Xnaqʼtzbʼil 6

¿Tiʼ aju Tkawbʼil Dios?

¿Jaʼtumel taʼ Tkawbʼil Dios? (1)

¿Alkye T-ajkawil? (2)

¿Atqeʼpetzulo xjal chi kawil tukʼil Ajkawil? Qa ikjo, ¿jteʼ kybʼet? (3)

¿Tiʼ yekʼbʼil at qa nqo anqʼin kyoj mankbʼil, mo nya ilaʼtl qʼij? (4)

¿Tiʼ kbʼantel tuʼn Tkawbʼil Dios kyiʼj kykyaqil xjal tuj ambʼil tzul? (5-7)

1. Tej tten Jesús twitz Txʼotxʼ e kubʼ t-xnaqʼtzaʼn t-xnaqʼtzbʼen tuʼn t-xi kyqanin toj naʼj Dios, tuʼn ttzaj Tkawbʼil Dios. A Tkawbʼil qMan Dios atzun jun kawbʼiljo tbʼanelxix. Atz taʼ tuj kyaʼj ex kkawil tibʼaj Txʼotxʼ. Xjanxix kʼokil tbʼi Dios tuʼn. Ok kbʼantel tajbʼil Dios tuʼn twitz Txʼotxʼ ik tzeʼnj nbʼant tuj kyaʼj (Mateo 6:9, 10, MC).

2. Tzaj ttziyen Dios qa kjapunel Jesús te Ajkawil tuj Tkawbʼil (Lucas 1:30-33). Tej tten Jesús twitz Txʼotxʼ kubʼ tyekʼin qa ok kʼokel te jun tbʼanelxix Ajkawil, jiqinxix ex tzʼaqlixix. Tej tmeltzʼaj tuj kyaʼj, mitiʼ xi qʼoʼnaj toklen te Ajkawil toj Tkawbʼil Dios (Hebreos 10:12, 13). Tojxi 1914 xi tqʼoʼn Jehová toklen Jesús aju otaq txi ttziyen. Atxixtzun, nkawintl Jesúsjo tuj kyaʼj aju Ajkawil o tzaj tkʼamoʼn toklen (Daniel 7:13, 14).

3. Ax ikx o chi jaw tskʼoʼn Jehová txqantl xinaq ex xuʼj aʼyeju tbʼanel kybʼinchbʼen twitz Txʼotxʼ, tuʼn kyxiʼ toj kyaʼj. Aqe xjal lu ok chi kawil tukʼe Jesús kyibʼaj kykyaqil xjal twitz Txʼotxʼ (Lucas 22:28-30; Apocalipsis 5:9, 10). Ok tqʼoʼn Jesús kybʼijo chi onil tukʼil tuj Tkawbʼil jun ‹chʼuq rit›, mo ẍneʼl. Atzun kyajlal jlu 144.000 (Lucas 12:32, MC; Apocalipsis 14:1-3).

4. Tej tjapun Jesús te Ajkawil, bʼiʼx etz tlajoʼn Jesús Satanás kyukʼe mya bʼaʼn t-anjeles toj kyaʼj ex e kutz t-xoʼn tzalu twitz Txʼotxʼ. Tuʼntzunjo, nimxix mya bʼaʼn nbʼaj twitz Txʼotxʼ atxix tuj 1914 (Apocalipsis 12:9, 12). Nimaq qʼoj, waʼyij, txʼuʼj yabʼil, ex nimxix mya bʼaʼn..., tkyaqil jlu jun «techil» qa nkawintl Jesús tuj kyaʼj ex ntzaj tyekʼin qa tkyaqiljo nbʼaj twitz txʼotxʼ at kyoj mankbʼil, mo nya ilaʼtl qʼij (Mateo 24:3, 7, 8, 12, MC; Lucas 21:10, 11; 2 Timoteo 3:1-5).

 5. Chʼixtl kyok xjal toj malbʼil tuʼn Jesús ex chi kbʼel tpaʼn ik seʼn jun xqʼuqil rit nchi el tpaʼn rit kyiʼj chip, mo chiv. Ik chi elila xjal tuj twitz Jesús ik tzeʼn qeʼ «ẍneʼl» aqeju otaq kubʼ kyekʼin qa nokx kybʼiʼn tkawbʼil tuj tkyaqil, ex kxel tqʼoʼn kychwinqlal te jumajx twitz Txʼotx. Aqetzun «chip» aʼyeʼtzun xjaljo otaq tzʼel kyikʼen Tkawbʼil qMan Dios (Mateo 25:31-34, 46). Toj ambʼil chʼinxtl tul kanin, chi kbʼel tnajsaʼn Jesús kykyaqil xjal aʼyeʼjo ik tzaʼnqeʼ chip (2 Tesalonicenses 1:6-9). Qa tajbʼilxix teya tuʼn toka te jun ‹t-ẍneʼl› Jesús, iltiʼj tuʼn tok tbʼiʼna aju tqanil nchikʼbʼajtz tiʼj Tkawbʼil Dios ex tuʼn tkubʼ tbʼinchaʼna ik tzeʼn in nel tnikʼa tiʼj (Mateo 24:14).

6. Paʼn tten twitz Txʼotxʼ kyuʼn nimaq tnam ex teyelex te junjun at tkawbʼil. Aqeju nimaq tnam lu nchi qʼojin kyxolx. Atzuntl te Tkawbʼil qMan Dios ok kjel te kyxel, mo kychʼixel tkyaqil kykawbʼil xjal. Oʼkxku jun kawbʼiljo ktel twitz tkyaqil Txʼotx (Daniel 2:44). Miʼtzun chi tentl nimaq qʼoj nix bʼiybʼel kyxol xjal. Kykyaqil xjal ok chi anqʼil junx toj mujbʼabʼil (Miqueas 4:3, 4).

7. Tjaqʼ Tkawbʼil Jesús tuj Mil abʼqʼi, aʼyeju xjal tbʼanil chi okil te tzʼaqli ex tkyaqil Txʼotxʼ kʼokil te jun Tbʼanel Najbʼil te Tzalajbʼil. Aj tjapunbʼaj mil abʼqʼi otaq bʼaj tbʼinchan Jesús tkyaqiljo tajbʼiltoq Dios tuʼn tbʼant tuʼn. Oktzun kxel tqʼoʼntl Kawbʼil te tTat (1 Corintios 15:24). Bʼaʼn tuʼn t-xiʼ tchikʼbʼaʼna kye tamiwe ex kye tuj tjaye aju kbʼantel tuʼn Tkawbʼil qMan Dios.

[Aju tilbʼilal toj t-xaq 13]

Miʼ tentl ikʼbʼel kyxol xjal nix tiʼj kyajil xjal tjaqʼ Tkawbʼil Jesús