Xnaqʼtzbʼil 2

¿Alkyexix Dios?

¿Alkye Dios axixtok, ex tiʼ tbʼi? (1, 2)

¿Tzeʼn t-xmilal Dios at? (3)

¿Alkyeqeʼ tmod Jehová nimxix kyoklen? (4)

¿Bʼaʼnpetzulo tuʼn kyajbʼen sant ex qeʼ tilbʼilal tuʼn qkʼulin te Dios? (5)

¿Alkyeqeʼ kabʼe tumel tuʼn tel qnikʼ tiʼj Dios? (6)

1. Atqeʼ xjal nchi kʼulin twitz nim tiʼchaq. Atzuntl te Xjan Uʼj ntzaj tqʼamaʼn qa oʼkx jun Dios AXIXTOK at. A bʼaj bʼinchante tkyaqiljo at tuj kyaʼj ex aju at twitz Txʼotxʼ, ex quʼn o tzaj tqʼoʼn qchwinqlal, oʼkxkute at toklen tuʼn t-xi tkʼamoʼn qkʼulbʼil (1 Corintios 8:5, 6; Apocalipsis 4:11).

2. Ate Dios tbʼi: JEHOVÁ. Tuj nim Xjan Uʼj o jatz qʼinju tbʼi Dios lu ex oʼkx o chi kyaj qʼoʼn qejo yol qAjaw, qMan mo Dios. Nya iktoq ttenjo, quʼn tej tkubʼ tzʼibʼin Xjan Uʼj; aju bʼibʼaj Jehová tkuʼxtaq chʼixme wuq mil maj toj (Éxodo 3:15; Isaías 42:8).

3. At te Jehová jun t-xmilal nya ik tzaʼnj qe. «Ate Dios xewbʼaj» chi tuj Tuʼjil Tyol (Juan 4:24). Jun xewbʼaj atzun jun tten chwinqlaljo mitiʼ qʼanchaʼl. Tuʼntzunjo, mi aʼlx jun xjal  o til qMan Dios. Tzmax tuj kyaʼj ntil Dios tkyaqilju at twitz txʼotxʼ (Salmo 11:4, 5; Juan 1:18). Yejtzun xewbʼaj xjan, ¿tiʼtzunjo? Nya jun xjaljo ik tzaʼn Dios, quʼn aju xewbʼaj xjan atzun tipumal Diosju aju in najbʼen tuʼn (Salmo 104:30).

4. Ntzaj tyekʼin Xjan Uʼj t-xjalil Jehová. Ntzaj tqʼamaʼn alkyeqeʼ tmod nimxix kyoklen, aʼyeʼtzun jlu: kʼujlabʼil, nabʼil, ipumalj, ex tzʼaqlixix (Deuteronomio 32:4; Job 12:13; Isaías 40:26; 1 Juan 4:8). Ax ikx ntzaj tmaʼn Xjan Uʼj qa nqʼaqʼin tkʼuʼj Dios qiʼj, nkubʼ tnajsaʼn qil, nim t-xtalbʼil, tbʼanel ex at tpasens. Bʼaʼn tuʼn tok tilil quʼn tuʼn tel qkanoʼn aqeju tbʼanel tmod lu (Efesios 5:1, 2).

5. ¿Bʼaʼnpetzulo tuʼn qkubʼ mejeʼ ex tuʼn qnaʼn Dios kywitz sant ex kywitz tilbʼilal? Mya bʼaʼn (Éxodo 20:4, 5). Ntzaj tqʼamaʼn Jehová qa oʼkx twitz qo kʼulil. Mitiʼ nxi tqʼoʼn toklen kye txqantl. Nya oʼkxju, aqejo sant mitiʼx kyipumal tuʼn kyonin qiʼj (Salmo 115:4-8; Isaías 42:8).

6. ¿Tzaʼn jaku tzʼelxix qnikʼ tiʼj Dios? Jun tumel aju qa ma tzʼok qkaʼyin (qkyeʼyin, mo qkiʼn) tkyaqil o bʼaj tbʼinchen ex qa ma qo ximinxix tiʼ ntzaj tyekʼin jlu tiʼj Dios. Tuʼnjo tkyaqil o bʼaj tbʼinchan in nel qnikʼ tiʼj tkʼujlabʼil, ex ntzaj tyekʼin qa at nimxix tipumal ex nimxix tnabʼil (Salmo 19:1-6; Romanos 1:20). Juntl tten ttxolil seʼn jaku tzʼel qnikʼ tiʼj Dios aju qa ma qo xnaqʼtzan tiʼj Tuʼjil Tyol. Quʼn atz tuj ntzaj tchikʼbʼaʼn tzeʼnxix Dios. Ax ikx ntzaj tqʼamaʼn tiʼ t-xim Dios at ex tiʼ taj tuʼn tbʼant quʼn (Amós 3:7; 2 Timoteo 3:16, 17).

[Aʼyeju tilbʼilal toj t-xaq 5]

Jaku tzʼel qnikʼ tiʼj Dios qa ma qo xnaqʼtzan tiʼj Xjan Uʼj ex qa ma qo ximin tiʼj tkyaqil o bʼaj tbʼinchaʼn