Xnaqʼtzbʼil 4

¿Alkyeju tajaw il?

Satanás aju tajaw il, ¿tzeʼntzun oka te ikju? (1, 2)

¿Tzaʼn tten nchi kubʼ tsbʼuʼn xjal? (3-7)

¿Tiquʼn iltiʼj tuʼn tel tikʼune tajaw il? (7)

1. Nyolin tajaw il nim nya axyol tiʼj Dios ex kyiʼj xjal, atzunju bʼibʼaj Satanás a tzʼelpuna jlu: ajqʼoj tiʼj qMan Dios. Tnejilku jun anjel tzʼaqlitoq ex nanqʼintaq tuj kyaʼj tukʼe Dios, yajxitzuntl jaw tnimsaʼn tibʼ ex tajtoq tuʼn t-xiʼ tkʼamoʼn kʼulbʼil, aju oʼkx qMan Dios at toklen tuʼn t-xiʼ tkʼamoʼn (Mateo 4:8-10).

2. Ajbʼen jun kan (lobʼaj) tuʼn anjel lu, tuʼn tyolin tukʼil Eva ex tukʼe nya ax tyol kubʼ tiʼj Eva tuʼn, tuʼntzunju, mitiʼ okx tbʼiʼn Eva Tyol Dios. Iktzun qʼojin Satanásjo tiʼj «nimxix toklen» qMan Dios. Tukʼe jlu tqʼma qa melayx bʼant tkawin Dios kyibʼaj xjal. Ax ikx tqʼama qa nijun xjal jaku tzʼajbʼen tukʼil tkyaqil tanmi te Dios. Tuʼnju tbʼinchbʼen lu, ok te ajqʼoj tiʼj Dios. Iktzun oka tbʼiju te Satanás aju tajaw il (Génesis 3:1-5; Job 1:8-11; Apocalipsis 12:9).

3. Nbʼant nim tiʼchaq tuʼn Satanás tuʼn kykubʼ tsbʼuʼn xjal ex tuʼn t-xi kyqʼoʼn kʼulbʼil te (2 Corintios 11:3, 14). Aju nya axixtok okslabʼil, atzun junjo in najbʼen tuʼn. Tuʼntzunjo, qa at jun okslabʼil nkubʼ t-xnaqʼtzaʼn nya axix tiʼj Dios, njapunbʼaj tajbʼil Satanás tuʼn (Juan 8:44). Aqeju xjal ateʼkx kyoj okslabʼil nya axixtok, nche ximinlo qa nchi kʼulen teju axixtok Dios, nya ikjo, quʼn te Satanás nchi ajbʼena ‹aju dios te twutz txʼotxʼ› (2 Corintios 4:4, MC).

4. Aju kyaqʼun chman, moqa ajyoʼẍ, atzun juntlju najbʼen tuʼn Satanás tuʼn kyajbʼen xjal te. Atlo junjun xjal nkuʼx pon kyuʼn mo nchi kubʼsan kywitz qeju xewbʼaj mya bʼaʼn, tuʼntzun kykolin kyiʼj, tuʼn t-xiʼ kybʼinchan mya bʼaʼn kyiʼj txqantl xjal, moqa tuʼn ttzaj qʼamaʼn tiʼ tzul kyiʼj, ax ikx nbʼant nim tiʼchaqkutl kyuʼn. A Satanás qʼolte ipumalj tuʼn tbʼent tkyaqil jlu. Qa qaj tuʼn qel bʼaʼn toj twitz qMan Dios, iltiʼj tuʼn tel qikʼen aju kyaqʼun chman (Deuteronomio 18:10-12; Hechos 19:18, 19).

5. Ax ikx nchi kubʼ tsbʼuʼn Satanás xjal tukʼeju njaw kynimsaʼn kyajil ex tukʼeju nxi kyqʼoʼn kʼulbʼil kye kawbʼil twitz txʼotxʼ. Ateʼqeʼ xjal nxi kyximin qa aju kytnam ex kyajil nim toklen twitz kytnam ex kyajil txqantl xjal. A jlu nya axtokju (Hechos 10:34, 35). Aʼyetzun  txqantl, nchi ayon tuʼn tel bʼaj tkyaqilju mya bʼaʼn tuʼn kykawbʼil xjal. Iktzun in nel kyikʼun Tkawbʼil Diosjo, aju kawbʼil lu, oʼkxku jun qʼanbʼilju te tkyaqil mya bʼaʼn ntzaj kyiʼj xjal (Daniel 2:44).

6. Ax ikx nok joybʼil kyiʼj xjal tuʼn Satanás tuʼn tpon kykʼuʼj tiʼj mya bʼaʼn, atzun juntlju in najbʼen tuʼn Satanás tuʼn kykubʼ tsbʼuʼn xjal. Ntzaj tqʼamaʼn Jehová tuʼn tel qikʼun tkyaqil bʼinchbʼen lu, quʼn ojtzqiʼn tuʼn qa jaku tzaj nim mya bʼaʼn qiʼj tuʼn (Gálatas 6:7, 8). Atlo junjun xjal kyajbʼil tuʼn tok tmujbʼan tibʼa kyukʼil, tuʼntzun tkubʼ tbʼinchane aju mya bʼaʼn nbʼant kyuʼn. Naʼntza, a Satanás tajbʼil tuʼn tbʼant tkyaqil jlu tuʼne (1 Corintios 6:9, 10; 15:33).

7. Ax ikx najbʼen ikʼbʼel tuʼn Satanás tuʼn tel laqʼeya tiʼj Jehová. Jakulo chi jaw qʼojin junjun tuj tjaye tuʼnju nxnaqʼtzana Tuʼjil Tyol Dios. Atlo txqantl jaku tzʼok xmayine kyuʼn. Ximinxa ¿alkye ntzaj qʼonte tchwinqlale? Taj Satanás tuʼn tjaw xobʼe tuʼntzun min tzʼel tnikʼa tiʼj Jehová. Miʼ txi tqʼoʼna ambʼil tuʼn tkubʼa tuʼn (Mateo 10:34-39; 1 Pedro 5:8, 9). Aj tel tikʼune tajaw il, ok ktzalajel Jehová tuʼne ex kxel tyekʼine qa oʼkxix Jehová nimxix Toklen tibʼaj tkyaqil (Proverbios 27:11).

[Aʼyeju tilbʼilal toj t-xaq 9]

A okslabʼil nya axixtok, aju kyaqʼun chman moqa ajyoʼẍ ex aju njaw kynimsen kytnam ex kyajil xjal, aqe jlu nchi ajbʼen tuʼn Satanás tuʼn kykubʼ tsbʼuʼn xjal

[Aju tilbʼilal toj t-xaq 9]

Tzʼelx tnikʼe tiʼj Jehová, tuʼntzun tel tikʼune Satanás