Xnaqʼtzbʼil 3

¿Alkye Jesucristo?

¿Tiquʼn nok tbʼi Jesús te ‹tnejil Tkʼwaʼl› Dios? (1)

¿Tiquʼn in nok tbʼi «te Yol»? (1)

¿Tiquʼn ul Jesús twitz Txʼotxʼ ik tzeʼnj jun xinaq? (2-4)

¿Tiquʼn e qʼanet yabʼ ex e jaw itzʼje kyimne tuʼn? (5)

¿Tiʼ kbʼantel tuʼn Jesús tuj ambʼil tzul? (6)

1. Tej naʼmxtaq tul Jesús twitz Txʼotxʼ, in nanqʼintoq tuj kyaʼj ik tzaʼnj jun xjal xewbʼaj. Atzun tnejil tbʼinchbʼen Diosju; tuʼntzunjo, nok tbʼi te ‹tnejil Tkʼwaʼl› Dios (Colosenses 1:15; Apocalipsis 3:14). Tjunaltoq Dios at tej tbʼant Jesús tuʼn. Ajbʼen Jesús tuʼn Jehová tej attoq toj kyaʼj ik tzeʼnj jun tbʼanel aqʼunal, tuʼn tbʼinchet tkyaqiljo at tuj kyaʼj ex tkyaqiljo at twiz Txʼotxʼ (Proverbios 8:22-31; Colosenses 1:16, 17). Ax ikx ajbʼen tuʼn Dios tuʼn tyolin te t-xel. Tuʼntzunjo, in nok tbʼi Jesús te «Yol» (Juan 1:1-3; Apocalipsis 19:13).

2. Tzaj tsamaʼn Dios Tkʼwaʼl tzaluʼ twitz Txʼotxʼ ex ok tqʼoʼn tchwinqlal tuj talbʼil María. Quʼn nya xjal ttat Jesús ten; tuʼntzunjo, tzʼaqlixixtoq ex mitiʼ ok il toj t-xmilal. Tzaj tsamaʼn Dios Jesús twitz Txʼotxʼ tuʼn tkubʼ tbʼinchaʼn oxe taqʼun: 1) tuʼn tkubʼ t-xnaqʼtzaʼn aju axix tiʼj Dios (Juan 18:37), 2) tuʼn tten tzʼaqlexix twitz Dios, iktzun kyaj tqʼoʼn jun techiljo qe tuʼn tel qkanoʼn (1 Pedro 2:21) ex 3) tuʼn t-xi tqʼoʼn tchwinqlal tuʼntzun qtzaqpaj tiʼj il ex kyimen. ¿Tiquʼn ilteq tiʼj tuʼn t-xi tqʼoʼn tchwinqlal? (Mateo 20:28.)

3. Tuʼnjo mitiʼ xi tbʼiʼn Adán tkawbʼil Dios, kubʼ tbʼinchan «il», ik tzaʼnj ntzaj tchikʼbʼaʼn Xjan Uʼj. Tuʼntzun jlu kubʼ tqʼoʼn Dios tsentens tuʼn tkyim (Génesis 3:17-19). Quʼn nya tzʼaqlitoqtl Adán melaytaqtl chi japun tkawbʼil Dios tuʼn. Chebʼe tijin ex kyim. Kyaj tqʼoʼn Adán il kyibʼaj kykyaqil tkʼwaʼl. Tuʼntzunjo, ax ikx qe nqo tijin, nqo yabʼti ex nqo kyim.  ¿Tzeʼnteqtzun jaku chi kleta kykyaqil xjal? (Romanos 3:23; 5:12.)

4. Tzʼaqlitoq Jesús ik tzeʼnteq Adán. Bʼant tkyaqil aju tzaj tqʼmaʼn Dios te nya ik seʼn Adán, axtpe ikʼx tuʼn tej ttzaj nim joybʼil tiʼj. Tuʼntzun jlu, jakutoq txi tqʼoʼn tchwinqlal tzʼaqlixix tuʼn tchjetjo il kubʼ tbʼinchaʼn Adán. Atzun tbʼi jlu tuʼn Xjan Uʼj «chojbʼil» te kolbʼil. Tuʼntzunju, jakutoq chi tzaqpaj tkʼwaʼl Adán tiʼjjo sentens tiʼj kyimen. Kykyaqil qeju nok qʼuqe kykʼuʼj tiʼj Jesús jaku kubʼ najsaʼn kyil ex jaku ten kyanqʼibʼil te jumajx (1 Timoteo 2:5, 6; Juan 3:16; Romanos 5:18, 19).

5. Tej tten Jesús twitz Txʼotxʼ e qʼanit yabʼ tuʼn, xi tqʼoʼn kwa xjal aqejo attaq waʼyij kyiʼj ex weʼ kyqʼiqʼ jbʼal tuʼn. Axpe e jaw itzʼji kyimni tuʼn. ¿Tiquʼn bʼant tkyaqil jlu tuʼn Jesús? 1) Tuʼnjo nqʼaqʼintaq tkʼuʼj kyiʼj xjal ateʼtoq tuj kʼixkʼoj ex tajtoq tuʼn tonin kyiʼj. 2) Ex tukʼe jlu kubʼ tyekʼin qa Tkʼwaʼl Diosteq. 3) Ax ikx kubʼ tyekʼin aju kbʼantel tuʼn kye xjal nxi kynimen qMan Dios, aj tok te Ajkawil tibʼaj Txʼotxʼ (Mateo 14:14; Marcos 2:10-12; Juan 5:28, 29).

6. Kyim Jesús, ex jaw anqʼintl tuʼn Dios tukʼe t-xmilal xewbʼaj ex meltzʼaj juntl maj tuj kyaʼj (1 Pedro 3:18, NM). Yajxitl ok tqʼoʼn Dios te Ajkawil. Chʼinxtl tul kanin ambʼil tuʼn tkubʼ tnajsaʼn Jesús tkyaqil mya bʼaʼn ex kʼixkʼoj twitz Txʼotxʼ (Salmo 37:9-11; Proverbios 2:21, 22).

[Aʼyeju tilbʼilal toj t-xaq 7]

E kubʼ t-xnaqʼtzaʼn Jesús xjal ex kubʼ tbʼinchaʼn nim tbʼanel, ax ikx xi tqʼoʼn tchwinqlal tuʼn qpaj