¿NAʼNX tuʼna tzeʼn ok jun t-anjel Dios te Satanás moqa te Tajaw il?... Oʼkx ximen tiʼjx ex tajtoq tuʼn kykʼulin xjal twitz, tuʼntzunju ok meltzʼaj tiʼj Dios. ¿E okpe lepeʼ junjuntl anjel tiʼj Satanás?... E ok lepeʼ. In nok tqʼoʼn Biblia kybʼi te «qe t-anjel» Satanás moqa qe demonio (Apocalipsis 12:9).

¿In xipe kyokslaʼn nya bʼaʼn anjel lu te Dios?... In tzaj tqʼamaʼn Tyol Dios qa «ax ikx qe juʼẍ [moqa demonio] okslaʼn kyuʼn qa oʼkx jun Dios at» (Santiago 2:19). Pero at nim kyxobʼil, tuʼnju bʼiʼn kyuʼn qa kbʼel tqʼoʼn Dios kykastiw tiʼj tkyaqil nya bʼaʼn in bʼant kyuʼn. ¿Alkyeqe nya bʼaʼn in bʼant kyuʼn?...

In tzaj tqʼamaʼn Biblia qa kyaj kyqʼoʼn anjel lu kylugar toj kyaʼj ex e kuʼtz tuʼn kyanqʼin tzalu twitz Txʼotxʼ. Bʼant jlu kyuʼn tuʼnju kyajtoq tuʼn kykubʼ kuẍeʼ kyukʼil tbʼanel xuʼj attoq twitz Txʼotxʼ (Génesis 6:1, 2; Judas 6). ¿Tiʼ ojtzqiʼn tuʼna tiʼjju tuʼn tkubʼ ten jun xinaq tukʼil jun xuʼj?...

In kubʼ ten jun xinaq tukʼil jun xuʼj aj kykubʼ kuẍeʼ junx. Tuʼn jlu, in nok ten tal jun xuʼj ex chebʼe chebʼe in chʼiy toj talbʼil. Oʼkx in tzaj tqʼoʼn Dios ambʼil tuʼn tbʼant jlu kyuʼn qeju o che kubʼ mojeʼ. Iktzun tten, aj tul itzʼj jun tal neʼ jaku xqʼuqin xuʼjilbʼaj ex chmilbʼaj tiʼj. Noqtzun tuʼnj, mintiʼ qʼoʼn ambʼil kye anjel tuʼn tbʼant jlu kyuʼn.

Tej kyok anjel te xjal, e kubʼ kuẍeʼ kyukʼil tbʼanel xuʼj ex ul itzʼj kykʼwal. Tej kychʼiy, e ok te matij kywaʼlil. Nya bʼaʼntoq kymod ex ok kybʼinchaʼn nim nya bʼaʼn kyiʼj xjal. Tuʼntzunju, kubʼ t-ximen Dios tuʼn ttzaj tqʼoʼn jun diluvio moqa nimxix jbʼal tuʼntzun tkubʼ tnajsaʼn qe xjal nim kywaʼlil ex tkyaqil xjal nya bʼaʼn. Pero xi tqʼamaʼn te Noé tuʼn tkubʼ tbʼinchaʼn jun ark moqa jun matij bark tuʼn kyklet qeju tbʼanel xjal. Tzaj tqʼamaʼn Tbʼanel aj Xnaqʼtzal qa nim toklen tuʼn ttzaj qnaʼn aju bʼaj tej ttzaj Nimxix Jbʼal (Génesis 6:3, 4, 13, 14; Lucas 17:26, 27).

¿Ojtzqiʼn tuʼna tiʼ bʼant kyuʼn nya bʼaʼn anjel tej ttzaj Nimxix Jbʼal?... Kyaj kyqʼoʼn kyxmilal otoq ten ex e meltzʼaj toj kyaʼj. Pero ya mlaytoq che ok te t-anjel Dios, tuʼntzunju e ok te t-anjel Satanás moqa te tdemonio. ¿Tiʼ bʼaj kyiʼj kykʼwal nya bʼaʼn anjel?... E kyim tej ttzaj Nimxix Jbʼal, junx kyukʼil qeju mintiʼ e nimen te Dios.

