Xnaqʼtzbʼil 12

Nim toklen qchwinqlal tukʼe qchkʼel

¿Tzeʼn nela qchwinqlal toj twitz qMan Dios? (1) ¿Tiʼ t-xim Dios kyiʼj qeju in nel kyiʼn kyal? (1)

¿Tzeʼn nkubʼ kyekʼin okslal qa nchi xqʼuqin tiʼj kychwinqlal? (2)

¿Bʼaʼnpetzulo tuʼn kykubʼ bʼiyet txkup, moqa jil? (3)

Qa nok qkʼujlaʼn qchwinqlal, ¿Tiʼ mitiʼ tuʼn tkubʼ qbʼinchen?  (4)

¿Alkye tkawbʼil Dios tzʼibʼinkj tiʼj chikʼ? (5)

¿Bʼaʼnpetzulo tuʼn tok chikʼ qiʼj? (6)

1. Ntzaj Tqʼoʼn Jehová qanqʼibʼil. Kykyaqil qeʼ nchi anqʼin, a Dios qʼol kychwinqlal (Salmo 36:9). Xjan qchwinqil tuj twitz Dios. Axpe ikx tchwinqlal jun kʼwaʼl naʼmxtaq tul itzʼje, nim toklen toj twitz Jehová. Mya bʼaʼn tuj twitz Dios tuʼn tel tiʼn jun xuʼj tal (Salmo 127:3).

2. Aʼyeju okslal axixtok nok kyxqʼuqin kychwinqlal. Tuʼntzunjo, nbʼaj kybʼinchan kykar ex kyja tuʼntzun miʼ ttzaja jun mya bʼaʼn kyiʼj (Deuteronomio 22:8). Aʼyeju nchi ajbʼen te Dios, mitiʼ nchi saqchan tiʼj saqchbʼil jatumel jaku chi kʼixbʼi tuʼn noqx tuʼn kyten chʼin tuj tzalajbʼil. Tuʼntzunjo, mitiʼ nchi saqchan tiʼj pelot qa nkubʼ qʼoʼn pwaq tiʼj ex nel kyikʼun txqantl saqchbʼil jatumel nchi kʼixbʼi xjal toj (Salmo 11:5; Juan 13:35).

 3. Tuj twitz Dios ax xjanjo kychwinqlal txkup, mo jil. Jaku bʼant tuʼn tkubʼ tbʼiyoʼn okslal qeʼ txkup te tchiʼ, ex moqa tuʼn kyxi tkʼayin tuʼn tlaqʼet t-xbʼalin ex tqʼanbʼil (Génesis 3:21; 9:3; Éxodo 21:28). Mya bʼaʼn tuʼn kykubʼ yajit mo tuʼn kykubʼ bʼiyet txkup noq tuʼn tpaj saqchbʼil (Proverbios 12:10).

4. Mya bʼaʼn tuʼn kysichʼin okslal, nix tuʼn t-xi kykʼaʼn drogas. Mya bʼaʼn qejo bʼinchbʼen lu tuʼnjo 1) nchi naqʼet xjal tiʼj 2) ntzaj kyabʼ tuʼn ex 3) ntzʼilix kyanqʼibʼil tuʼn (Romanos 6:19; 12:1; 2 Corintios 7:⁠1). Kwest-xixlo tuʼn tkyaj qtzaqpiʼn qejo bʼinchbʼen lu, qatzun qa qajxix tuʼn qajbʼen te Jehová iltiʼj tuʼn kykyaj qtzaqpiʼn.

5. Ax ikx xjan nela chikʼ toj twitz qMan Dios. Ntzaj tqʼamaʼn qa aju chikʼ atzun tchwinqlal xjaljo. Tuʼntzunjo, mya bʼaʼn tuʼn t-xi qwaʼn nix tuʼn t-xi qkʼaʼn chikʼ. Ax ikx mya bʼaʼn tuʼn t-xi qchoʼn (qchʼyoʼn) tchibʼjal jun txkup qa naʼmxtaq tel tchikʼel. Qa noq xkubʼ bʼalqʼin tiʼj tqul jun txkup moqa atz xbʼaja tuj tramp, mya bʼaʼn tuʼn t-xi qchoʼn. Qa ma kubʼ qbʼiyoʼn jun txkup tuʼn jun xobʼil abʼaj moqa xobʼil qʼaqʼ iltiʼj tuʼn tel qiʼnaj tchkʼel, tuʼntzun t-xi qchoʼn Génesis 9:3, 4; Levítico 17:13, 14; Hechos 15:28, 29).

6. ¿Bʼaʼnpetzulo tuʼn tok chikʼ qiʼj? Naʼntza, a Jehová ntzaj qʼmante qa mitiʼ tuʼn tok chikʼ qiʼj. A t-xilen jlu qa mya bʼaʼn tuʼn tok tchkʼel juntl xjal qiʼj moqa axju qchikʼel otoqxe tzʼel (Hechos 21:25). Tuʼntzunjo, mitiʼ nok kykʼamoʼn axix okslal chikʼ kyiʼj. Oʼkx nok kykʼamoʼn qeju qʼanbʼil mitiʼ chikʼ kyoj, kyajbʼil tuʼn kyanqʼin, nya naq tuʼn jlu, kʼelel kyikʼen tkawbil Dios tzʼibʼinkj tiʼj chikʼ (Mateo 16:25).

[Aʼyeju tilbʼilal toj t-xaq 25]

Tuʼn qel bʼaʼn tuj twitz qMan Dios, mitiʼ tuʼn tok qkʼamoʼn chikʼ qiʼj ex mitiʼ tuʼn tkubʼ qbʼinchan aʼyeju bʼinchbʼen tzʼilqexix ex aqeju tiʼchaq jaku qo kʼixbʼi kyuʼn