Xnaqʼtzbʼil 14

Nchi aqʼunan testigos de Jehová junx

¿Jtoje ttzajlen tzyet kyaqʼun testigos de Jehová toj qqʼijlalil jaʼle? (1)

¿Tzeʼnqeʼ chmabʼil nkubʼ kyikʼsaʼn testigos de Jehová? (2)

¿Jatumel ntzaja pwaq tuʼn tbʼant tkyaqil aqʼuntl? (3)

¿Alkye qʼil twitz aqʼuntl kyxol junjun kʼloj okslal kye testigos de Jehová? (4)

Tuj junjun abʼqʼi ¿Alkyeqeʼtl nimaq chmabʼil nok kyuʼn testigos de Jehová? (5)

¿Tiʼ aqʼuntl nbʼent toj kytxuylal ninja ex kyoj qeʼ ninja qʼil twitz aqʼuntl? (6)

1. Kyxol abʼqʼi 1870 tukʼe 1880 atz tzaja tzyet juntl maj aqʼuntl kyuʼn testigos de Jehová. Tnejilku atoq kybʼi tok, Xnaqʼtzal tiʼj Xjan Uʼj; tojtzun 1931 ok kyqʼoʼn kybʼi te testigos de Jehová, ik tzeʼnj tkuʼx toj Tuʼjil Tyol Dios (Isaías 43:10). Nyaʼ nimtoq kybʼet tej ttzaj qe aqʼuntl kyuʼn, atzuntl jaʼlin nimxix kybʼet Testigos ex nchi pakbʼan tuj kabʼe syent tukʼe treinta nimaq tnam ex toj junjuntl.

2. Chʼixmi kykyaqil kʼloj okslal kye testigos de Jehová in nok kychmoʼn kyibʼ oxe maj toj seman. Nxiʼ txokbʼil teya tuʼn tbʼeta tuj alkyexku chmabʼil lu (Hebreos 10:24, 25). Aju xnaqʼtzbʼil netz chikʼbʼaʼn atz njatza tuj Xjan Uʼj. Aqe chmabʼil nchex qe tukʼe naʼj Dios ex nponbʼaj tukʼe naʼj Dios, chʼixme toj kykyaqil chmabʼil nchex bʼitzet tbʼanil «bʼitz te Dios» (Efesios 5:18, 19). Noq kukx nchi okx xjal ex mitiʼ njaw chmet pwaq (Mateo 10:8).

3. Chʼixme kykyaqil kʼloj okslal kye testigos de Jehová nok kychmoʼn kyibʼ toj jun Ja te Chmabʼil. Aqe Ja te Chmabʼil nya nim pwaq nxi kyiʼj ex naq kukx nchi aqʼunan Testigos de Jehová tuʼn tjaw kybʼinchaʼn. Mlay tile qeʼ tilbʼilal nix cruz nix junjuntl tiʼchaq kyoj. Aju pwaq najbʼen kyuʼn testigos de Jehová tuʼn tbʼant tkyaqil aqʼuntl, axju onbʼil nkubʼ kyqʼoʼn ex aju ntzaj kyqʼoʼn xjal. Aʼyeju kyajbʼil tuʼn kyonin, bʼaʼn tuʼn tkux kyqʼoʼn toj jun tkubʼel oyaj aju tokx tuj  Ja te Chmabʼil (2 Corintios 9:7).

4. Tuj tkyaqil kʼloj okslal kye testigos de Jehová, ateʼqeʼ ansyan qʼil twitz aqʼuntl tuʼn tchikʼbʼet Tyol Dios (1 Timoteo 3:1-7; 5:17). Ateʼqeʼtl onil kye ansyan nchi ajbʼen junx kyukʼel (1 Timoteo 3:8-10, 12, 13). Mi aʼl jun ansyan nix jun onil kye, nim toklen kywitz qeju txqantl tuj jun kʼloj okslal (2 Corintios 1:24). Mitiʼ nok qʼoʼn jun kybʼi nim toklen kywitz txqantl (Mateo 23:8-10). Mitiʼ nchjet twiʼ kykʼuʼj tuʼnju kyaqʼun nkubʼ kybʼinchen ex mitiʼ nok kyqʼoʼn junxitl kyxbʼalin kywitz txqantl. Aʼyeqeʼ ansyan nxi kyqʼoʼn onbʼil tukʼe Tyol Dios tuʼn tkyaqil kykʼuʼj kye kʼloj okslal. Nok kyqʼuqbʼaʼn kykʼuʼj okslal ex nxi kyqʼoʼn ttxolil aj ttzaj mya bʼaʼn kyiʼj (Santiago 5:14-16; 1 Pedro 5:2, 3).

5. Toj junjun abʼqʼi nkubʼ kyiʼksaʼn testigos de Jehová nimaq chmabʼil. Atztzun noka kychmoʼn kyibʼ nim kʼloj okslaljo, tuʼn tok kybʼiʼn qeʼ chikʼbʼabʼil bʼinchanqetl tiʼj Tyol Dios. Jun tbʼanel nbʼaj kyoj kykyaqil nimaq chmabʼil lu, aju aj tjaw aʼ kwiʼ (kybʼyan) qeju kyajbʼil tuʼn kyok lepe tiʼj t-xnaqʼtzbʼil Jesús (Mateo 3:13-17; 28:19, 20).

6. Aju kytxuylal ninja qʼil twitz aqʼuntl twitz tkyaqil Txʼotxʼ kye testigos de Jehová, atz taʼ Nueva York. Atz taʼ Kʼloj Xjal Qʼil Twitz Aqʼuntl, aqe jlu jun kʼloj ansyan at kynabʼl aʼyeʼ nchi xqʼuqin kyiʼj kykyaqil kʼloj okslal twitz txʼotxʼ. Nyaʼ oʼkxju, ax ikx at mas twitz jun syent ninja qʼil twitz aqʼuntl twitz tkyaqil txʼotxʼ. Aʼyeqeʼ nchi ajbʼen kyoj qeʼ tembʼil lu, noq kukx nchi onin tuʼn kyetz bʼinchet ex tuʼn kyxi samet uʼj te onbʼil Xjan Uʼj. Ax ikx atz kyoj nkubʼ ximit tzeʼn tten tuʼn t-xi pakbʼet Tyol Dios. Bʼaʼn tuʼn t-xi t-ximine tuʼn t-xiʼya kaʼyil jun ninja qʼil twitz aqʼuntl aju nqaku taʼ.