Xnaqʼtzbʼil 13

¿Tzeʼn jaku kanet axixtok okslabʼil tuʼna?

¿Bʼaʼnpetzulo nchi ela tkyaqil okslabʼil toj twitz Dios, moqa oʼkx junx? (1)

¿Tiquʼn at nim okslabʼil ntzaj kyqʼamaʼn qa lepchiqeʼk tiʼj Jesús? (2)

¿Tzaʼn jaku tzʼel teye tnikʼ kyiʼj axix okslal? (3-7)

1. Junx okslabʼil (nimbʼil) axixtok kubʼ tbʼinchaʼn Jesús. Tuʼntzunjo, noq junx kʼloj okslal (nimil) axixtok nchi ajbʼen te Jehová jaʼlin (Juan 4:23, 24; Efesios 4:4, 5). Ntzaj tchikʼbʼaʼn Xjan Uʼj qa naq chʼinx kybʼet xjal nchi bʼet tuj bʼe chʼin twitz, aju bʼe lu nchex tiʼn xjal toj chwinqlal te jumajx (Mateo 7:13, 14).

2. Kyaj tqʼamaʼn Tuʼjil Tyol Dios qa ajtoq kykyim t-xnaqʼtzbʼen Jesús, chebʼeletoq kʼokex kyxol kʼloj okslal aju xnaqʼtzbʼil nya axtok ex qeju bʼinchbʼen mya bʼaʼn. Ax ikx tqʼma qa oktoq chi tel xjal ex oktoq chi okil ten sbʼul kye okslal, tuʼntzun tel kypaʼn kyibʼ tiʼj Jesús (Mateo 7:15, 21-23; Hechos 20:29, 30). Tuʼntzunjo, at nim junxichaq okslabʼil jaʼle ex ntzaj kyqʼmaʼn qa lepchiqeʼk tiʼj Jesús. ¿Tzeʼn jaku tzʼel qnikʼ kyiʼj axix okslal?

3. Aju nkubʼ kyekʼinxix okslal axixtok aju kykʼuʼjlabʼil at kyxol (Juan 13:34, 35). Mitiʼ nchi kubʼ xnaqʼtzaʼn tuʼn tjaw kynimsaʼn kyibʼ twitz txqantl xjal te junxitl kyajil. Ex mitiʼ nchi kubʼ xnaqʼtzaʼn tuʼn tel kyikʼoʼn qeʼ xjal te txqantl nimaq tnam (Hechos 10:34, 35). Tuʼntzunjo, mitiʼ ncheʼx nix tuj jun qʼoj. Aʼyeju okslal axixtok nok kykʼujlaʼn kyibʼ, ik tzʼenj nok kykʼuʼjlan kyibʼ kabʼe xjal kyitzʼin kyibʼ (1 Juan 4:20, 21).

4. Juntl techil tzaʼn jaku tzʼel qnikʼ tiʼj axixtok okslabʼil, aju qa nimxix toklen Xjan Uʼj kye xjal ateʼkx toj. Nxi kyokslaʼn aju tkuʼx tuj Tuʼjil Tyol Dios (Juan 17:17; 2 Timoteo 3:16, 17). Nimxix toklen Tyol Dios kye, twitzju kyxnaqʼtzbʼil ex kybʼinchbʼen xjal (Mateo 15:1-3, 7-9). Nok tilil kyuʼn tkyaqil qʼij, tzeʼn tuʼn tkubʼ kybʼinchaʼn aju ntzaj tqʼamaʼn Xjan Uʼj kye. Ax ikx nkubʼ kybʼinchen aju nchi pakbʼan tiʼj (Tito 1:15, 16).

 5. Aqeju ateʼkx tuj okslabʼil axixtok ax ikx iltiʼj tuʼn tjaw kynimsaʼn tbʼi Dios (Mateo 6:9, MC). Xi tqʼmaʼn Jesús tbʼi Dios kye xjal, aju Jehová, ax ikx kye axix okslal iltiʼj tuʼn t-xi kyqʼamaʼn tbʼi Dios ik tzeʼnj bʼant tuʼn Jesús (Juan 17:4; Romanos 10:13, 14, NM). ¿Alkyeqeʼ nchi yolin tiʼj tbʼi Dios atz jatumel nanqʼinaye?

6. Iltiʼj tuʼn kypakbʼan axixtok okslal tiʼj Tkawbʼil Dios. Tej tten Jesús twitz txʼotxʼ yolinxix tiʼj Tkawbʼil Dios (Lucas 8:1). Ax ikx kyaj tqʼamaʼn Jesús kye t-xnaqʼtzbʼen, tuʼn kyxiʼ pakbʼal tbʼanel tqanil twitz tkyaqil Txʼotxʼ (Mateo 24:14; 28:19, 20). Qʼuqle kykʼuʼj axix okslal, qa oʼkxix Tkawbʼil qMan Dios tzul tiʼn mujbʼabʼil ex xqʼuqbʼil twitz tkyaqil Txʼotxʼ (Salmo 146:3-5).

7. Aqeju lepchiqeʼk tiʼj t-xnaqʼtzbʼil Jesús, mitiʼ kyoklen tiʼj bʼinchbʼen mya bʼaʼn nbʼaj twitz txʼotxʼ (Juan 17:16). Mitiʼ nokx kyqʼoʼn kyibʼ kyxol ajkawil ex aj ttzaj jun qʼoj kyxol xjal, mitiʼ njaw kybʼuyin kyibʼ tuʼn kyqʼojin junx kyukʼil. Ax ikx nel kyikʼon tkyaqil bʼinchbʼen mya bʼaʼn ex aju mya bʼaʼn kymod xjal nbʼaj kybʼinchaʼn twitz txʼotxʼ (Santiago 1:27; 4:4). ¿Ojtzqiʼn teya tuʼn alkye jun kʼloj okslal nkubʼ kybʼinchaʼn tkyaqilju ma bʼaj chikʼbʼet tuj xnaqʼtzbʼil lu?

[Aʼyeju tilbʼilal t-xaq 26 ex 27]

Nok kykʼuʼjlaʼn kyibʼ axixtok okslal, nimxix toklen Xjan Uʼj kye, ax ikx nchi pakbʼan tiʼj Tkawbʼil qMan Dios