E kubʼ tmojbʼaʼn Jehová * tnejel xjal. In tzaj tqʼamaʼn Xjan Uʼj qa kubʼ tbʼinchaʼn Dios tnejel xuʼj ex tzajtzun tiʼn twitz Adán. Jaw tzalajxix Adán ex tqʼama: «¡Ateʼ lu nbʼaqilkuʼxiʼxeʼ ex nchibʼjilkuʼxiʼxeʼ!» (Génesis 2:22, 23, Xjan Tuʼjil.) Ex kukx tajbʼil Jehová tuʼn kytzalaj qeju o che kubʼ mojeʼ.

Aj kykubʼ mojeʼ kabʼe xjal, jaku kubʼ kyximin qa tbʼanelxix kʼelel tkyaqil. Noqtzun tuʼnj, axpe ikx qeju mejebʼleʼn in nok kykʼujlanxix kyibʼ tuʼn tkyaqil kyanmi che okel weʼ twitz junju nya bʼaʼn (1 Corintios 7:28). Toj uʼj lu ok che kanetel xnaqʼtzbʼil nim kyoklen tuʼna toj Tyol Dios, aʼyeju che onil tiʼja tuʼn tten tmejebʼleʼna ex qe toj tjaya toj tzalajbʼil qa ma che japun tuʼna (Salmo 19:8-11).

¿TIʼ IN TZAJ TQʼAMAʼN TYOL DIOS? A chmilbʼaj wibʼaj toj ja (Efesios 5:23).

Qa chmilbʼaj teya, tajbʼil Jehová tuʼn tok tkwentina t-xuʼjila tukʼil kʼujlabʼil (1 Pedro 3:7). Kubʼ tbʼinchaʼn Jehová te onil teya ex tajbʼil tuʼn tten tbʼanel tmoda tukʼil ax ikx tuʼn tok tkʼujlaʼna (Génesis 2:18). Il tiʼj tuʼn tokxix tkʼujlaʼna ex tuʼn tkubʼ tqʼoʼna aju tajbʼil tnejel twitzju tajbʼila (Efesios 5:25-29).

Qa xuʼjilbʼaj teya, tajbʼil Jehová tuʼn t-xi tnimana tchmila, ex tuʼn tonina tiʼj tuʼn tjapun tuʼn aju toklen o txi qʼoʼn (1 Corintios 11:3; Efesios 5:33). Bʼaʼn tuʼn tonina tiʼj tchmila aj tkubʼ t-ximin jun tiʼ tuʼn tbʼant tuʼn ex tzʼonina tiʼj tuʼn tkyaqil tkʼuʼja (Colosenses 3:18). Qa ma bʼant tuʼna ikju, tbʼanelxix ok kʼelela toj twitz tchmila ex toj twitz Jehová (1 Pedro 3:1-6).

¿TIʼ JAKU BʼANT TUʼNA?

• Bʼaʼn tuʼn t-xi tqanina te tukʼila tiʼ jaku bʼant tuʼna tuʼn toka te jun tbʼanil chmilbʼaj moqa te jun tbʼanil xuʼjilbʼaj. Bʼaʼn tuʼn tkubʼ tbʼiʼna aju in tzaj tqʼamaʼn ex bʼaʼn tuʼn tok tilil tuʼna tuʼn tkubʼ tbʼinchaʼna

• Bʼaʼn tuʼn tten tpasensa. Kxel tiʼn ambʼil tuʼn tel kynikʼe alkye tten jaku tzalaj teyele junjun kyeye

¿TIʼ IN TZAJ TQʼAMAʼN TYOL DIOS? Nim toklen tuʼn tkubʼ tena ximel tiʼjju tajbʼil tukʼila (Filipenses 2:3, 4). Miʼn tzaj tqʼoja tiʼj tukʼila, bʼaʼn tuʼn ttzaj tnaʼna qa tajbʼil Jehová tuʼn kyok qe tmajen te «mans kyukʼil kykyaqil» (2 Timoteo 2:24). Bʼaʼn tuʼn t-ximana tzeʼn tten kxel tqʼamaʼna tyola, in tzaj tqʼamaʼn Tyol Dios kyjaʼ: «At xjal in kʼixbʼisan tiʼj juntl kyuʼn qe tyol, atzun kyyol qe xjal at kynabʼl nnoʼk te qʼanbʼil kye mastl» (Proverbios 12:18). Kʼonil t-xew Jehová tiʼja tuʼn tyolina tukʼil kʼujlabʼil ex toj tumel (Gálatas 5:22, 23; Colosenses 4:6).

¿TIʼ JAKU BʼANT TUʼNA?

• Naʼmxtoq tok tena yolil tukʼil tukʼila tiʼj junjun tiʼchaq nim toklen, qaninxa onbʼil te Jehová tuʼn miʼn ttzaj tqʼoja ex tuʼn tzaj tqʼoʼn jun tbʼanel tnabʼla

• Ximana tiʼj tiʼ kxel tqʼamaʼna ex tzeʼn tten kxel tqʼamaʼna

¿TIʼ IN TZAJ TQʼAMAʼN TYOL DIOS? Aj kykubʼ mojeʼ kabʼe xjal, in che ok «te junx» (Mateo 19:5). Noqtzun tuʼnj, bʼaʼn tuʼn kukx ttzaj kynaʼne qa kabʼe xjal qeye, tuʼntzunju, at maj junxitl t-ximbʼetz jun twitz juntl. Kyjuʼtzun, il tiʼj tuʼn t-xi kyxnaqʼtzan kyibʼe tuʼn tten junx kyximbʼetze ex junx kyajbʼile (Filipenses 2:2). Nimxix toklen tuʼn tten mujbʼabʼil kyxole aj tkubʼ kyximane tuʼn tbʼant jun tiʼ kyuʼne. ¿Tzeʼn jaku bʼant? In tzaj tqʼamaʼn Tyol Dios jlu: «Kyuʼn qe consej bʼaʼn, bʼaʼn in che ela qeju in kubʼ qximan» (Proverbios 20:18). Qʼonxa ambʼil te Tyol Dios tuʼn ttzaj tyekʼun kybʼeye aj tkubʼ kyximane junx tuʼn tbʼant jun tiʼ nim toklen (Proverbios 8:32, 33).

¿TIʼ JAKU BʼANT TUʼNA?

• Miʼn tzʼok tena yolil tukʼil tukʼila oʼkx kyiʼj qe tiʼchaq; yolina tiʼjju in tnaʼna

• Naʼmxtoq t-xi ttziyena tuʼn tbʼant jun tiʼ tuʼna, bʼaʼn tuʼn tyolina tiʼj tukʼil tukʼila