Xnaqʼtzbʼil 11

¿Alkyeqeʼ xnaqʼtzbʼil ex ninqʼij mya bʼaʼn nchi ela toj twitz Dios?

¿Alkyeqeʼ xnaqʼtzbʼil ex ninqʼij nya tbʼanelqeʼ? (1)

¿Jakupetzulo txi kyximin okslal qa oxe kybʼet Dios? (2)

¿Tiquʼn mitiʼ nkubʼ kyikʼsaʼn axix okslal Navidad nix Xjan Qʼij nix kyitzʼjlen? (3, 4)

¿Jakupetzulo tzʼok kybʼinchaʼn kyimni mya bʼaʼn kyiʼj qeju xjal itzʼqeʼ? (5)

¿Kyimpetzulo Jesús twitz jun cruz? (6)

¿Alkye iltiʼj tuʼn bʼant quʼn? (7)

1. Nya tkyaqil xnaqʼtzbʼil ex ninqʼij tbʼanelqeʼ. Aʼyeju xnaqʼtzbʼil ex ninqʼij tzajniqeʼ tuj nya axixtok okslabʼil mo aʼyeju mitiʼ ntzaj t-xnaqʼtzaʼn Xjan Uʼj, mya bʼaʼn nchi ela jlu toj twitz Dios (Mateo 15:6).

2. Oxe kybʼet: ¿Oxepetzulo kybʼet Jehová? Nya. Quʼn oʼkx Jehová, aju Mambʼaj «jun Dios axix tok» (Juan 17:3; Marcos 12:29). A Jesús atzun tnejil Tkʼwaʼl Jehovájo, ex tokx tjaqʼ tkawbʼil (1 Corintios 11:3). Nim toklen Mambʼaj twitz Tkʼwaʼl (Juan 14:28). Aju xewbʼaj xjan nya jun xjalju; quʼn a jlu atzun tipumal Diosjo najbʼen tuʼn (Génesis 1:2; Hechos 2:18).

3. Navidad ex Xjan Qʼij: Mitiʼ ul itzʼje Jesús toj 25 te diciembre, quʼn chʼixme tuj 1 te octubre ul itzʼji, tuj ambʼil lu nchi kyajatoq xjal tuj kʼul xqʼuqil kyrit toj qonikʼen (Lucas 2:8-12). Mitiʼ kyaj tqʼmaʼn Jesús tuʼn tkubʼ kyikʼsaʼn okslal titzʼjlen. Oʼkxix kyaj tqʼmaʼn kye, tuʼn tkubʼ kynaʼn tkyimlebʼil (Lucas 22:19, 20). Aju Navidad ex tkyaqil tiʼchaq nbʼaj bʼinchaʼn tuj, atz tzajniqeʼ kyoj okslabʼil nya axixtok te ojtxe. Ax ikx Xjan Qʼij ex tkyaqil tiʼchaq nkubʼ kybʼinchan xjal toj, ik tzeʼnj nchi waʼn pan ex nchi ex xjal bʼetil kyukʼe kysant. Mitiʼ kubʼ kyikʼsaʼn kye tnejil okslal Navidad nix Xjan Qʼij, tuʼntzunjo, ax ikx tuj qqʼijlalil jaʼlin mitiʼ nkubʼ kyikʼsaʼn axixtok okslal aju Navidad nix Xjan Qʼij.

4. Ikʼsabʼil itzʼjlen: Ntzaj tqʼmaʼn Tuʼjil Tyol Dios qa oʼkx kabʼe xjal kubʼ kyikʼsaʼn kyitzʼjlen, aqeju xjal lu mitiʼ nchi  ajbʼentoq te Jehová (Génesis 40:20-22; Marcos 6:21, 22, 24-27). Mitiʼ kubʼ kyikʼsaʼn kye tnejil okslal kyitzʼjlen. Quʼn aju bʼinchbʼen lu atz tzajni kyoj okslabʼil nya axixtok te ojtxi. Atzun kye axix okslal nxi kyqʼoʼn oyaj ex nok kychmon kyibʼ toj alkyexku ambʼil te abʼqʼi.

5. Xobʼajil kyuʼn kyimne: Mitiʼ nbʼant jun tiʼxti kyuʼn kyimni ex mitiʼ nkynaʼn tiʼ nbʼaj. Mlay bʼant kyonit quʼn, ax ikx kye melay tzʼok kybʼinchan mya bʼaʼn qiʼj (Salmo 146:4; Eclesiastés 9:5, 10). Aj tkyim jun xjal ¿nkyajpetzulo itzʼje tanmi? Mitiʼ (Ezequiel 18:4). Atku maj aʼyeʼ anjeles mya bʼaʼn kybʼinchbʼen, a kybʼi tok taqʼunal tajaw il, nok kyqʼoʼn kyibʼ te kyanmi kyimne. Kykyaqil qeju nchi jaw xobʼ kyuʼn kyanmi kyimni moqa nchi ninqʼijin kyibʼaj, mya bʼaʼn nela jlu tuj twitz Dios (Isaías 8:19).

6. Cruz: Atz twitz jun tzeʼ kyima Jesús nya twitz jun cruz. Kyoj nim Xjan Uʼj o chi bʼaj tzʼibʼan, aju yol griego «cruz» nyolin tiʼj junx tzeʼ jiqin tiʼj. Aju cruz jun techilju tzajni kyoj nya axixtok okslabʼil te ojtxi. Mitiʼtoq najbʼen cruz kyuʼn tnejil okslal ex mitiʼtoq nok kykʼulen. Tuʼntzujo, ¿bʼaʼnpetzulo tuʼn tajbʼen jun cruz quʼn tuʼn qnimen te Dios? (Deuteronomio 7:26; 1 Corintios 10:14.)

7. Kwest-xixlo tuʼn tkyaj ttzaqpiʼne junjun xnaqʼtzbʼil ex bʼinchbʼen ma chi bʼaj qʼamet. Atlo junjun tamiwe ex toj tjaya nya kyajbʼil tuʼn tkubʼ tchʼixpun tibʼe tuj tokslabʼila. Aju iltiʼj tuʼn tbʼant quʼn, aju tajbʼil Dios ex myaju kyajbʼil xjal (Proverbios 29:25; Mateo 10:36, 37).

[Aju tilbʼilal toj 22]

Junx Dios at, nya oxe kybʼet

[Aju tilbʼilal toj 23]

Aju Navidad ex Xjan Qʼij atz tzajniqeʼ kyoj okslabʼil nya axixtok te ojtxi

[Aju tilbʼilal toj 23]

Mitiʼ tuʼn qjaw xobʼ kyuʼn kyimne nix tuʼn qxiʼ kʼulil kyibʼaj