Xnaqʼtzbʼil 8

Jun ja xjal tbʼanel tuj twitz Dios

¿Tiʼ toklen chmilbʼaj toj tja? (1)

¿Tzeʼn tmod chmilbʼaj iltiʼj tuʼn tten tukʼe t-xuʼjlal? (2)

¿Tiʼ taqʼun jun mambʼaj iltiʼj tuʼn tbʼant kyxol tuj tja? (3)

¿Tiʼ taqʼun jun xuʼjelbʼaj iltiʼj tuʼn tbʼant kyukʼe toj tja? (4)

¿Tiʼ ntzaj tqanin Dios kye tatbʼaj ex kye kʼwalbʼaj? (5)

¿Tiʼ ntqʼmaʼn Xjan Uʼj tiʼjju nkubʼ kypaʼn kyibʼ kabʼe xjal, ex aj tkubʼ kynajsaʼn kymujbʼabʼil twitz jun ajkawil? (6, 7)

1. Ntzaj tqʼmaʼn Tuʼjil Tyol Dios qa a chmilbʼaj nejenel kye tuj tja (1 Corintios 11:3). Junx t-xuʼjal jun xinaq bʼaʼn tuʼn tten, ex iltiʼj tuʼn kymujeʼ twitz jun ajkawil (1 Timoteo 3:2; Tito 3:1, MC).

2. Iltiʼj tuʼn tok tkʼujlaʼn chmilbʼaj t-xuʼjel ik tzaʼnj nok tkʼujlaʼn tibʼ. Iltiʼj tuʼn tten tbʼanel tmod tukʼe ik tzeʼnj te Jesús bʼent tuʼn kyukʼe t-xnaqʼtzbʼen (Efesios 5:25, 28, 29). Mya bʼaʼn tuʼn tok tbʼiyoʼn nix tuʼn tok tyasaʼn, oʼkx tuʼn tok tqʼoʼn toklen ex tuʼn tjaw tnimsaʼn (Colosenses 3:19; 1 Pedro 3:7).

3. Iltiʼj tuʼn taqʼunan manbʼaj tuʼntzun kyanqʼin tuj tja. Iltiʼj tuʼn t-xi tqʼoʼn kywaʼ, kyxbʼalin ex kyja. Ax ikx iltiʼj tuʼn kyxi tonin tuʼn tel kynikʼ tiʼj Tuʼjil Tyol Dios (1 Timoteo 5:8). A kbʼel nej kywitz toj tja tuʼn tel kynikʼ tiʼj Dios ex kyiʼj t-xim (Deuteronomio 6:4-9; Efesios 6:4).

4. Iltiʼj tuʼn tok xuʼjilbʼaj te jun tbʼanil onil te tchmil (Génesis 2:18). Iltiʼj tuʼn tonin tukʼe tchmil tuʼn kyxnaqʼtzet kʼwaʼl (Proverbios 1:8). Taj Jehová tuʼn tok t-xqʼuqin jun xuʼj qeʼ toj tja tukʼe kʼuʼjlabʼil (Proverbios 31:10, 15, 26, 27; Tito 2:4, 5). Iltiʼj tuʼn tjaw tnimsaʼn xuʼj tchmil (Efesios 5:22, 23, 33).

5. Ntzaj tqʼamaʼn qMan Dios qa iltiʼj tun t-xi kynimin, mo kybʼiʼn kʼwal kytat ex kynan (Efesios 6:1-3). Tajxix Dios tuʼn t-xi kykawin tatbʼaj kykʼwaʼl ex tuʼn t-xi kyjiqisaʼn tiʼj kynabʼil. Aqe mambʼaj iltiʼj tuʼn tel kypaʼn ambʼil tuʼn kyten  kyukʼil kykʼwaʼl ex tuʼn kyxnaqʼtzan tiʼj Xjan Uʼj, ax ikx tuʼn kyxqʼuqin kyiʼj aj ttzaj tiʼchaq toj kyanqʼibʼil (Deuteronomio 11:18, 19; Proverbios 22:6, 15). Mitiʼ tuʼn ttzaj nim kyqʼoj mambʼaj aj t-xi kykawin qeʼ kykʼwaʼl (Colosenses 3:21).

6. Aj ttzaj mya bʼaʼn kyxol chmilbʼaj tukʼe xuʼjilbʼaj, aju tbʼanel tuʼn tbʼant kyuʼn aju ntqʼmaʼn Xjan Uʼj. Ntzaj tmaʼn Xjan Uʼj tuʼn tok qkʼujlaʼn qibʼ ex tuʼn tkubʼ qnajsaʼn qil (Colosenses 3:12-14). Mitiʼ ntzaj tqʼmaʼn Tuʼjil Tyol Dios tuʼn tkubʼ tpaʼn tibʼ chmilbʼaj tukʼe t-xuʼjil noq tuʼnjo ntzaj chʼin mya bʼaʼn kyxol. Jakulo txi t-ximin xuʼj tuʼn tel tpaʼn tibʼ tiʼj tchmil qa 1) nya taj tchmil tuʼn t-xi tqʼoʼn kʼachbʼil kye toj tja 2) qa bʼiyil tchmil, moqa yaʼl bʼujin, jakulo tzaj jun tiʼ tuʼn tuj tchwinqlal 3) qa tikʼoxix tuʼn t-xi tqʼoʼn ambʼil te t-xuʼjel tuʼn tajbʼen te Jehová (1 Corintios 7:12, 13).

7. Aju chmilbʼaj mitiʼ tuʼn t-xi tjyoʼn juntl twitz t-xuʼjil ax ikx xuʼjelbʼaj mitiʼ tuʼn t-xi tjyoʼn juntl twitz tchmil. Aju ajpajil jun iljo twitz Dios ex twitz chmilbʼaj mo twitz xuʼjilbʼaj (Hebreos 13:4). Qa ma kubʼ kuẍeʼ chmilbʼaj tukʼe junxitl xuʼj moqa a xuʼjilbʼaj tukʼe junxitl ichin, ntzaj tqʼmaʼn Tuʼjil Tyol Dios qa oʼkxtzun jun tumeljo tuʼn tkubʼ kypaʼn kyibʼ twitz jun ajkawil ex jakutzun bʼent tuʼn kykubʼ mujeʼ juntl maj tukʼe juntl (Mateo 19:6-9; Romanos 7:2, 3). In nel tikʼen Jehová aju xjal nel tpaʼn tibʼ noqx tuʼn tkubʼ mojeʼ tukʼe juntl (Malaquías 2:14-16).

[Aju tilbʼilal toj t-xaq 16 ex 17]

Aju tbʼanel mambʼaj nxi tqʼoʼn tkyaqilju in najbʼen kye tuj tja ex nchex t-xnaqʼtzaʼn tiʼj Tuʼjil Tyol Dios

[Aju tilbʼilal toj 17]

Tajbʼil Dios tuʼn t-xi kykawin tatbʼaj kykʼwaʼl ex tuʼn t-xi kyjiqisaʼn tiʼj kynabʼil