Tej tbʼaj Nimxix Jbʼal, ya mintiʼ xi tqʼoʼn Dios ambʼil kye demonio tuʼn kyok juntl maj te xjal. Noqtzun tuʼnj, maske mintiʼ in che ok qkaʼyin demonio, in nok tilil kyuʼn tuʼn tkubʼ kybʼinchaʼn xjal nya bʼaʼn. Mas nim nya bʼaʼn in bʼant kyuʼn toj ambʼil jaʼlo tuʼnju o che kutz xoʼn twitz Txʼotxʼ.

¿Ojtzqiʼn tuʼna tiquʼn mintiʼ in che ok qkeʼyin qe demonio?... Tuʼnju xewbʼaj qe. Noqtzun tuʼnj, jaku txi qqʼamaʼn qa ateʼ. In tzaj tqʼamaʼn Biblia qa in sbʼun Satanás ex qe demonio «kyiʼj kykyaqil xjal twitz txʼotxʼ» (Apocalipsis 12:9, 12).

¿Jakupe qo kubʼ sbʼuʼn tuʼn Satanás ex qe nya bʼaʼn t-anjel?... Jaku, qa mintiʼ ma tzʼok qxqʼuqin qibʼ. Pero mintiʼ tuʼn qtzaj xobʼ. Tqʼama Tbʼanel aj Xnaqʼtzal jlu: ‹Mintiʼ toklen Tajaw il wiʼje›. Tuʼntzunju, qa kukx ma qo ten ttxlaj Dios, kxqʼuqil qiʼj tiʼj Satanás ex kyiʼj nya bʼaʼn t-anjel (Juan 14:30).

Nim toklen tuʼn tel qnikʼ tiʼj alkyeqe tiʼchaq kyaj demonio tuʼn tbʼant quʼn. Tuʼntzunju, ximana tiʼj jlu: ¿Alkyeqe nya bʼaʼn bʼant kyuʼn demonio tej kyul twitz Txʼotxʼ?... Tej naʼmxtoq ttzaj Nimxix Jbʼal, e kubʼ kuẍeʼ kyukʼil xuʼj ex mintiʼtoq qʼoʼn ambʼil kye tuʼn tbʼant jlu kyuʼn. Toj ambʼil jaʼlo, in che tzalaj demonio qa mintiʼ in xi kybʼiʼn xjal qe ley o tzaj tqʼoʼn Dios tiʼjju aj tkubʼ ten jun xinaq tukʼil jun xuʼj. A ver qa naʼnx tuʼna, ¿alkyeqe qʼoʼn ambʼil kye tuʼn kykubʼ kuẍeʼ tukʼil juntl?... Oʼkx qeju o che kubʼ mojeʼ.

Toj ambʼil jaʼlo, ateʼ txin ex qʼa in che kubʼ kuẍeʼ ex naʼmx kykubʼ mojeʼ, ex nya bʼaʼn jlu. In yolin Tyol Dios tiʼj ttzʼalbʼil jun xinaq moqa jun ichan ex pene tbʼi toj kastiy (Levítico 15:1-3). Atzun kye xuʼj kytzʼalbʼil, vagina tbʼi toj kastiy. Kubʼ tbʼinchaʼn Jehová ttzʼalbʼil xinaq ex xuʼj tuʼn kytzalaj tiʼj, pero oʼkx qa ma che kubʼ mojeʼ. In che tzalaj demonio aj tkubʼ kybʼinchaʼn xjal qe tiʼchaq in nel tikʼun Jehová, ik tzeʼn aj tsaqchan jun tal txin tukʼil jun qʼa tiʼj kytzʼalbʼil. Pero nya qaj tuʼn kytzalaj demonio tuʼn qbʼinchbʼen.

