¿Alkye mas tbʼanel oyaj (kotz) jaku txi kyqʼoʼne kye kykʼwaʼle? At nim tiʼchaq il tiʼj tuʼn t-xi qʼet kye, ik tzeʼn tuʼn kyok kykʼujlaʼne, tuʼn t-xi kyyekʼune kybʼe ex tuʼn kyok kyxqʼuqine. Naqtzun tuʼnj, aju oyaj mas nim toklen jaku txi kyqʼoʼne kye, aju ojtzqibʼil tiʼj Jehová ex tiʼj xnaqʼtzbʼil axix tok tkuʼx toj Tuʼjil Tyol (Juan 17:3). Aju ojtzqibʼil lu jaku tzʼonin kyiʼj tuʼn tok kykʼujlaʼn Jehová ex tuʼn kyajbʼen te tuʼn tkyaqil kyanmi, axpe ikx qa tzma tal kʼwaʼlqex (Mateo 21:16).

O tzʼel kynikʼ nim tatbʼaj qa mas in nel kynikʼ kʼwaʼl qa naq chʼin tqan xnaqʼtzbʼil ex aqʼuntl in xi qʼet kye. Tuʼntzunju, in qo tzalaje tuʼnju ma tzʼetz uʼj aju tok tbʼi: Tal wuʼje tiʼj Tyol Dios. Aʼyeju xnaqʼtzbʼil nya kwest ateʼkux toj uʼj lu, ok kʼonil kyiʼj tatbʼaj tuʼn kyxnaqʼtzet qe tal kykʼwaʼl. Aʼye tilbʼilal ex qe txol yol atqeʼkux toj uʼj lu o che bʼaj ximet tuʼn tajbʼen kye tal kʼwaʼl te oxe abʼqʼi moqa naʼmx tel oxe abʼqʼi kyuʼn. Ax ikx o che kubʼ qʼet junjun aqʼuntl tuʼn kybʼaj bʼinchet. Aju uʼj lu, mitiʼ o kubʼ bʼinchet te kysaqchbʼil (kychaq) kʼwaʼl, quʼn o kubʼ bʼinchet tuʼn tkubʼ kyuʼjine, moqa tuʼn tkubʼ kyẍchʼiʼne, junx kyukʼe kykʼwaʼle ex tuʼn tonin kyiʼje tuʼn kyyoline kyukʼe.

Qʼuqli qkʼuʼje qa aju uʼj lu, ok kʼonil kyiʼje tuʼn t-xi kyqʼoʼne axix xnaqʼtzbʼil tiʼj Tyol Dios kye kykʼwaʼle toj kyneʼyil, moqa toj kyneʼẍil (2 Timoteo 3:14, 15).

Aʼyeqe kyermane,

Kʼloj Xjal Qʼil Twitz Aqʼuntl kye Testigos de Jehová