Xnaqʼtzbʼil 10

¿Alkyeqeʼ bʼinchbʼen nchi el tikʼen Dios?

¿Tzeʼn kʼelela teya tuj twitz aqejo tiʼchaq nchi el tikʼon Dios? (1)

¿Alkyeqeʼ bʼinchbʼen tukʼe kychibʼjal xjal mya bʼaʼn tuj twitz Dios? (2)

¿Tiʼ kyxim okslal tiʼj nya axyol? (3) ¿Ex tiʼjju saqchbʼil nkubʼ qʼoʼn pwaq tiʼj? (3) ¿Ex tiʼj elqʼabʼil? (3) ¿Ex tiʼj bʼiybʼel? (4) ¿Ex tiʼj kyaqʼun chman? (5) ¿Ex tiʼjjo txʼujtel? (6)

¿Tzeʼn jaku tzaqpaje kyiʼj qeju bʼinchbʼen mya bʼaʼn? (7)

1. Aʼyeju nchi ajbʼen te Dios kʼuʼjlaʼnxix bʼaʼn kyuʼn, ax ikx iltiʼj tuʼn tel kyikʼun aju mya bʼaʼn (Salmo 97:10). Atzun t-xilen jlu, qa iltiʼj tuʼn tkyaj tzaqpet qeju bʼinchbʼen nchi el tikʼon qMan Dios. ¿Alkyeqeʼ bʼinchbʼen lu?

2. Bʼinchel il tukʼe kychibʼjal: Qa ma chi kubʼ kuẍeʼ kabʼe xjal naʼmxtaq kymujeʼ, ex aju ajpajil, ex qa ma tzʼok ten jun xjal tiʼj jun txkup, ex qa ma tzʼok ten jun xjal tiʼjx jun toj tja, ax ikx qa ma tzʼok ten jun xinaq tiʼjx juntl xinaq, aqetzun nimaq il jlu toj twitz qMan Dios (Levítico 18:6; Romanos 1:26, 27; 1 Corintios 6:9, 10). Qa junx nchi najana jun ichin tukʼe jun xuʼj ex nya mujleqeʼ twitz jun ajkawil, iltiʼj tuʼn tkubʼ kypaʼn kyibʼ moqa tuʼn kymujeʼ twitz jun ajkawil (Hebreos 13:4).

3. Nya axyol, saqchbʼil nkubʼ qʼoʼn pwaq tiʼj ex elqʼabʼil: Mitiʼ nchi kubʼ tsbʼuʼn Jehová xjal (Tito 1:2 MC). Qa kyajxix xjal tuʼn kyel bʼaʼn tuj twitz qMan Dios mitiʼ tuʼn kyolin nya axyol (Proverbios 6:16-19; Colosenses 3:9, 10). Tkyaqil qeju saqchbʼil nkubʼ qʼoʼn pwaq kyiʼj nchi naqʼet xjal tiʼj ex atzunjo in nonin kyiʼj tuʼn tpon  kykʼuʼj tiʼj nim tiʼchaq. Tuʼntzunjo, mitiʼ nchi saqchan okslal tiʼj lotería nix kyiʼj txqantl saqchbʼil aju nkubʼ qʼoʼn pwaq kyiʼj (Efesios 5:3-5). Ax ikx mitiʼ nchi elqʼan ex mitiʼ ntzaj kylaqʼoʼn tiʼchaq elqʼaʼn ex mitiʼ njaw kyiʼn tiʼchaq qa naʼmxtaq t-xi kyqanin (Éxodo 20:15; Efesios 4:28).

4. Qʼojel ex bʼiyel: Qa ma tzajxix tqʼoj xjal nponbʼaj tukʼe bʼiybʼel (Génesis 4:5-8). Aʼyeju nchi ok ten jubʼel juntl xjal melay chi ok te tamiw Dios (Salmo 11:5; Proverbios 22:24, 25). Aj tok tbʼinchan jun xjal mya bʼaʼn qiʼj mitiʼ tuʼn tok qbʼinchantl qe mya bʼaʼn tiʼj (Proverbios 24:29; Romanos 12:17-21).

5. Kyaqʼun chman: Atqeʼ xjal nxi kyqanin onbʼil te kydios moqa te kyanmi kyimni tuʼn kyqʼanit. Aqetzuntl txqantl xjal ncheʼx kyukʼe chman tuʼn t-xi kybʼinchan mya bʼaʼn kyiʼj kyajqʼoj, tuʼntzun kyabʼti moqa tuʼn kykyim kyuʼn. A Satanás qʼol ipumalj tuʼn tbʼant tkyaqil jlu. Tuʼntzunjo, mitiʼ tuʼn tkubʼ kybʼinchaʼn okslal tkyaqil jlu (Deuteronomio 18:9-13). Oʼkx qa nqo ajbʼen te Jehová qo kletil tiʼj mya bʼaʼn ntzaj kybʼinchan xjal qiʼj (Proverbios 18:10).

6. Txʼujtel: Qa ma txi qkʼaʼn (qkʼwaʼn) chʼin cerveza, chʼin vino mo alkyexku juntl kʼabʼj qʼeʼn bʼaʼn jlu (Salmo 104:15; 1 Timoteo 5:23). Qatzun qa ma txi qkʼaʼn nimxix moqa bʼiʼx xqo txʼujte tuʼn, mya bʼaʼn jlu tuj twitz qMan Dios (1 Corintios 5:11-13; 1 Timoteo 3:8). Qa ma txi tkʼaʼna nimxix qʼeʼn jaku kubʼ xitj tuj tjaya ex jaku tzaj tyabʼe tuʼn. Nya oʼkxju, ax jaku kubʼ tbʼinchaʼna txqantl mya bʼaʼn tuʼn (Proverbios 23:20, 21, 29-35).

7. Aʼyeju xjal nkubʼ kybʼinchan tiʼchaq mya bʼaʼn toj twitz Dios «mlay che okx tuj tkawbʼil Dios» (Gálatas 5:19-21). Qa kʼujlaʼnxix Dios tuʼne ex qa tajxixa tuʼn tkubʼ tbʼincheye tbʼanel tuj twitz, ok ktzaqpajela tiʼj tkyaqil bʼinchbʼen lu (1 Juan 5:3). Tzʼok tilil tuʼna tuʼn tel tikʼuna aju mya bʼaʼn toj twitz Dios (Romanos 12:9). Mojbʼank tibʼa kyukʼe xjal nkubʼ kybʼinchan bʼaʼn (Proverbios 13:20). Aqeju okslal at kynabʼl jaku qo tzaj kyoninxix (Santiago 5:14). Aju naʼj Dios atzun jun tbʼanelxix onbʼiljo ntzaj tqʼoʼn Dios teya (Filipenses 4:6, 7, 13).

[Aʼyeju tilbʼilal t-xaq 20 ex 21]

Txʼujtel, elqʼal, saqchbʼil nkubʼ qʼoʼn pwaq tiʼj ex bʼiybʼel; tkyaqiI qeju bʼinchbʼen lu nchi el tikʼon qMan Dios