Ax ikx, at juntl tiʼ kygan demonio, pero nya bʼaʼn in nela toj twitz Jehová. ¿Ojtzqiʼn tuʼna alkye?... Aju bʼiybʼil (Salmo 11:5). In bʼant nim nya bʼaʼn kyuʼn xjal in che bʼiyen ex in nok kybʼinchaʼn nya bʼaʼn kyiʼj txqantl. Naʼntza, atzun jlu bʼant kyuʼn xjal matij kywaʼlil, aqeju kykʼwal demonio.

Ax ikx, in che tzalaj demonio aj in nok kyxobʼsaʼn qe xjal. At maj in nok kyqʼon kyibʼ te t-xel jun xjal otoq kyim ex in nel kykanoʼn tqʼajqʼajel twiʼ. Iktzun tten in che sbʼun kyiʼj xjal tuʼntzun tkubʼ kyximen qa kukx itzʼ qe kyimni ex qa jaku che yolin kyukʼil. Ex tuʼn jlu in kubʼ kyximen nim xjal qa ateʼqe fantasma.

Tuʼntzunju, nim toklen tuʼn tok qxqʼuqin qibʼ tuʼntzun miʼn qkubʼ sbʼuʼn tuʼn Satanás nix kyuʼn demonio. In tzaj tqʼamaʼn Biblia jlu qe: «Axte Satanás in bʼaj tchʼexpun tibʼ, nnoʼk tqʼon tibʼ ik tzaʼn jun anjel in qoptzʼaj. [...] Ax ikx qe tmajen» (2 Corintios 11:14, 15). Pero nya bʼaʼn kymod demonio. Qo xnaqʼtzan kyiʼj junjun tiʼchaq in bʼant kyuʼn ex tiʼ jaku bʼant quʼn tuʼn miʼn tel qkanoʼn kyiʼj

¿Jatumel in nel kykanoʼn xjal tuʼn tbʼant kybʼiyen, tuʼn kyyaẍin, tuʼn t-xi kynimen qa kukx itzʼ qe kyimni ex qa ateʼqe fantasma?... Nim xjal in nel kykanoʼn jlu kyoj programa te televisión, kyoj videojuego, toj Internet ex kyoj libro. Pero, ¿in che oninpe tiʼchaq lu qiʼj tuʼn qok laqʼeʼ ttxlaj Jehová moqa in che onin qiʼj tuʼn qok lepeʼ tiʼj Satanás ex qe tdemonio? ¿Tiʼ teya t-ximbʼetz tiʼj?...

¿Alkyeqe kygan tuʼn tok qbʼiʼn moqa tuʼn tok qkeʼyin qe tiʼchaq nya bʼaʼn?... A Satanás ex qe tdemonio. Tuʼntzunju, ¿tiʼ il tiʼj tuʼn tbʼant quʼn?... Il tiʼj tuʼn quʼjin, tuʼn qbʼin ex tuʼn tok qkeʼyin qe tbʼanel tiʼchaq ex qeju jaku che onin qiʼj tuʼn qajbʼen te Jehová. ¿In che ulpe junjuntl tumel toj twiʼya?...

Qa ma kubʼ qbʼinchaʼn qe tbʼanel tiʼchaq, mintiʼ jun tiquʼn tuʼn qtzaj xobʼ kye demonio tuʼnju mas nim tipumal Jesús kywitz. Jun maj, xi kyqanin demonio jlu te Jesús ex in che xobʼtoq: «¿Maj ma tzula tuʼn qnaje tuʼna?» (Marcos 1:24). Nimlo qo tzalajel aj tkubʼ tnajsaʼn Jesús Satanás ex qe demonio. Akux in pon ambʼil lu, jaku tzʼok qeʼ qkʼuʼj tiʼj qa kxqʼuqil Jesús qiʼj tuʼn miʼn tok kybʼinchaʼn demonio nya bʼaʼn qiʼj qa ma qo ten ttxlaj ex ttxlaj Jehová.