Xnaqʼtzbʼil 9

Aʼyeju nchi ajbʼen te Dios, iltiʼj tuʼn kyok te saq

¿Tiquʼn iltiʼj tuʼn qok te saq tuj tkyaqil tten qanqʼibʼil? (1)

¿Tzeʼn tten jaku qo ok te saq tuj Tyol Dios? (2) ¿Ex saq toj qanqʼibʼil? (3) ¿Ex tbʼanel qxim? (4) ¿Ex saq qxmilal ex toj qja? (5)

¿Alkyeqeʼ yol mya bʼaʼn, iltiʼj tuʼn kyel qikʼen? (6)

1. Saqxix ex xjanxix Jehová. Ax ikx tajbʼil tuʼn kyten saq aqejo nchi kʼulin te, tuʼn kyten saq tuj Tuʼjil Tyol, saq toj kyanqʼibʼil, tbʼanel kyxim ex saq kyxmilal tukʼe tuj kyja (1 Pedro 1:16). Iltiʼj tuʼn tok tilil quʼn tuʼn qten saq twitz Dios. Nqo anqʼin kyxol xjal tzʼilxix kyanqʼibʼil. Nya oʼkxju, ax ikx nqo ok weʼ twitz mya bʼaʼn qxim ex mya bʼaʼn tajbʼil qchibʼjal. Mi txi qqʼoʼn ambʼil tuʼn qkubʼ tuʼn.

2. Saq qten tuj Tyol Dios: Qa qajbʼilxix tuʼn qajbʼen te Jehová, iltiʼj tuʼn tel qikʼon tkyaqil xnaqʼtzbʼil ex tiʼchaq nkubʼ tikʼsaʼn nya axixtok okslabʼil. Ax ikx, iltiʼj tuʼn qetz toj ex mitiʼx tuʼn qonin tiʼj (2 Corintios 6:14-18; Apocalipsis 18:4). Quʼn otaqxi tzʼel qnikʼ tiʼjju axix tiʼj Dios, iltiʼj tuʼn tok qxqʼuqin qibʼ tuʼntzun miʼ qkubʼ sbʼuʼn kyuʼn qejo nchi xnaqʼtzan nya axtok xnaqʼtzbʼil (2 Juan 10, 11).

3. Saq qanqʼibʼil: Tajxix Jehová tuʼn aqeju nchi kʼulen te, iltiʼj tuʼn tkubʼ kybʼinchaʼn bʼaʼn tuj tkyaqil ambʼil (1 Pedro 2:12). Ntil Dios tkyaqilju  nbʼant quʼn, axpe ikxju nkubʼ qbʼinchen toj ewaj (Hebreos 4:13). Mitiʼ tuʼn tajbʼen qxmilal tuʼn tbʼant mya bʼaʼn quʼn ex iltiʼj tuʼn tel qikʼen tkyaqilju bʼinchbʼen tzʼilxix nbʼaj bʼinchaʼn twitz Txʼotxʼ (1 Corintios 6:9-11).

4. Tbʼanel qxim: Qa ma tzʼokx qqʼoʼn oʼkx tbʼanel xim tuj qwiʼ, ax ikx qbʼinchbʼen tbʼanel kʼelila (Filipenses 4:8). Qatzun qa oʼkx xqo ximin tiʼj mya bʼaʼn, aj ttzaj qnaʼn qibʼ otaq kubʼ qbʼinchen mya bʼaʼn (Mateo 15:18-20). Iltiʼj tuʼn tel qikʼon junjun tten saqchbʼil aʼyeju jaku tzʼilix qxim kyuʼn. Qa ma qo xnaqʼtzan tiʼj Tuʼjil Tyol Dios, oktzun knojil qwiʼ kyuʼn tbʼanel xim.

5. Saq qxmilal ex tuj qja: Quʼn nqo ajbʼen te Dios, iltiʼj tuʼn tel qtxʼjoʼn qxmilal ex tuʼn tjatz qtxʼjoʼn qxbʼalin. Aj qetz toj tzʼalbʼil iltiʼj tuʼn tel qtxʼjoʼn qqʼobʼ, ax ikx naʼmxtaq qxiʼ waʼl ex aj tkubʼ qbʼinchen qwa. Qa mitiʼ jun jul te tzʼalbʼil iltiʼj tuʼn tkux bʼinchet jun jul moqa tuʼn tkuʼx muqet tzʼaʼlj (Deuteronomio 23:12, 13). Qa ma kubʼ qbʼinchen ikjo, atzunjo kʼonil qiʼj tuʼn mi qo yabʼti. Iltiʼj tuʼn tjaw kyiʼn okslal tzʼis tuj kyja ex twitz kyja ex tuʼn tkubʼ kybʼinchan tkyaqil tiʼchaq at toj kyja. Iltiʼj tuʼn tok te jun techil kye qejo jatumel nchi anqʼina.

6. Tbʼanel yol: Aʼyeju nchi ajbʼen te Dios iltiʼj tuʼn kyolen axix yol. Aʼyeju nya axtok chi yolin mitiʼ kyoklen tiʼj Tkawbʼil Dios (Efesios 4:25; Apocalipsis 21:8). Qeʼ okslal mitiʼ nchi yolen mya bʼaʼn yol. Mitiʼ nok kybʼiʼn yaqbʼil mya bʼaʼn ex mitiʼ nchi yaqin tiʼj mya bʼaʼn. Nchi yolin bʼaʼn yol tuj kyaqʼun, toj tja xnaqʼtzbʼil ex atz jaʼ nchi anqʼina (Efesios 4:29, 31; 5:3).

[Aʼyeju tilbʼilal toj t-xaq 18 ex 19]

Aʼyeju nchi ajbʼen te Dios, iltiʼj tuʼn kyok te saq tuj tkyaqil tten kyanqʼibʼil