Xnaqʼtzbʼil 7

¿Alkye tumel tuʼn qnaʼn Dios?

¿Tiquʼn iltiʼj tuʼn qnaʼn Dios tkyaqil qʼij? (1)

¿Alqe qo naʼla Dios, ex alkye tumel? (2, 3)

¿Tiʼ kxel qqanin tuj qnaʼj Dios? (4)

¿Alkye ambʼil bʼaʼn tuʼn tnaʼn teya Dios? (5, 6)

¿Ntzaj tbʼiʼnpetzulo Dios tkyaqil naʼj Dios? (7)

1. Aju naʼj Dios atzun nqo yolinjo tukʼe Dios. Iltiʼj tuʼn qnaʼn Dios tkyaqil qʼij. Qa ma bʼant ikju quʼn, qo ponbʼil laqʼe ttxlaj Jehová ik tzeʼn jun qamiw kʼujlaʼnxix quʼn. Nya naq tuʼnju nimxix toklen ex nimxix tipumal Jehová mitiʼwt ntzaj tbʼiʼn qnaʼj Dios. ¿In naʼn teya Dios tkyaqil qʼij? (Salmo 65:2; 1 Tesalonicenses 5:17.)

2. Aju naʼj Dios at toklen tukʼe qkʼulbʼel. Tuʼntzunjo, iltiʼj tuʼn qnaʼn Dios oʼkxku te Jehová. Tej tten Jesús twitz Txʼotxʼ, oʼkx naʼn Dios te tTat, mitiʼ  naʼn Dios te juntl. Ikxtzun qe kbʼanteljo quʼn (Mateo 4:10; 6:9). Iltiʼj tuʼn qnaʼn Dios tuj tbʼi Jesús. Iktzun nkubʼ qyekʼinju qa nim toklen Jesús qe ex qa qʼuqli qkʼuʼj tiʼjjo xi tqʼoʼn tibʼ te chojbʼil qil (Juan 14:6; 1 Juan 2:1, 2).

3. Aj qnaʼn Dios te Jehová, iltiʼj tuʼn t-xi qmaʼn aju tkuʼx tuj qanmi. Mitiʼ tuʼn t-xi qqʼmaʼn ax naʼj Diosju tkyaqil qʼij, nix tuʼn tjaw quʼjin toj jun uʼj tzʼibʼentl (Mateo 6:7, 8). Jaku bʼant tuʼn qnaʼn Dios tzeʼnxku qten, alkyexku ambʼil ex jaʼxku tumel. Axpe ntzaj tbʼiʼn qnaʼj Dios aju naqx tuj qanmi (1 Samuel 1:12, 13). Bʼaʼn tuʼn qnaʼn Dios qjunalx jatumel mitiʼ jun xjal (Marcos 1:35, MC).

4. ¿Tiʼ kxel tqanine tuj naʼj Dios? Tkyaqiljo at toklen tiʼj tamiwbʼela tukʼe Dios (Filipenses 4:6, 7). Aju naʼj Dios kyaj tqʼoʼn Jesús te techal, ntzaj tyekʼin qa iltiʼj tuʼn qnaʼn Dios tiʼj tbʼi ex tiʼj t-xim Jehová. Ax ikx jaku bʼant tuʼn t-xi qqanin tuʼn ttzaj tqʼoʼn aju najbʼen qe tkyaqil qʼij, tuʼn tkubʼ tnajsaʼn qil ex tuʼn tikʼx quʼn aj ttzaj joybʼil qiʼj (Mateo 6:9-13). Aj qnaʼn Dios mitiʼ tuʼn t-xi qqanin oʼkxixju qajbʼil. Oʼkx kxel qqanin aju at toklen tukʼe tajbʼil qMan Dios (1 Juan 5:14).

5. Jaku bʼant tuʼn tnaʼne Dios tkyaqil ambʼil aj ttzaj anqʼin toj tanmiye, tuʼn t-xi tqʼoʼna chjonte te Dios moqa tuʼn tjaw tnimsaʼne (1 Crónicas 29:10-13). Miʼ kyaj ttzaqpiʼna tuʼn tnaʼne Dios aj ttzaj mya bʼaʼn tiʼja ex aj tok qʼuqbʼil tkʼuʼja tiʼj Dios tuj joybʼil (Salmo 55:22; 120:1). Ax ikx bʼaʼn tuʼn tnaʼne Dios aj tok tena waʼl (Mateo 14:19). Nqo tzaj ttxkoʼn Jehová tuʼn qnaʼn Dios «tkyaqil qʼij» (Efesios 6:18).

6. Qa ma kubʼ qbʼinchan jun il, iltiʼj tuʼn qnaʼn Dios ex tuʼn qkubʼsan twitz Jehová, tuʼntzun ttzaj qʼaqʼin tkʼuʼj qiʼj ex tuʼn tkubʼ tnajsaʼn qil. Nqaku taʼ Dios tuʼn ‹tkubʼ tnajsaʼn qil›, oʼkx qa ma jatz qmaʼn qil ex qa ma tzʼok tilil quʼn tuʼn miʼ tkubʼ qbʼinchaʼntl il (Salmo 86:⁠5; Proverbios 28:13).

7. Oʼkx kynaʼj Dios xjal tzʼaqliqeʼ ntzaj tbʼiʼn Jehová. Tuʼn ttzaj tbʼiʼn Jehová tnaʼj Diosa, iltiʼj tuʼn tok tilel tuʼne tuʼn tkubʼ tbʼinchene ik tzeʼn ntzaj tqʼmaʼn tuj Tuʼjil Tyol (Proverbios 15:29; 28:9). Aj tnaʼne Dios mitiʼ tuʼn tjaw tnimsaʼn tibʼe (Lucas 18:9-14). Iltiʼj tuʼn tkubʼ tbʼinchaʼna aju nxi tqaneye toj naʼj Dios. Iktzun kbʼel tyekʼine qa at qʼuqbʼil tkʼuʼja tiʼj ex qa tukʼe axixtok in naʼne Dios. Oʼkxtzun ikjo tzul ttzaqʼweʼn Jehová tnaʼj Diosa (Hebreos 11:6).