Xnaqʼtzbʼil 15

Qo onin kyiʼj xjal tuʼn tkubʼ kybʼinchen tajbʼil Dios

¿Tiquʼn iltiʼj tuʼn tyolina kyukʼe xjal tiʼjjo nel tnikʼe tiʼj? (1)

¿Alqechaq kxel tchikʼbʼana tbʼanel tqanil? (2)

¿Tzeʼn jaku tzʼonin tbʼanel tmoda kyiʼj txqantl xjal? (2)

¿Tiʼ teya kbʼel tbʼinchaʼn, tuʼntzun texe pakbʼal? (3)

1. Atzun jaʼlin ma tzʼel tnikʼa tiʼj nimku tiʼchaq tbʼanel tkuʼx tuj Xjan Uʼj. Aju tnabʼila lu tzʼoninwt tiʼja tuʼn toke te jun tbʼanel okslal (Efesios 4:22-24). Nya oʼkxjo, aju tojtzqibʼila lu nim toklen tuʼn ttzaj tkʼamoʼne tchwinqila te jumajx (Juan 17:3). Ax ikx qeʼ txqantl xjal iltiʼj tuʼn tok kybʼiʼn tbʼanel tqanil tuʼntzun kyklet. Kykyaqil axix okslal iltiʼj tuʼn kypakbʼan. Quʼn a jlu jun kawbʼilju (chaqʼbʼilju) tuʼn qMan Dios (Romanos 10:10; 1 Corintios 9:16; 1 Timoteo 4:16).

2. Bʼaʼn tuʼn t-xi tqʼmaʼna kye xjal ateʼ ttxlaja aju tbʼanel tiʼchaq in nel tnikʼe tiʼj. Txʼolbʼanxa kye toj tjaya, kye tamiwe, kye tukʼile tuj tja xnaqʼtzbʼil ex kye qeju nchi aqʼunan junx tukʼila. Chikʼbʼanxa toj tumel ex tukʼe pasens (2 Timoteo 2:24, 25). Quʼn aju nok kykeʼyin xjal aju tzeʼn qmod ex nya aju nxi qqʼmaʼn. Tuʼntzunju, aju tbʼanel tmoda jaku tzʼonin tiʼja tuʼn tok bʼiʼne aj texa pakbʼal (Mateo 5:16; 1 Pedro 3:1, 2, 16).

3. Aj tbʼet ambʼil, okle chi japunel tkawbʼil Dios tuʼne, tuʼntzun texa pakbʼal tukʼe kʼloj okslal kye testigos de Jehová jaʼ noka tchmoʼn tibʼa. A jlu nim toklen tuʼn tchʼiya tuj tokslabʼile (Mateo 24:14). ¡Nimxixlo tzalajbʼil tzul teya qa ma tzʼoniye tiʼj jun xjal tuʼn tok te ajbʼel te Jehová, ex tuʼn ttzaj tkʼamoʼn tchwinqlal te jun majx! (1 Tesalonicenses 2:19, 20).