq tiʼj tuʼn tok xqʼuqit Jesús tej tal kʼwalx. Ax ikx teya, nim toklen tuʼn tok xqʼuqina kyiʼj xjal o che chʼiy, axpe ikx kyiʼj tal kʼwal kyaj tuʼn kykubʼ kuẍe tukʼila. Chʼixme tkyaqil maj, in kubʼ kyyekʼin xjal lu tbʼanel kymod tukʼila. Axpe ikx jaku txi kyoyin junjun tiʼchaq teya, pero jaku txi kyqʼamaʼn teya tuʼn miʼn t-xi tqʼamaʼna kye txqantl. Noqtzun tuʼnj, oʼkx in che ximen kyiʼjx ik tzeʼn in bʼant tuʼn Satanás ex qe tdemonio. Oʼkx kyajbʼil tuʼn tkubʼ kybʼinchaʼn tajbʼil kychibʼjal ex in bʼant jlu kyuʼn aj kykubʼ ten kyukʼil tal kʼwal. ¡Puro nya bʼaʼn aju in bʼant kyuʼn!

¿Ojtzqiʼn tuʼna tiʼ in bʼant kyuʼn tuʼn kytzalaj?... Jakulo tzʼok kyxqʼuyen ttzʼalbʼila moqa jaku tzʼok kymojbʼaʼn kytzʼalbʼil tukʼilju teya. Noqtzun tuʼnj, miʼn txi tqʼoʼna ambʼil tuʼn kyok ten makolte ttzʼalbʼila. Axpe ikx, mlay bʼant jlu kyuʼn ttzika nix kyuʼn tmana. Ni jun at toklen tuʼn tok makonte t-xmilala.

¿Tzeʼn jaku tzʼok t-xqʼuqina t-xmilala kyiʼj xjal oʼkx kyajbʼil tuʼn kyyaẍin?... Tnejel, miʼn txi tqʼoʼna ambʼil kye xjal tuʼn kyok ten saqchal tukʼil ttzʼalbʼila. Qa at jun xjal taj tuʼn tbʼant jlu tuʼn, qʼamanxa jlu te ex miʼn tzaj xobʼa: «¡Miʼn chin ok tmakoʼna! ¡Kxel nqʼamaʼne kye txqantl aju in bʼant tuʼna!». Qa ma tzaj tqʼamaʼn xjal teya qa aya at tpaj tiʼjju in bʼaj, miʼn t-xi tnimana. Nya ax tok jlu. Bʼaʼn tuʼn tikʼ bʼeta ex qʼamanxa kye txqantl aju in bʼant tuʼn xjal ex noq alkyexku. Il tiʼj tuʼn t-xi tqʼamaʼna kye txqantl aju in bʼant tuʼn xjal maske in tzaj tqʼamaʼn qa mintiʼ tuʼn t-xi tqʼamaʼna te ni jun. Il tiʼj tuʼn tel oqa tiʼj xjal lu ex qʼamanxa kye txqantl aju in bʼaj maske in tzaj tqʼamaʼn qa kxel tqʼoʼn tbʼanel regalo teya moqa kʼokel tbʼinchaʼn nya bʼaʼn tiʼja.

Mintiʼ tuʼn ttzaj xobʼa, pero il tiʼj tuʼn tok t-xqʼuqin tibʼa. Qa ma tzaj kyqʼamaʼn ttata teya tuʼn tok t-xqʼuqin tibʼa tiʼj jun xjal moqa tuʼn miʼn t-xiʼya toj jun lugar jatumel jaku tzʼok bʼinchaʼn nya bʼaʼn tiʼja, bʼinxa kyyol. Iktzun tten mlay txi tqʼoʼna ambʼil te jun nya bʼaʼn xjal tuʼn tok tbʼinchaʼn nya bʼaʼn tiʼja.