Xnaqʼtzbʼil 5

¿Alkye t-xim Dios at tiʼj Txʼotxʼ?

¿Tiquʼn kubʼ tbʼinchaʼn Jehová Txʼotxʼ? (1, 2)

¿Tiquʼn nya Tbʼanel Najbʼil te Tzalajbʼil Txʼotxʼ jaʼlin? (3)

¿Tiʼ tzul kyiʼj xjal mya bʼaʼn kybʼinchbʼen? (4)

¿Tiʼ kbʼantel tuʼn Jesús kyiʼj yabʼ?, ¿kyiʼj tij xjal?, ¿ex kyiʼj qeju kyimne? (5, 6)

¿Tiʼ teya kbʼel tbʼinchen tuʼn ttzaj tkʼamoʼne tkyaqil kʼiwlabʼil tzul? (7)

1. Kubʼ tbʼinchaʼn Jehová Txʼotxʼ tuʼn kyanqʼin xjal te jumajx twitz. Tajtoq tuʼn kynajan jiqon xjal te jumajx ex tuʼn kytentoq tuj tzalajbʼil (Salmo 115:16; Isaías 45:18). Melayx kubʼ xitin Txʼotxʼ, ok ktel te jumajx (Salmo 104:5; Eclesiastés 1:4).

2. Tej naʼmxtaq tkubʼ tbʼinchen Dios xinaq, moqa ichin, jaw tjyoʼn jun piẍ Txʼotxʼ ex kubʼ tbʼinchaʼn te Tbʼanel Najbʼil te Tzalajbʼil ex ok tqʼoʼn tbʼi te «Edén». Atz kubʼ tqʼoʼn Dios tnejel xinaq tukʼe tnejel xuʼj, mo qya, a kybʼi jlu: Adán ex Eva. Tajtoq Dios tuʼn tten kykʼwaʼl ex tuʼn tkubʼ noj tkyaqil twitz Txʼotxʼ kyuʼn. Chebʼelewtlo ok Txʼotxʼ kyuʼn te Tbʼanel Najbʼil te Tzalajbʼil (Génesis 1:28; 2:8, 15).

3. E ilen Adán tukʼe Eva, tuʼnjo mitiʼ okx kybʼiʼn tkawbʼil Dios aju oteq tzaj tqʼoʼn kye. Tuʼntzun jlu, e etz tlajoʼn Jehová tuj Edén, ex naj Tbʼanel Najbʼil te Tzalajbʼil (Génesis 3:1-6, 23). Menaʼmx tel naj t-xim Jehová tiʼj Txʼotxʼ. Ntzaj ttziyen qa kbʼel tbʼinchan Txʼotxʼ te Tbʼanel Najbʼil te Tzalajbʼil, tuʼntzun kynajan xjal te jumajx twitz. ¿Tzeʼn ktela tuʼn? (Salmo 37:29.)

4. Naʼmxtaq tok Txʼotxʼ te Tbʼanel Najbʼil te Tzalajbʼil, tnejil chi kbʼel najsaʼn xjal mya bʼaʼn kybʼinchbʼen (Salmo 37:38). Atz kbʼajela jlu tuj Armagedón, aju tqʼoj Dios tuʼn tkubʼ tnajsaʼn tkyaqil mya bʼaʼn. Aj tikʼ jlu kbʼelex jupuʼn Satanás mil abʼqʼi, mi aʼltzun jun xjal mya bʼaʼn kjel yajil te twitz Txʼotxʼ. Oʼkxix ttnam Dios kjel anqʼin (Apocalipsis 16:14, 16; 20:1-3).

5. Oktzun kkawil Jesucristo mil abʼqʼi tibʼaj Txʼotxʼ (Apocalipsis 20:6).  Ex chebʼe kʼelil il tuʼn toj qxmilal. Oktzun qo okil te tzʼaqli ik tzeʼntoq Adán tukʼe Eva tej bʼajxteq kubʼ kybʼinchin il. Miʼ tentl yabʼil, tijil nix kyimen. Ok chi qʼanitel yabʼ ex qeʼ tij xjal ok chi okil juntl maj te qʼa, mo kuʼxin (Job 33:25; Isaías 33:24; Apocalipsis 21:3, 4).

6. Tjaqʼ Tkawbʼil Jesús tuj Mil Abʼqʼi, aqe tbʼanel xjal ok chi aqʼunal tuʼn tok tkyaqil twitz Txʼotxʼ kyuʼn te Tbʼanel Najbʼil te Tzalajbʼil (Lucas 23:43). Nya oʼkxju, ax ikx nimxix xjal chi jawil anqʼin juntl maj, tuʼntzun kyanqʼin twitz Txʼotxʼ (Hechos 24:15). Qa ma kubʼ kybʼinchaʼn aju ntzaj tqanin Dios kye, kukx chi anqʼil te jumajx twitz Txʼotxʼ. Qa mitiʼ xbʼent ikjo kyuʼn, ok chi kʼwel najsaʼn te jun majx (Juan 5:28, 29; Apocalipsis 20:11-15).

7. Iktzun kjapunel bʼaj t-xim Diosju ajo attoq tnejil tiʼj Txʼotxʼ. ¿Taj teya tuʼn ttzaj tkʼamoʼna tkyaqil kʼiwlabʼil tzul? Qa ikju, kukx xnaqʼtzana tiʼj Tyol Jehová ex tzʼok tilil tuʼne tuʼn tkubʼ tbʼinchane aju ntzaj tqanin Dios teye. Aju kʼonil tiʼja tuʼn tbʼant ik jlu tuʼne; aju qa ma bʼeta kyoj chmabʼil nchi kubʼ ikʼset tuj Ja te chmabʼil kye Testigos de Jehová, aju nqaku taʼ jatumel nanqʼinaye (Isaías 11:9; Hebreos 10:24, 25).

[Aju tilbʼilal toj t-xaq 10]

Aju Tbʼanel Najbʼil te Tzalajbʼil kubʼ naj

[Aʼyeju tilbʼilal toj t-xaq 11]

Aj tbʼaj Armagedón, oktzun kbʼel bʼinchaʼn Txʼotxʼ te jun Tbʼanel Najbʼil te Tzalajbʼil